Bilyonaryong Mafia ang Mahal Ko (50)

ni Maria Angela Gonzales @Kuwentong Pag-Ibig | Ika-6 Araw ng Abril, 2024

Hindi pa man nagsasalita si Madame Marie, kabadung-kabado na si Via. Mapanuri kasi ang tingin na binibigay nito sa kanya. 

Paano na lang kapag nalaman nito kung sino siya? 

Napatingin siya kay Nhel nang hawakan nito ang kanyang kamay. Sa klase nang tingin na ibinibigay nito sa kanya, parang binibigyan siya nito ng assurance na hindi siya puwedeng saktan ninuman. 

“Hindi nga ba?” Tanong niya sa sarili. 

“Sino siya?” Tanong ng matandang babae. 

“Via po,” wika niya. 

“My wife,” wika ni Nhel sabay hawak sa bewang ni Via. 

“Your wife?” Wika nito sabay tawa na para bang isang pagkakamali ang maging asawa ni Nhel. 

“Pipili ka lang ng babae, ‘yung mukhang ordinaryo pa!” Dagdag pa nito.

Medyo nasaktan si Via sa kanyang narinig. Para kasing iniinsulto siya ng matandang babae. Kunsabagay, talaga naman kasing wala siyang maipagmamalaki. 

“I love her,” mariing sabi ni Nhel, mas lalo pang hinigpitan ni Nhel ang pagkakayakap sa kanyang misis.

“May alam ka ba sa pag-ibig?” Sarkastikong tanong ni Marie kay Nhel.

“Hindi ba ang alam mo lang ay mamerhuwisyo at pumatay ng ibang tao?” Dagdag pa nito.

“Iyon kasi ang itinuro ng magaling mong asawa!”

Gulat siyang napatingin kay Nhel. Nakakunot ang noo nito na para bang iritable na sa kanyang ina. 

“Ayoko sa kanya,” diretsong sabi sa kanya ng matandang babae. 

“Ipinakilala ko lang sa inyo si Via.” Malamig nitong sabi. 

“Mas gusto ko si Mariz.” 

“Pero, kasal na kami. Wala ka nang magagawa. Via, let’s go,” wika ni Nhel, sabay hila sa kanyang misis. 

Agad namang naging sunud-sunuran si Via sa kanyang asawa. Mahal niya si Nhel kaya talagang susundin niya ito. Iyon nga lang, hindi niya maiwasan ang masaktan. 

Itutuloy…

Bilyonaryong Mafia ang Mahal Ko (49)

ni Maria Angela Gonzales @Kuwentong Pag-Ibig | Ika-5 Araw ng Abril, 2024

Dumagundong nang husto ang dibdib ni Via nang makita niya si Nhel sa kanilang pintuan. Hindi niya kasi inaasahan na magpapakita pa ito sa kanya.  Sa ngayon, gusto na lamang niyang burahin sa kanyang isipan ang ideya na niloko lang siya nito. Panigurado kasing hindi iyon totoo. 

Ang importante lang ngayon kay Via ay nakita na niya muli si Nhel. Wala na siyang pakialam kung sumagi man sa isipan niya na lolokohin lang siya nito o hindi.  

Mahal niya si Nhel. Kaya lahat ay gagawin niya para sa kanyang mister. Kung hindi man siya nito mahal, gagawin niya ang lahat para mahalin siya nito. Naniniwala naman siya na makukuha rin niya ang puso nito. 

“Ano’ng ginagawa mo rito?” Nahagilap niyang tanong. 

Bahagyang kumunot ang noo nito na para bang hindi nagustuhan ang kanyang tanong.

“Susunduin ko na ang asawa ko,” buong diing sabi nito.

Nang sabihin ni Nhel ang katagang ‘asawa’ parang ibig niyang ngumiti. Para kasing napaka-possessive nito nang sabihin ang mga katagang iyon. Pakiwari tuloy niya, hindi nito hahayaan na may mang-agaw sa kanya. 

“Paano si….” Umiling siya dahil hindi niya matandaan kung alam ba niya ang pangalan ng fiancée ng kanyang asawa. 

“Wala akong pakialam kay Mariz. Ikaw lang ang mahalaga sa akin,” mariing sabi nito na para bang gustong pakadiinan sa kanyang utak ang mga sinabi. 

“Uuwi na ba tayo?” Excited niyang tanong. 

“Wala ba si… Tatay Pedro mo?”

“May pinuntahan lang, ngunit nangako siya na hindi na siya magsusugal.”

Umungol ito na para bang ayaw maniwala sa kanyang sinabi. 

“Mas maigi siguro kung mag-uusap kayo.”

“Next time.”

“Okey.”

“Pupunta tayo sa bahay – sa mansyon ng pamilya ko,” mariing sabi nito. 

Hindi niya alam kung bakit may kaba siyang naramdaman sa sinabi ni Nhel. 

Itutuloy…

Bilyonaryong Mafia ang Mahal Ko (45)

ni Maria Angela Gonzales @Kuwentong Pag-Ibig | Ika-1 Araw ng Abril, 2024

“Tunay ang kasal namin!” buong diing sabi ni Nhel. 

Wala na siyang pakialam kung mapahiya siya sa kanyang ex-fiancée, ang importante sa kanya ay  huwag lang masaktan si Via. 

“Bakit nga ba ayaw mong masaktan si Via?” Naghahamon niyang tanong sa sarili. Ipinilig niya ang kanyang ulo sa kaisipang mahal na niya ito dahil hindi iyon ang nararamdaman niya rito, kundi guilt. Tiyak niya kasing mahal na mahal na siya nito.

“Hindi ‘yan ang sinabi mo sa akin,” gulat na sabi ni Mariz. 

Nanlaki ang mata nito na para bang hindi malaman kung sasakyan lang ba niya ang sinasabi ni Nhel o maniniwala na lang ito. 

“Nagsinungaling ako.” 

Nang sabihin niya ang mga salitang iyon, diretso pa siyang tumingin sa mga mata nito. 

“Alam ba niya na parte lang siya ng paghihiganti mo?” Buwisit nitong tanong sa kanya. 

“Shut up!” Galit na sagot ni Nhel. 

Ngunit hindi tumigil si Mariz sa pagsasalita. “Ang rason lang naman kaya ka niya pinakasalan ay para saktan ang ama niya na kinilala mo ring ama,” nakangisi pang sabi nito. 

Umiinit na ang ulo niya kay Mariz kaya hindi na niya napigilan ang singhalan ito, “Tumigil ka na!” 

Nakita ni Nhel na labis na nasaktan si Via. Pakiwari niya ay may punyal na ibinato rito kaya sobrang sakit ng ekspresyon ni Via. 

“Totoo ba?” 

“No,” wika niya. 

Sanay naman siyang magsinungaling kaya mabilis niyang nasabi ang mga katagang iyon. Pagkaraan, gusto niyang yakapin si Via dahil gusto niyang iparamdam dito na hindi niya ito iiwanan kahit kailan. Ngunit, tinulak siya nito. 

“Nagsisinungaling ka lang sa akin,” wika nito. 

“No,” wika niya, pero mahina ang kanyang boses. 

“Kaya ba ayaw mong magpunta kay Tatay Pedro dahil ginagamit mo lang ako para pasakitan siya?” Wika nito sabay agos ng luha. 

“Via…” wika ni Nhel. 

Ngunit, biglang hinubad ni Via ang kanilang wedding ring at iniabot kay Nhel. 

“Mahal kita. Mahal na mahal, ngunit hindi ‘ko hahayaan na gamitin mo ako, para lamang saktan ang Tatay Pedro ko,” madiing sabi nito.

Itutuloy…