May ‘K’ sa kustodiya ng illegitimate child kapag namatay ang ina

ni Atty. Persida Rueda-Acosta @Magtanong Kay Attorney | Nov. 16, 2024

Dear Chief Acosta,

Ang aking dating live-in partner ay pumanaw noong nakaraang buwan. Naulila niya ang aming anak na ngayon ay 4 taong gulang. Sinabihan ko ang nanay ng aking dating live-in partner na kukunin ko sa kanila ang aming anak subalit sinabihan ako na hindi ko maaaring makuha ang aking anak at ito ay mananatili sa poder ng lola niya. May karapatan ba ang nanay ng aking yumaong dating live-in partner sa kustodiya ng aking anak? -- Ponsee

---

Dear Ponsee,

Ang sagot sa iyong katanungan ay matatagpuan sa Artikulo 176 at Artikulo 214 na may kaugnayan sa Artikulo 216 ng Family Code of the Philippines.

Nakasaad sa nasabing batas na:

“Article 176. Illegitimate children shall use the surname and shall be under the parental authority of their mother, and shall be entitled to support in conformity with this Code. Xxx.” 

Sa kasong Grande vs. Antonio, G.R. No. 206248, February 18, 2014, sinabi ng Korte Suprema sa pamamagitan ni Kagalang-galang na Kasamang Mahistrado Presbitero J. Velasco, Jr., na: 

“Parental authority over minor children is lodged by Art. 176 on the mother; hence, respondent’s prayer has no legal mooring. Since parental authority is given to the mother, then custody over the minor children also goes to the mother, unless she is shown to be unfit.”

Dagdag pa ng Korte Suprema sa kasong Briones vs. Miguel, G.R. No. 156343, October 18, 2004, sa panulat ni Kagalang-galang na Punong Mahistrado Artemio V. Panganiban, Jr., na:

“Moreover, Article 214 in relation to Article 216 of the Family Code provides that, ‘Art. 214. In case of death, absence or unsuitability of the parents, substitute parental authority shall be exercised by the surviving grandparent. In case several survive, the one designated by the court, taking into the same consideration mentioned in the preceding article, shall exercise the authority.’

Art. 216. In default of parents or a judicially-appointed guardian, the following persons shall exercise substitute parental authority over the child in the order indicated:

(1) The surviving grandparent, as provided in Art. 214;

(2) The oldest brother or sister, over twenty-one years of age, unless unfit or disqualified; and

(3) The child’s actual custodian, over twenty-one years of age, unless unfit or disqualified.

Whenever the appointment of a judicial guardian over the property of the child becomes necessary, the same order of preference shall be observed.”

Base sa mga nabanggit sa itaas, ang buhay na maternal grandparent o ang ina ng inyong yumaong dating live-in partner ang may karapatan para sa substitute parental authority at kustodiya sa illegitimate ninyong anak. Mahalaga rin na malaman na ang biological na ama ng illegitimate child ay hindi kasama sa listahan sa Article 216 ng Family Code bilang isa sa mga puwedeng mag-exercise ng substitute parental authority sa illegitimate na anak maliban na lamang kung siya ay actual custodian ng mismong bata kung saan pangatlo siya sa listahan na nakasaad sa batas. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Dahil sa tapang ni ex-P-Duterte, ‘Pinas rank 3 sa safest country sa Southeast Asia

ni Pablo Hernandez @Prangkahan | Nov 16, 2024

NAGING SAFEST CITY ANG DAVAO, NAGING SAFEST COUNTRY ANG ‘PINAS DAHIL SA TAPANG NI EX-P-DUTERTE -- Sa pagdinig sa Quad Committee ng Kamara ay sinabi ni ex-P-Duterte na para maging mapayapa ang pamumuhay ng kanyang mga kababayan sa Davao City, kailangan niyang magpakita ng tapang noong siya pa ang alkalde para puksain ang mga tulak, durugista at mga kriminal sa lungsod.

Ang pagiging palaban sa mga tulak, durugista at kriminal sa Davao City ay nagustuhan ng majority Pinoy kaya iniluklok siya bilang presidente ng bansa noong May 2016.

At sa totoo lang, ang pagiging matapang ni ex-P-Duterte laban sa mga tulak, durugista at kriminal ay may kinahinatnan naman, at hindi maitatanggi na naging mapayapa ang pamumuhay ng mamamayan, at patunay diyan ang data na rank 2 ang Davao City sa safest city sa buong Asya at rank 3 naman ang Pilipinas sa safest country sa buong Southeast Asia, palakpakan naman diyan!

XXX

SA TAPANG NI EX-P-DUTERTE KAYA MINAHAL SIYA NG MAMAMAYAN AT LAGING PANALO SA HALALAN -- Minahal ng mayoryang mamamayan ang pagiging matapang na lider ni ex-P-Duterte. Pero, matapang lang naman siya sa mga tulak, durugista at kriminal at hindi sa mga inosente o ordinaryong mamamayan.

Patunay na siya ay minahal ng publiko dahil mula nang pasukin niya ang pulitika ng maging Officer-in-Charge (OIC) vice mayor ng Davao City noong 1986, at kumandidato noong 1988 hanggang 2016 o halos tatlong dekada, ay never pa siyang natalo, lagi siyang panalo sa halalan, sa pagiging mayor, congressman, vice mayor hanggang presidente, period!

XXX

MARAMING NAPATAAS ANG KILAY NANG IBIDA NI REP. CARDEMA NA ANG DUTERTE YOUTH PARTYLIST LANG NILA ANG KUMAKALABAN SA MGA DURUGISTA, KRIMINAL AT KOMUNISTA -- Marami ang napataas ang kilay nang umepal si Duterte Youth Partylist Rep. Ducielle Cardema nang ibidang mahal niya ang Inang Bayan dahil nag-iisa lang daw ang partylist nila sa Kamara na kumakalaban sa mga durugista, kriminal at komunista.

Dahil sa sinabi niyang iyan, sinermunan ito ng mga kapwa niya kongresista, sinabihan siya nina Antipolo City Rep. Romeo Acop at Surigao Del Norte Rep. Ace Barbers na huwag daw solohin ni Cardema ang pagmamahal sa bayan dahil lahat daw silang nanunungkulan ay may pagmamahal sa bayan. At bukod diyan, pinutakti din ng bashers sa social media ang congresswoman, boom!

XXX

WA’ NA KUWENTA ANG PARTYLIST SYSTEM SA ‘PINAS -- Wala nang kuwenta ang partylist system sa ‘Pinas.

Nakasaad naman kasi sa batas na dapat ang mga partylist nagre-represent sa mga marginalized sector tulad ng kabataan, kababaihan, magsasaka, manggagawa, mangingisda, katutubo at iba pang kauri nito, pero sa ngayon ay karamihan na sa mga partylist, ang mga nominado ay kapamilya ng mga trapo (traditional politicians), at pati ang sikat na apelyido, ginagawa na ring partylist tulad ng apelyido ng dating presidente, dinugtungan lang ng “youth” aprub na sa Comelec bilang partylist, at ito nga ‘yung Duterte Youth Partylist, tsk!

Pasasway na mga online seller, tutuluyan

ni Ryan Sison @Boses | Nov. 16, 2024

Sa halip na maging pasaway, dapat na sumunod na lamang ang mga online seller sa mga patakaran o polisiya na ipinatutupad ng Bureau of Internal Revenue (BIR).

Ayon kay BIR Commissioner Romeo Lumagui, Jr., hindi sila magdadalawang-isip na ipasara at ipatigil ang operasyon ng mga online seller at E-marketplaces kung hindi sumusunod sa kanilang registration at tax remittance rules.

Aniya, dahil ngayon ang panahon na marami ang namimili online at malakas ang kita ng mga online business, mas pinaigting ng kagawaran ang kanilang kampanya laban sa mga ito.

Batay sa Section 115 ng National Internal Revenue Code na inamyendahan sa ilalim ng RA No. 12023, binibigyang kapangyarihan ang commissioner ng BIR na suspendihin ang mga operasyon ng negosyo, gayundin ang pag-block sa digital services at mga digital service provider sa bansa na hindi nagbabayad ng tamang buwis sa gobyerno.

Binigyang-diin ni Lumagui na sakaling lumabag ang mga ito sa batas sa pagbubuwis ay kanilang sususpendihin ang operasyon ng mga online store sa ilalim ng kanilang Online Kandado program gaya ng ginagawa sa mga physical store. Iginiit din niya na ang lahat ng online stores ay kinakailangan na sumailalim sa tamang registration maging ito man ay maliit o malaki.

Ipinaliwanag pa ng opisyal na ang mga may tindahan o kahit na sari-sari store ay nagbabayad ng kanilang buwis kaya nararapat lamang na ipatupad din ito sa mga online business.

Pinaalalahanan naman niya ang mga mamimili na dapat humingi sa mga online seller ng official receipt na kanilang na-purchase. Ipinunto niya na kung ginugugol natin ang ating pinaghirapang kita matapos magbayad ng buwis sa kanilang mga produkto, dapat ding magbayad ng buwis ang mga online seller.

Marahil, tama lang na sumunod ang ating mga kababayang online seller at isumite ang mga kinakailangan sa BIR.

Mahirap kasing magmatigas pa at hindi agad gawin ang ipinatutupad ng batas dahil siguradong tayo rin ang mapeperhuwisyo, kung saan hindi sila mangingimi na ipasara agad ang ating mga negosyo.

Kumbaga, no choice tayo kundi ipa-register ang ating mga online business habang magbayad tayo ng tamang buwis.

Hiling lang natin sa kinauukulan na sana ang ibinabayad na mga buwis ng bawat mamamayan sa ating gobyerno ay totoong ginagamit sa tama at hindi napupunta sa kung saan man.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com