Taumbayan, may alam sa batas ang dapat na iboto

ni Pablo Hernandez @Prangkahan | Nov. 24, 2024

SA PANGAMBANG MAG-ALA-ROYINA GARMA KAYA TODO-BANTAY SI VP SARA KAY ZULEIKA LOPEZ -- Todo-bantay si Vice President Sara Duterte-Carpio sa kanyang chief of staff na si Atty. Zuleika Lopez na kinontempt at ipinakulong ng Kamara.

Sa totoo lang, may dahilan si VP Sara na bantayan si Lopez kasi baka may kumumbinsi rito, na sa next hearing ng House Committee on Good Government and Public Accountability ay tumuga at idiin ang bise presidente sa sinasabing confidential funds scam, na baka mag-ala former PCSO General Manager Royina Garma ito (Lopez), na idiniin si ex-P-Duterte sa extrajudicial killings (EJK) sa bansa sa panahon ng Duterte administration, boom!

XXX

MAGAGALIT TALAGA SI VP SARA KASI DIS-ORAS NG GABI ILILIPAT NG KULUNGAN ANG KANYANG CHIEF OF STAFF -- Umuusok sa galit si VP Sara kina Pres. Bongbong Marcos (PBBM), First Lady Liza Araneta at Speaker Martin Romualdez nang puntahan ng mga miyembro ng Kamara Sergeant-at-Arms at mga pulis ang kanyang COS na si Lopez sa piitan nito sa House detention cell ng dis-oras ng gabi para ilipat na ikulong sa Correctional Institution for Women sa Mandaluyong City. Hanggang sa isugod na sa ospital ang chief of staff ng bise presidente. 

Magagalit talaga si VP Sara kasi mantakin n’yo, kasarapan ng tulog ni Lopez tapos gigisingin sa dis-oras ng gabi para ilipat ng kulungan, gayong puwede namang gawin ang paglilipat sa umaga, period!

XXX

MAY ALAM SA PAGGAWA NG BATAS ANG DAPAT IBOTO NG MAMAMAYAN, HINDI MGA MAGPAPABIDA LANG SA SENADO -- Karamihan sa mga pumapasok sa top 12 senatorial survey ng anumang survey firm ay ilang kilalang personalidad na wala namang alam sa paggawa ng batas.

Sa totoo lang, diyan nagkakaloko-loko ang bansa, na ang ibinoboto ng majority Pinoy ay mga sikat, pero walang alam sa paggawa ng batas.

Dapat isalpak ng majority Pinoy na ang mandato ng senador ay gumawa ng batas para sa kapakanan ng bayan at mamamayan, at hindi para lang magpabida sa Senado, boom!

XXX

PORKE DOLOMITE BEACH PROYEKTO NG DUTERTE ADMIN, HINAYAAN NA LANG NG MARCOS ADMIN MABALIK ITO SA DATING MARUMI -- May mga nag-viral sa social media na video at photo na napakarumi na ang dolomite beach sa Manila Bay sa Maynila.

Mantakin n’yo, nilinis at pinaganda ng Duterte admin ang Manila Bay, ginawa itong dolomite beach para maging pasyalan ng mamamayan, tapos porke proyekto ito ni ex-P-Duterte, sa kadahilanang nagkakabanggaan na ang Duterte at Marcos, hinayaan na lang na mabalik sa dating marumi at dugyot ang pasyalang ito sa baybaying dagat ng Maynila, tsk!

PBBM, parang sirang plaka sa kasasabing ban ang POGO pero may nag-o-operate pa rin

ni Pablo Hernandez @Prangkahan | Nov. 23, 2024

SIGURO NAINIS SI SPEAKER ROMUALDEZ NA KULELAT SA PRESIDENTIAL SURVEY KAYA INAATAKE SI VP SARA NA FRONT-RUNNER SA 2028 ELECTION – Kung dati ay tikom ang bibig ni Speaker Martin Romualdez sa mga isinasagawang imbestigasyon ng House Committee on Good Government and Public Accountability patungkol sa confidential fund ni Vice Pres. Sara Duterte-Carpio, ngayon nakiki-join na siya sa atake sa bise presidente na dapat daw dumalo na ito sa House hearing para ipaliwanag ang maanomalya umanong pagkaubos ng confi funds nito sa Office of the Vice President (OVP) at noong siya pa ang kalihim ng Department of Education (DepEd).

Siguro, ang atakeng ‘yan ni Speaker Romualdez kay VP Sara ay may bahid pagkainis, kasi nga naman panay ang banat ng mga anti-Duterte congressmen sa vice president, na inakala niyang bababa na ang rating nito pero ang nangyari front-runner pa rin ito sa eleksyon sa 2028, dahil nakakuha ang bise presidente ng mataas na 24% rating para sa 2028 presidential election survey, tapos siya (Romualdez) kulelat sa rating na 1% lang, he-he-he! 

XXX

MGA TRAPO AT MAY POLITICAL DYNASTY LANG YATA ANG GUSTO NG COMELEC NA LUMAHOK SA SENATORIAL ELECTION -- Karamihan sa mga idineklarang senatorial nuisance candidate ng Comelec ay hindi mga trapo at walang political dynasty, at ang karamihan naman sa pinayagan ng komisyon na kumandidatong senador ay mga trapo at may political dynasty.

Ganyan ka-bad ang Comelec ng ‘Pinas kasi ang gusto lang nila sigurong kumandidato sa pagka-senador ay mga trapo at may political dynasty, mga pwe!

XXX

SA PANAHON LANG NG MARCOS ADMIN NANGYARING SUNUD-SUNOD NA OIL PRICE HIKE -- Inanunsyo ni Assistant Director Rodela Romero ng Dept. of Energy-Oil Industry Management Bureau (DOE-OIMB) na next week ay may ipapatupad na namang oil price hike ang gobyerno, P0.70 hanggang P0.90 sa kada litro ng gasolina; P0.70 hanggang P1.00 sa kada litro ng diesel at P0.60 hanggang P0.70 sa kada litro ng kerosene.

Sa totoo lang, sa lahat ng mga administrasyon, ay sa Marcos administration lang nangyari ang sunud-sunod na oil price hike, buset!

XXX

MGA POGO OPERATOR WALANG TAKOT KAY PBBM -- Mismong si Sec. Jonvic Remulla ng Dept. of the Interior and Local Gov’t. (DILG) ang nagsabing may mga nagpapanggap na resorts at restaurants, pero ang totoo raw ay Philippine Offshore Gaming Operators (POGO) ang operasyon nito sa bansa.

Ang sinabing iyan ni Sec. Remulla ay indikasyon na walang takot kay Pres. Bongbong Marcos (PBBM) ang mga POGO operator, kasi mantakin n’yo, parang sirang plaka na si PBBM sa kasasabi na ban na ang POGO sa bansa, pero may mga nag-o-operate pa rin, boom!

PBBM, ayaw ng magarbong X-Mas party sa gobyerno pero pa-concert sobrang bongga

ni Pablo Hernandez @Prangkahan | Nov. 22, 2024

PINEPERSONAL NA BA NG MARCOS ADMIN ANG PAMILYA DUTERTE? -- Sa rekomendasyon ni Kabataan Partylist Rep. Raoul Manuel ay inaprubahan ng House Committee on Good Government and Public Accountability ang pagkuha ng mga dokumento na may kaugnayan sa confidential fund ni dating DepEd secretary, Vice Pres. Sara Duterte-Carpio upang imbestigahan din ng Kamara kung nagamit ito sa tama.

Kapag pati ang confidential fund ni Davao City Mayor Baste Duterte ay kuwestiyunin na rin ng Kamara, isa lang iisipin ng publiko at ito ay pinepersonal na ng Marcos administration ang pamilya Duterte, kasi si ex-P-Duterte ay iniimbestigahan sa extrajudicial killings (EJK), si Davao City Rep. Paolo Duterte at bayaw nito na si Atty. Mans Carpio na mister ni VP Sara ay iniuugnay sa drug shipment at si VP Sara sa confidential fund, period!

XXX

AYAW NI PBBM MAGING MAGARBO ANG X-MAS PARTY NG MGA TAONG-GOBYERNO, PERO KAPAG SIYA NAGPA-CONCERT SA MALACANANG SOBRANG BONGGA -- Na-bash na naman sa social media si Pres. Bongbong Marcos (PBBM) kaugnay sa panawagan niya sa mga departamento ng gobyerno na iwasang maging magarbo ang pagdaraos nila ng Christmas party.

Maba-bash talaga ang Presidente, kasi kapag nagpapa-concert siya sa Malacanang ay sobrang bongga, tapos ang mga empleyado ng gobyerno ay pagsasabihan niyang huwag gawing magarbo ang x-mas party, boom!

XXX

SANA ANG BAGONG PILIPINAS SERBISYO FAIR NI SPEAKER ROMUALDEZ AY WALANG BAHID-PULITIKA PARA SA KANDIDATURA NG MGA SENATORIAL CANDIDATE NI PBBM -- Inanunsyo ni Speaker Martin Romualdez na sa unang quarter daw ng year 2025 ay 13 probinsya ang pupuntahan ng “Bagong Pilipinas Serbisyo Fair” (BPSF) para magdala ng ayuda sa mga residente sa mga lalawigang ito.

Sana walang bahid-pulitika ang gagawing ‘yan ni Romualdez dahil kung mayroon man para ikampanya ang mga kandidato sa pagka-senador ng Marcos administration ay bad iyan, kasi pera ng bayan ang ginagamit na pondo ng BPSF at hindi ‘yan pera ng mga pulitiko, period!

XXX

KAHIT BAWAL ANG ‘UKAY-UKAY’ SA ‘PINAS, PARAMI NANG PARAMI PA RIN ANG NAGTITINDA NITO -- Habang nalalapit ang Pasko ay parami rin nang parami ang mga “ukay-ukay” na ibinebenta sa merkado.

Ang “ukay-ukay” o second hand clothes ay ipinagbabawal na ibenta sa ‘Pinas, base sa RA 4653, at ang sinumang lalabag sa batas na ito ay may parusang 2 taon hanggang 5 taon na pagkabilanggo at multang P20,000.

Hanggang walang ginagawang aksyon si Customs Commissioner Bienvenido Rubio laban sa mga “ukay-ukay” smugglers na sina alyas "Gerry," "Joel," "John Paul," "Janjan," "Ringgo," "Jimpol," "Egay," "Tina U.," "Bebang," "Big Mama" at "Kimberly" ay asahan nang lalo pang dadami ang mga panindang “ukay-ukay” sa bansa, boom!