Bilyonaryong Mafia ang Mahal Ko (36)

ni Maria Angela Gonzales @Kuwentong Pag-Ibig | Marso 19, 2024

Hindi alam ni Via kung saan nagpunta si Nhel at labis na ang kanyang pag-aalala dahil gabi na, pero ‘di pa rin ito nakakauwi.

Mga katulong lang ang kanyang kasama. Ibig sana niyang makipagkuwentuhan sa mga ito, pero pilit nilang iniiwasan si Via. 

“Nasaan ba si Nhel?” Hindi nakatiis niyang tanong. 

“Wala kaming ideya.”

“Hindi man lang niya ako naisip,”

“Hindi totoo ‘yan,” madiing sabi nito. 

Bigla siyang nanigas nang marinig niya ang boses ni Nhel. Hindi niya tuloy ito magawang lingunin at gusto na lamang niyang lumubog sa kanyang kinalalagyan. 

“Alis ka nang alis!”

“May nilakad lang akong mahalaga.”

“Bakit hindi ba ako mahalaga?”

Bigla namang humagalpak ng tawa si Nhel.

“Naiisip mo rin ba ako?” Hindi niya napigilang itanong. 

“Ofcourse.”

Ilang ulit siyang napalunok sa labis na kasiyahan. Ngunit, wala siyang lakas na loob para magtatatalon. 

“Asawa kita, kaya walang ibang nasa isip ko kundi ikaw lang.”

Napurnada ang kilig na kanyang naramdaman nang maalala niya ang mga ginagawa nito. 

“Ayokong maniwala,” nahagilap pa niyang sabi. 

“Wala ka bang tiwala sa sarili mo? Kung may tiwala ka sa sarili mo, hindi mo iisipin na may ibang babae pa akong nagugustuhan dahil ikaw lang, sapat na.”

“Masyado ka lang bolero.”

“Hindi totoo ‘yan.” 

“Hindi ko alam kung maniniwala ako sa iyo. Hindi dahil sa wala akong tiwala sa sarili ko.”

Marahas na buntong hininga ang pinawalan nito bago angkinin ni Nhel ang kanyang labi. Napakapit tuloy siya sa batok nito at ‘di rin niya nais na matapos ito.

Itutuloy…

Misis na pera lang ang habol sa asawa, buking ni mister

ni Sister Isabel del Mundo - @Mga kuwento ng buhay at pag-ibig | Marso 17, 2024

Dear Sister Isabel,

Isa akong tindera ng gulay sa palengke. May nakilala akong isang retired army galing U.S., Pinoy siya at hiwalay na rin sa kanyang asawa. Niligawan niya ako at agad ko rin naman siyang sinagot.

Mula noon, hinango niya ako sa kahirapan. Kumbaga, naging instant mayaman ako, pero hindi ko naman talaga mahal ang lalaking iyon. 60-anyos na siya habang 28-anyos pa lang ako. Hanggang sa dumating sa puntong may nakilala akong ibang lalaki na siyang nagpatibok ng aking puso. Kapwa kami nagmamahal, ang problema nga lang ay nabuntis ako. Natuklasan ito ng asawa kong retired army at ngayon ay binabawi niya na lahat ng ari-arian at pera na ibinigay niya sa akin. Hindi ko na puwedeng ibalik ‘yun, lalo na ‘yung house and lot na galing din sa kanya. Pinapalayas at pinapademanda niya ako ngayon.Ano kaya ang gagawin ko? Mawawalan ako ng ari-arian kapag pumayag ako sa gusto niyang mangyari. Maski ang naipon kong pera ay mauubos lang kung babayaran ko ang P3 milyon na hinihingi niya sa akin. Kasal naman kami, Sister Isabel, at naguguluhan na ang isip ko. Ano kaya ang dapat kong gawin?

Nagpapasalamat,

Maritess ng Batangas

Sa iyo, Maritess,

Wala kang magagawa kundi pumayag sa gusto niya kung ayaw mong makulong. Kasalanan mo ‘yan. Hinango ka na niya sa kahirapan, binigyan ng magandang buhay, ngunit nagawa mo pa rin siyang pagtaksilan.

Tiyak na sa bilangguan ang kahihinatnan mo dahil may ebidensya siya na buntis ka ngayon. Mas mabuting kumunsulta ka sa abogado dahil puwede naman kayong maghati sa ari-ariang binigay niya sa iyo dahil ang sabi mo ay kasal naman kayo. Naniniwala akong kung hihingi ka ng tawad sa asawa mo, tiyak na patatawarin at iaatras niya rin lahat ng reklamo laban sa iyo. Magpakumbaba at ‘wag kang makipagmatigasan sa asawa mo para lumambot ang puso niya at ibigay ang iyong hiling na kalayaan. Sana magpakatino ka na at huwag mo nang ulitin ang pumatol sa iba pang lalaki na nagkakagusto sa iyo. May balik din sa iyo ‘yang ginagawa mo at  habambuhay kang hindi pagpapalain. Hanggang dito na lang, nawa'y malampasan mo ang problemang kinakaharap mo sa kasalukuyan.

Sumasaiyo,

Sister Isabel del Mundo

Bilyonaryong Mafia ang Mahal Ko (34)

ni Maria Angela Gonzales @Kuwentong Pag-Ibig | Marso 17, 2024

Hindi makapaniwala si Via na magagawa siyang ligawan ni Nhel, tulad ng isang probinsyanong umaakyat ng ligaw. Bigla tuloy naglaho ang tampo na kanyang nararamdaman nang sumilip siya sa bintana, naroon kasi si Nhel at hinaharana siya.

Ang awit na kinanta ni Nhel ay ang ‘Pangarap ko ang ibigin ka,’ kaya hindi niya napigilan ang mapangiti. Hindi niya lubos akalain na magka-timbre pala sila ng boses ng isang sikat na singer na si Erik Santos. Hindi tuloy niya mapigilan ang mapasinghap. Paano ba naman niya hindi mararamdaman iyon eh, damang-dama niya ang bawat lyrics nito.

“Para sa iyo?” Tanong niya sa sarili, sabay tutop sa tapat ng kanyang dibdib. Pakiramdam kasi niya ay bumilis ang tibok ng kanyang puso. 

“Ang ganda naman ng boses ng asawa ko,” hindi niya napigilang sabihin. 

Nilambingan pa niya ang kanyang boses. Kahit na nililigawan si Nhel, hindi pa rin siya kumbinsido na mahal talaga siya nito dahil may nagsasabi sa kanyang isip na ginagamit lang siya nito para makapaghiganti.Agad namang umakyat si Nhel sa bintana, kahit na sa tingin niya ay kayang-kaya naman iyon ng kanyang asawa, iniabot pa rin ni Via ang kanyang kamay para tulungan itong makaakyat.

“Ang sweet mo naman.”

“Ayoko kasing mahulog ka.”

Marahang tawa naman ang ginawang tugon ni Nhel. 

“Bakit ka natatawa?”

“Para kasing napakaimposible. Kaya kong tumalon kahit ilang palapag pa ang taas.”

Si Via naman ang napahagikgik. Tiyak kasi niyang niyayabangan lang siya ni Nhel, pero siyempre hindi na niya binara pa ito. Baka kasi kapag kinontra niya pa ito ay madagdagan pa ang inis nito sa kanya.

Kahit asawa na siya nito, hindi pa rin siya nakakasiguro kung mahal ba siya nito. 

Ayaw niya rin paasahin ang kanyang sarili, mas maiging tanggapin na lang niya na paghihiganti lamang ang gusto ni Nhel sa kanya. Nais lang talaga isipin ni Via ngayon na mahal na mahal siya ng kanyang asawa. Pero, hindi siya utu-uto para paniwalaan ang ginagawang effort ng kanyang asawa.

“Kaya nainlab ako sayo, eh! ” Sarkastikong sabi niya.

Itutuloy…