May sign daw mula kay Lord… KALAT NA: ION, AATRAS SA PAGTAKBONG KONSEHAL

ni Reggee Bonoan @Sheet Matters | Oct. 24, 2024

Photo: Ion Perez official / Instagram

Trulili kayang umatras na si Ion Perez sa kanyang kandidatura bilang konsehal sa bayan nitong Concepcion, Tarlac?

Ito ang isa sa mga topics nina Ogie Diaz at Mama Loi kasama si Ate Mrena sa online show nilang Showbiz Update.

Say ni Mama Loi, “Ang post kasi ni Ion was, ‘Salamat sa sign, Lord. Alam ko, mas makakabuti itong desisyon ko para sa sarili ko.’ Tapos, nu’ng isinend sa ‘kin ni Morena, ini-scroll-scroll ko ‘yung mga comments. So ‘yung iba, itinatanong, aatras ka na ba sa kandidatura mo? Eh, ‘di ba, naibalita mo, ‘Nay, na feeling mo, may aatras?"

“Kung pagbabatayan natin ‘yung cryptic post na ‘yan ni Ion Perez… kasi nakaitim ‘yung background niya. So, parang malungkot na balita ‘yung dating. Na parang, ‘ano ‘to? Aatras ba ‘to?’ Kasi kung makakabuti itong desisyon ko para sa sarili ko, dapat, hindi black ‘yung background,” opinyon ni Ogie.

Sa kasalukuyan ay walang official statement na nagmumula kay Ion o sa kampo nito. Noong Oktubre 1 nag-file si Ion ng kanyang Certificate of Candidacy (COC).

Anyway, bukas ang BULGAR mula sa kampo ni Ion Perez.

---

THE Gaze ang tema ng 12th edition ng QCinema International Film Festival kung saan tampok ang 77 pelikula na kinabibilangan ng 22 shorts at 55 full-length features sa iba’t ibang kategorya.

Sa unang pagkakataon ay apat ang napili para sa short films na produkto ng Directors' Factory Philippines. Isang omnibus film project na nagsimula sa Cannes Directors’ Fortnight na ipinalabas sa 77th Cannes Film Festival noong Mayo ang magbubukas ng filmfest simula Nobyembre 8.

Ang apat na short films ay ang Walay Balay (WB) mula sa direksiyon nina Eve Baswel ng Pilipinas at Gogularaajan Rajendran mula Malaysia; Nightbirds, na pinamahalaan nina Maria Estela Paiso mula sa Pilipinas at Ashok Vish mula sa India; Silig na kolaborasyon nina Arvin Belarmino (Pilipinas) at Lomorpich Rithy (a.k.a YoKi) ng Cambodia; at Cold Cut na obra nina Don Eblahan ng Pilipinas at Tan Siyou ng Singapore.

Ngayong 2024, ang QCinema ay binubuo ng dalawang main competition sections: ang Asian Next Wave at QCShorts International na sa taong ito ay mas pinaigting ito tampok ang Southeast Asian films kasama ang anim na Filipino short film grantees sa kompetisyon. 

Kasama sa Asian Next ang Don’t Cry Butterfly na Grand Prize winner sa Venice Critics' Week; Pierce na Best Director sa katatapos na Karlovy Vary Crystal Globe Competition; at Mistress Dispeller , isang feature documentary na winner ng NETPAC award for Best Asian Film sa Venice. 

Mapapanood din ang Happyend, Tale of the Land; Viet and Nam at ang Moneyslapper ni Bor Ocampo (Philippines) na magkakaroon ng world premiere.

Magtutunggali naman sa QCShorts International category ang Alaga, Kinakausap ni Celso ang Diyos, Refrain, RAMPAGE! (o ang parada), Supermassive Heavenly Body, at Water Sports.

Ang Southeast Asian contenders ay kinabibilangan ng Are We Still Friends?, Here We Are, In the Name of Love I Will Punish You; Peaceland; Saigon Kiss, at Locarno-winning film na WAShhh.

Tatlo namang Cannes Queer Palm nominees ang mapapanood sa LGBTQA+ section na Rainbow QC: ang Baby, The Balconettes at My Sunshine. 

Ang dalawa pang kukumpleto ng line-up ay ang Pooja, Sir at Sebastian.

Sa New Horizons section naman ay hindi dapat kaligtaan ang Blue Sun Palace, Cu Li Never Cries na nanalong Best First Feature sa Berlin; Santosh, The Major Tones, at Toxic.

Mapapanood sa unang pagkakataon dito sa Pilipinas ang Phantosmia ni Lav Diaz; The End ni Joshua Oppenheimer; The Count of Monte Cristo nina Alexandre de la Patellièr at Matthieu Delaporte, at ang Venice Golden Lion winner na The Room Next Door ni Pedro Almodóvar.

Apat pang sections ang ilulunsad ngayong taon, ang QCLokal, Rediscovery, Contemporary Italian Cinema at QCinema Selects.

Marami pang pelikula na mula sa iba't ibang bansa ang nakatakdang mapanood sa festival kaya puwedeng bisitahin ang kanilang social media pages. 

Ang QCinema 12 na gaganapin mula Nobyembre 8 hanggang 17 ay mapapanood sa mga piling sinehan tulad ng Gateway Cineplex 18, Ayala Malls Cinema sa Trinoma, Red Carpet sa Shangri-la Plaza, at Powerplant Mall.

Walang piyansa... KEN, IPINAA-ARESTO SA SYNDICATED ESTAFA

ni Reggee Bonoan @Sheet Matters | Oct. 22, 2024

Photo: Ken Chan / Instagram

Dahil hindi nakikipag-ugnayan si Ken Chan sa mga investors niya ay may pangalawang warrant of arrest na uling inilabas ang korte at sa pagkakataong ito ay ‘no bail’ na sa kasong syndicated estafa.

Sa inilabas na dokumento ni Nanay Cristy Fermin sa online show nilang Showbiz Now Na kahapon ay lumabas din ang pangalan ng kapatid ni Ken Chan na si Mark Clinton Angeles Chan. 

Dawit din ang kasosyo ng karelasyon daw ni Ken na hindi naman binanggit kung sino.

Bungad ni ‘Nay Cristy, “Kalat na kalat na ‘yung kanyang (Ken Chan) warrant of arrest sa lahat ng himpilan ng pulis at ang Immigration ay may kopya na rin at kung sakali na babalik dito (Pilipinas) si Ken Chan, doon pa lang sa paliparan, airport pa lang, may huhuli na sa kanya. Nakakalungkot.”

“So, walang takas talaga?” tanong ni Romel Chika.

“Nu’ng unang ibinalita natin, ayon sa kuwento ay nasa Amerika siya, pero ngayon ay nasa isang bansa na lang siya ng SouthEast Asia at ayon sa ating source ay pagkapayat-payat na raw ni Ken Chan,” sabi ulit ni ‘Nay Cristy.

Napag-usapan nina Romel Chika at ‘Nay Cristy na nakaka-stress sa panig ng actor ang mga nangyayari sa kanya ngayon.

“Overthinking kills your peace,” sey pa ni ‘Nay Cristy.

At bilang may demanda ring kinakaharap ang SNN host ay ikinuwento niya na sadyang binabantayan niya ang bawat galaw ng kasong libelo na isinampa nina dating Senador Francis ‘Kiko’ Pangilinan at Sharon Cuneta na natalo siya at kinailangan niyang magbayad ng piyansa.

Aniya, “Ako po talaga, binabantayan ko po ito mula noon hanggang ngayon. Ako po ay hindi matapang, wala pong taong matapang pagdating sa ganitong problema. Hindi rin po ako mapera o mayaman para mag-post agad ng piyansa. 

"Ang totoo pong dahilan kung bakit ko binabantayan ang mga ganitong problema ay dahil marespeto ako sa batas. Kung ano po ang isinasaad ng batas, iyon po ang dapat nating sundin.”

Ang payo ni ‘Nay Cristy kay Ken Chan ay ‘petition for bail’ ang dapat nitong gawin.

“Pero kailangang bumalik muna siya rito at magpakita muna sa branch na may hawak ng kaso para masabing may jurisdiction ang korte sa kanya. Tapos, alam naman ng mga abogado niya ang gagawin, petition for bail kasi no bail ito, eh.

“Kapag pinagbigyan ng judge, pupuwede niya itong ipiyansa at saka niya asikasuhin ang problema. Mula roon ay makakausap na niya ang mga investors, mga complainants, pupuwede na niyang, ‘Mas maganda po na ako ay malaya para matugunan ko po ‘yung mga hinihingi n’yo,'” esplikang mabuti ni ‘Nay Cristy.

Singit ni Romel Chika, “Pero sabi nga ‘Nay, kapag pera ang usapin, may katapat, ‘di ba?”

Sagot ni 'Nay Cristy, “'Yun po ang pinakamadaling problema, sa totoo lang po, ang pinakamahirap ay ang kalusugan, ‘yung health. Ang pag-ibig ay pangalawa dahil ang pag-ibig, kapag nawala ay hindi naman puwedeng halinhinan ng taong hindi mo naman mahal.

“Pero ‘yung pera po ay pinakamadaling problema po ‘yan kung tutuusin. Mahirap lang pong isipin dahil napakahalaga ng pera. Kaya lang po, kapag may binanggit tayong presyo, may katapat na presyo rin po ‘yun, kaya ‘yung pera, pinakamadaling problema!”

“Kaya dapat makipag-coordinate s’ya. ‘Di ba, ‘Nay, kahit gaano kalaki (utang) hahati-hatiin naman ‘yan hanggang makabayad ka?” payo ni Romel Chika.

Sey ni ‘Nay Cristy, “Oo, ang huwes naman ay makikinig naman kung ano lang ang kapasidad ng inirereklamo ng pagbabayad. Halimbawa, piso ang kinikita mo, hahati-hatiin mo ‘yun.

“Alam mo si Ken Chan, wala siyang kapanatagan ng loob ngayon, nangangayayat siya dahil ‘yung ganitong problema ay hindi ka makakatulog, hindi ka makakain, ang peace of mind, talagang lumilipad ‘yan palayo. 

Kausapin niya ang kanyang mga abogado, harapin niya, no one is above the law,” payo pa ng kolumnista-TV host sa aktor.

Bukas ang BULGAR sa panig ni Ken Chan o ng abogado niya.

Talo sa kasong ‘libel’... CRISTY, TULOY ANG LABAN KINA SHARON AT KIKO

ni Reggee Bonoan @Sheet Matters | Oct. 18, 2024

Photo: Cristy Fermin, Kiko Pangilinan at Sharon Cuneta / ONE PH, Circulated

Noong nagsisimula pa lang kaming maging reporter ay isa si Nanay Cristy Fermin sa mga nagbukas ng pinto para bigyan kami ng espasyo sa Mariposa Publications at ipinakilala kami sa mga editor na may hawak ng limang magazines na lumalabas mula Lunes hanggang Biyernes.

Nasanay kaming si ‘Nay Cristy ang takbuhan kapag may mga problema kasi nga ‘nanay’ siya ng lahat, kaya pati pamilya namin ay tinitingala siya. 

Tingin namin lagi kay ‘Nay Cristy ay problem solver lalo na pagdating sa trabaho, matatag, matigas, pero may malambot na puso.

Kaya masakit sa kalooban namin kapag nakikita namin siyang lumuha sa isang bagay na may kinalaman sa trabaho dahil para sa amin ay trabaho lang ito, bakit may personalan?

Anyway, nagulat kami nang mapanood namin ang Cristy Ferminute (CFM) kahapon, Huwebes, na ibinalita ni ‘Nay Cristy na natalo siya (hindi kasama sina Wendell Alvarez at Romel Chika) sa kasong libel na isinampa ng mag-asawang Senator Francis ‘Kiko’ Pangilinan at Sharon Cuneta sa Makati City.

Kamakailan lang ay masayang ibinalita ng CFM host na panalo sila sa cyberlibel case na isinampa ng magulang ni Sarah Lahbati na sina Ginoong Abdel at Ginang Esther Lahbati sa Quezon City.

Pero totoo talaga ang kasabihang may kakambal na lungkot ang saya at heto nga ang malungkot, sasampa sa korte ang 5 counts of libel nina ex-Sen. Kiko at Sharon laban sa Showbiz Now Na host.

Bungad ni ‘Nay Cristy, “Ako naman po ay bukas ang aking libro ng buhay sa inyo kapag may saya, may lungkot. ‘Pag may magandang balita, meron ding nagaganap na hindi gusto natin. Sinampahan po kami ng kasong libelo ng mag-asawang dating Senador Kiko Pangilinan at Sharon Cuneta.”

At binasa ni ‘Nay Cristy ang mga episodes na inireklamo siya, “‘KC ayaw na ng drama’;  ‘Mega may favoritism’; ‘Palusot ni Sharon, buking’; ‘Diary nina Sharon at Kris Aquino, social media’; ‘Sharon Cuneta, problemado talaga’; at ‘Sharon at KC, sayang na relasyon.’

“Ito po ‘yung mga isinampang kasong libelo sa akin. Kami naman po ni Atty. Shirley Tabangcura ay humanap ng aming mga depensa, depensa dahil sila ay pampublikong pigura ay inilatag po namin ang aming mga dahilan at katwiran. Pero sabi ko nga po, hindi lahat ng panahon na ang ating gusto ay natutupad.

“Natalo po ako sa kasong libelo na isinampa nina dating Senador Kiko Pangilinan at Sharon Cuneta, five counts po ito sa piskalya ng Makati. Ito po ay pinirmahan ni Senior Assistant City Prosecutor Rafael Rodrigo Esguerra at recommending approval naman po ng dalawang city prosecutor po ang pumirma.

“Ang amin lamang po ay hindi lang naman ngayon ang laban, ito po ay sa piskalya pa lamang, sa mga nag-aalala po, nalulungkot at ‘ika nga ay nakikisimpatya sa inyong lingkod, ‘wag po. Unang hakbang pa lamang po ito sa piskalya, aakyat po ito ngayon sa RTC Makati, kung anuman po ang maganap sa pagdinig dito, meron pa po tayong Court of Appeals at ‘pag hindi po natin nakuha ang tagumpay ay meron pa pong kataas-taasang hukuman, ang Supreme Court.”

Pinasalamatan lahat ni ‘Nay Cristy ang kanyang CFMers na naging bala niya sa lahat ng laban at ang mahalaga ay hindi pa ito ang katapusan ng lahat.

“Ang laban po ay hindi natin uurungan at tayo ay patuloy na maniniwala na lahat ng tao ay mayroon pong dahilan at katwiran sa kanilang ipinaglalaban,” diin ni ‘Nay Cristy.

Samantala, ang galing bumalanse ni God dahil pagkatapos ng malungkot na balita ni ‘Nay Cristy ay heto at binigyan naman siya ng magandang balita na ibinahagi niya sa lahat ng sumusubaybay ng CFM na napapakinggan sa 92.3 Radyo5 True FM na bibigyan siya ng parangal ng GEMS na isang award-giving body that recognizes outstanding achievements in the fields of PRINT, STAGE, RADIO, TELEVISION, and FILM.

Aniya, “Ako’y emosyonal at malungkot at katatanggap ko lang nito (dokumento) kaninang umaga (kahapon), sulat mula sa GEMS Hiyas ng Sining na binubuo po ng educators, mentors and students. Mahigpit po ang pamimili nila sa kanilang pinararangalan.

“Sa SNN po ako kinasuhan ng mag-asawang Pangilinan, ito naman ang nilalaman ng resulta ng GEMS, Best Digital Program Host and Entertainment Human Interest and Variety, Cristy S. Fermin- Showbiz Now Na.

“Sa pamunuan po ng GEMS, maraming-maraming salamat po sa inyo! Ito ang tinatawag natin na ang tadhana ay napakabilis gumamot ng sugat, ang aking lugmok na kalooban, nagbigay sila kaagad ng parangal na ikagagalak naman po ng aking puso. Maraming salamat, GEMS.”

Dagdag pang sinabi ni ‘Nay Cristy na noong natalo siya sa mga kaso niyang libelo rin noong araw ay P10,000 lang ang bail, ngayon daw ay P48,000 na kaya sa limang counts ay kulang sa P250,000.

“Tumaas na ang inflation, kaya sa mga may kasong libelo, paghandaan n’yo na ito,” payo ni ‘Nay Cristy.

Sabi nga ng aming Nanay Cristy Fermin, tuloy ang laban, walang susuko, at yes, suportado ka po namin sa lahat ng laban mo, ‘Nay!