Wakasan ang political career ng pamilya Duterte, may bendisyon daw ng Malacañang, weh?!

ni Pablo Hernandez @Prangkahan | Dec. 21, 2024

MAY BENDISYON BA NG MALACAÑANG ANG MGA AKSYON NG KAMARA PARA WAKASAN ANG POLITICAL CAREER NG PAMILYA DUTERTE? -- Matapos sampahan ng patung-patong na impeachment complaints si Vice Pres. Sara Duterte-Carpio, inirekomenda ng Quad Committee ng Kamara na sampahan ng mga kasong kriminal si ex-P-Duterte at iba pang sinasabing sangkot sa extrajudicial killings (EJK) sa bansa, at inatasan ang mga law enforcement agency na imbestigahan ang pagkakasangkot ni Davao City Rep. Pulong Duterte sa drugs shipment sa ‘Pinas. 

Kaya’t kung pakasusuriin ang ginagawang ito ng Kamara, lumalabas na may basbas ng Malacañang ang mga aksyong ito ng mga kongresista para wakasan ang political career ng pamilya Duterte, boom!

XXX

MASAKIT KAY EX-P-DUTERTE ANG GINAGAWA NG MAJORITY CONGRESSMEN, PINAKISAMAHAN NIYA ANG MGA ITO PERO NANG WALA NA SA PODER TINITIRYA NA ANG BUONG PAMILYA -- Sa totoo lang, masakit kay ex-P-Duterte ang ginagawang ito ng mga majority congressmen laban sa kanyang pamilya.

Pinakisamahan kasi nang hustong ni ex-P-Duterte ang mga kongresista noong siya pa ang presidente ng ‘Pinas, tapos nang wala na siya sa poder, hindi lang siya ang tinitirya kundi pati buong pamilya niya, tsk!

XXX

KAPAG INIMBESTIGAHAN NA NG QUADCOMM PAGPUGA NI HARRY ROQUE, MAHUHUBARAN NA NG MASKARA ANG MGA TIWALI SA IMMIGRATION -- Iimbestigahan ng QuadComm ng Kamara ang pagtakas sa bansa ni former presidential spokesman Harry Roque na nahaharap sa kasong qualified trafficking in person at mananagot daw ang mga tumulong para makatakas ito palabas ng ‘Pinas.

Kapag inumpisahan na ang imbestigasyon dito, tiyak mahuhubaran ng maskara ang mga tiwali sa Bureau of Immigration (BI) na tumulong kay Roque makapuga ng bansa, boom!

XXX

LAHAT NG ISINAMPANG KASO NOON SA PAMILYA MARCOS, AWTOMATIK NA IDIDISMIS NG MGA KORTE KASI SI PBBM NA ANG POWERFUL PINOY SA ‘PINAS -- Ibinasura na kamakalawa ng Sandiganbayan ang huling kaso ng pamilya Marcos patungkol sa coconut levy fund scam noong pangulo pa ang yumaong dating Pres. Ferdinand Edralin Marcos, Sr.

Dapat pa bang i-memorize ‘yang desisyon ng Sandiganbayan na pabor sa pamilya Marcos eh, Marcos na uli ang presidente kaya natural dahil si Pres. Bongbong Marcos (PBBM) na ang pinaka-powerful Pinoy sa ‘Pinas, kaya lahat ng kaso na isinampa sa mga Marcos, ididismis ng mga korte, period!

Tuloy ang serbisyo at malasakit para sa mga Pilipino

ni Bong Go @Bisyo Magserbisyo | Dec. 21, 2024

Masarap sa pakiramdam kapag ang ating mga inisyatiba para magkaroon ng mga reporma sa ating healthcare system ay nagkakaroon ng suporta mula sa hanay ng ating mga kapwa manggagawa sa gobyerno.

Noong December 17 ay naglabas ang Department of Health ng public advisory kung saan kinukumpirma nito ang kanilang commitment na siguraduhing hindi maantala ang medical assistance programs na kaugnay ng Republic Act No. 11463, o ang Malasakit Centers Act of 2019. Tayo ang principal sponsor at may-akda ng batas na ito.

Alinsunod sa RA 11463, maaaring dumulog ang nangangailangan ng medical assistance sa mga Registered Social Worker sa mga Malasakit Center ng ospital na mayroon nito. Malaking ginhawa ang naibibigay ng Malasakit Centers sa mga kababayan nating walang kakayahang magbayad ng gastusin sa ospital. Sa isang kuwarto lang, nandiyan na ang mga ahensya na tutulong para mabawasan ang pasanin nila.

Kaya paalala ko sa mga ahensya na ipatupad ang batas nang tama upang hindi mapabayaan ang mga kababayan nating naghihingalo dahil sa sakit at sa bayarin ng pampagamot.

Ang Malasakit Centers program na ating isinulong ay nagsisilbing one-stop shop kung saan pinagsama-sama na sa iisang bubong ang representatives mula sa DSWD, DOH, PhilHealth, at PCSO para hindi na magpapalipat-lipat pa ng mga opisina at pipila nang mahaba ang mga benepisyaryong nangangailangan ng tulong medikal.

Batay sa datos ng DOH, mahigit 15 milyong kababayan na natin ang natulungan ng programa at may 166 Malasakit Centers na ang operational sa buong bansa. Pera ng taumbayan iyan, ibinabalik lang sa kanila sa pamamagitan ng mabilis at epektibong tulong pangkalusugan.

Hindi na dapat kailangang mahirapan pa ang ating mga kababayan sa paglapit sa gobyerno para humingi ng tulong, magsanla ng kalabaw o mangutang para lang sa pampaospital. Bilang mga lingkod bayan, ilapit natin ang serbisyo sa taong nangangailangan bilang pagmamalasakit sa kanilang mga pinagdadaanan. Huwag na dapat pahirapan pa ang mahirap na!

Samantala, patuloy pa rin tayo sa paghahatid ng serbisyo lalo na ngayong panahon ng Kapaskuhan.

Binisita natin noong December 19 ang mga kababayan natin sa Cagayan. Guest of honor tayo sa Cagayan Provincial Health Awards bilang chairperson ng Senate Committee on Health. Pinangunahan din natin ang pamamahagi ng tulong sa 1,281 estudyante at 400 mahihirap sa Tuguegarao City katuwang si Mayor Maila Ting, na sa ating inisyatiba, napagkalooban din sila ng tulong mula sa lokal na pamahalaan. Sinaksihan din natin ang inagurasyon ng itinayong Super Health Center sa Peñablanca kung saan nagbigay tayo ng suporta sa 80 barangay health workers doon.  Nagpapasalamat ako sa pagdedeklara sa akin bilang adopted son ng Tuguegarao City at Peñablanca, Cagayan.

Kahapon, December 20, nasa Rizal province tayo upang mamahagi ng tulong sa 2,820 estudyante ng Binangonan. Sa ating pakikipagtuwang kay Gov. Nina Ricci Ynares, nabigyan din ang mga benepisyaryo ng tulong mula sa lokal na pamahalaan. Matapos ito ay dumiretso tayo sa San Mateo at nag-inspeksyon sa itinayong Super Health Center. Katuwang si Mayor Omie Rivera, namahagi rin kami ng rice packs at iba pang tulong sa libu-libong residente roon. Pagkatapos ay nakipagtulungan din tayo sa ilang mga barangay official sa Pasig City upang mas mailapit ang serbisyo sa mga tao sa paanyaya ni Kap. Jigs Servillon.

Sinaksihan naman ng aking opisina ang turnover ng Super Health Center sa Esperanza, Agusan del Sur at ang groundbreaking ng itatayong Super Health Center sa Cuenca, Batangas.

Ipinadala ko naman ang aking Malasakit Team sa iba’t ibang komunidad para maalalayan ang mga nangangailangan tulad ng 55 na naging biktima ng sunog sa Talisay City, Cebu; at sa dalawang biktima sa Governor Generoso, Davao Oriental.

Nag-abot din tayo ng dagdag na suporta bilang Senate Youth Committee chairperson sa 189 iskolar sa Bulacan State University; 41 sa National College of Business Administration sa Taytay, Rizal; at 553 sa iba’t ibang sangay ng Cebu Technological University. Napagkalooban din ng suporta ang 200 TESDA scholars sa Iligan City.

Natulungan din natin ang 23 kooperatiba sa Region 10 katuwang ang Cooperative Development Authority sa ilalim ng programang Malasakit sa Kooperatiba na ating isinulong.

Namahagi rin ng tulong ang aking opisina para sa mga benepisyaryo sa isinagawang Dental and Medical Mission at Feeding Program sa Pasay City.

Ilang araw na lang at Pasko na, sana ay maging ligtas at mapayapa ang pagsapit ng espesyal na okasyong ito sa ating lahat. Bilang inyong Mr. Malasakit, sana ay magkaroon ang lahat ng happy and healthy holiday season!

Ako na inyong Senator Kuya Bong Go ay patuloy na magseserbisyo sa inyo dahil bisyo ko ang magserbisyo, at naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Transportasyon ngayong holiday, tiyaking safe at sapat sa publiko

ni Ryan Sison @Boses | Dec. 21, 2024

Dahil dagsa na ang mga pasahero sa iba’t ibang lugar sa bansa, siguradong problemado na ang mga ito sa kanilang pagbiyahe.

Kaya naman binigyan ng Land Transportation Franchising and Regulatory Board (LTFRB) ng mga special permit para sa mga public utility vehicle para sa panahon ng Kapaskuhan at Bagong Taon.

Ayon kay LTFRB Chairperson Teofilo Guadiz III, inaprubahan ng board ang mga special permit para sa 956 units, mula sa 988 units na nag-apply para makabiyahe ng kanilang ruta.

Pinaalalahanan din ng opisyal ang mga operator at driver na ang mga special permit ay magiging valid mula December 20, 2024 hanggang January 10, 2025.

Sinabi ni Guadiz na karaniwang nagbibigay ang LTFRB ng special permits sa mga PUV bilang dagdag na sasakyan sa tumataas na bilang ng mga pasahero tuwing holiday season. 

Aniya pa, inaasahan nilang maseserbisyuhan ang mas maraming komyuter ngayong holiday rush, at tinitiyak ang mahusay at ligtas na paglalakbay para sa lahat.

Mainam at napagdesisyunan agad ng kinauukulan na magdagdag ng mga sasakyan lalo na’t napakaraming mga pasahero ang nagsisipaglabasan at namamasyal na habang ipinagdiriwang ang holiday season.

Gayundin, dapat nilang siguruhing may mga available na mga transportasyon hindi lang sa land, maging mga sasakyang pandagat at air transport. 

Para naman sa ating mga kababayan, kailangang planuhin din ang kanilang paglalakbay partikular na ang mga may sasakyan dahil trapik naman ang kanilang susuungin, habang tiyakin na maayos ang makina at break ng mga ito.

Paalala rin sa lahat na magdoble-ingat sa pagbiyahe at huwag kalimutang magdasal at magpasalamat sa lahat ng biyayang ipinagkaloob ng Poong Maykapal.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com