Matapos pag-aralin… Bf, tinakasan ang responsibilidad sa gf

ni Sister Isabel del Mundo - @Mga kuwento ng buhay at pag-ibig | Ika-15 Araw ng Abril, 2024

Dear Sister Isabel,

Ang sakit ng ginawa sa akin ng boyfriend ko. Macho dancer siya rito sa Japan, habang isa naman akong singer. Pinag-aral ko siya, para mahango siya sa kanyang trabaho. 

Awa ng Diyos, nakapagtapos naman siya. Kaya lang, bigla na lang niya akong binlock.

‘Yun pala ay may iba na siya at ang masaklap pa ay nabuntis niya pa ito. Pero, dinalaw muna niya ako bago siya maglahong parang bula.

Nabuntis niya rin ako. Oo, Sister Isabel, dinadala ko sa sinapupunan ang magiging baby namin, subalit ‘di ko alam kung saan siya hahanapin. 

Gulung-gulo na ang isipan ko, at ‘di ko na alam ang gagawin. 

Sana mapayuhan n’yo ako para gumaan naman kahit papaano ang loob ko. Hihintayin ko ang payo n’yo.

Nagpapasalamat,

Belinda 

Sa iyo, Belinda,

Hindi ko nga rin alam sa mga lalaki, halos lahat pare-pareho lang. Wala na yatang matinong lalaki ngayon. 

Ang maipapayo ko sa iyo ay huwag ka na umasa sa lalaking iyon. Sakit lang ng ulo ang mapapala mo kung hahanapin mo pa siya at kung susubukan mo pang makipagbalikan sa kanya. Higit pang problema ang ibibigay niya sa buhay mo kung tatanggapin mo siyang muli. Pangatawanan mo na lang ‘yang pinagbubuntis mo. Makakaraos at malalampasan mo rin ang problemang kinakaharap mo ngayon, dahil tiyak na hindi ka pababayaan ng Diyos. Ugaliin mong magdasal. Naniniwala ako na ang baby na dinadala mo ay anak ng Diyos. Alagaan mo na lang nang mabuti ang sarili mo at ang baby na nasa sinapupunan mo. Huwag na huwag mo ‘yang ipapalaglag dahil malaking problema lang ang aabutin mo. Hanggang dito na lang, ugaliin mong magdasal. 

Sumasaiyo,

Sister Isabel del Mundo

Bilyonaryong Mafia ang Mahal Ko (58)

ni Maria Angela Gonzales @Kuwentong Pag-Ibig | Ika-14 Araw ng Abril, 2024

Hindi alam ni Nhel kung maniniwala ba siya sa sinasabi ni Pedro Pedral na hindi nito alam kung nasaan si Via. Malaki ang hinala niya na layunin lang nitong pahirapan siya. 

“Hindi kita niloloko,” wika ni Pedro. 

Kahit na wala namang sinasabi ni Nhel, na-gets agad nito ang tumatakbo sa isipan ng kanyang tunay na anak. 

“Iniwan mo kami.” Buong diin niyang sabi habang gigil na gigil. 

Sa kauna-unahang pagkakataon, gustong sumabog ng kanyang dibdib dahil sa sobrang bigat. 

“Wala akong ideya na buntis si Marie, at isa pa, hindi ko iniwan ang mommy mo. Siya ang nakipaghiwalay sa akin, dahil hindi niya ako kayang ipaglaban, at hindi rin siya handang maghirap.”

Bigla siyang natigilan sa sinabi ni Pedro. Wala naman kasi siyang ideya kung ano ang nangyari sa kanyang mga magulang. Sa katunayan, hindi nga nagkukuwento ang kanyang ina. Naririnig niya lang ang usap-usapan sa kanilang mga katulong. 

“Kung alam ko lang na nariyan ka. Hindi sana ako pumayag na makipaghiwalay sa mommy mo.”

Hindi niya alam kung maniniwala siya sa sinabi nito, pero nang tingnan niya ito sa mata parang nilapirot ang kanyang puso. Para kasing sinasabi ng mga mata nito na hindi siya nagsisinungaling. 

“May ideya ba kayo na buntis si Via?” Mahina niyang tanong. 

“Buntis?” Hindi makapaniwalang tanong nito. “Iyon ba ang dahilan kaya madalas siyang nagsusuka?” Dagdag pa nito. 

Doon na kinabahan si Nhel. Ang pumasok kasi sa kanyang isipan kapag nagsusuka ang isang babae ay paniguradong buntis na ito. Para tuloy gusto niyang sumigaw sa tuwa dahil magiging ama na siya, pero gusto niya ring umiyak dahil parang ayaw siyang papasukin ni Via sa buhay nito. 

“Hindi ko ‘yun hahayaan!”

Itutuloy…

Bilyonaryong Mafia ang Mahal Ko (57)

ni Maria Angela Gonzales @Kuwentong Pag-Ibig | Ika-13 Araw ng Abril, 2024

“Mabuti naman at nandito ka, anak ko,” nakangiting sabi ni Marie.

“Ano’ng kasinungalingan ang sinabi mo sa asawa ko?!” Gigil niyang sabi. 

Kahit na ano’ng taktak ang gawin niya kay Pedro Pedral, wala pa rin siyang sagot na nakuha rito. 

Ang sabi kasi nito, wala rin talaga siyang ideya kung saan pupunta si Via. Basta ang nais lang nito ay magpakalayu-layo. Kahit nga si Pedro ay nagtataka rin kung bakit ganu’n na lang kapursigidong umalis ni Via. 

“Mayroon ba itong nililihim?” Naitanong niya sa sarili. 

Sa kaisipang iyon ay bigla siyang kinabahan. Lahat naman kasi ay malalaman niya dahil masyadong transparent si Via sa kanyang nararamdaman. 

“Eh, paano kung buntis pala ito?” Naitanong niya siya sa sarili. 

Sa kaisipang iyon, bigla siyang kinabahan. Parang drum na tinambol ang kanyang puso.

Iyon lang kasi ang alam niyang dahilan kung bakit ito biglang umalis.  

Hindi siya papayag na hindi siya kikilalanin ng kanyang anak. Hindi pa nga niya sigurado kung buntis nga ba si Via o hindi, pero nasasabik na siyang malaman na magiging ama na siya. 

“Kasinungalingan ba na paghihiganti ang dahilan kaya pinakasalan mo ang babaeng iyon? Hindi ba gusto mo lang makapaghiganti sa kanya?” 

“No.”

“Sinungaling! Anyway, nandito si Mariz. See kung gaano siya kaganda?” Nakangising tanong nito. 

Naningkit ang kanyang mga mata at galit na sinabing, “May asawa na ako, kaya wala akong pakialam sa kahit sinong babae!”  Talagang hindi siya makapaniwala sa sinasabi ng kanyang ina. 

Marahas na buntong hininga ang kanyang pinawalan. 

Hindi nga pala niya tunay na kilala ang kanyang ina, ayaw din kasing  ilapit ni Marie ang kanyang loob sa nag-iisa niyang anak. 

“Pero, ako ang nararapat sa iyo,” wika ni Mariz. 

“Shut up!” Gigil niyang sabi na talagang nagpahinto rito. 

Hindi siya papayag na may sinumang hahadlang sa pagmamahalan nila ni Via. 

Itutuloy…