Mga aprub sa gun ban exemption, maging responsable

ni Ryan Sison @Boses | Nov. 19, 2024

Para sa mga naghahangad na ma-exempt sa poll gun ban na ipatutupad next year, nagsimula na ang naturang aplikasyon nitong Lunes.

Ayon sa Commission on Elections (Comelec), pinapaalalahanan lamang ang lahat na kumpletuhin ang kanilang mga kinakailangang dokumento bago isumite ang kanilang mga aplikasyon sa kagawaran.

Tiniyak naman ni Comelec Chairman George Garcia sa mga aplikante na maaari nilang makuha sa loob lamang ng isang linggo ang kanilang certificate of authority kung maipapasa nila ang lahat ng requirements.

Subalit sa ilang mga kaso aniya, ang pag-apruba ng aplikasyon para sa exemption ng gun ban ay naaantala dahil ang mga dokumento ay hindi kumpleto. Pero kung ito ay kumpleto na, maaari nilang ipangako na ang mga aplikasyon ng mga ito ay maaaprubahan ng isang linggo.

Nitong Lunes, November 18 ay sinimulan na ang aplikasyon ng gun ban exemption para sa 2025 midterm elections. Sinabi ni Garcia na ang mga mag-aaplay para sa exemption ay maaari ring gumamit ng online payment system.

Matatandaang naglabas ng abiso ang Comelec na simula January 12 hanggang May 28, 2025 ay magpapatupad sila ng gun ban para sa nalalapit na eleksyon. 

Mainam talaga ang pagpapairal ng gun ban sa halalan sa susunod na taon para na rin sa kaligtasan at seguridad ng mga kababayan sa panahon ng eleksyon.

Kadalasan kasi ay nagdudulot ng takot sa marami ang sinumang may bitbit ng baril o anumang armas at kung minsan ay humahantong pa sa gulo.

Subalit, kailangan din ito bilang proteksyon lamang, lalo na sa mga kandidato, dahil batid naman natin na nagkalat na rin ang mga armadong grupo na naghahasik ng karahasan sa ating mga komunidad habang umuusbong ang mga kaguluhan kapag nalalapit na ang eleksyon.

Paalala sa mga kababayan na mabibigyan ng exemption sa gun ban na gamitin lang sana ang mga armas na hawak bilang depensa at proteksyon laban sa masasamang gawain at hindi para makapanakit o makapatay ng kapwa.

Higit sa lahat dapat na maging responsable tayo sa pag-aari nating mga baril.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas paghandaan ang 7 pang bagyo kesa Pasko

ni Bong Revilla @Anak ng Teteng | Nov. 18, 2024

Hindi naman masamang maghanda para sa darating na Kapaskuhan ngunit huwag sana nating isasantabi ang paghahanda para sa bagyo dahil apat hanggang pitong bagyo pa ang inaasahan nating papasok sa bansa bago matapos ang taong 2024.

Noong isang linggo lamang ay nanawagan tayo na maghanda para sa pagpasok ng Bagyong Pepito ngunit ngayon ay may dobleng paalala pa ang ating ipinakikiusap dahil baka hindi na natin kayanin ang mga paparating na bagyo na ayon sa PAGASA ay may bitbit ding malalakas na pag-ulan.

Bilang chairman ng Committee on Public Works ay mariin din nating kinakalampag ang Department of Public Works and Highways (DPWH) at mga Local Government Units (LGUs) sa buong bansa na tiyaking handa ang kani-kanilang nasasakupan upang maiwasan na natin ang mga hirap na ating dinanas nitong mga nagdaang bagyo.

Heto at marami na naman ngang sinalanta ng Bagyong Pepito kaya mas dapat talaga tayong matuto sa mga karanasang dulot nito para hindi tayo mapahamak.

Mismong PAGASA na ang nag-anunsyo na hanggang pitong bagyo pa ang inaasahan nating papasok sa bansa bago matapos ang taon at sa ayaw man natin o sa gusto ay tiyak na malaki ang epekto nito sa pagsalubong natin sa araw ng Pasko at Bagong Taon.

Oo nga at kailangang masiguro ng DPWH at ng mga tatamaang LGUs ngayon pa lang -- na malinis at maluwag ang mga daluyan ng tubig at ma-clear lahat ng mga maaaring maging debris, pero huwag tayong puro asa sa gobyerno, dapat sa mga personal nating kapasidad ay maghanda rin tayo para matiyak na walang maging problema.

Hindi baleng binabayo tayo ng bagyo sa panahon ng Kapaskuhan basta’t ligtas lang ang bawat isa at wala tayong nawawalang kaanak o pinaglalamayan.

‘Yung mga nakatira sa mga delikadong lugar ay makipag-ugnayan na sa lokal na pamahalaan at huwag matigas ang ulo kapag pinapalikas para walang madisgrasya.

Ngayon pa lamang dapat ay palaging naka-ready ang mga kagamitan partikular na ang mga damit at gamot upang isang bitbit na lamang sakaling rumagasa ang pagtaas ng tubig baha.

Marami kasing napapahamak dahil sa may nakalimutan na mahalagang bagay sa bahay at kapag binalikan ay doon nangyayari ang trahedya.

Alam naman na natin ang mga lugar na palaging binabaha -- maliban na lamang sa mga binaha sa unang pagkakataon, kaya sana alam na natin ang mga dapat nating gawin kung ayaw naman nating lumipat ng bahay.

Tulad sa lalawigan ng Bulacan na sanay na ang mga tao sa baha, marami sa kanila ang may sariling bangka at salbabida dahil alam nilang kailangan sa tuwing umuulan.

‘Yung mga lugar na may pag-asa pa namang hindi binabaha ay inaasikaso na ngayon ng DPWH pero ang mga lugar na ilang dekada na ay talagang may pagbaha, dapat na mas doble ang paghahandang ginagawa.

Baka kasi nakatuon lahat ng panahon ng mga kababayan natin sa papalapit na Pasko at ang konsentrasyon ay nasa pagbili ng mga damit at regalo para sa Christmas party, tapos nakaligtaan na may paparating palang bagyo at iba pa.

Basta’t maging alerto lang, huwag tayong papatay-patay para sa susunod na pag-ikot natin ay hindi ayuda ang ating ipamimigay kundi regalo na para sa Pasko.

Siyempre napakasaya kung kumpleto tayo sa pamilya na sasalubong sa Pasko at Bagong Taon kahit wala tayong maraming handa basta’t magkakasama lang ay ayos na.

Kaya para maging maligaya ang Pasko at Bagong Taon ay maghanda tayo para sa kaligtasan natin laban sa pitong bagyo pa bago matapos ang taong 2024.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Brgy term extension, mas bongga pa sa hair extensions niyo mga besh!

ni Imee Marcos @Imeesolusyon | Nov. 18, 2024

Mga sismars, here we go again with the Senate pasabog! Noong Nobyembre 5, nagbigay ako ng sponsorship speech para sa Senate Bill No. 2816, at ang tea? Pahabain na ang 3-year term ng barangay officials at SK, gawin na itong 6 years — yes mga mare, hindi ito chismis, legit ito!

Bakit, kamo? Eh, baka ipabarangay na talaga tayo sa dami ng pinapasan nila! Ang 3 years? Haller, puh-lease! Hindi ‘yan sapat para matapos ang lahat ng pinaglalaban at proyektong sinimulan nila — kalerki talaga! Super bitin, as in!

Itong mga barangay captain at kagawad natin, sila ang mga certified frontline divas sa mga komunidad. All day, all night na dilat, talagang kailangan ng retouch pero wala na ngang time, wala pang pondo! Sila na nga ang first on the scene, sila pa rin ang last to leave. Over ‘di ba?! Ang plot twist? Imbes na sunud-sunod na elections na juicy sa budget, ilaan na lang ito sa mga proyekto para sa mga sangkabeshihan natin sa barangay. I mean, ‘di ba? Mas maraming paandar na proyekto, mas todo ang serbisyo, mas feel ng mga ka-village natin ang tunay na pagbabago!

So mga besh, ito na talaga — para sa isang mas maayos, mas fierce, at mas produktibong termino ng ating barangay leaders, gora na ‘to! Kasi naman, dasurv na dasurv nila ang spotlight at suporta! Agree?