Direk Darryl Yap, lugi na sa pelikulang ‘The Rape of Pepsi Paloma’, malamang mag-abono pa ng P35M

ni Pablo Hernandez @Prangkahan | Jan. 11, 2025

AFP CHIEF NA ANG NANAWAGAN SA PUBLIKO, BUMOTO NANG TAMANG KANDIDATO -- Nagpalabas ng statement si AFP Chief of Staff, Gen. Romeo Brawner sa publiko na hindi kudeta o military junta ang solusyon sa mga problemang kinakaharap ng bansa, kundi ayon sa kanya ay mapapabuti lang ang pamumuhay ng mga mamamayan kung tamang kandidato ang iboboto sa darating na May 2025 midterm elections.

Tama ang sinabing iyan ni Gen. Brawner, dapat bumoto nang tama ang taumbayan, at ang dapat iluklok ay iyong mga pulitikong walang political dynasty at mga pulitikong walang bahid ng corruption, period!

XXX

SABI NOON NI EX-VP LENI, POLITICAL DYNASTIES SANHI NG KAHIRAPAN NG ‘PINAS AT DAHIL MARAMING ‘KAMAG-ANAK INC.’ NA MGA KAKANDIDATO, ASAHANG LALONG TITINDI ANG KAHIRAPAN SA BANSA -- Nang maimbitahan ang noo’y Vice Pres. Leni Robredo noong April 2018 sa London School of Economics and Political Science ay natanong siya ng mga estudyante kung bakit mahirap ang Pilipinas, ang tugon dito ng dating bise presidente ay dahil sa political dynasties, napakaraming magkakapamilyang may iba’t ibang posisyon sa pamahalaan.

Tama ang sinabing iyan ni ex-VP Leni kasi lahat ng may political dynasty, mag-asawang pulitiko, kanilang mga anak at kapatid na mga pulitiko rin, lahat ng mga iyan ay mga nagsiyaman sa pulitika, at sa kabilang banda, patuloy na naghihirap ang pamumuhay ng mayoryang mamamayan.

Itong darating na May 2025 midterm election ay mas dumami pa ang “Kamag-anak Inc.” na may mga sikat na apelyido ang mga nagsipagkandidato at kapag ang mga iyan ay nanalo, asahan nang mas lalong titindi ang kahirapan sa ‘Pinas, boom! 

XXX

LALONG GAGANAHAN ANG PRO-MARCOS CONGRESSMEN I-IMPEACH SI VP SARA KASI SA SURVEY MAJORITY PINOY GUSTONG MA-IMPEACH ANG BISE PRESIDENTE -- Sa isinagawang survey ng Social Weather Stations (SWS) ay 41% ng mga Pinoy ang pabor na ma-impeach si VP Sara Duterte at 35% lang ang tutol mapatalsik siya sa puwesto.

Dahil sa survey na iyan, tiyak mas lalong gaganahan ang mga pro-Marcos congressmen na i-impeach si VP Sara, abangan!

XXX

KAPAG ANG ‘THE RAPE OF PEPSI PALOMA’ HINDI NAIPALABAS SA MGA SINEHAN, LUGI NA SI DIREK YAP, ABONADO PA SIYA NG P35M -- Sablay ang naisin ni film director Darryl Yap na kumita ang pelikula niyang “The Rape of Pepsi Paloma”, tiyak lugi siya rito.

Hindi kikita kasi malamang hindi payagan ng korte at ni Movie and Television Review and Classification Board (MTRCB) Chairman Lala Sotto maipalabas ito sa mga sinehan, at lugi o abonado pa dahil kinasuhan ni actor and comedian Vic Sotto si Yap ng 19-counts ng cyber libel at P35 million damages, boom!

Malacañang, ibinibidang gumanda ang pamumuhay ng mga Pinoy sa Marcos admin, fake news

ni Pablo Hernandez @Prangkahan | Jan. 10, 2025

PAHIRAP ANG DAGDAG-BUTAW SA SSS, KAYA TANGA NA LANG ANG BOBOTO SA MGA SENATORIAL CANDIDATE NI PBBM -- Dinepensahan ng Malacanang ang 15% monthly contribution sa mga Social Security System (SSS) member, na ayon kay Executive Sec. Lucas Bersamin ay dumaan naman daw sa masusing pag-aaral ang SSS contribution hike na ito kaya aprub kay Pres. Bongbong Marcos (PBBM).

Ang dagdag-butaw na iyan ay malaking pahirap sa buhay ng mga SSS member, at dahil aprubado ito ng Malacanang ay masasabi nating malaking katangahan na kung may mga miyembro ng SSS ang boboto pa sa mga “manok” ni PBBM sa pagka-senador, period!

XXX

HINDI GINHAWA KUNDI DUSA ANG INABOT NG 31M BUMOTO KAY PBBM -- Bukod sa patuloy na pagtaas ng presyo ng mga bilihin at bayarin, sunud-sunod na oil price hike, 15% sa monthly butaw sa SSS, may isa pang paparating na dagdag-pahirap sa mga commuter at ito ay ang nagbabadyang taas-pasahe sa LRT, na sa biyaheng short distance ay P8.65 ang dagdag, sa medium distance ay P6.00 at sa long distance ay P12.50.

Akala ng 31 milyong botante na bumoto kay PBBM ay giginhawa ang pamumuhay nila kapag naging presidente ito, ‘yun pala ay dusa, tsk!

XXX

FAKE NEWS ANG IBINIBIDA NG MALACANANG, SENADO AT KAMARA NA GUMANDA ANG PAMUMUHAY NG MGA PINOY SA ILALIM NG MARCOS ADMIN -- Sa latest survey ng Social Weather Stations (SWS) ay 63% pamilyang Pilipino ang nagsabing sila ay mga mahihirap.

Ang survey na iyan ang magpapatunay na fake news ang ibinibida ng Malacañang, Senado at Kamara na gumaganda ang pamumuhay ng mga Pinoy sa ilalim ng Marcos administration, boom!

XXX

KAYA DAMING MAHIRAP DAHIL MARAMI RING ‘KAMAG-ANAK INC.’ POLITICIANS -- Ang isa sa dahilan kung bakit maraming pamilyang Pinoy ang naghihirap ay dahil sa kaboboto ng mga botante sa mga political dynasty o “Kamag-anak Inc.” sa pulitika.

Sa totoo lang, lahat ng magkakamag-anak na pulitiko na may mga posisyon sa pamahalaan ay ubod nang yayaman kasi nga, kung sila ay senador, district congressmen o partylist representatives, lahat sila ay may pork barrel funds, at kung sila naman ay mayor, mayroon silang confidential funds.

Kaya kung nais ng 63% mahihirap na pamilyang Pinoy na guminhawa ang kanilang pamumuhay ay ibasura nila sa eleksyon ang lahat ng mga “Kamag-anak Inc.” candidate na kalahok sa May 2025 midterm elections, period!

SSS pres. sa Malacañang nagpa-presscon para buwisitin mga SSS member sa walang atrasang contribution hike

ni Pablo Hernandez @Prangkahan | Jan. 9, 2025

DAPAT IMBESTIGAHAN ANG CONFI FUNDS NG DAVAO CITY AT MAKATI CITY, BAKA MGA ‘BENEFICIARY’ WALA RING BIRTH RECORDS SA PSA -- Top o number 1 ang Davao City sa laki ng ginastos na confidential fund na pumalo sa halagang P530 million at pumangalawa ang Makati City na umabot sa P240 million ang ginasta sa confi fund.

Kung walang plano sina Davao City Mayor Baste Duterte at Makati City Mayor Abby

Binay na ipaliwanag sa publiko kung saan nila ginastos ang daan-daang milyong pisong ito na public funds, dapat ay imbestigahan din ito ng Quad Committee ng Kamara kasi baka ang mga naging “beneficiaries” ng mga confidential funds ng Davao at Makati Cities ay tulad din ng “beneficiaries” ng confi funds ni Vice Pres. Sara Duterte-Carpio na ayon sa ibinulgar ng PSA ay mga walang “birth records,” period!

XXX

MALAMANG PAGBABA NI PBBM SA PUWESTO SA 2028 MAS MALAKI ANG IIWAN NITONG UTANG KAYSA KAY EX-P-DUTERTE -- Inanunsyo ng Bureau of Treasury (BOT) na pumalo na sa higit P16.09 trillion ang utang ng Pilipinas sa iba’t ibang financial institution sa mundo.

Ang laki na ah, samantalang nang bumaba sa puwesto si ex-P-Duterte ang iniwang utang nito sa bansa ay higit P12 trillion, pero ngayon ang utang ng ‘Pinas ay higit P16 trillion na.

Diyan makikita na kapag bumaba na sa poder si Pres. Bongbong Marcos (PBBM) sa June 30, 2028, ay lubog na tayo at mas malaki ang iiwan nitong utang ng bansa kaysa sa iniwang utang ni ex-P-Duterte, tsk!

XXX

KAYA MARAMING PINOY ANG NAGKAUTANG DAHIL SUNUD-SUNOD ANG PAGTAAS NG PRESYO NG MGA BILIHIN AT BAYARIN -- Matapos ianunsyo ng Bangko Sentral ng Pilipinas (BSP) na dumami o pumalo sa 23.6 na mga Pinoy ang nangutang sa mga bangko at iba pang financial institution sa ‘Pinas last year ay isinapubliko naman ng Philippine Statistics Authority (PSA) na nitong nakalipas na December 2024 ay tumaas ng 2.9% ang presyo ng mga bilihin at bayarin. At sa data rin ng PSA, nagsimulang tumaas ang inflation rate noong October 2024 ng 2.3%, pagsapit ng November 2024 mas tumaas pa ito ng 2.5% at last December 2024 nga, pumalo na sa 2.9% ang itinaas ng inflation rate.

Ibig sabihin, kaya maraming Pinoy ang mga nangutang at nagkautang last 2024 ay dahil sa patuloy na pagtaas ng presyo ng mga bilihin at bayarin sa panahon ng Marcos administration, boom!

XXX

SA MALACANANG PA NAGPA-PRESSCON ANG SSS PRESIDENT PARA BUWISITIN ANG MGA SSS MEMBER SA WALANG ATRASANG CONTRIBUTION HIKE -- Nagtungo kamakalawa sa Malacanang si Social Security System (SSS) President Joseph Robert De Claro at matapos na magkaroon sila ng meeting ni PBBM ay nagpatawag siya ng presscon.

Inakala ng mga mamamahayag na iaanunsyo ni De Claro na hindi na itutuloy ang pahirap na 15% SSS contribution sa mga member, eh ‘yun pala kaya siya nagpatawag ng presscon ay para panindigan na tuloy at walang atrasan ang isasagawa nilang implementasyon sa dagdag na monthly butaw sa mga miyembro ng SSS.

Patunay ‘yan na si PBBM ang may gustong itaas sa 15% ang monthly butaw ng mga SSS member, kasi nga sa Malacanang pa nagpa-presscon si De Claro para buwisitin sa SSS contribution hike ang mga miyembro, tsk!