Sa panahon ni PBBM, pahirap nang pahirap ang buhay ng mga Pinoy

ni Pablo Hernandez @Prangkahan | Dec. 8, 2024

KUNG FOR MAYOR NA LANG AT HINDI KUMANDIDATONG VP, WALA SANANG KUMAKALABAN KAY VP SARA, WALA SANA SIYANG KINAHARAP NA MGA KASO – Hindi lang ang nakaambang impeachment complaint at criminal cases ang dapat paghandaan ni Vice Pres. Sara Duterte-Carpio, kundi pati ang kasong plunder na isasampa sa kanya ng mga anti-Duterte politician.

Siguro, ngayon napagtanto ni VP Sara na sana hindi na siya kumandidato sa pagka-VP at itinuloy na lang niya ang pagkandidato niya bilang re-electionist sa pagka-alkalde ng Davao City kasi sa lugar nila ay lahat ng gusto niya nasusunod at walang kumokontra, hindi tulad sa nangyayari ngayon sa kanya bilang bise presidente na ang daming kumakalaban sa kanya at inuulan pa siya ng iba’t ibang uri ng kaso, boom!

XXX

PERA NG BAYAN NA IBINIGAY DAW KINA ALYAS ‘MARY GRACE PIATTOS’ AT ‘KOKOY VILLAMIN’ KANINONG BULSA SA MGA TAGA-OVP NAPUNTA? -- Hindi lang ang pangalang “Mary Grace Piattos” ang walang birth record sa Philippine Statistics Authority (PSA), kundi pati ang pangalang “Kokoy Villamin.”

Dahil diyan ay lumalabas na gawa-gawa o imbento lang ang mga ganitong pangalan na mga naging recipient o tumanggap daw ng cash reward mula sa confidential fund ng Office of the Vice President (OVP).

Kaya’t ang tanong: Kaninong bulsa kaya sa mga taga-OVP napunta ang pera ng bayan na ibinigay daw kina alyas “Mary Grace Piattos” at “Kokoy Villamin”? Abangan!

XXX

SA PANAHON NI PBBM, DAMING NAWALAN NG WORK, TAPOS NAGMAHAL PA ANG PRESYO NG MGA BILIHIN AT BAYARIN -- Matapos ianunsyo ng PSA na pumalo na sa 3.9% o katumbas ng 1.97M Pinoy na nawalan ng trabaho, ay sinundan ito ng anunsyo ng PSA na tumaas ng 2.5% ang inflation rate sa Pilipinas.

‘Yan ang nakalulungkot na mga nangyayari sa ‘Pinas sa panahon ng liderato ni President Bongbong Marcos (PBBM), pahirap nang pahirap ang buhay ng mga Pinoy kasi ang dami na nawalan ng work, tapos nagmahal pa ang presyo ng mga bilihin at bayarin, tsk!

XXX

P11B HALAGA NG MGA GAMOT AT MEDICAL SUPPLIES NAG-EXPIRE KAYA DAPAT MANAGOT ANG MGA APPOINTEE NOON NI EX-P-DUTERTE SA DOH -- Sa House hearing ay nabulgar na higit P11 billion halaga ng mga gamot pangontra sa COVID-19 at iba pang medical supplies na nasa mga bodega ng Dept. of Health (DOH) ang nag-expire na, at ang pangyayaring ito ay isinisi ni Iloilo Rep. Janet Garin sa mga DOH official na appointed ni ex-P-Duterte noon sa kagawaran.

Dapat managot dito ang mga appointed official noon ni ex-P-Duterte sa DOH, kasi dahil sa kanilang kapabayaan ay nasayang ang ganyan kalaking halaga na pera ng bayan, period!

Sen. Robin, ‘di kasama sa pinasalamatan ni VP Sara, anyare?

ni Pablo Hernandez @Prangkahan | Dec. 7, 2024

PINASALAMATAN NI VP SARA SINA SENATORS BONG GO, BATO DELA ROSA AT IMEE MARCOS PERO SI SEN. ROBIN PADILLA, HINDI -- Nitong nakalipas na Dec. 5, 2024 ay pinasalamatan ni Vice Pres. Sara Duterte-Carpio sina Senators Bong Go, Ronald Dela Rosa at Imee Marcos na nagpakita ng suporta sa kanya habang nasa krisis ang Office of the Vice President (OVP).

Aba teka, bakit sina Senators Bong Go, Bato Dela Rosa at Imee Marcos lang at hindi nakasama si Sen. Robin Padilla sa pinasalamatan ni VP Sara?

Kaalyado kasi ng pamilya Duterte si Sen. Padilla, kaya ang tanong: Nakalimutan lang kaya o sinadya ni VP Sara na huwag pasalamatan ang actor-turned politician? Boom!

XXX 

MAINIT NA ISYU ANG IMPEACHMENT KAY VP SARA KAYA’T IMPOSIBLENG HINDI ITO NAPAG-USAPAN NINA PBBM AT MGA CONG. SA MALACAÑANG --Imposible ang sinasabi ng Malacañang at mga kongresista na hindi napag-usapan nina Pres. Bongbong Marcos (PBBM) at mga House member ang impeachment kay VP Sara nang magtungo sa Palasyo ang mga ito noong Dec. 4, 2024.

Mainit na isyu kasi ang impeachment kaya huwag “ungguyin” ng mga taga-Malacañang at mga taga-Kamara na hindi nila ito napag-usapan sa Palasyo, period!

XXX

DAMING MAGPA-PASKONG TUYO KASI ANG DAMING NAWALAN NG WORK -- Inanunsyo ng Philippine Statistics Authority (PSA) na mula nitong buwan ng Oktubre 2024 hanggang Nobyembre 2024 ay 3.9 % o katumbas ng 1.97 milyong Pinoy ang nawalan ng trabaho.

Sa rami ng mga nawalan ng work, at dahil panahon na ngayon ng Kapaskuhan, ay asahan nang maraming pamilyang Pinoy ang makakaranas ng “Paskong Tuyo,” tsk!

XXX

IBASURA ANG MGA PARTYLIST NA HINDI RAMDAM SA PANAHONG HUMIHINGI NG TULONG ANG MGA BIKTIMA NG BAGYO AT BAHA -- Maraming kalamidad ang tumama sa bansa ngayong taon, ang daming mga Pinoy na nasawi at nawalan ng ari-arian at bahay dulot ng mga pananalasa ng bagyo at baha, at next year ay idaraos na ang May 2025 midterm election.

Ang nais nating ipunto rito, dapat ibasura ng mga botante ang mga partylist representative na hindi ramdam ng mamamayan sa panahon na humihingi ng tulong ang mga biktima ng bagyo at baha, period!

Speech ni VP Sara na ‘di magpapatawad, tiyak maraming kinabahan

ni Pablo Hernandez @Prangkahan | Dec. 6, 2024

HUWAG NANG ITULOY NG KAMARA ANG IMPEACHMENT VS. VP SARA, AKSAYA LANG NG PANAHON DAHIL SA RAMI NG SENADOR NA TUTOL, ‘DI SIYA MAI-IMPEACH -- Bukod kina Senators Bong Go, Ronald Dela Rosa na pawang kaalyado ng pamilya Duterte, ay nagpahayag na rin ng pagkontra sa impeachment kay Vice Pres. Sara Duterte-Carpio sina Senators Imee Marcos, Jinggoy Estrada, JV Ejercito, Nancy Binay at Migz Zubiri.

Kapag sa impeachment court pitong senador na tatayong hurado ay kumontra sa impeachment ni VP Sara, hindi siya mai-impeach, eh walong senador na iyan at maaaring madagdagan pa.

Ang nais nating ipunto rito ay huwag nang ituloy ng Kamara ang pagpapa-impeach kay VP Sara dahil aksaya lang ito ng panahon, kasi nga sa ngayon pa lang ay walong senador na ang tiyak magbabasura sa impeachment sa bise presidente, period!

XXX

WALA MANG PINANGALANAN, PERO TIYAK MARAMING KINABAHAN SA SPEECH NI VP SARA NA HINDI SIYA MAGPAPATAWAD -- Sa speech ni VP Sara sa thanksgiving activity ng Office of the Vice President (OVP) ay ito ang kanyang sinabi... “Hindi ako magpapatawad.”

Bagama’t walang tinukoy, pero tiyak kinabahan dito ang mga kongresistang nagtapyas sa OVP budget, nagtanggal at nag-iimbestiga sa kanyang confidential funds, at tiyak may mga kinabahan din sa Malacanang at Senado kasi sa tema ng speech na ito ni VP Sara ay kapag naging presidente siya, may mga reresbakan siya at maaari talagang mangyari iyan kasi kilala ang pamilya Duterte na mga ‘benggador’, boom!

XXX

HINDI P40 PER KILONG BIGAS ANG GUSTONG MABILI NG MAMAMAYAN KUNDI ‘YUNG PROMISE NI PBBM NA P20 BIGAS -- Ibinida ni Asec. Arnel De Mesa ng Dept. of Agriculture (DA) na maglalagay daw ng mga Kadiwa stores sa ilang piling palengke at train stations para magbenta ng P40 per kilo ng bigas.

Hay naku, hindi naman ang P40 per kilo ng bigas ang gustong mabili ng mamamayan, kundi iyong ipinangako ni Pres. Bongbong Marcos (PBBM) na P20 bigas, period!

XXX

NAGPAPALIGSAHAN ANG ERC AT MWSS SA PAG-AANUNSYO NG MGA DAGDAG-PAHIRAP SA MAMAMAYAN -- Kamakailan lang ay nag-aprub ang Energy Regulatory Commission (ERC) ng panibagong oil price hike, at kamakalawa ay inanunsyo naman ng Manila Water Sewerage System (MWSS) na pagpasok ng year 2025 ay magdadagdag ng singil ang Manila Water Company sa kanilang mga konsyumer.

Iyang mga appointee ni PBBM sa ERC at MWSS, nagpapaligsahan sa pag-aanunsyo ng mga dagdag-pahirap sa mamamayan, mga buset!