Kasong isasampa kina ex-P-Duterte malamang idismis ng korte, hearsay lang ang ‘ebidensya’

ni Pablo Hernandez @Prangkahan | Dec. 20, 2024

UNFAIR KINA SEN. BONG GO AT SEN. DELA ROSA, PLANONG PAGSASAMPA NG KASO SA KANILA, ITINAON NA RE-ELECTIONIST SILA SA PAGKA-SENADOR -- Inirekomenda ng Quad Committee ng Kamara na sampahan ng kasong paglabag sa international law crimes against humanity sina ex-P-Duterte, Sen. Bong Go, Sen. Ronald Dela Rosa, former PNP chiefs ret. Gen. Oscar Albayalde, ret. Gen. Debold Sinas, ret. Col. Edilberto Leonardo, former PCSO General Manager Royima Garma, Muking Espino at iba pang sangkot sa sinasabing naganap na extrajudicial killings (EJK) sa bansa sa panahon ng Duterte administration.

Sa totoo lang, unfair kina Sen. Bong Go at Sen. Dela Rosa ang ginawang ito ng QuadComm kasi nga pareho silang re-electionists sa pagka-senador, tapos pinasasampahan sila ng kaso na lumalabas ngayon na nagiging biktima ng political persecution ang dalawang nabanggit na senador, tsk!

XXX

PARA MATIYAK ANG PANALO NINA SEN. BONG GO AT SEN. DELA ROSA, DAPAT MGA KANDIDATO LANG NI EX-P-DUTERTE ANG IBOTO NG MILYUN-MILYONG DDS -- Ayon kay Sen. Dela Rosa, malinaw na paninira ang atakeng ito ng QuadComm sa kanila para matalo sila ni Sen. Bong Go, at kapag natalo raw silang dalawa, wala nang haharang sa impeachment case kay VP Sara.

Kaya ang dapat gawin ng milyun-milyong Duterte Diehard Supporters (DDS) ay sina Sen. Bong Go, Sen. Dela Rosa at iba pang manok ni ex-P-Duterte sa pagka-senador lang ang kanilang iboto para matiyak ang panalo ng mga senatoriable candidates ng dating pangulo, period!

XXX

DAHIL MGA HEARSAY LANG ANG ‘EBIDENSYA’, MALAMANG IDISMIS NG KORTE ANG ISASAMPANG KASO SA GRUPO NI EX-P-DUTERTE -- Ang alegasyon laban sa grupong ito ni ex-P-Duterte ay pulos hearsay lang ang sinasabing mga ebidensya ng QuadComm.

Ang nais nating ipunto rito ay malamang pagsapit sa korte, kung patas ang korte, malaki ang posibilidad na idismis lang ng korte ang mga kasong isasampa sa grupo ni ex-P-Duterte, period!

XXX

MALAKING NAGASTOS SA CONFI FUNDS NG MAKATI CITY HALL, IMBESTIGAHAN DIN KAYA NG KAMARA? -- Ibinulgar ng Commission on Audit (COA) na sa mga lungsod sa Metro Manila, ang Makati City daw ang may pinakamalaking ginastang confidential fund na umaabot sa halagang higit P240 million.

Ang kasalukuyang alkalde ng Makati ay si Mayora Abby Binay na kaalyado at kabilang sa senatorial line-up ng Marcos admin.

Kung nagawa ng Kamara na imbestigahan ang confi funds ni Vice Pres. Sara Duterte-Carpio na kalaban sa pulitika ng Marcos admin, ay magawa rin kayang imbestigahan ng mga kongresista kung nagastos sa tama ang confidential fund ng Makati City Hall, kung saan si Abby Binay ay kabilang sa manok ni Pres. Bongbong Marcos sa pagka-senador? Abangan!

Say ng ex-Finance Usec., pinaka-corrupt daw sa kasaysayan ng ‘Pinas ang ipinasang national budget next year

ni Pablo Hernandez @Prangkahan | Dec. 19, 2024

SA KASAYSAYAN NG ‘PINAS, PINAKA-CORRUPT DAW ANG IPINASANG NATIONAL BUDGET NEXT YEAR DAHIL ZERO SUBSIDY ANG PHILHEALTH, PINALOBO NAMAN ANG BUDGET NG DPWH -- Sinabi ni dating Finance Undersecretary Cielo Magno na pinaka-corrupt daw sa kasaysayan ng Pilipinas ang naipasang panukalang budget na P6.352 trillion next year kasi raw ginawang zero subsidy ang PhilHealth, tapos pinalobo nang pagkalaki-laki ang budget ng Dept. of Public Works and Highways (DPWH).

May punto si former Usec. Magno sa sinabi niyang ito kasi kung anong tanggapan ng pamahalaan ang laging nasasangkot sa ‘corruption’ tulad ng DPWH, ay ‘yun pa ang nilagyan ng pagkalaki-laking pondo ng majority senators and congressmen, period!

XXX

SA MARCOS ADMIN, PATULOY ANG PAMAMAYAGPAG NG MGA PORK BARREL POLITICIAN -- Ang proposed budget ng DPWH para sa year 2025 ay P900 billion, at ito ay inaprub agad ng Senado at Kamara.

Ito na ang siste, matapos ang bicameral conference ng majority senators and congressmen, ang P900B budget ng DPWH ay biglang lumaki, naging P1.1 trillion, “siningitan” ito ng P200B.

Kapag ang proposed budget ng isang ahensya ay siningitan ng dagdag na budget, ang tawag sa isiningit na ‘yan ay “pork barrel,” na ibig sabihin sa Marcos administration, patuloy ang pamamayagpag ng mga pork barrel politicians, buset!

XXX

DULOT NG BANGAYANG MARCOS AT DUTERTE, PAREHONG BAGSAK ANG RATING NINA PBBM AT VP SARA -- Sa latest survey na inilabas at isinapubliko ng Publicus Asia ay parehong bumagsak ang rating nina Pres. Bongbong Marcos (PBBM) at Vice Pres. Sara Duterte-Carpio. 

Mula sa dating 43% approval rating ni PBBM, bumaba ito sa 33% at sa dati niyang 32% trust rating, bumama rin ito sa 23%, samantalang sa dating 43% approval rating ni VP Sara, bumaba ito sa 37%, at sa kanya namang dating 33% trust rating, bumaba ito sa 31%.

Iyan ang dulot ng bangayan ng dating magkakamping PBBM at VP Sara, na dahil sa away-pulitika nila, parehong bagsak ang kanilang rating, boom! 

XXX

KAHIT MAGPA-PASKO NA, TULOY ANG ATAKE NG QUADCOMM KAY VP SARA -- Nitong nakalipas na Dec. 17, 2024 o isang linggo bago sumapit ang Pasko ay inatake na naman ng mga anti-Duterte politician si VP Sara, na ayon sa mga member ng Quad Committee ng Kamara ay dapat daw humarap ito sa imbestigasyon ng National Bureau of Investigation (NBI) kaugnay sa sinabi ng bise presidente na may inutusan daw siyang pumatay kina PBBM, First Lady Liza Araneta-Marcos at Speaker Martin Romualdez.

Talagang ayaw lubayan ng Quad Comm members si VP Sara, kahit na malapit nang mag-Pasko, tuloy ang atake nila sa bise presidente, tsk!

Lumalabas na si PBBM, nag-utos sa majority senators na i-zero subsidy ang PhilHealth

ni Pablo Hernandez @Prangkahan | Dec. 18, 2024

DAHIL APRUB KAY PBBM ANG ZERO SUBSIDY SA PHILHEALTH, LUMALABAS NGAYON NA SIYA ANG NAG-UTOS SA MGA KAALYADONG SENADOR NA ‘WAG BIGYAN NG BUDGET -- Sabi ni Pres. Bongbong Marcos (PBBM) ay tama raw ang ginawa ng majority senators na huwag nang bigyan ng subsidy ng gobyerno ang PhilHealth dahil nga raw ay malaki pa ang pondo ng ahensyang ito.

Dahil sa sinabing iyan ni PBBM ay pinutakti na naman siya ng batikos ng publiko at netizens sa social media kasi lumalabas ngayon na siya ang nag-utos sa mga kaalyado niyang senador na i-zero budget o subsidy ang PhilHealth, boom!

XXX

KUNG WALANG PANGGIGIBA KAY SEN. BONG GO, MALAMANG SIYA LAGI ANG RANK 1 SA KADA LABAS NG SENATORIAL SURVEYS -- Sa kabila ng mga panggigiba ng ilang anti-Duterte resource persons ng Quad Committee ng Kamara kay Sen. Bong Go ay bigo silang mailaglag ito sa top 12 senatoriables sa 2025 midterm elections.

Sa senatorial survey kasi ng Publicus Asia noong Dec. 14, 2024 ay rank number 5 si Sen. Bong Go, at sa survey kamakalawa (Dec. 16) ng Tangere Research Firm ay rank number 4 ang senador.

Kung walang panggigiba o paninira laban kay Sen. Bong Go ang mga QuadComm resource persons na sina former PCSO General Manager Royima Garma, former Sen. Antonio Trillanes, wanted na si former Col. Eduardo Acierto, at Philippine Drug Enforcement Agency (PDEA) Deputy Director General (DDG) Renato Gumban, ay malamang laging rank number 1 ang senador sa kada labas ng 2025 senatorial survey, period!

XXX

KAHIT MGA QUADCOMM MEMBER HINDI NANIWALA SA MGA ALEGASYON LABAN KAY SEN. BONG GO -- Ang matinding demolition job o panggigibang ginawa kay Sen. Bong Go ay ‘yung isinama ni PDEA DDG Gumban ang pangalan ng senador sa drugs matrix at mabuti na lang ay inusisa ni ACT Teacher Partylist Rep. France Castro ang PDEA kung sangkot sa kalakaran ng droga ang senador, at nang sabihin ng PDEA official na hindi at kaya lang daw nila isinama sa matrix si Sen. Bong Go ay dahil kakilala raw nito si Alan Lim na nasasangkot daw sa droga. Kaya sa buwisit nina Cong. Castro, QuadComm chairman Surigao del Sur Rep. Ace Barbers at Manila 6th Dist. Rep. Bienvenido Abante, sinermunan nila ang mga taga-PDEA at sinabihang huwag magsama sa matrix ng pangalang hindi naman sangkot sa droga at huwag gagamitin ang komite para siraan ang senador.

Ibig sabihin niyan, kahit ang mga QuadComm member ay hindi naniniwala sa mga alegasyon ng anti-Duterte resource persons kay Sen. Bong Go, period!

XXX

IMBES BIGYANG SAYA ANG MGA PINOY DAHIL MAGPA-PASKO NA, BINIBIGYANG DUSA PA NG MARCOS ADMIN -- Kahapon ay nagpairal na naman ng panibagong oil price hike ang mga kumpanya ng langis at ito ay aprubado ng mga “bata” ni PBBM sa Dept. of Energy (DOE) at Energy Regulatory Commission (ERC) at dahil diyan ay asahan nang tataas na naman ang presyo ng mga bilihin at bayarin.

Hay naku, ilang araw na lang ay Pasko na, at imbes bigyang saya ng Marcos admin ang mga Pinoy, eh nagbibigay pa ng dagdag-dusa sa mamamayan, buset!