PBBM, mga sen. at cong., dapat idamay sa confi funds scam ng OVP at DepEd

ni Pablo Hernandez @Prangkahan | Dec. 11, 2024

PBBM, MGA SENADOR AT KONGRESISTA DAPAT IDAMAY SA CONFI FUNDS SCAM DAHIL KAHIT HINDI NAMAN LAW ENFORCEMENT AGENCY, INAPRUB NA BIGYAN NG GANITONG PONDO ANG OVP AT DEPED -- Dapat sisihin din ng publiko si Pres. Bongbong Marcos (PBBM), mga senador at kongresista sa nabulgar na confi funds scam sa Office of the Vice President (OVP) at Dept. of Education (DepEd). Sa totoo lang, dapat damay sila sa isyung ito dahil sila ang nag-aprub na mabigyan ng tinatawag na “secret funds” si VP Sara Duterte-Carpio.

Alam naman kasi nilang hindi law enforcement agency ang mga tanggapan ng OVP at DepEd, eh mantakin n’yong inaprub ni PBBM, mga sen. at cong. ang P500M confi fund ng OVP at P150M confi fund ng DepEd, at nang ibulgar ng mga Makabayan bloc representatives ang anomalya sa confi funds, ay saka sila (Malacañang, Senado at Kamara) mga nagmamalinis, mga buset!

XXX

MALAMANG MAS MARAMING BOGUS CONFI FUND RECIPIENTS SA OVP KAYSA DEPED -- Malamang mas maraming bogus confi fund recipients ang OVP kaysa DepEd.

Sabi kasi ni Manila 3rd Dist. Rep. Joel Chua, chairman ng House Committee on Good Government and Public Accountability, ang 677 bogus na mga pangalan, 405 dito ay walang mga birth record at ang 272 ay maraming kapangalan, ang mga ito umano ay mga DepEd confi fund recipients, hindi pa kasama rito ang mga OVP confi fund recipients. 

Kung ganyan karaming non-existent na tao ang inilista bilang mga DepEd confi fund recipients, aba’y siguradong mas maraming bogus na tao ang nailistang OVP confi fund recipients, kasi ang confi fund noon ng DepEd ay P150 million lang, at ang sa OVP ay P500M, tsk!

XXX

DEC. 9 ANTI-CORRUPTION DAY, SIGURADONG DEDMA LANG DIYAN ANG MGA KURAKOT SA ‘PINAS -- Nitong nakalipas na Dec. 9, 2024 ay ipinagdiwang ang ika-21 taong anibersaryo ng Anti-Corruption Day, resolusyon ito na ipinasa ng United Nations (UN) noong Dec. 9, 2003.

Hindi natin alam kung ang mga corrupt official sa ibang bansa ay sumunod na huwag munang mangurakot noong Dec. 9. Pero sa ‘Pinas, naku, sa rami ng mga kurakot tiyak na dinedma lang ‘yang selebrasyon ng “Anti-Corruption Day,” boom!

XXX

LTO, PALPAK HANGGANG NGAYON, DAHIL HIGIT 9M ANG MGA MOTORSIKLO NA WALA PANG PLAKA -- Ibinulgar ng Commission on Audit (COA) na higit 9 milyon motorsiklo pa ang hindi naiisyuhan ng plaka ng Land Transportation Office (LTO). Aba’y ang dami niyan ah!

Kung ganyan kapalpak sa kanyang tungkulin si LTO Chief Vigor Mendoza II, aba’y dapat na itong sibakin ni Pres. Bongbong Marcos (PBBM), period!

Pareho ang confi funds at pork barrel scams, mga bogus na ‘tao’ ang recipients

ni Pablo Hernandez @Prangkahan | Dec. 10, 2024

HIRIT NG KAMARA, IN AID OF LEGISLATION ANG IMBESTIGASYON SA CONFI FUNDS, ‘YUN PALA PASASAMPAHAN NILA NG PATONG-PATONG NA KASO SI VP SARA -- Sa wrap up committee report ng House Committee on Good Government and Public Accountability na nag-imbestiga sa sinasabing confidential funds ng Office of the Vice President (OVP) at Dept. of Education (DepEd) ay ang mga kasong posibleng kaharapin daw nina Vice President Sara Duterte-Carpio at mga tauhan nito sa OVP at DepEd ay plunder, technical malversation, falsification of public documents at perjury.

Noong una, sabi ng Kamara ay in aid of legislation daw ang pakay nila sa pag-iimbestiga nila sa confi funds ng OVP at DepEd, pero sa kanilang wrap up committee report, mas nagpokus sila sa mga patong-patong na kasong maaaring irekomenda nila sa Dept. of Justice (DOJ), period!

XXX

CONFI FUNDS AT PORK BARREL SCAMS, PAREHONG MGA BOGUS NA ‘TAO’ ANG RECIPIENTS -- Sinabi ni Manila Rep. Joel Chua, chairman ng House Committee on Good Government and Public Accountability, na bukod sa mga bogus na pangalang “Mary Grace Piattos” at “Kokoy Villamin,” ayon sa Philippine Statistics Authority (PSA) ay mayroon pang 405 na “taong” binigyan o naging recipients ng confi funds ng OVP at DepEd, at mga “taong” bogus din daw dahil wala raw birth record ang mga ito sa PSA.

Dahil diyan, lumalabas na itong confi funds scam ay mahahalintulad sa pork barrel scam na kinasangkutan ng ilang senador at ilang kongresista noon, kasi parehong mga bogus na “tao” ang mga naging recipient nila sa confi at pork barrel funds, boom!

XXX

ASAHAN NA NI VP SARA NA ANG KINASANGKUTANG CONFI FUNDS SCAM GAGAMITIN LABAN SA KANYA SA 2028 PRESIDENTIAL ELECTION -- Kung ginaya lang ni VP Sara ang pinalitan niya sa puwesto na si former VP Leni Robredo na hindi humingi ng confi fund, wala sana siyang kinakaharap na kontrobersya ngayon.

Kaya’t asahan na ni VP Sara na sa pagtakbo niyang kandidato sa pagka-presidente sa 2028 election, gagamitin ng mga makakalaban niya sa eleksyon ang kinasangkutan niyang confi fund scam, period!

XXX

IMBESTIGAHAN DIN KAYA NG KAMARA ANG ISINAPUBLIKO NG COA NA P10B CONFI AND INTEL FUNDS ANG NAGASTOS NG OFFICE OF THE PRESIDENT --Isinapubliko ng Commission on Audit (COA) na P10 billion confidential and intelligence funds ang nagasta ng Office of the President (OP) nitong nakalipas na year 2023.

Aba’y dapat imbestigahan din iyan ng House Committee on Good Government and Public Accountability, kasi tulad ng sinasabing mga bogus na “taong” nabigyan ng confi funds ni VP Sara, ay baka mga bogus na “tao” rin ang mga nabigyan ng confi and intel funds ni Pres. Bongbong Marcos (PBBM), boom!

Desisyon ng QuadComm, tama na ‘di padaluhin sa hearing si ex-P-Duterte

ni Pablo Hernandez @Prangkahan | Dec. 9, 2024

‘DI IMPORTANTE KAY SEN. BONG GO SAAN MAN IPINUWESTO SA SIGNING NG PRESIDENTE SA PANUKALANG BATAS NIYA, MAHALAGA SA KANYA BATAS NA ITO PARA SA KAPAKANAN NG MGA EVACUEES -- Ang panukalang batas ni Sen. Bong Go na “Ligtas Pinoy Centers Act” o paglalagay ng mga permanenteng maayos na evacuation center sa bawat city at municipality ay ganap nang batas matapos na ito ay lagdaan ni Pres. Bongbong Marcos nitong nakalipas na Dec. 6, 2024. 

Dahil ito ay panukalang batas ni Sen. Bong Go, obligado siyang magtungo sa Malacanang para saksihan ang paglalagda rito ni PBBM, kaya lang kapuna-puna sa mga video at larawan na isinapubliko ng Presidential Communications Office (PCO) na hindi siya ang ginawang bida sa Malacanang, kasi imbes na sana ay kabilang siya sa nasa unahan ay sa likod at sa dulo siya ipinuwesto.

Gayunman, hindi importante kay Sen. Bong Go kung saan man siya ipinuwesto sa signing ng kanyang panukalang batas, basta’t ang mahalaga sa kanya ay batas na ito dahil ang makikinabang dito ay mga evacuees na ang mga lugar ay tinatamaan ng kalamidad, palakpakan naman diyan!

XXX

MANDATO NG KAMARA NA AKSYUNAN ANG IMPEACHMENT KAY VP SARA, PERO KAPAG INAPRUB NILA ITO NA IAKYAT SA SENADO, PINUPULITIKA NILA ANG BISE PRESIDENTE -- Sinabi ng mga kongresista na obligado raw nilang aksyunan ang inihaing impeachment complaint kay Vice Pres. Sara Duterte-Carpio kasi nga raw mandato nila ito ayon sa nakasaad sa Konstitusyon.

Korek, mandato talaga nila iyan, at nasa kanilang pagpapasya kung ibabasura ito o kung aaprubahan para maiakyat sa Senado.

Kaya kapag iyang impeachment ay inaprubahan nilang maiakyat sa Senado, isa lang ang ibig sabihin niyan, pinupulitika nila nang todo si VP Sara para mapatalsik ito sa poder, boom!

XXX

TAMA ANG DESISYON NG QUADCOMM NA HUWAG NANG PADALUHIN SA HEARING SI EX-P-DUTERTE KASI MATANDA NA, MAY SAKIT AT MAHINA -- Ayon kay House Quad Committee Chairman Ace Barbers ay hindi na raw nila iimbitahan si ex-P-Duterte sa extrajudicial killings (EJK) hearing sa Dec. 12, 2024.

Aba’y dapat lang, kasi hindi talaga katanggap-tanggap sa publiko na ang may edad na, mayroong iniindang sakit at hirap nang maglakad na dating presidente ay gisahin uli sa Kamara, period!

XXX

CUSTOMS, WALANG AKSYON SA PAGPUPUSLIT NI ‘ENTENG CHENG’ NG MGA CHINESE PAPUTOK SA ‘PINAS -- May impormasyon na ngayong nalalapit na ang Kapaskuhan at Bagong Taon, ay nagpupuslit na naman daw si alyas “Enteng Cheng” ng mga smuggled Chinese firecrackers sa bansa.

Taun-taon ay ganyan ang raket ni “Enteng Cheng” pero ang kataka-taka sa kabila na ilegal ang smuggling ay walang ginagawang aksyon ang mga Customs official para “dakpin” ang Chinese paputok smuggler na ito, boom!