PBBM, ayaw nang patulan si VP Sara, aatakehin siya uli ng bise presidente

ni Pablo Hernandez @Prangkahan | Nov 4, 2024

MAY NAG-UTOS RIN BA KAY COL. ESPENIDO PARA I-‘MARITES’ SI SEN. BONG GO SA ISYUNG EJK REWARD SYSTEM? -- Sa imbestigasyon ng Senado sa extrajudicial killings (EJK) ay ibinulgar ni P/Col. Hector Grijaldo na tinanggihan niya ang pangungumbinse sa kanya ng mga miyembro ng Quad Committee ng Kamara na sina Laguna Rep. Dan Fernandez at Manila Rep. Benny Abante na lumagda sa supplemental affidavit na gawa ng dalawang abogado ni former Philippine Charity Sweepstakes Office (PCSO) General Manager, ret. Col. Royima Garma, na ang nakasaad dito ay kinukumpirma niya ang sinabi ni Garma na totoong may reward system sa EJK, na ayon sa police colonel ay wala naman daw talaga siyang alam sa reward system, at ayaw niyang magsinungaling kaya hindi siya pumirma sa supplemental affidavit.

Kaya’t ang tanong: May nag-utos din kaya kay P/Col. Jovie Espenido para siraan at isangkot sa reward system sa EJK si Sen. Bong Go, kasi sa Senate probe ay umamin ang police colonel na ito (Espenido) na ang mga dinaldal niya sa QuadComm laban sa senador ay mga hearsay o “marites” lang, period!

XXX

QUAD COMMITTEE INVESTIGATION, ‘IN AID OF ELECTION’ VS. MGA DUTERTE, SENS. BONG GO AT DELA ROSA? -- Dahil sa ibinulgar na ito ni Col. Grijaldo ay lumalabas na tama ang naging pananaw ni former presidential spokesman Rigoberto Tiglao na hindi “in aid of legislation,” kundi “in aid of election” ang ginagawang atake ng QuadComm laban sa pamilya Duterte at kina Sen. Bong Go at Sen. Ronald Dela Rosa.

Kandidato kasi sina ex-P-Duterte for mayor, Baste Duterte for vice mayor, reelectionist for congressman si Paolo Duterte at reelectionist for senators sina Bong Go at Ronald Dela Rosa, period!

XXX

ALAM NI PBBM NA KAPAG PINATULAN NIYA ANG MGA STATEMENT NI VP SARA, AATAKEHIN ULI SIYA NG BISE PRESIDENTE -- Nitong nakalipas na Nov. 1, sa Libingan ng mga Bayani, ay hindi tinugon ni Pres. Bongbong Marcos (PBBM) ang tanong ng mga mamamahayag kung ano ang reaksyon niya sa sinabi ni Vice Pres. Sara Duterte-Carpio na nais nitong hukayin ang mga labi ng kanyang amang si ex-Pres. Ferdinand Edralin Marcos Sr. at itapon ito sa West Philippine Sea (WPS).

Marahil, alam ni PBBM na aatakehin na naman siya ni VP Sara kapag pinatulan pa niya ang tungkol sa isyung ito, boom!

XXX

BATAS NA HABAMBUHAY NA PAGKABILANGGO VS. SMUGGLERS AT HOARDERS TILA PABIDA LANG NI PBBM -- Mahigit isang buwan na ang nakakalipas mula nang lagdaan ni PBBM noong Sept. 25, 2024 ang batas na may parusang habambuhay na pagkabilanggo sa mga sangkot sa agri-smuggling at hoarding, pero hanggang ngayon ay tila wala pa ring nahuhuli at nakakasuhang mga smuggler at hoarders.

Dahil diyan, lumalabas na pabida lang ni PBBM ang nilagdaan niyang batas na ito, period!

Appointee ni PBBM sa ERC, dagdag-pahirap ang inaatupag

ni Pablo Hernandez @Prangkahan | Nov 3, 2024

SA PISTA NG MGA PATAY, PINATAMAAN NI VP SARA ANG MGA ANTI-DUTERTE POLITICIAN -- Sa kanyang mensahe sa Pista ng mga Patay nitong nakalipas na November 1, sinabi ni Vice Pres. Sara Duterte-Carpio na manalangin ang sambayanang Pilipino para sa kapayapaan at katatagan ng bansa sa gitna ng mga hamon mula sa mga kasamaan, kawalan ng katarungan at personal na interes ng iilan.

Malamang, ang mga pinatamaan ni VP Sara sa mensahe niyang ito ay ang mga anti-Duterte politician na patuloy na umaatake sa kanilang pamilya, period!

XXX

BABAGSAK TALAGA ANG RATING NINA PBBM AT VP SARA DAHIL DATING MAY UNITY, PERO NGAYON NAGBABANGAYAN NA SILA -- Sa latest survey ng OCTA ay parehong bumagsak ang rating nina Pres. Bongbong Marcos at VP Sara.

Sa totoo lang, pareho talagang babagsak ang rating nina PBBM at VP Sara kasi nga nawasak na ang UniTeam nila, nagbabanatan na ang kampo ng Marcos at Duterte.

Dati noong may unity pa sila, sa kada labas ng survey, parehong mataas ang rating nila, pero mula nang magbangayan, parehong bumabagsak na ang rating nila, boom!

XXX

NOONG PRESIDENTE PA SI EX-P-DUTERTE, PALAKPAKAN ANG MGA SEN. AT CONG. KAPAG NAGMURA SIYA, PERO NGAYON BAD DAW ANG PAGMUMURA NIYA -- Ayon sa ilang senador at kongresista, bad daw ang ginagawang pagmumura ni ex-P-Duterte sa loob ng Senado.

Diyan makikita na karamihan sa mga pulitiko talaga ay mga ipokrito.

Nasabi natin ito kasi noong presidente pa si ex-P-Duterte, kapag nagmura ito sa mga speech niya karamihan sa mga senador at kongresista ay todo-palakpak with standing ovation pa, period!

XXX

MGA APPOINTEE NI PBBM SA ERC LAGING INAATUPAG, DAGDAG-PAHIRAP SA MAMAMAYAN -- Nitong nakalipas na November 1 ay nagpatupad ang Energy Regulatory Commission (ERC) ng dagdag-presyo na P1.64 sa kada kilo ng LPG o Liquefied Petroleum Gas.

Hay naku, itong mga appointee ni PBBM sa ERC wala nang inatupag ang mga ito kundi magsagawa ng mga dagdag-pahirap sa mamamayan, kasi mantakin n’yo, katataas lang ng presyo ng mga produktong petrolyo noong October 28, 2024, tapos makalipas lang ang limang araw, sinundan agad ng dagdag-presyo ng LPG, tsk!

Ex-P-Duterte, ‘di na haharap sa EJK hearing, Senado naduduwag?

ni Pablo Hernandez @Prangkahan | Nov 2, 2024

SENADO, NADUWAG KAY EX-P-DUTERTE KAYA HINDI NA PAHAHARAPIN SA EJK SENATE HEARING? -- Sinabi ni Minority Leader, Sen. Koko Pimentel na hindi na raw niya ipapatawag si ex-P-Duterte sa mga susunod na hearing ng Senate Blue Ribbon Committee patungkol sa isyung extrajudicial killings (EJK) sa bansa noong panahon ng Duterte administration.

Naku, eh baka isipin ng publiko na naduduwag na ang Senado kay ex-P-Duterte kaya’t ayaw na niya itong padaluhin, lalo’t nakita ng mamamayan kung paano bara-barahin ng ex-president si Sen. Risa Hontiveros, period!

XXX

KAPAG TINANGGAP NI EX-P-DUTERTE ANG HAMON NI CONG. ABANTE KAPANA-PANABIK ‘YAN, TIYAK AABANGAN ANG BANGAYAN NILA SA QUADCOMM HEARING -- Kung si Sen. Koko ay ayaw nang paharapin si ex-P-Duterte sa Senado, hinamon naman ni Manila 6th District Rep. Benny Abante na humarap sa Quad Committee ng Kamara na nag-iimbestiga rin sa EJK sa bansa.

Kapag tinanggap ni ex-P-Duterte ang hamon ni Cong. Abante, aba’y kapana-panabik iyan kasi tiyak masasaksihan ng publiko ang bangayan ng dalawang pulitikong lolo sa Kamara, abangan!

XXX

TIYAK NAPAARAY ANG MGA KURAKOT NA PULITIKO SA SINABI NI DIWATA NA HINDI SIYA KUMANDIDATO PARA LANG ‘MAGKAWATAN’ -- Sinabi ni Deo Balbuena alyas Diwata na 4th nominee ng Vendors Partylist na hindi raw siya kumandidato para “magkawatan” (magnakaw). Kaya raw siya kumandidato ay para sa kapakanan ng mga kapwa niya vendors.

Tiyak “napaaray” ang mga kurakot na pulitiko sa sinabing ito ni Diwata kasi sa totoo lang, maraming politicians ang nagsipag-file ng certificate of candidacy (COC) para kapag nanalo, ang aatupagin ay ‘magnakaw’ sa kaban ng bayan, period!

XXX

HARRY ROQUE ‘BAHAG ANG BUNTOT’ NA HUMARAP SA DOJ -- Napa-wow reactions ang netizens nang buong tapang na maglabas ng statement sa social media si former presidential spokesman Harry Roque na haharapin daw niya ang no bail na kasong qualified trafficking in person na isinampa sa kanya ng Presidential Anti-Organized Crime Commission (PAOCC).

Ang wow reactions ng netizens ay napalitan ng “ha-ha-ha” reactions sa sumunod na statement ni Roque na hindi raw siya pupunta sa Dept. of Justice (DOJ) at sa halip ay ipapadala na lang daw niya ang kanyang counter-affidavit sa DOJ.

Mapapa-ha-ha-ha reactions talaga ang netizens kasi akala nila matapang na si Roque, ‘yun pala, ‘bahag din ang buntot’ na humarap sa DOJ, boom!