Pinoy, imbes matuwa, kabado pa sa oil price rollback

ni Pablo Hernandez @Prangkahan | Mar. 2, 2025

MAMAMAYAN KABADO NA NAMAN SA OIL PRICE ROLLBACK KASI MALAMANG KABUNTOT NITO BIGTIME PRICE HIKE -- Inanunsyo ng DOE (Dept. of Energy) na magkakaroon ng oil price rollback next week.

Dahil d'yan, kabado na naman ang mamamayan, kasi ang sistema sa Marcos administration, magro-rollback ng katiting sa presyo ng langis pero ang kasunod ay bigtime oil price hike.

Sana man lang, kapag nag-announce ang DOE ng oil price rollback ay ipadama naman ito sa mga motorista kahit sa loob lang ng isang buwan, ang problema hindi, kasi after mag-announce ng oil price rollback, isa o dalawang linggo lang, bigtime oil price hike na nga ang kabuntot, tsk!

XXX

DAGDAG-SINGIL SA NLEX, DAGDAG-PAHIRAP SA MAMAMAYAN -- Ngayong araw na ito, Marso 2, start na ang taas-singil sa toll fee ng NLEX.

Mula Balintawak hanggang Marilao exit o vice versa sa class 1 vehicles ay P5.00 ang dagdag-singil; sa class 2 vehicles ay P13 at sa class 3 vehicles ay P15, samantalang sa open system naman ng NLEX ay P79 na ang singil sa class 1 vehicles, P199 sa class 2 vehicles at P238 sa class 3 vehicles.

Hay naku, hindi na nga bumababa ang presyo ng mga bilihin at bayarin, tapos may dagdag-pahirap pa na dagdag-singil sa NLEX, buset!

XXX

TATALUNIN NI PCO USEC. CLAIRE SI VP SARA KUNG PAGIGING TAKLESA PAG-UUSAPAN --Rumesbak si Presidential Communication Office (PCO) Usec. Claire Castro sa statement ni Vice Pres. Sara Duterte-Carpio sa political rally sa Cebu na may karapatan daw ang mamamayan na magalit sa Marcos administration, na ayon sa PCO usec. ay dapat daw nanawagan din si VP Sara na magalit sa gobyerno nu'ng ang tatay pa niya na si ex-P-Duterte ang lider ng bansa kasi nga raw ay nabansagan ang kanyang ama na "most corrupt" ng Organized Crime and Corruption Reporting Project noong year 2017.

Tila yata kung pagiging taklesa ang pag-uusapan, tatalunin ni PCO Usec. Claire si VP Sara, boom!

XXX

DAPAT HUBARAN NG MASKARA ANG MGA PROTEKTOR NG AGRI-SMUGGLER AT MEAT SMUGGLER SA CUSTOMS -- Patuloy daw ang pamamayagpag ng agri-smuggling ni "Leah Cruz" at meat smuggling ni "Gerry Teves" sa Customs.

Dapat magsagawa uli ng imbestigasyon ang Senado at Kamara sa isyung ito para mahubaran ng maskara ang mga protektor nila sa Customs, kasi hindi naman magpapatuloy ang ganitong raket nina "Leah Cruz" at "Gerry Teves" sa Adwana kung wala silang mga buwayang protektor sa Customs, period!

Ate, nanay at lola, samantalahin ang mga libreng serbisyo

ni Ryan Sison @Boses | Mar. 2, 2025

Bilang pagkilala sa mga kontribusyon at pagpapahalaga na rin sa ating kababaihan, may mga libreng serbisyo na nakalaan para sa kanila.

Ayon sa Philippine Commission on Women (PCW), magkakaroon ng mga libreng sakay ang Light Rail Transit Line 2 (LRT-2) sa lahat ng kanilang stations para sa mga babaeng pasahero simula sa March 8, tuwing peak hours mula alas-7 ng umaga hanggang alas-9 ng umaga at mula alas-5 ng hapon hanggang alas-9 ng gabi. Kailangan lamang nilang magtungo sa ticket booth ng LRT-2 para makakuha ng libreng tiket.

Maliban dito, may alok din ang LRT-2 na free haircut sa unang 30 pasahero sa March 12 sa Antipolo Station, habang makikinabang naman sa libreng gupit ang mga babaeng pasahero sa Cubao Station sa March 19 at 26.

Sa March 5, magbibigay din ang LRT-2 ng mga rosas para sa mga kababaihan sa Antipolo Station o sa concourse level.

Batay sa PCW, ang mga handog na ito sa mga kababaihan ay bilang bahagi ng ‘Serbisyo para kay Juana 2025’, kasabay ng pagdiriwang ng National Women’s Month.

Kabilang sa iba pang mga ibibigay sa kanila ay ang libreng issuance ng civil registration documents para sa unang 100 kababaihan na makikipagtransaksyon sa Philippine Statistics Authority (PSA) CRS outlets sa buong bansa sa March 3, 10, 17, at 24, gayundin ang libreng admission naman sa mga babaeng bibisita sa The Ninoy Aquino Parks and Wildlife Center sa March 8.

Totoong hindi matatawaran ang mga ambag at ginagawa ng mga kababaihan para sa atin at sa ating lipunan. 

Bukod-tangi rin ang kanilang kasipagan, pagtitiyaga, pagmamalasakit at walang sawa nilang pag-aalaga para sa pamilya at komunidad.

Kaya naman, nararapat lamang na maglaan o magbigay ng mga libreng serbisyo at iba pa sa mga kababaihan bilang pasasalamat natin sa kabutihang ginagawa nila sa atin.

Hindi man natin kayang tumbasan ang pagmamahal at pag-aalaga ng ating mga ina, lola at kapatid na babae, kahit paano ay magagawa nating masuklian ito sa pamamagitan ng ganitong simple subalit makabuluhang pagseserbisyo.

Sa kinauukulan, sana ay mas marami pang magagandang programa at proyekto ang inyong isagawa na tunay na may pakinabang at nakakatulong sa mga mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

EDSA People Power at ang pagbangon ng mga kabataan para sa inang bayan

ni Fr. Robert Reyes @Kapaayapaan / Patakbo-takbo | Mar. 1, 2025

Noong nagsimula ang mga kilos protesta sa harapan ng Commission on Elections (Comelec) sa Intramuros halos tatlong taon na ang nakaraan, nagtitinginan ang mga naroroon at maririnig ang pabirong bulung-bulungan, “Panay seniors na tayong naririto, nasaan na ang mga kabataan?” 

Mahigit dalawang taong nagtipun-tipon ang iba’t ibang grupo tuwing huling Biyernes para sa “First Friday Devotion” na binubuo ng rosaryo at misa na sinusundan ng maikling programa ng protesta laban sa malawakang dayaan noong nakaraang pambansang halalan noong ika-9 ng Mayo 2022. 

Hindi ganoon karami ang naroroon ngunit ang pasya ng lahat ay ipagpatuloy ang buwan-buwang protesta tuwing huling Biyernes upang iparating sa Comelec ang walang sawang pagbabantay ng taumbayan laban sa pandaraya at katiwalian.

Sa mga nagdaang buwan nagising at nagsimulang kumilos ang marami laban sa dalawang matinding isyu: ang “impeachment” ni VP Sara Duterte at ang maanomalyang General Appropriations Act 2025 o ang budget ng administrasyong Marcos para sa 2025. 

Nagsunud-sunod ang mga rally mula Enero 31, Pebrero 9 at Pebrero 25. 

Bagama’t hiwa-hiwalay ang mga nag-rally noong Enero 31, ang Tama Na Coalition sa Liwasang Bonifacio, ang Buhay ang Diwa ng EDSA Coalition sa People Power Monument at ang Clergy and Citizens for Good Governance sa EDSA Shrine, hindi nanatiling magkakahiwalay ang mga pagkilos.

Nagkaroon ng munting pagkilos sa Comelec noong Pebrero 10, kung saan muling nagtipun-tipon ang mga medyo may edad at batikan nang mga aktibista. “History repeats itself,” ang isinigaw ng mga naroroon pagkatapos ng ‘flag raising ceremony ng Comelec’ na dinaluhan ng mga matataas na opisyal at kawani. 

At may bigat naman ang sigaw ng mga naroroon dahil karamihan sa kanila ay buhay na noong dekada 70 at saksi sa mga kaganapan mula sa pag-upo at paglayas ng diktador at ng kanyang pamilya sa Malacañang. 

Oo, matatanda ang mga sumigaw at paulit-ulit na sinasabi, “History repeats itself” sa harapan ng Comelec. Dahil naroroon ang tatlo na naging bahagi ng 35 nag-“walk out” sa PICC noong Pebrero 9, 1986, isinigaw din ang, “Cheating in 1986, cheating again in 2022.”

Punung-puno ng sigla, galit at tuwa ang pagbabahagi ng tatlong naging bahagi ng “walk out” ng 35 kawani ng National Computer Center. Bakit? Dahil naroroon sila at gumawa ng kasaysayan sa pag-“walk out” at pagtalikod sa pandarayang naganap sa “snap elections” ng 1986.

Pagkatapos ng makabuluhang protesta ng paggunita sa “walk out sa PICC”, sunud-sunod na ang pagpupulong at pagpaplano para sa malawakan at nagkakaisang pagkilos sa mismong araw ng paglayas ng diktador at ng kanyang pamilya sa Malacañang. 

Malaki ang nagawa ng panawagan ng isang Obispong Katoliko sa iba’t ibang grupo na magkaisa at palakasin ang kolektibong tinig laban sa katiwalian at inhustisya ng kasalukuyang administrasyon. 

Nagkaroon ng pag-uusap ang tatlong koalisyon ng Tama Na; Buhay ang EDSA at ang Clergy at Citizens for Good Governance. Iba’t ibang kulay at edad din ang bumubuo sa tatlong grupong  nagplano ng magkaisang pagkilos. Hindi nalalaman ng karamihan sa amin kung ano ang mangyayari sa Pebrero 25, 2025. 

Nagtanung-tanong kami kung sinu-sino kaya ang makadadalo? Marami kayang mga kabataan ang lalahok? Ilan kayang mga taong simbahan, mga pari, madre, ermano at iba’t ibang organisadong grupong Katoliko? Ilan kayang mga Protestante, Ebangheliko, mga Muslim ang dadalo? Hanggang dumating ang mismong araw ng kilos-protesta, hindi namin alam, hindi namin tiyak kung ano nga ang mangyayari.

Dumating ang Pebrero 25, unti-unting nagtipon sa EDSA Shrine ang mga grupo sa hanay ng Simbahang Katoliko. Wala pang ala-1 ng hapon, marami nang nasa loob at paligid ng EDSA Shrine. Makapal na ang taong nasa harapan at loob ng EDSA Shrine.

Napakaraming kabataan ang nagsimulang dumating. Maraming mga seminarista, batang miyembro ng religious congregations. Napakarami ring mga kabataang estudyante galing sa iba’t ibang paaralan, kolehiyo at unibersidad. Nang magsimula na ang martsa ng hapon, panay kabataan na ang nakikita namin. Sa harapan, sa likod, sa kaliwa, sa kanan, kabataan maski saan. Naroroon pa rin kaming may edad na, ngunit naroroon ang mga kabataang estudyante.

Ito na nga ba ang pagbabagong hinihintay ng marami? Naririto na ang mga kabataang nag-iisip, hindi nadadala ng mga kasinungalingan ng mga trolls at fake news. Naririto na ang mga kabataang hindi nadadala ng ayuda at mga panandaliang ginhawa mula sa mga amo, padron, ng mga pamilyang trapo at mula sa matatandang dinastiya. Naririto na ang mga kabataang nagpapahalaga sa katotohanan at kasaysayan at handang ipaglaban at ipagpatuloy ang mabuting laban ng mga nakatatanda sa kanila.

Sinabi ng mga pulis, umabot ng anim na libo ang mga naroroon sa EDSA at People Power Monument. Ngunit, merong ibang ulat na umabot ng higit pang 10, 20 hanggang 50 libo ang dumalo, na karamihan sa mga ito ay kabataan. 

Heto na marahil ang pagdurugtong na matagal nang dapat nangyari. Ang pagdurugtong ng ngayon at kahapon, ng ngayon at ng bukas. Ano, sino ang susi ng pagdurugtong na ito? Oo, ang tuluy-tuloy na pagsisikap ng mga nakatatanda, ngunit higit sa lahat ang bukas at masigasig na paninindigan at pagpupunyagi ng kabataan ngayon!