Pagbusisi ng Senado sa 2025 national budget, tapos na

ni Nancy Binay @Be Nice Tayo | Nov. 24, 2024

Matapos ang ilang linggo, natapos na rin ang Senate deliberations para sa panukalang budget ng ating bansa para sa taong 2025.

Ilang araw din tayong nagpuyat para busisiin at suriing maigi ang panukalang budget ng iba’t ibang ahensya ng pamahalaan.

Ilan sa mga mahalagang bagay na natalakay ay ang matinding pangangailangan para palawigin pa ang mga programa sa sektor ng kalusugan, imprastraktura, at pabahay.

☻☻☻

At dahil tapos na nga ang debate sa Senado, susunod na gagawin ang bicameral conference committee kasama ang House of Representatives.

Dito, pag-uusapan maigi at pilit pagtutugmain ang mga bersyon ng budget ng Senado at Kamara.

Mahalagang hakbang ito dahil may mga tinanggal ang Senado sa ipinasang batas ng Kamara.

Dito natin makikita kung papaano ipagtatanggol ng Senado at Kamara ang kanilang mga posisyon at kung ano nga ba talaga ang para sa ikabubuti ng ating bansa.

☻☻☻

On a personal note, may halong konting lungkot ang ating saya nang maipasa na ang 2025 budget nitong nakaraang linggo.

Ito na kasi ang huling budget deliberations ng inyong lingkod dahil graduate na tayo sa Senado sa 2025.

Kaya naman nais kong ipaabot ang aking pasasalamat sa aking mga seatmate sa Senado sa walang sawang inaalay ang kanilang oras at talento para sa bayan.

Makakaasa kayo na hanggang sa huling sandali ay tututukan natin ang budget ng bayan para masiguro na ang bawat piso ay gagamitin sa pagpapaunlad ng ating bansa at pagpapaganda ng buhay ng ating mga kababayan.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Responsableng tulong ‘di limos para sa mga taong lansangan

ni Ryan Sison @Boses | Nov. 24, 2024

Kung minsan sa kagustuhan natin na makatulong sa kapwa ay agad tayong nagbibigay ng kahit na konting barya sa mga nanghihingi sa atin. 

Kaya naman muling nanawagan ang Department of Social Welfare and Development (DSWD) sa publiko na huwag magbigay ng limos sa mga batang lansangan, mga homeless o taong walang tirahan at mga miyembro ng Indigenous Peoples’ (IP) groups, na kadalasang dumarami ang bilang tuwing holiday season.

Ayon kay DSWD Assistant Secretary Irene Dumlao, hindi nais ng kagawaran na mabalewala ang diwa ng Pasko. Gusto pa rin nilang magbahagi ng tulong lalung-lalo na sa mga bata, subalit ang responsableng paraan ng paggawa nito ay ang abutin sila, at alisin sila sa mga lansangan.

Ang apelang ito ng DSWD ay alinsunod sa Presidential Decree (PD) No. 1563, kilala rin bilang Anti-Mendicancy Law, na nagbabawal sa pamamalimos at paghingi ng mga charitable donation sa mga lansangan ng mga indibidwal o religious organizations.

Upang maiwasan ang tinatawag na mendicant activities o pagbibigay sa mga nanlilimos, hinimok ni Dumlao ang publiko na magkaloob ng iba pang uri ng tulong, gaya ng pagsasagawa ng organized activities sa pamamagitan ng gift-giving, feeding sessions, medical missions, storytelling sessions at group caroling sa pakikipag-ugnayan sa mga local government units (LGUs).

Sinabi ng opisyal na nais nilang matiyak ang isang ligtas na Christmas experience para sa lahat ng mga bata. Kaya aniya, mahalaga ang paggabay ng mga magulang o guardian sa mga bata na nakikilahok sa mga caroling para masigurong safe at malayo sila sa kapahamakan.

At para sa mga grupo o organisasyong nagsasagawa ng fundraising activities sa pamamagitan ng caroling, hinikayat naman niyang kumuha ng solicitation permits mula sa DSWD kung ang saklaw nito ay sa buong rehiyon o sa buong bansa.

Sinabi niya na ang permit ay dapat makuha mula sa mga concerned LGU para sa fundraising na limitado sa loob ng isang komunidad, lungsod o munisipalidad.

May punto naman ang kinauukulan sa panawagan nilang hindi na dapat tayo magbigay ng limos sa mga kababayan nating homeless, street children, IP groups o katutubo na nagkakalat na rin sa mga lansangan lalo na ngayong nalalapit na ang Kapaskuhan.

Kung minsan ay nagiging hanapbuhay na rin nila na mangatok sa bintana ng mga sasakyang nakahinto sa trapik at nanghihingi ng barya, o sumasampa sa mga bus, jeep at iba pang uri ng public transport at namamalimos sa mga pasahero. Sa halip kasi na matulungan natin sila para matuto na magbanat ng buto ay nagiging tamad at umaasa na lamang sa ating mga limos.

Marahil, mas makabubuting huwag na nga tayong magbigay ng kahit na anong limos bagkus maging responsable tayo sa pagtulong sa kanila.

Kumbaga, gawin natin ang tamang paraan ng pagtulong at pagsuporta sa mga kababayang nangangailangan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagkakaiba nina Flor Contemplacion at Mary Jane Veloso

ni Fr. Robert Reyes @Kapaayapaan / Patakbo-takbo | Nov. 23, 2024

Marahil, nakalimutan na ng marami ang nangyari noong Marso 17, 1995. Subalit, marami pa rin ngayon ang buhay na noon para maalala ang pangalang Flor Contemplacion. 

Hindi na ganoon kalinaw ang aking alaala sa mga pangyayari ng araw na iyon, halos 30 taon na ang nakararaan. Pero tiyak kong nagkaroon ng misa sa EDSA Shrine at dumalo tayo. Isang misang protesta laban sa pagbitay kay Flor Contemplacion ang naganap bandang ika-10 ng umaga. Naalala ko ang dobleng lungkot na aking naramdaman dahil magkasunod ang kamatayan ni Flor at ng aking tiyuhin na inatake sa puso. 

Maraming nagalit sa pamahalaan ng Singapore sa pangyayari at ganoon na lang ang pagtindi ng reaksyon ng marami hindi lang laban sa nasabing bansa kundi sa ating sariling gobyerno. Bakit? Dahil sa makupad at mahinang pagtatanggol at pagsuporta sa isang maliit na OFW. 

Noong hinuli si Flor Contemplacion at pinagbintangan sa pagpatay kay Delia Mamaril Maga at sa inaalagaang bata nitong si Nicholas Huang (3 taong gulang).

Ngunit, hindi ganu’n katibay ang ebidensya laban kay Flor. Walang “suspect” sa simula.

Natunton lang ng mga pulis si Flor sa pamamagitan ng diary ni Delia Maga. Dahil dito, hinuli si Flor Contemplacion na madaling nagkumpisal sa krimen. Sa kabila ng lahat, lumitaw ang isang testigo sa katauhan ni Evangeline Parale. Ayon kay Parale, hindi pinatay si Nicholas kundi nalunod. At nang malaman ng nanay nito ang nangyari, doon nito umano pinatay si Delia Maga na kanyang pinagbintangan sa pagkamatay ng kanyang anak. 

Sa kabila ng lumitaw na testigo na pinabubulaanan ang kuwentong si Flor ang pumatay kay Delia Maga at Nicholas Huang, mabagal at mahina ang naging pagkilos ng Philippine Embassy. Ayon sa mga ulat, wala diumanong taga-Philippine Embassy ang dumalo sa mga ‘hearing’ sa kabuuan ng paglilitis kay Flor.

Dalawa ang ebidensyang nakalap ng mga imbestigador kay Flor. Una, ang kanyang kalusugan noong araw ng mismong krimen. Ayon sa kaisa-isang testigong Evangeline Parale, nagkasama sila ni Flor sa ospital at doon nito ibinahagi ang kanyang kalagayang sikolohikal sa araw ng kamatayan nina Maga at Huang. Dumaraan si Flor sa “partial complex seizure” (kakaibang uri ng epilepsy) noong araw ng pagkamatay nina Maga at Huang. Hindi ito tinanggap ng korte kaya’t muling iginiit nito ang pagkakasala ni Flor. Ang ikalawang ebidensya ay ang mismong pahayag ni Flor na siya ay pinahirapan

(tinortyur) para aminin na siya ang pumatay sa dalawa.

Mula Mayo 4, 1991 (araw na natuklasang patay sina Delia Maga at Nicholas Huang) hanggang sa araw ng bitay ni Flor Contemplacion, kakaunti ang nagawa ng pamahalaan para kay Flor. Hindi ito masasabi sa mga grupong tutol sa bitay na kasama rin ang iba’t ibang grupong “anti-death penalty” at “pro-life” mula Simbahang Katoliko na nagkampanya rin sa pagligtas kay Flor Contemplacion. Ano kaya’t tinutukan at pinagtiyagaang tutulan at ipagtanggol ng ating pamahalaan ang pagbitay kay Flor Contemplacion? Baka buhay pa siya ngayon.

At salamat na lang sa tiyaga, malasakit at tuluy-tuloy na pagbabantay ng lahat ng mga grupong inilaban naman ang paglaya ni Mary Jane Veloso sa kanyang kulungan sa Indonesia, malapit na siyang makabalik sa Pilipinas sa ilalim ng programang, “Lipat Kulungan.” 

Hindi pinalalaya si Mary Jane, kundi pinapayagan lang makulong sa sarili niyang bansa. Subalit, malinaw na wala nang intensyon ang pamahalaan ng Indonesia na ipataw ang batas ng bitay kay Mary Jane. Labing-apat na taon mula sa pagkakakulong ni Mary Jane hanggang ngayon, hindi tumigil ang pamahalaan at ang iba’t ibang mga samahan na ilaban ang kaso ni Mary Jane. At kung siya ay pinayagang umuwi na, malinaw na bunga ito ng tuluy-tuloy at sama-samang pagkilos mula diplomasya hanggang mga legal na pamamaraan at ang maraming malikhaing plano para mapanatiling buhay na buhay ang istorya ni Mary Jane.

Ano kaya’t ganundin ang naging pagtulong at pagsuporta ng pamahalaan at ng iba’t ibang grupo kay Flor Contemplacion? Siguro si Flor Contemplacion ang isa sa mga tumulong para hindi mabitay at mabuhay pa’t makauwi sa Inang Bayan si Mary Jane Veloso.