VP Sara, tiklop sa NBI, anyare?!

ni Pablo Hernandez @Prangkahan | Nov. 30, 2024

PBBM AYAW IPA-IMPEACH SI VP SARA SA TAKOT NA MA-PEOPLE POWER NG 32M DDS -- Nang umugong ang impeachment laban kay Vice Pres. Sara Duterte-Carpio dahil sa ‘pagbabanta’ nito sa buhay nina Pres. Bongbong Marcos (PBBM), First Lady Liza Araneta-Marcos at Speaker Martin Romualdez ay nanawagan ang Presidente sa Kamara na huwag itong ituloy kasi hindi naman daw ito importante at aksaya lang umano ito sa panahon.

Ang hirit ni PBBM na huwag nang ituloy ang impeachment ay pagpapakita na may takot pa rin siya sa pamilya Duterte kasi kapag in-impeach na si VP Sara ay baka lumabas sa kalye ang 32 milyong Duterte Diehard Supporters (DDS) at magsagawa naman ang mga ito ng People Power laban sa Marcos admin, boom! 

XXX

NAWALA ANG TAPANG NI VP SARA, TUMIKLOP SA NBI -- Negatibo kay VP Sara ang hindi niya pagharap kahapon sa National Bureau of Investigation (NBI) kaugnay sa imbestigasyon sa kanya tungkol sa ginawa niyang pagbabanta umano sa buhay nina PBBM, FL Liza at Speaker Romualdez.

Kilala kasi ang mga Duterte na matatapang pero sa hindi niya pagsipot ay lumalabas ngayon na tumiklop, nawala ang tapang ni VP Sara sa NBI, he-he-he!

XXX

PANG-UUNGGOY LANG SA PUBLIKO ANG EXECUTIVE ORDER 62 NI PBBM NA NAG-AATAS PABABAIN ANG PRESYO NG BIGAS KASI IMBES BUMABA, TUMAAS PA -- Noong June 22, 2024 ay nagpalabas ng Executive Order 62 si PBBM na nag-aatas kay Sec. Francisco Tiu Laurel ng Dept. of Agriculture (DA) na tapyasan ng P6 o hanggang P7 ang presyo per kilo ng bigas, ang problema, imbes mabawasan ang presyo ay mas lalong tumaas ang halaga ng kada kilo nito.

Isa lang ang ibig sabihin niyan, pang-uunggoy lang sa publiko ang executive order na ito ni PBBM, boom!

XXX

KUNG SI EX-P-DUTERTE PA ANG PRESIDENTE, DURUGISTANG SIGA-SIGA NA SI ‘JUN PULO’ MALAMANG NA-TOKHANG NA -- Isang durugistang nagngangalang "Jun Pulo" ang nagsisiga-sigaan, totoma nang hindi nagbabayad at kinokotongan pa raw ang mga may-ari ng mga KTV bars sa Quezon City.

Dapat ipa-tokhang na ito ni Quezon City Police Director, Col. Melecio Buslig, kasi sa totoo lang, kung si ex-P-Duterte pa ang presidente ng ‘Pinas, ‘yung ganyang durugistang siga-siga, may pinaglagyan na ‘yan, malamang “na-tokhang” na, period!

Customs commissioner, ‘nganga’ lang sa mga smuggler sa Adwana

ni Pablo Hernandez @Prangkahan | Nov. 29, 2024

PDEA, SERMON ANG INABOT SA QUADCOMM AT SA MAKABAYAN BLOC MEMBER KASI ISINAMA SA DRUGS MATRIX SI SEN. BONG GO NA HINDI NAMAN SANGKOT SA DROGA -- Mali ang akala ni Philippine Drug Enforcement Agency (PDEA) Asst. Sec. Renato Gumban na matutuwa sa kanya ang Quad Committee ng Kamara nang isama niya sa illegal drugs matrix si Sen. Bong Go, kasi imbes papuri ay sermon ang inabot niya sa mga kongresista.

Sa presentasyon kasi ng PDEA patungkol sa illegal drugs matrix ay nagtaka ang mga QuadComm member kung bakit naisama ang pangalan ni Sen. Bong Go kaya’t inusisa ni ACT Teacher partylist Rep. France Castro si Gumban kung sangkot sa kalakaran ng droga ang senador, at ang tugon nito (Gumban) ay hindi raw at kaya lang daw nila isinama sa matrix si Sen. Bong Go ay dahil kakilala raw nito si Alan Lim na nasasangkot daw sa droga. At dahil diyan ay nabuwisit ang mga kongresista, sinermunan nina Cong. Castro, QuadComm chairman Surigao del Sur Rep. Ace Barbers at Manila 6th Dist. Rep. Bienvenido Abante ang mga taga-PDEA na huwag magsama sa matrix ng pangalang hindi naman sangkot sa droga at huwag gagamitin ang komite para siraan ang senador.

Ibig sabihin niyan, sablay ang matrix ng PDEA kaya sermon ang inabot nila sa QuadComm at maging sa kilalang kritiko ng mga Duterte na si ACT Teacher Rep. Castro dahil hindi sila naniniwala na sangkot sa droga si Sen. Bong Go, period!

XXX

SABLAY ANG PRESENTASYON NI TRILLANES -- Sablay din ang presentasyon ni former Sen. Antonio Trillanes nang idawit din nito ang pangalan ni Sen. Bong Go sa mga taong isinasangkot niya sa droga, kaya’t nang matapos ang presentasyon ay tinanong siya nina Bukidnon Rep. Jonathan Flores, Cagayan de Oro City Rep. Lordan Suan at Batangas 2nd Dist. Rep. Jinky Luistro kung ano ang batayan ng kanyang mga alegasyon, at ang tanging nasabi ng dating senador ay ibinase lang niya sa mga interview kina former police officers Arturo Lascanas, Eduardo Acierto at mga clippings ng mga diyaryo.

Dahil sa kawalan ng interes sa presentasyon ni Trillanes kasi nga lumalabas na ito ay hearsay lang, tinapos na ng QuadComm ang hearing, he-he-he!

XXX

VP SARA NA IBINOTO NG 32M PINOY, PINAGRE-RESIGN NI GADON NA LAGING TALUNAN SA ELEKSYON --Nanawagan si Presidential Adviser on Poverty Alleviation Sec. Larry Gadon kay Vice Pres. Sara Duterte-Carpio na mag-resign na sa puwesto kaysa patalsikin ng Kamara sa pamamagitan ng impeachment.

Iyan naman ang hindi katanggap-tanggap sa publiko, na’yung laging talunan sa eleksyon na si Gadon ay pinagre-resign si VP Sara na ibinoto ng higit 32 milyong Pinoy, period!

XXX

CUSTOMS COMMISSIONER ‘NGANGA’ LANG SA GRUPO NG MGA SMUGGLER SA ADWANA -- Hanggang ngayon ay patuloy ang raket na smuggling sa Customs ng "Teves Group" at "Kimberly Group."

Grabe ah, grupo-grupo na pala ang mga nagsasagawa ng smuggling sa Adwana, pero ang Customs Comm. na si Bienvenido Rubio, “nganga” lang, boom!

VP Sara kahit babae, ipinakitang matikas, haharapin daw lahat ng alegasyon

ni Pablo Hernandez @Prangkahan | Nov. 28, 2024

MATIKAS SI VP SARA DAHIL KAHIT BABAE AT ALAM NA HINDI SIYA MAGKAKAROON NG PATAS NA TRATO, HAHARAPIN PA RIN ANG MGA ALEGASYON -- Sinabi ni Vice Pres. Sara Duterte-Carpio na handa niyang harapin ang lahat ng alegasyon sa kanya, pero hindi raw siya umaasang magkakaroon ng patas na trato mula sa Marcos administration.

Ganyan pala talaga katikas ang mga Duterte kasi kahit isa siyang babae at hindi umaasang magkakaroon ng patas na trato ay haharapin pa rin niya ang mga alegasyon ng Marcos admin laban sa kanya, period!

XXX

IPINAKITA NI SEN. IMEE SA PUBLIKO NA TUNAY SIYANG KAIBIGAN NI VP SARA -- Habang naka-confine sa Veterans Memorial Medical Center si Atty. Zuleika Lopez, ang chief of staff ng Office of the Vice President (OVP) na kinontempt at ipinakulong ng House Committee on Good Government and Public Accountability ay dinalaw ito ni Sen. Imee Marcos bilang pagpapakita ng suporta kay VP Sara.

At sa social media ay ikinatuwa ng mga Duterte Diehard Supporters (DDS) ang ginawang ito ni Sen. Imee kasi ipinakita niya sa publiko na tunay siyang kaibigan ni VP Sara, palakpakan naman diyan!

XXX

LUNDAGAN SA TUWA ANG MGA BUWAYA DAHIL APRUB NA NG SENADO ANG P6.352 TRILLION -- Inaprub na ng Senado ang panukalang batas na P6.352 trillion national budget.

Dahil aprubado na, hindi man aminin ay tiyak naglulundag sa tuwa ang mga ‘buwaya’ sa Marcos administration, boom!

XXX

DAPAT NANG MAG-RESIGN SI DA SEC. LAUREL -- Magpa-Pasko na pero hanggang ngayon ay hindi magawa ng Dept. of Agriculture (DA) na pababain ang presyo ng per kilo ng bigas.

Nang italaga noon ni PBBM si businessman Francisco Tiu Laurel bilang DA secretary ay nangako ito na pabababain ang presyo ng bigas pero hanggang ngayon ay hindi niya magawang maging mura ang kilo ng bigas.

Dahil bigo siya sa promise na pababain ang presyo ng bigas, dapat mag-resign na si Laurel sa kanyang puwesto bilang DA secretary, period!