Pangarap na maiahon sa kahirapan ang magulang, tiyak na matutupad

ni Maestro Honorio Ong @Kapalaran Ayon Sa Palad | August 18, 2024

KATANUNGAN

1. Gusto ko sanang mag-abroad. Ito lang din kasi ang alam kong paraan para maiahon ko sa kahirapan ang aking magulang na kasalukuyang nasa probinsya. Kaya naman, nag-apply ako bilang domestic helper sa Dubai.

2. Maestro, may pag-asa ba akong makapag-abroad? Once na natuloy ako, magiging maganda kaya ang trabaho ko roon, at magkakaroon kaya ako ng mabait na employer?

KASAGUTAN

1. May malinaw, makapal at malawak na Travel Line (Drawing A. at B. t-t arrow a.) sa kaliwa at kanan mong palad. Tanda na sa malapit na hinaharap, may pangako ng maalwan at positibong pangingibang-bansa na itatala sa iyong kapalaran, na madali namang kinumpirma ng birth date mong 1.

2. Karamihan sa mga indibiduwal na nagtataglay ng birth date na 1 ay nakakapag-abroad. Ang problema lang sa kanila, kapag nasa abroad na, minsan ay hindi sila marunong magtipid o magsinop ng kabuhayan. Kaya sa umpisa lang nagiging maalwan ang kanilang buhay, pero kapag tumagal na, mabilis ding nasisimot at nauubos ang kanilang pinagpaguran.

3. Hindi naman dapat mangyari iyon sa iyo, kaya ngayon pa lang pinapaalalahanan ka na ng iyong kapalaran, na kung sakaling bigyan ka ng magandang pagkakataong makapag-abroad, pilitin mong magtipid at magsinop ng bawat salapi o bawat sentimo na iyong mahahawakan. 

4. Sa ganyang paraan, hindi ka gasta nang gasta, at bili nang bili ng kung anu-ano’ng bagay na hindi mo naman talaga kailangan, mas mabilis kang uunlad, at makakaipon ng sapat na salapi upang madali mong mapaunlad ang sarili mong kabuhayan.

MGA DAPAT GAWIN

1. Ang pag-a-abroad ay paunang hakbang lamang upang maiahon mo sa kahirapan ang iyong pamilya, pero ang ikalawang mas kailangan o mas mahalagang hakbang ay dapat matutunan mong sinupin ang bawat sentimo o bawat piso o bawat dollar na iyong kikitain sa ibang bansa.

2. Sa ganyang paraan lamang, kapag natapos na ang iyong kontrata sa abroad, dahil naging masinop ka sa buhay, hindi ka matutulad sa mga OFW na wala ring nangyari sa kanilang kabuhayan.

3. Habang ayon sa iyong mga datos, Jonnalyn, nakatakda na ang magaganap sa taon ding ito ng 2024, sa buwan ng Oktubre o Nobyembre, sa edad mong 34 pataas, may isang mabunga at mabiyayang pangingibang-bansa ang itatala sa iyong kapalaran.

Kelot na ipagpalit sa tropang mapera, dapat nang mag-move on

ni Maestro Honorio Ong @Kapalaran Ayon Sa Palad | August 14, 2024

KATANUNGAN

1. Matagal na kaming mag-on ng girlfriend ko, pero dahil wala naman akong permanenteng trabaho, hindi ko siya mapangakuan ng kasal, hanggang sa mabalitaan kong bigla na lang siyang sumama sa ibang lalaki at ang lalaking ‘yun ay kaibigan ko pa.

2. Alam ko kung bakit nagawa niya sa akin ito—wala akong trabaho at pera. Mapera kasi ‘yung kaibigan kong sinamahan niya at sa ngayon, ang balita kong malapit na silang ikasal.

3. Gusto kong malaman kung may pag-asa pa ba kaming magkabalikan o tuluyan na siyang mawawala sa akin? Gayundin, matutuloy ba ang kasal nila?

4. Kung tuluyan na siyang mawawala sa akin, kailan ulit ako magkaka-girlfriend at kung sakali, siya na ba ang aking mapapangasawa? Ano rin ang zodiac sign niya?

KASAGUTAN

1. Tama lang na kalimutan mo na ang ex mong sumama sa ibang lalaki. Ito rin naman ang nais sabihin ng naputol at nagkabilog na unang bahagi ng Heart Line (Drawing A. B. h-h arrow a.) sa kaliwa at kanan mong palad. Tanda na tulad ng nangyari na at mangyayari pa, bago ka tuluyang lumigaya sa pag-ibig at pakikipagrelasyon, luluha ka muna sa kabiguang matatamo tulad ng relasyong matagal mong iningatan, ngunit sa wala at pagkabigo rin pala mauuwi.

2. Gayunman, hindi ka dapat malungkot o labis na manghinayang, sapagkat may ikalawang mas maganda at mas okey na Marriage Line (Drawing A. at B. 2-M arrow b.) na sumulpot sa kaliwa at kanan mong palad. Tanda na sa ikalawang pag-ibig, maaaring sa pagkakataong ito ay hindi na mukhang salapi ang magiging girlfriend mo. Bagkus, siya ay ka-level ng iyong pamilya, hindi masyadong mayaman at hindi rin naman kahirapan. Sa kanya mo mararanasan ang panghabambuhay na relasyon.

3.  Ang pag-aanalisang liligaya ka sa ikalawang pag-ibig ay madali namang kinumpirma ng gumanda at naayos ding Heart Line (Drawing A. at B. h-h arrow c.) sa gitna hanggang dulong bahagi ng kaliwa at kanan mong palad. Tanda na pagkatapos ng matinding kabiguan sa pag-ibig, may ligaya ka ring makakamit.

MGA DAPAT GAWIN

1. Dante, bagama’t magiging maayos na ang susunod mong pakikipagrelasyon, hindi ka dapat manatiling walang trabaho. Sa halip, ‘wag kang tumulad sa ibang istambay na hindi nagsisikap. Kailangang magsikap ka upang umunlad at mabigyan ng magandang buhay ang bubuuin mong pamilya sa hinaharap at mapag-aral mo sa kolehiyo ang iyong magiging anak.

2. Kaya tulad ng nasabi na, simulan mong magsikap ngayon, alang-alang sa susunod na babaeng mamahalin at pakakasalan mo. 

3. Ayon sa iyong mga datos, ang nasabing babae na siyang makakasama mo sa pagbuo ng simple pero masayang pamilya ay nakatakdang lumutang sa taong kasalukuyan sa buwan ng Nobyembre o Disyembre sa edad mong 29 pataas.

Unang GF ngayong taon, sure na makakasama habambuhay

ni Maestro Honorio Ong @Kapalaran Ayon Sa Palad | August 11, 2024

KATANUNGAN

1. Marami naman akong nililigawan, pero hanggang ngayon ay wala pa rin akong girlfriend.

2. Sa edad kong 28, sabik na sabik na akong magka-girlfriend, lalo na kapag nakikita kong may kani-kanya ng girlfriend ang mga kaibigan ko. Wala akong nobya ngayon, kaya naman nalulungkot ako. 

3. Sa palagay n’yo, kailan kaya ako magkaka-girlfriend? Sana naman magkanobya na ako bago matapos itong taong ito.   

   
   

KASAGUTAN

1. Ayon sa kaisa-isang maganda at makapal na Marriage Line (Drawing A. at B. 1-M arrow a.) sa kaliwa at kanan mong palad, ito ay nagsasabing ‘wag kang malungkot, at mainip. Sapagkat, tinitiyak ng guhit ng iyong palad na magkaka-girlfriend ka na rin sa wakas, sa panahong ito ng iyong buhay bago tuluyang sumapit ang edad mong 29 pataas.

2. Kung saan, sinasabi rin ng guhit ng iyong palad na ang unang magiging girlfriend mo sa taong ito ng 2024, ang  mapapangasawa, at makakasama mo sa pagbuo ng isang maligaya at panghabambuhay na pamilya na nagtataglay ng zodiac sign na Aquarius. Ang babaeng nabanggit ay makikilala mo sa pamamagitan ng modernong komunikasyon, o sa pamamagitan ng iba’t ibang uri ng social media platforms.

DAPAT GAWIN

Habang ayon sa iyong mga datos, Caleb, Hindi ka na dapat malungkot sa kasalukuyan. Sa halip, dapat mas maging masaya ka pa. Ngayon pa lang ihanda mo na ang iyong sarili, dahil bago matapos ang taong ito ng 2024, sa buwan ng Setyembre o October, tiyak na magkaka-girlfriend ka na rin sa wakas. Ang babaeng tinutukoy ko ay ang babaeng medyo chubby ang pangangatawan na mababa ang height, cute tingnan, ang siya mo na ring mapapangasawa at tuluyang makakasama sa pagbuo ng isang simple, pero maligaya at panghabambuhay na pagpapamilya.