Mga ‘Kamag-anak Inc.’ politician na dedma sa mga binagyo at binaha, ibasura sa halalan

ni Pablo Hernandez @Prangkahan | Nov 18, 2024

PARA SA KAPAKANAN NG MAMAMAYAN ANG PANUKALANG BATAS NI SEN. BONG GO NA DEPARTMENT OF DISASTER RESILIENCE KAYA DAPAT SUPORTAHAN NG MGA KAPWA SENADOR AT MALACANANG -- Ang panukalang batas ni Sen Bong Go na pagtatatag ng Department of Disaster Resilience (DDR) ay dapat suportahan ng lahat ng senador at maging ng Malacanang lalo’t sunud-sunod na bagyo na ang tumatama sa Pilipinas.

Layunin ng panukalang batas na ito ni Sen. Bong Go ay magkaroon ng isang departamentong nakatutok sa paghahanda, pagresponde, maproteksyunan at mabigyan ng dagliang tulong o ayuda ang mamamayang nabibiktima ng kalamidad.

Sa totoo lang, mainam ang panukalang ito ni Sen. Bong Go at sana maisabatas na agad ito alang-alang sa kapakanan ng sambayanang Pinoy, period!

XXX

IBASURA SA HALALAN ANG MGA POLITICAL DYNASTY NA DEDMA SA MGA KABABAYANG BINAGYO AT BINAHA -- Kapuna-puna na ang karamihan sa mga political dynasty o “Kamag-anak Inc.” na may puwesto sa pamahalaan ay hindi nagpapakita ng pagbibigay ng tulong sa mga kababayan na nabiktima ng bagyo at baha.

Next year ay mid-term election na, at isa lang ang dapat gawin ng mamamayan, ibasura sa halalan ang mga “Kamag-anak Inc.” politician na dedma lang sa mga kababayang naging biktima ng bagyo at baha, period!

XXX

MGA ANTI-DUTERTE CONG., ASAR-TALO NA NAMAN SA PANG-IISNAB NI VP SARA SA HOUSE HEARING -- Sinabi ni Vice President Sara Duterte-Carpio na wala siyang planong dumalo sa imbitasyon ng House Committee on Good Governance and Public Accountability hearing sa Nov. 20, 2024 kaugnay sa imbestigasyon sa naging confidential funds ng bise presidente sa Office of the Vice President (OVP) at Dept. of Education (DepEd).

Dahil sa sinabing iyan ni VP Sara na iisnabin niya ang House hearing, ay tiyak asar-talo na naman ang anti-Duterte congressmen kasi hindi nila “magigisa” nang harapan ang bise presidente, boom!

XXX

IBIG SABIHIN NG SURVEY, 47% PINOY HINDI PA GUMIGINHAWA ANG PAMUMUHAY SA PANAHON NI PBBM KAYA ASA SILA NA SA NEXT 12 MONTHS GIGINHAWA NA ANG PAMUMUHAY NILA -- Sa survey ng SWS ay 47% ng mga Pinoy ang naniniwalang gaganda ang kanilang pamumuhay sa susunod na 12 buwan sa ilalim ng Marcos administration.

Ibig sabihin ng survey na iyan ay mula nang maging lider ng bansa si Pres. Bongbong Marcos (PBBM) ay hindi pa nakakatikim ng ginhawa sa pamumuhay ang 47% Pinoy, kaya umaasa sila, panalangin nila, na sa susunod na 12 buwan o isang taon, sana naman guminhawa na ang kanilang mga pamumuhay, period!

Sa isyung ICC at Interpol, PBBM, daming paek-ek, galit lang kay ex-P-Duterte

ni Pablo Hernandez @Prangkahan | Nov 17, 2024

MAPAPAHAMAK SI EX-P-DUTERTE SA PAG-WELCOME NI PBBM SA ICC AT INTERPOL -- Matapos kumalas ang Pilipinas sa jurisdiction ng International Criminal Court (ICC) noong May 13, 2019, magmula noon hindi na pinayagan ng noo’y Pres. Rodrigo Duterte ang mga ICC prosecutor at ICC investigators na pumasok sa bansa at nang wala na siya sa poder, mismong si Pres. Bongbong Marcos (PBBM) na ang nagsabi na papayagan niyang magtungo sa ‘Pinas ang mga taga-ICC para magsagawa ng imbestigasyon patungkol sa naganap na extrajudicial killings (EJK) sa panahon ng Duterte administration.

Noon talaga ay may lusot sa kasong crimes against humanity si ex-P-Duterte dahil hindi makapasok sa bansa ang mga taga-ICC, pero ngayon malalagay na sa tagilid ang ex-president kasi kung pagbabasehan ang statement ni PBBM ay tila ang Marcos admin pa ang magpapahamak sa dating pangulo sa kasong kinakaharap nito sa ICC, tsk!

XXX

DAMING PAEK-EK NI PBBM, KAYA LANG NAMAN WELCOME SA KANYA ANG ICC AT INTERPOL KASI GALIT SIYA KAY EX-P-DUTERTE -- Ang daming pakiyeme ni PBBM sa isyung ICC, na kesyo hindi raw babalik ang ‘Pinas sa jurisdiction ng ICC, hindi raw makikipag-cooperate rito (ICC), pero payag naman daw siyang papasukin sa ‘Pinas ang mga ICC prosecutors at investigators, at hindi naman daw hahadlangan ng kanyang administrasyon ang International Criminal Police Organization (Interpol) kapag may dala itong warrant of arrest para dakpin ang ex-president at iba pang may kaso sa ICC.

Daming paek-ek ni PBBM, eh hindi pa niya sabihin ang totoo na kaya welcome sa kanyang administrasyon na pumasok sa ‘Pinas ang ICC at Interpol ay dahil galit siya kay ex-P-Duterte sa statement nitong durugista raw siya, period!

xxx

NAGTUNGO SI VP SARA SA QUADCOMM HEARING PARA SUPORTAHAN ANG AMA AT HINDI PARA TUMANGGAP NG LETTER INVITATION – Kawalang galang sa Office of the Vice President (OVP) ang ginawa ng Kamara nang ibigay mismo kay Vice Pres. Sara Duterte-Carpio ang imbitasyon ng House Committee on Good Governance and Public Accountability habang nagpapakita ng morale support ang bise presidente sa ama niyang si ex-P-Duterte na iniimbestigahan naman ng House Quad Committee noong Nov. 13, 2024 patungkol sa isyung extrajudicial killings (EJK).

May sariling opisina naman si VP Sara, sana sa OVP dinala ang imbitasyon at hindi personal na iniabot kasi kaya nagtungo ang bise presidente roon para magpakita ng suporta sa ama at hindi para tumanggap ng invitation letter, period!

XXX

NUISANCE CANDIDATES ANG TURING NG COMELEC SA MGA MAHIHIRAP AT ‘DI SIKAT NA KANDIDATO SA PAGKA-SENADOR -- Nasa 70 senatorial candidates ang itinuturing ng Comelec na mga nuisance candidate kaya’t hindi nila papayagang kumandidato ang mga ito sa 2025 midterm election.

Ang 70 senatorial candidates na ito ay mga mahihirap lang at hindi mga sikat.

Ganyan ka-bad ang Comelec, kasi basta mahirap at hindi sikat ang apelyido, itinuturing nilang mga nuisance candidate, tsk!

Dahil sa tapang ni ex-P-Duterte, ‘Pinas rank 3 sa safest country sa Southeast Asia

ni Pablo Hernandez @Prangkahan | Nov 16, 2024

NAGING SAFEST CITY ANG DAVAO, NAGING SAFEST COUNTRY ANG ‘PINAS DAHIL SA TAPANG NI EX-P-DUTERTE -- Sa pagdinig sa Quad Committee ng Kamara ay sinabi ni ex-P-Duterte na para maging mapayapa ang pamumuhay ng kanyang mga kababayan sa Davao City, kailangan niyang magpakita ng tapang noong siya pa ang alkalde para puksain ang mga tulak, durugista at mga kriminal sa lungsod.

Ang pagiging palaban sa mga tulak, durugista at kriminal sa Davao City ay nagustuhan ng majority Pinoy kaya iniluklok siya bilang presidente ng bansa noong May 2016.

At sa totoo lang, ang pagiging matapang ni ex-P-Duterte laban sa mga tulak, durugista at kriminal ay may kinahinatnan naman, at hindi maitatanggi na naging mapayapa ang pamumuhay ng mamamayan, at patunay diyan ang data na rank 2 ang Davao City sa safest city sa buong Asya at rank 3 naman ang Pilipinas sa safest country sa buong Southeast Asia, palakpakan naman diyan!

XXX

SA TAPANG NI EX-P-DUTERTE KAYA MINAHAL SIYA NG MAMAMAYAN AT LAGING PANALO SA HALALAN -- Minahal ng mayoryang mamamayan ang pagiging matapang na lider ni ex-P-Duterte. Pero, matapang lang naman siya sa mga tulak, durugista at kriminal at hindi sa mga inosente o ordinaryong mamamayan.

Patunay na siya ay minahal ng publiko dahil mula nang pasukin niya ang pulitika ng maging Officer-in-Charge (OIC) vice mayor ng Davao City noong 1986, at kumandidato noong 1988 hanggang 2016 o halos tatlong dekada, ay never pa siyang natalo, lagi siyang panalo sa halalan, sa pagiging mayor, congressman, vice mayor hanggang presidente, period!

XXX

MARAMING NAPATAAS ANG KILAY NANG IBIDA NI REP. CARDEMA NA ANG DUTERTE YOUTH PARTYLIST LANG NILA ANG KUMAKALABAN SA MGA DURUGISTA, KRIMINAL AT KOMUNISTA -- Marami ang napataas ang kilay nang umepal si Duterte Youth Partylist Rep. Ducielle Cardema nang ibidang mahal niya ang Inang Bayan dahil nag-iisa lang daw ang partylist nila sa Kamara na kumakalaban sa mga durugista, kriminal at komunista.

Dahil sa sinabi niyang iyan, sinermunan ito ng mga kapwa niya kongresista, sinabihan siya nina Antipolo City Rep. Romeo Acop at Surigao Del Norte Rep. Ace Barbers na huwag daw solohin ni Cardema ang pagmamahal sa bayan dahil lahat daw silang nanunungkulan ay may pagmamahal sa bayan. At bukod diyan, pinutakti din ng bashers sa social media ang congresswoman, boom!

XXX

WA’ NA KUWENTA ANG PARTYLIST SYSTEM SA ‘PINAS -- Wala nang kuwenta ang partylist system sa ‘Pinas.

Nakasaad naman kasi sa batas na dapat ang mga partylist nagre-represent sa mga marginalized sector tulad ng kabataan, kababaihan, magsasaka, manggagawa, mangingisda, katutubo at iba pang kauri nito, pero sa ngayon ay karamihan na sa mga partylist, ang mga nominado ay kapamilya ng mga trapo (traditional politicians), at pati ang sikat na apelyido, ginagawa na ring partylist tulad ng apelyido ng dating presidente, dinugtungan lang ng “youth” aprub na sa Comelec bilang partylist, at ito nga ‘yung Duterte Youth Partylist, tsk!