Atake ng QuadComm kay VP Sara, wa’ epek dahil front-runner pa rin sa 2028 Election

ni Pablo Hernandez @Prangkahan | Nov. 20, 2024

WALANG EPEKTO KAY VP SARA ANG MGA ATAKE NG QUADCOMM DAHIL SA SURVEY FRONT-RUNNER PA RIN SIYA SA 2028 PRESIDENTIAL ELECTION -- Sa inilabas na survey ng WR Numero Research Firm ay nagtabla sina Vice President Sara Duterte-Carpio at Sen. Raffy Tulfo sa iskor na 24% para sa 2028 presidential election.

Ibig sabihin niyan, walang epekto sa popularidad ni VP Sara ang mga atake sa kanya ng mga Quad Committee member kasi kung susuriin kahit nag-tie sila ni Sen. Tulfo sa iskor ay mataas pa rin ang nakuha niyang rating na nangangahulugan na front-runner pa rin siya sa 2028 election, period!

XXX

RATING NI SPEAKER ROMUALDEZ 1% LANG, KAYA ‘SUNTOK SA BUWAN’ NA MAGING PRESIDENTE SIYA SA 2028 ELECTION -- Ito ang kabuuan ng mga pangalan na nasa 2028 presidential survey ng WR Numero Research Firm, tabla sa 24% sina VP Sara at Sen. Tulfo, 9% si former VP Leni Robredo, 5% si Sen. Grace Poe, 5% si Sen. Imee Marcos, 4% si Sen. Risa Hontiveros, 4% si former Sen. Manny Pacquiao, 3% si Sen. Robin Padilla at 1% si Speaker Martin Romualdez.

Sa mga pangalang ito, si Speaker Romualdez ang posibleng “manukin” ni Pres. Bongbong Marcos (PBBM) sa 2028 presidential election, at kung ang magiging resulta ng survey bago sumapit ang pampanguluhang halalan ay laging ganito ang iskor na makukuha niya (Speaker Romualdez), ay “suntok sa buwan” na maging presidente ang ‘manok’ ni PBBM, boom!

XXX

OA ANG ALOK NA P1M NG QUADCOMM SA MAKAPAGTUTURO KAY ‘MARY GRACE PIATTOS’ -- Nag-alok ang mga miyembro ng QuadComm ng Kamara ng reward na P1 million sa sinumang makapagbibigay ng impormasyon sa kinaroroonan ng nagngangalang “Mary Grace Piattos” na ayon daw sa isinumiteng resibo ng Office of the Vice President (OVP) sa Commission on Audit (COA), ay kabilang daw ito (Mary Grace Piattos) sa nakatanggap ng confidential fund ni VP Sara.

Napaka-OA (overacting)  naman ng QuadComm kasi may kapangyarihan naman silang alamin sa Philippine Statistics Authority (PSA) kung may ganyang pangalang nakarehistro sa kanilang tanggapan at hindi na kailangan umepal pa at mag-alok ng P1 milyong pabuya patungkol sa impormasyon ng kinaroroonan ng hinahanap nilang “Mary Grace Piattos,” period!

XXX

EX-P-DUTERTE, TUTULUYAN NG MARCOS ADMIN SA MGA KASONG MAY KINALAMAN SA EJK -- Matapos irekomenda ni QuadComm member, Batangas 2nd Dist. Rep. Jinky Luistro na sampahan ng mga kasong kriminal si ex-P-Duterte, ay kinumpirma na ni Sec. Boying Remulla ng Dept. of Justice (DOJ) na iniimbestigahan na ng DOJ-Task Force ang mga tila naging paglabag ni ex-P-Duterte sa International

Humanitarian Law na may kaugnayan sa extrajudicial killings (EJK) sa panahon ng Duterte administration.

Ibig sabihin niyan, talagang tutuluyan ng Marcos admin si ex-P-Duterte na masampahan ng kasong may kinalaman sa EJK, tsk!

Kabataan, suportahan at ihanda sa magiging papel sa lipunan

ni Bong Go @Bisyo Magserbisyo | Nov. 20, 2024

Ang ating pambansang bayani at isa sa aking mga idolo na si Dr. Jose P. Rizal ang nagsabing “Ang kabataan ang pag-asa ng bayan.” 

Kaya bilang chairman ng Senate Committee on Youth, prayoridad ko ang edukasyon ng ating mga kabataan na pundasyon ng kanilang mga pangarap. Ito ang susi sa kanilang magandang kinabukasan.

Ito rin ang mensahe ko nang maghatid ako ng tulong sa mga scholars sa University of Perpetual Help System Dalta-Calamba noong November 15: “Mag-aral nang mabuti dahil kayo ang susunod na lider ng bansa.” Nanawagan din ako ng pagkakaisa at pakikipagtulungan upang maisulong ang mga inisyatiba para sa kabataan.

Para maipagpatuloy ng mga kabataan — lalo na ng mga mahihirap — ang kanilang pag-aaral, sinusuportahan natin ang scholarship programs ng gobyerno. Tumutugon ito sa misyon natin na mapagkalooban sila ng inclusive and quality education.

Sa ating adhikain na mas maraming kabataan at estudyante ang matulungan, tayo rin ang isa sa mga may-akda at co-sponsor ng Republic Act No. 11510, na nag-institutionalize sa Alternative Learning System (ALS) para mas mapaganda ang paghahatid ng basic education sa mga pinakamahihirap na estudyante at higit na nangangailangan. Nariyan din ang RA 11984, o ang “No Permit, No Exam Prohibition Act”, na nagbabawal sa mga educational institutions na tanggihan ang mga estudyanteng may pagkakautang na makakuha ng pagsusulit.

Isinulong din natin ang RA 12006, o ang “Free College Entrance Examinations Act”, kung saan hindi na kailangang singilin ng entrance exam fees ng mga pribadong kolehiyo at unibersidad ang mga kuwalipikadong estudyanteng nangunguna sa kanilang klase. Para naman sa mga guro sa pampublikong paaralan, nariyan ang RA 11997, o ang “Kabalikat sa Pagtuturo Act,” na nagtaas sa kanilang teaching supply allowances.

Isa rin ako sa co-author at co-sponsor ng Senate Bill No. 1360 na kung maisabatas ay naglalayon na mapalawak ang sakop ng subsidiya para sa tertiary education sa pamamagitan ng pag-amyenda sa RA 10931, o ang Universal Access to Quality Tertiary Education Act, na naisabatas noong panahon ni dating Pangulong Rodrigo Duterte.

Co-author at co-sponsor din tayo ng SBN 1864, o ang Student Loan Payment Moratorium During Disasters and Emergencies Act, para naman mabigyan ng palugit ang mga estudyanteng may pagkakautang pero hindi makabayad dahil tinamaan ng kalamidad at iba pang sakuna kung maisabatas.

Isinusulong din natin sa Senado ang pagpasa ng SBN 1786, na nag-aatas sa mga pampublikong Higher Education Institutions (HEIs) na magkaroon ng Mental Health Offices sa kanilang campus. Kaugnay ito ng ating adhikain bilang chairperson ng Senate Committee on Health na ang mental health ay dapat bigyan ng sapat na atensyon tulad ng inilalaan natin sa physical health.

At bilang chairperson ng Senate Committee on Sports, payo ko sa mga kabataan ay: “Get into sports and stay away from illegal drugs to keep us healthy and fit!” Matagumpay nating naisulong ang National Academy of Sports sa New Clark City, Capas, Tarlac bilang isa sa mga may-akda at co-sponsor ng RA 11470. Sa NAS, mapagsasabay ng student-athlete ang pag-aaral at pag-eensayo ng walang masasakripisyo.

Principal sponsor at author naman tayo ng SBN 2514, o ang panukalang Philippine National Games (PNG) Act, na naglalayong ma-institutionalize ang isang national sports program para makatuklas ng mga kabataang atleta mula sa mga kanayunan kung maisabatas.

Bilang vice chair ng Senate Finance Committee, isinusulong ko rin ngayon ang dagdag na pondo para sa youth programs upang matulungan ang mga kabataan na magtagumpay sa larangang kanilang pinili at mabigyan ng oportunidad na makapagserbisyo rin sa kapwa.

Samantala, bumisita tayo sa Cagayan de Oro City at pinangunahan ang feeding initiative para sa mga pasyente at staff ng Northern Mindanao Medical Center noong November 16. Kasabay nito ang palugaw at pagbibigay ng tulong ng aking Malasakit Team sa mga pasyente sa JR Borja General Hospital.

Binalikan natin at binigyan ng tulong ang 116 residente na naapektuhan ng kalamidad sa Brgy. Puntod, Cagayan de Oro City noong November 16. Nakatanggap din sila ng emergency housing assistance mula sa NHA na ating isinulong para may pambili sila ng materyales na pampaayos ng kanilang tahanan. Sinaksihan din natin ang groundbreaking ng itatayong Super Health Center sa Brgy. Kauswagan sa CDO pa rin.  

Sa araw ding iyon, dumalo ang aking opisina sa ginaganap na sportsfest sa MSU sa General Santos City. Ang pagdaraos ng naturang palaro ay nasuportahan natin kasama ang Philippine Sports Commission.

Sinaksihan din ng aking opisina noong November 16 ang sportsfest sa Pamantasan ng Lungsod ng Muntinlupa na sinuportahan namin ng PSC. Dumalo rin tayo sa ginanap na SK Basketball and Volleyball League sa Basista, Pangasinan na proyekto ni SK Chair Irra Parazo.

Sa imbitasyon ni Mayor Bernie Palencia, sinaksihan ng aking opisina noong November 18 ang ginanap na South Cotabato Provincial Athletic Association Meet sa Polomolok, South Cotabato.

Kahapon, November 19, personal nating pinangunahan ang pagbibigay ng tulong sa 203 maliliit na negosyante sa Tondo, Maynila na sa ating inisyatiba ay nakatanggap din ng livelihood kits mula sa DTI. Pinangunahan din ng ating tanggapan ang pamamahagi ng tulong para sa 800 mahihirap sa Tanjay City, Negros Oriental na sa ating inisyatiba ay nabigyan ng tulong pinansyal katuwang si Mayor Jose Orlino.

Naging panauhin din tayo sa ginanap na Gawad Pilipino Lingkod Bayan Awards sa paanyaya ni President Dr. Danilo Mangahas. Nagpapasalamat tayo sa ipinagkaloob nila sa atin na parangal bilang isa sa mga Outstanding Senator. With or without award, patuloy lang akong magseserbisyo sa aking mga kapwa Pilipino.

Hindi rin tumitigil ang aking Malasakit Team sa pagbibigay tulong sa ating mga kababayan. Naalalayan natin ang 27 pamilyang nabiktima ng sunog sa Brgy. Tumaga, Zamboanga City.

Sa ating pakikipagkapit-bisig sa DOLE, nabigyan ng tulong at pansamantalang trabaho ang 110 displaced workers sa Isulan, Sultan Kudarat katuwang natin si Mayor Marites Pallasigue.

Nag-abot din tayo ng tulong sa ginanap na Patient Convention: Peace Tayo sa NKTI katuwang si Executive Director Dr. Rose Marie Liquette.

Bilang inyong Mr. Malasakit, patuloy akong magseserbisyo sa mga kapwa ko Pilipino sa abot ng aking makakaya dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagtulong sa mga binagyo unahin kesa magarbong pagdiriwang ng Pasko

ni Ryan Sison @Boses | Nov. 20, 2024

Dahil sa nalalapit na rin ang Kapaskuhan, marami sa atin ang naghahanda para sa kabi-kabilang reunion, mga party at selebrasyon sa mga opisina, pabrika, eskwelahan, komunidad, kabilang na rito ang mga ahensya ng pamahalaan.

Kaya marahil, nanawagan na si Pangulong Ferdinand “Bongbong” Marcos Jr. sa iba’t ibang ahensya ng gobyerno na panatilihing simple ang kanilang pagdiriwang ng Pasko ngayong taon bilang pakikiisa sa mga biktima ng mga nagdaang bagyo.

Sa isang pahayag sinabi ni Executive Secretary Lucas Bersamin na alinsunod sa panawagan ng ating Pangulo, hinihimok nila ang lahat ng government agencies na iwasan ang mga magagarbong pagdiriwang ngayong Pasko.

Ito aniya ay bilang pakikiisa sa milyun-milyong kababayan natin na patuloy na nagdadalamhati hinggil sa mga buhay, tahanan at kabuhayang nawala sa mga panahon kung saan anim na bagyong humagupit sa bansa sa loob ng wala pang isang buwan. 

Ayon kay Bersamin naniniwala naman sila sa kabaitan ng mga kapwa manggagawa sa gobyerno, na lubos din nilang pinagkakatiwalaan na maaaring gawing makiisa sa pagtitipid sa kanilang mga pagdiriwang. Gayundin aniya, hinihikayat nila sila na anumang savings o naipon na nagmula dahil sa kanilang mga simpleng pagdiriwang lamang ay ibigay o i-donate sa mga komunidad na tinamaan ng kalamidad. 

Binigyang-diin naman ng opisyal na sa panig ng gobyerno ay sisiguraduhin nila na ang diwa ng Pasko ay maagang mararamdaman ng lahat ng mga apektadong lugar sa pamamagitan ng pamamahagi ng mga relief goods at tulong, ng mga imprastruktura na itatayong muli, at ng mga kabuhayan na maibalik.

Marahil, tama lamang na mas unahin nating tulungan ang ating mga kababayang binagyo na sila ay makabangong muli sa halip na magsagawa pa tayo ng malalaking parties na lubhang magastos.

Maipagdiriwang naman siguro nating lahat ng simple subalit makabuluhan ang Kapaskuhan na hindi na kailangang maglaan pa ng napakalaking halaga para rito at kung kakayanin ay makapag-donate din tayo bilang regalo para sa kanila. 

Sana ay makiisa ang lahat, hindi lang ng mga ahensya ng gobyerno kundi pati na rin ng mga pribadong kumpanya at iba pa, sa panawagang ito.  

Isipin na lamang natin na magbigay para sa kanila na siyang diwa naman talaga ng Pasko.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com