Zero budget ang PhilHealth, tinapyasan naman sa edukasyon, ‘bobo’ na lang ang boboto sa mga ‘manok’ ni PBBM

ni Pablo Hernandez @Prangkahan | Dec. 14, 2024

UMUUSOK SA GALIT SINA SEN. BONG GO AT SEN. HONTIVEROS SA PAG-ZERO BUDGET SA PHILHEALTH NG MGA PRO-MARCOS SENATOR AND CONGRESSMEN -- Umuusok sa galit sina Sen. Bong Go at Sen. Risa Hontiveros nang i-zero budget ng mga pro-Marcos senator and congressmen ang PhilHealth sa katuwiran ng mga ito na sobra-sobra naman daw ang budget ng ahensya.

Sabi ni Sen. Bong Go na dapat daw ay healthcare ng mamamayan ang maging prayoridad ng gobyerno at ikinabahala niya na kapag naubos ang sobrang pondo ng PhilHealth, ang kaawa-awa ay ang mga mahihirap na may sakit, at ayon naman kay Sen. Hontiveros, unconstitutional na hindi ito lagyan ng budget dahil obligasyon ng gobyerno na bayaran ang premiums ng mga maralitang Pinoy.

Dahil sina Sen. Bong Go at Sen. Hontiveros lang ang pumalag sa ginawang ito ng mga pro-Marcos senator and congressmen, sila lang ang masasabing may malasakit sa maralitang Pinoy, period!

XXX

DAHIL SA GINAWANG PAG-ZERO BUDGET SA PHILHEALTH, DAPAT I-ZERO VOTE RIN NG MGA BOTANTE ANG MGA ‘MANOK’ NI PBBM SA PAGKA-SENADOR -- Kapag inaprub ni Pres. Bongbong Marcos (PBBM) ang ginawang pag-zero budget ng mga pro-Marcos senator and congressmen sa PhilHealth, dapat rumesbak ang mamamayan.

Ang dapat gagawin ay i-zero vote rin ng mamamayan ang lahat ng ‘manok’ o kandidato ni PBBM sa 2025 senatorial election, boom!

XXX

DAMING MAHIHIRAP NA MAY SAKIT ANG BAKA HINDI NA MAKAPAGPAGAMOT, AT BAKA MARAMING KABATAAN DIN ANG HINDI NA MAKAPAG-ARAL -- Kung ang PhilHealth ay zero budget, tinapyasan naman ng mga pro-Marcos senator and congressmen ang budget sa edukasyon. Sa Dept. of Education (DepEd) ay P12 billion ang tinapyas, sa Commission on Higher Education (CHEd) ay P3 billion ang ibinawas at sa mga State Universities and Colleges (SUCs) ay P5.8 billion ang tinapyas din.

Dahil sa mga ginawang iyan ng mga pro-Marcos senator and congressmen, baka maraming mahihirap na may sakit ang hindi na makapagpagamot, at baka maraming kabataan na kahit gusto ay hindi makapag-aaral next year (2025), tsk!

XXX

‘BOBO’ LANG ANG MGA BOBOTO SA MGA MANOK NG MARCOS ADMIN SA PAGKA-SENADOR, DAHIL ZERO BUDGET NA ANG PHILHEALTH AT TINAPYASAN PA ANG EDUKASYON -- Hindi katanggap-tanggap ang ginawa ng mga pro-Marcos senator and congressmen na pag-zero budget sa PhilHealth at pagtapyas sa budget ng DepEd, CHEd at SUCs.

Kaya kapag sa May 2025 election ay ibinoto pa ng majority Pinoy ang mga kandidato sa pagka-senador ni PBBM ay masasabi nating kabobohan na ‘yan ng mga botante, kasi ginawa na ngang zero ang budget sa PhilHealth, tinapyasan pa ang budget sa edukasyon, tapos ibinoto at ipinanalo pa nila sa halalan ang mga manok ng Marcos admin sa 2025 senatorial election, boom!

Mga ‘buwaya’ sa Customs para mawala, dapat isapribado

ni Pablo Hernandez @Prangkahan | Dec. 13, 2024

VP SARA HANDANG HUMARAP SA IMPEACHMENT, PERO AYAW SA NBI INVESTIGATION -- Nitong nakalipas na Dec. 10, 2024 ay nagpakita ng tapang si Vice Pres. Sara Duterte-Carpio nang sabihin niyang handa niyang harapin ang mga impeachment complaints na isinampa sa Kamara laban sa kanya, pero nang tanungin ng mga mamamahayag kung nakahanda siyang pumunta sa National Bureau of Investigation (NBI) para maimbestigaan tungkol sa pagbabanta niya sa buhay nina Pres. Bongbong Marcos (PBBM), First Lady Liza Araneta-Marcos at Speaker Martin Romualdez, ang tugon ng bise presidente ay hindi raw siya pupunta para magpaimbestiga.

Iyan ang VP ng ‘Pinas, matapang sa impeachment, tiklop sa NBI investigation, boom!

XXX

DAHIL SA LIIT NG BUDGET NA INILAAN SA OVP, ASAHAN NA KARAMIHAN SA MGA EMPLEYADO NITO JOBLESS NEXT YEAR -- Sa pinal na desisyon ng majority senators tungkol sa 2025 national budget ay hindi na nila dinagdagan ang budget ng Office of the Vice President (OVP), inaprub na rin ng mga senador ang inilaan ng Kamara na P733M budget sa tanggapan ng bise presidente.

Ang laki ng tinapyas, kasi ang hirit ni VP Sara para sa kanilang tanggapan ay P2.03 billion, tapos ang inaprub lang ay P733M, at dahil diyan ay asahan na ng karamihan sa mga empleyado ng OVP na next year ay jobless na sila, tsk!

XXX

CUSTOMS,  DAPAT ISAPRIBADO NA PARA MAWALA NA ANG MGA ‘BUWAYA’ SA ADWANA -- Sa pagdinig ng Quad Committee ng Kamara patungkol sa illegal drugs shipments, nabulgar ang talamak na corruption, smuggling, tara system (payola), consignee for hire, fake consignee at harassment ng mga ‘buwaya’ sa Customs sa mga broker.

Iyan ang dahilan kaya ang daming milyonaryong opisyal at empleyado na taga-Customs.

Isa lang ang solusyon para matigil ang mga ganyang bad na gawain sa Adwana at ito ay isapribado ang Customs para otomatik mawala na sa Adwana ang mga ‘buwayang’ taga-Customs, period!

XXX

KAPAG ITINULOY NI CONG. ABANTE NA IMBESTIGAHAN ANG CUSTOMS, TIYAK MAHUHUBARAN NG MASKARA ANG MGA KURAKOT AT MGA SMUGGLER SA ADWANA -- Isa sa naungkat sa pagdinig sa QuadComm ay ang ilegal na pagpasok sa bansa ng mga “ukay-ukay” at nang tanungin ni Manila 6th Dist. Rep. Bienvenido Abante si Customs officer Camilo Cascolan kung bakit nakakalusot na maipuslit ang mga kargamentong ito sa Adwana ay wala itong maisagot at dahil diyan ay sinabi ng kongresista na posibleng mag-file siya ng resolusyon para imbestigahan ang talamak na katiwalian sa Customs.

Sana mag-file na si Cong. Abante ng resolusyon para mahubaran ng maskara ang mga ‘buwaya’ sa Customs at mga smuggler na nagpapanggap na brokers, boom!

Hangarin ng Kamara na ma-impeach si VP Sara, ‘suntok sa buwan’

ni Pablo Hernandez @Prangkahan | Dec. 12, 2024

DAHIL VOTE STRAIGHT SA PDP CANDIDATES, HIRIT NI EX-P-DUTERTE, PARANG NANAWAGAN NA RIN SIYA SA MILYUN-MILYONG DDS NA IBASURA ANG MGA ‘MANOK’ NI PBBM SA 2025 ELECTION -- Nanawagan si ex-P-Duterte sa milyun-milyong Duterte Diehard Supporters (DDS) na i-vote straight sa pagka-senador ang mga kapartido niya sa Partido Demokratiko Pilipino (PDP) na sina reelectionists Sen. Bong Go at Sen. Ronald Dela Rosa, kasama sina Sagip Partylist Rep. Rodante Marcoleta, actor Philip Salvador, former Pagcor official, singer Jimmy Bondoc, former Presidential Adviser for Northern Luzon Raul Lambino at former Dept. of the Interior and Local Gov’t. (DILG) Usec. Jayvee Hinlo.

Dahil vote straight ang hirit ni ex-P-Duterte para sa mga PDP senatorial candidates ay parang nanawagan na rin siya sa mga DDS na ibasura ang mga ‘manok’ ni Pres. Bongbong Marcos (PBBM) sa pagka-senador, boom!

XXX

HANGARIN NG KAMARA NA MA-IMPEACH SI VP SARA, ‘SUNTOK SA BUWAN’ -- Nakiisa na rin si Sen. Sherwin Gatchalian kina Senators Bong Go, Ronald Dela Rosa, Robin Padilla, Migz Zubiri, Nancy Binay, Jinggoy Estrada at JV Ejercito sa pagkontra sa pagpapa-impeach kay Vice Pres. Sara Duterte-Carpio, at bagama’t wala pang official statement sa isyung ito si Sen. Imee Marcos ay posibleng tutulan din niyang ma-impeach ang bise presidente.

Dahil diyan ay masasabing “suntok sa buwan” ang hangarin ng Kamara na ma-impeach si VP Sara, period!

XXX

HINDI LANG MGA BAGYO SANHI NG PAGLAGAPAK NG EKONOMIYA NG BANSA, KUNDI PATI SA MALALANG KORUPSIYON SA ‘PINAS -- Inanunsyo ng World Bank (WB) na lumagapak ang ekonomiya ng Pilipinas dahil sa mga sunud-sunod na bagyong tumama sa bansa.

Sa totoo lang, hindi lang naman ang mga nanalasang bagyo sa bansa ang sanhi ng paglagapak ng ekonomiya, kundi pati ang malalang korupsiyon sa ‘Pinas, boom!

XXX

MALAPIT NANG MAHUBARAN NG MASKARA ANG MGA RICE IMPORTER NA MIYEMBRO NG SINDIKATONG RICE CARTEL -- Hiniling ni Albay 2nd Dist. Rep. Joey Salceda sa Bureau of Internal Revenue (BIR) na tingnan kung nagbabayad ng tamang buwis ang mga rice importer sa bansa.

Ayos ‘yan, at dahil diyan ay malapit nang mahubaran ng maskara kung sino sa mga rice importer ang mga miyembro ng sindikatong rice cartel na naghu-hoard ng bigas na nagdudulot ng pagtaas ng presyo nito sa merkado, abangan!