AKAP mas mainam kesa pork barrel funds na tiwaling politicians lang ang nakikinabang

ni Pablo Hernandez @Prangkahan | Dec. 17, 2024

MAS MAINAM ANG AKAP KAYSA PORK BARREL -- Hindi dapat binabatikos ang pondong inilaan sa Ayuda sa Kapos ang Kita Program (AKAP) ng Dept. of Social Welfare and Development (DSWD) kasi sa totoo lang, mas mainam iyang AKAP kaysa pork barrel funds.

Sa AKAP kasi ay tiniyak ni DSWD Sec. Rex Gatchalian na mga mamamayang minimum wage earners at mga mas mababa pa ang kinikita ang makikinabang dito (AKAP), kaysa naman sa nabulgar na pork barrel scam noong year 2013 na si pork barrel queen Janet Napoles at ilang tiwaling pork barrel politicians lang ang nakinabang, period!

XXX

LUMABAS NA MAS MARAMI ANG OVP CONFI FUNDS GHOST BENEFICIARIES KAYSA DEPED CONFI FUNDS GHOST BENEFICIARIES -- Inanunsyo ng Philippine Statistics Authority (PSA) na sa 1,992 pangalan na sinasabing nabiyayaan ng confidential funds ng Office of the Vice President (OVP), ang 1,332 dito ay wala ring birth records, samantalang ang 670 pangalan na binigyan din daw ng confi funds ay maraming mga kapangalan.

Iyan ang sinasabi natin na lalabas sa pagsusuri ng PSA na mas maraming “confi funds ghost beneficiaries” sa OVP kasya “confi funds ghost beneficiaries” sa pinamumunuan ni VP Sara noon na Dept. of Education (DepEd). Ayon nga rin sa inanunsyo ng PSA noon na sa 677 “benepisyaryo” ng DepEd confi funds ay 405 dito ang wala ring birth records, at marami rin kapangalan ang 272 pangalan na “nabigyan” din daw ng confidential funds, boom!

XXX

KAPAG SINUSPINDE NG SEC ANG HIGIT 11,699 KUMPANYA, TIYAK MILYUN-MILYONG MADADAGDAG NA JOBLESS SA ‘PINAS -- Sinabi ng Securities and Exchange Commission (SEC) na posibleng suspendihin daw nila ang operasyon ng higit 11,600 kumpanya sa buong bansa dahil sa kabiguan na magsumite sa kanilang tanggapan ng financial statements at general information sheets.

Bakit naman sususpendihin ang operasyon, gayong puwede namang pagmultahin na lang?

Kapag tinotoo ng SEC ang banta nilang iyan ay asahan nang madadagdagan ang milyun-milyong jobless sa ‘Pinas, tsk!

XXX

SIBAKIN SINA CUSTOMS COMM. RUBIO AT DA SEC. LAUREL KAPAG WALA PA SILANG NAHULING MGA SMUGGLER -- Noong July 2023 State of the Nation Address (SONA) ni Pres. Bongbong Marcos (PBBM) ay binalaan niya ang mga agri-smuggler na kesyo tapos na raw ang happy days ng mga ito, sabay utos sa Customs at Dept. of Agriculture (DA) na magsanib-puwersa sa pagtugis sa lahat ng mga smuggler sa Adwana, pero makalipas ang mahigit isang taon ay kahit isang smuggler ay wala pang nahuhuli ang mga otoridad.

Kamakalawa ay inatasan na naman ni PBBM ang Customs at DA na manghuli ng mga smuggler para raw masampahan na ng pinalakas na kasong Anti-Agricultural Sabotage Act of 2016.

Sakaling wala pa rin mahuling smuggler, ang dapat nang gawin ni PBBM ay sibakin sa puwesto sina Customs Comm. Bienvenido Rubio at DA Sec. Francisco Tiu Laurel, period!

POGO, ipina-ban na pero mga vlogger tuloy pa rin sa pagpu-promote sa socmed

ni Pablo Hernandez @Prangkahan | Dec. 16, 2024

TINIYAK NI SEC. GATCHALIAN NA WALANG PAPEL ANG MGA PULITIKO SA AKAP AT PATUNAY ANG STATEMENT ‘YAN NA NASA MABUTING KAMAY AT PAMAMAHALA ANG DSWD -- Tiniyak ni Sec. Rex Gatchalian ng Dept. of Social Welfare and Development (DSWD) na walang magiging papel ang mga pulitiko sa implementasyon ng P26 billion DSWD aid program na Ayuda sa Kapos ang Kita Program (AKAP) na ayon pa sa kanya, lahat ng minimum wage earners o mas mababa pa ang kinikita rito ay puwedeng magtungo sa lahat ng tanggapan ng kagawaran sa bansa para mabigyan ng ayuda.

Ang statement na iyan ni Sec. Gatchalian ay pagpapatunay na sa kanyang pamumuno sa kagawaran ay nasa mabuting kamay at pamamahala ang DSWD, palakpakan naman diyan!

XXX

BAKA GAWIN DIN NG KONGRESO KAY VP SARA ANG MABILIS NA PAG-IMPEACH KAY SOUTH KOREAN PRES. YEOL -- Sa loob lang ng 10 araw ay na-impeach o napatalsik sa puwesto si South Korean Pres. Yoon Suk Yeol. Nag-ugat ito nang magdeklara siya ng Martial Law noong Dec. 3, 2024 dahil daw sa banta ng komunistang North Korea. At makalipas lang ang halos 6 na oras ay ni-lift din ng SoKor president ang batas-militar, at pagkaraan niyan, Dec. 4, naghain ng impeachment case sa kanilang presidente ang oposisyon at nitong Dec. 14 o sa loob lang ng 10 araw, na-impeach na ito.

Ang nais nating ipunto rito ay ‘yung mabilis na pagpapa-impeach kay SoKor Pres. Yeol ay baka gayahin ng Kongreso, na bilisan din nila ang pagpapa-impeach kay Vice Pres. Sara Duterte-Carpio, abangan!

XXX

AUTHOR NG POGO LAW NA SI SEN. PIA CAYETANO, LAGING PASOK SA TOP 12 SENATORIABLES, KUNG GANU’N PABOR BA SA POGO ANG MAJORITY PINOY? – Tila majority Pinoy ay pabor sa Philippine Offshore Gaming Operators (POGO).

Nasabi natin ito kasi sa kada labas ng mga survey tungkol sa 2025 senatorial election ay laging pasok sa top 12 ang author ng POGO Law sa panahon ng Duterte administration na si reelectionist Sen. Pia Cayetano, boom!

XXX

IPINA-BAN NA NGA NI PBBM ANG POGO, PERO MGA VLOGGER TULOY PA RIN SA PAGPU-PROMOTE NG POGO ONLINE GAMBLING -- Kahit ipina-ban na ni Pres. Bongbong Marcos (PBBM) ang POGO sa bansa, ay kapuna-puna na tuloy pa rin ang pagpu-promote ng mga vlogger ng mga POGO online gambling.

Isa lang ang paraan para matigil na ang raket na ito, at ito ay sa pamamagitan ng pagsasampa ng kaso sa mga vlogger na nanghihikayat sa mga netizens na tumaya sa pamamagitan ng GCash sa mga POGO online gambling sa social media, period!

Panelo, mistulang komedyante sa hirit na ‘Robin Padilla for President’ sa 2028

ni Pablo Hernandez @Prangkahan | Dec. 15, 2024

TAWANAN SA SOCMED ANG MGA NETIZENS NANG SABIHIN NI PANELO ANG ‘ROBIN PADILLA FOR PRESIDENT’ SA 2028 -- Nagpalabas ng statement si former Presidential Legal Counsel Atty. Salvador Panelo na kapag in-impeach o ipinakulong daw si Vice Pres. Sara Duterte-Carpio ay si Sen. Robin Padilla raw ang gagawing pambato ng Partido Demokratiko Pilipino (PDP) sa 2028 presidential election.

Libu-libong netizens sa social media ang nag-“ha-ha-ha” reactions sa sinabing iyan ni Panelo, kasi nagmistula siyang komedyante sa statement niyang ‘yan na “Robin Padilla for President” sa 2028 presidential election, he-he-he!

XXX

TAMA ANG DESISYON NI VP SARA NA HUWAG TAKASAN ANG MGA KASONG ISASAMPA SA KANYA -- Ayon kay VP Sara, hindi raw siya lalabas ng bansa para takasan ang napipintong impeachment case at mga kasong kriminal na posibleng isampa sa kanya ng Marcos administration.

Aba’y dapat lang na huwag niya itong takasan, kasi kapag hindi niya hinarap ang impeachment case at mga kasong kriminal na isasampa sa kanya at nagtago siya ay tiyak maglulundag sa tuwa ang mga anti-Duterte politician dahil iyan naman talaga ang gusto nila, ang mawala siya (VP Sara) sa poder bilang bise presidente ng ‘Pinas, period!

XXX

BASTA’T POOR AT ‘DI SIKAT NA KANDIDATO REJECT SA COMELEC -- Kinumpirma ng Comelec na pinal na silang nagdesisyon na 66 senatorial candidates lang ang pinayagan nilang kumandidato at tuluyan na nilang ibinasura ang kandidatura ng 117 pang senatorial aspirants, na ayon sa kanila ay mga nuisance candidate ang mga ito.

Para sa kaalaman ng publiko, sa 117 senatorial aspirants na ito na inalis ng Comelec sa listahan ng mga kandidato ay 18 sa mga iyan ay nag-file ng motion for reconsideration na payagan silang kumandidato, pero ni-reject pa rin sila ng komisyon sa kadahilang sila ay mga poor at hindi mga sikat.

Iyan ang bad sa Comelec, basta’t poor at ‘di sikat ang kandidato, reject sa komisyon, tsk!

XXX

PARA MATIGIL ANG PAGGAWA NG MGA PEKENG PWD IDs, DAPAT LANSAGIN ANG SINDIKATONG GUMAGAWA NG MGA PEKENG ID SA QUIAPO, MANILA -- Magsasagawa ng crackdown ang Bureau of Internal Revenue (BIR) laban sa mga gumagamit ng mga pekeng person with disability (PWD) identification cards (IDs) para makakuha ng diskwento at makalibre sa value-added tax (VAT).

Sana ang unang aksyon na gawin ng BIR ay makipag-ugnayan sa Manila Police District (MPD) Director, Brig. Gen. Thomas Ibay para hulihin, kasuhan at ikulong ang mga sindikato na gumagawa ng iba’t ibang uri ng mga IDs sa Quiapo, Manila kasi hangga’t hindi nalalansag ito ay patuloy na dadami ang magtataglay ng mga pekeng PWD ID, period!