Transportasyon ngayong holiday, tiyaking safe at sapat sa publiko

ni Ryan Sison @Boses | Dec. 21, 2024

Dahil dagsa na ang mga pasahero sa iba’t ibang lugar sa bansa, siguradong problemado na ang mga ito sa kanilang pagbiyahe.

Kaya naman binigyan ng Land Transportation Franchising and Regulatory Board (LTFRB) ng mga special permit para sa mga public utility vehicle para sa panahon ng Kapaskuhan at Bagong Taon.

Ayon kay LTFRB Chairperson Teofilo Guadiz III, inaprubahan ng board ang mga special permit para sa 956 units, mula sa 988 units na nag-apply para makabiyahe ng kanilang ruta.

Pinaalalahanan din ng opisyal ang mga operator at driver na ang mga special permit ay magiging valid mula December 20, 2024 hanggang January 10, 2025.

Sinabi ni Guadiz na karaniwang nagbibigay ang LTFRB ng special permits sa mga PUV bilang dagdag na sasakyan sa tumataas na bilang ng mga pasahero tuwing holiday season. 

Aniya pa, inaasahan nilang maseserbisyuhan ang mas maraming komyuter ngayong holiday rush, at tinitiyak ang mahusay at ligtas na paglalakbay para sa lahat.

Mainam at napagdesisyunan agad ng kinauukulan na magdagdag ng mga sasakyan lalo na’t napakaraming mga pasahero ang nagsisipaglabasan at namamasyal na habang ipinagdiriwang ang holiday season.

Gayundin, dapat nilang siguruhing may mga available na mga transportasyon hindi lang sa land, maging mga sasakyang pandagat at air transport. 

Para naman sa ating mga kababayan, kailangang planuhin din ang kanilang paglalakbay partikular na ang mga may sasakyan dahil trapik naman ang kanilang susuungin, habang tiyakin na maayos ang makina at break ng mga ito.

Paalala rin sa lahat na magdoble-ingat sa pagbiyahe at huwag kalimutang magdasal at magpasalamat sa lahat ng biyayang ipinagkaloob ng Poong Maykapal.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Darating pa ba si Santa Claus?

ni Bong Revilla @Anak ng Teteng | Dec. 20, 2024

Maraming mga bata ang nagtatanong kung darating pa ba si Santa Claus — masakit na katanungan kung ang makaririnig ay ang mga magulang partikular ang ama ng tahanan dahil sa isang mahalagang papel ang kanilang ginagampanan sa mga anak sa tuwing sumasapit ang Pasko.

Sa dinami-dami ng ating mga kababayang tila hindi pinalad sa panahong ito ng Kapaskuhan dahil sa mga pagsubok na dumaan tulad ng mga kalamidad ay mahirap ipaliwanag sa kanilang maliliit na anak kung darating pa ba si Santa Claus.

Alam naman natin na bahagi ng ating kultura na ang ama ng tahanan ay naglalaan ng panahon para makapaghanda at maibili ng laruan para pasayahin ang Pasko ng kanilang mga anak sa paniniwalang galing ito kay Santa Claus.

Sa mga lugar sa Pilipinas ay maraming mga bata ang hanggang sa kasalukuyan ay umaasang isang araw bago mag-Pasko ay dadalawin sila ni Santa Claus.

Bilang isang tatay ay damang-dama ko ang pighating nararanasan ng mga ama ng tahanan na kapos sa kakayahan para tuparin ang mga pangarap ng kani-kanilang mga anak kahit sa isang simpleng pamasko lamang.

Sa kabila ng napakarami na nating napuntahan lugar para bahaginan ng kahit pang-Noche Buena man lamang ay nagsusumigaw ang katotohanang hindi natin kakayaning bigyan lahat para walang malungkot sa mismong araw ng Pasko.

Nawa ay magsilbing aral din sa mga ama ang pangyayaring ito na lalo tayong magsumikap sa buhay para sa susunod na taon ay matiyak nating mapupuntahan ni Santa Claus ang ating mga anak.

Ngunit, hindi porke kapos tayo sa pinansyal na aspeto ay hahayaan na lamang nating dumaan ang Pasko ng wala lang.

Dapat ay pangunahan natin ang mismong paliwanag sa ating mga anak kung ano talaga ang tunay na kahulugan ng Pasko at idetalyeng mabuti na hindi handa at laruan ang importante bagama’t bahagi ang mga material na bagay ay higit na mahalaga na magkakasama ang buong pamilya.

Pinakamahalagang sabay-sabay tayong dumalo sa misa sa mismong araw ng kapanganakan ni Hesus kasama ang buong pamilya at ipagpasalamat natin ang mga biyayang ipinagkaloob ng Panginoon sa nagdaang taon.

Pagkatapos dumalo ng misa ay dapat ding pagsaluhan ang hapunan kahit walang magarbong handa — dahil kahit simple ay magkakasama at buo ang pamilya.

Ito ang tunay na diwa ng Pasko, ang ipagdiwang ang kaarawan ng ating Panginoon at dapat na maunawaan ng ating mga anak. 

Ipagdasal lang natin sa Panginoon ang kasalukuyan nating pinagdaraanan at unti-unti ay magiging maayos din ang lahat habang maiintindihan ng mga bata kung bakit hindi magagawi si Santa Claus.

Samantala, ayon sa ulat ng Philippine National Police (PNP) ay tumaas ng bahagya ang krimen na may kaugnayan sa Pasko – ito ay dahil sa pressure na kailangan ng panggastos sa Kapaskuhan.

Ngunit hindi tamang gumawa pa ng panlalamang sa kapwa para lamang mairaos ang araw na ito ng masagana — kahit magarbo ang handaan kung galing naman sa masama ay tiyak na hindi ito ikatutuwa ng Panginoon.

Hindi naman kailangang may mamahaling damit o regalo dahil ang mahalaga ay maipadama natin sa kapwa ang pagmamahal. At kung may mga kasamaan tayo ng loob ay mabuting makipagkasundo na bilang pag-alala sa tunay na diwa ng Pasko.

Sa ganitong paraan ay mairaraos natin ito ng maligaya at sinisiguro kong mas masaya ang ganitong uri ng karanasan kumpara sa maraming handa pero sobrang bigat naman ng nararamdaman dahil sa rami ng bagahe sa buhay.

Ayokong magtunog relihiyoso ngunit mahalagang yugto ng ating buhay ang panahong ito at sayang naman kung hindi natin magagawang maging masaya dahil lamang sa kakapusan sa buhay.

Huwag tayong malugmok dahil sa hindi natin maayos na sitwasyon at sa halip ay gamitin natin itong inspirasyon para sa masayang Pasko sa susunod na taon. Maligayang Pasko sa inyong lahat!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Saludo sa mga nagsisilbi sa taumbayan kahit sa panahon ng Kapaskuhan

ni Judith Sto. Domingo @Asintado | Dec. 20, 2024

Binabaybay ang siyudad ng tsuper ng isang pribadong sasakyan na maaaring mai-book gamit ang isang kilalang ride-hailing app. Gabi at bisperas ng Pasko habang nag-aabang siya ng pasaherong mangangailangan ng kanyang serbisyo. Malamang na ang maisasakay ay nakipagsalu-salo sa bahay ng kamag-anak o kaibigan at maghahabol na makauwi sa sariling tahanan bago sumapit ang hatinggabi.

Ngunit posibleng ang kanyang maiaangkas ay magpapahatid hindi pauwi mula sa isang kasiyahan o patungo sa pagpapakasasa kundi papasok sa hanapbuhay upang patuloy na manilbihan sa kapwa. Sa mahinahong pagbibiyahe ng naturang tsuper sa mga oras na iyon ay matatanaw din niya ang iba pang nasa kalagitnaan ng pagkayod sa panahong ito, ’di gaya ng nakararami na nakatutok muna sa paglilibang at pagpipiging.

Dala ng wagas na dahilan ng panahong ito, mapapansin niya ang ilang tauhan ng mga lugar na dasalan, na bukas para sa mga nais magpasalamat nang taimtim sa pagdating ng Mesiyas. 

May magigisnan din siyang mga kaparis na tsuper pero ng taxi, pampublikong motor at kahit jeepney, na nagtitiyaga pa ring kumayod kahit limitado ang bilang ng mga pasahero.

Hindi siya magugulat ngunit tahimik na sasaludo sa mga nars, doktor at ilan pang kawani ng mga ospital, mga institusyong nungkang magbakasyon. Kasama nila ang may pasok na mga tagalinis, na walang humpay sa pagtitiyak na walang batik ang mga pader, sahig at kagamitan ng kanilang pinapasukan.

Sa pagdaan din ni manong tsuper sa ilang mga gusali ay makikita niya ang mga guwardiya o sekyu na nanunungkulan pa rin sa pagbabantay ng negosyo ng kanilang amo.

Mamamataan din niya ang mga pulis sa ilang presinto, na abala sa pagte-text o pag-i-scroll sa cellphone.

Nariyan din ang kanilang kapatid sa pagiging alisto: mga bumberong handa pa ring sumaklolo kung magkakaroon ng biglaang sakuna. 

Mapapansin din ng nabanggit na tsuper ang mga empleyado ng mga pamilihan at restoran na hindi sarado kailanman, kahit tuwing tulog na ang karamihan. 

Bukod sa mga iyon ay ang matiyagang mga tagapag-alaga sa mga tahanan o sa mga bahay ampunan para sa mga naulilang kabataan o inabandonang may-edad. Isama na rin ang mga kasambahay na marahil ay kinabukasan pa makakasama ang kanilang sariling kamag-anak at ang pansamantalang pinagsisilbihan ay hindi ang sariling pamilya. 

Resulta ng patuloy na globalisasyon ang isa pang grupo ng manggagawang makikita ni manong drayber: ang mga nagmamando ng mga opisinang ang pagpapatakbo ay 24 oras araw-araw, gaya ng mga call center o business process outsourcing (BPO) na mga kumpanya, na mga orasan at kultura ng ibang bansa ang sinusunod at hindi ang sa sariling bayan.

Kung magagawi sa may paliparan ay matatanaw din niya ang patuloy na naka-duty rito, lalo na upang manilbihan para sa dagsa ng magsisipag-uwi galing sa ibayong dagat, gaya ng mga OFW na sabik na makapiling ang mga mahal sa buhay na matagal nang sa kanilang napawalay.

At hindi man niya mamumukhaan ang mga ito pero masisilip din niya ang mga nakaantabay na mga tagapagbalita, taga-ulat man o taga-litrato, para sa pagkakataong may kailangang ibalita’t ibulgar kahit sa mga oras na ito na abala ang karamihan sa selebrasyon.

Silang lahat ay ilan lamang sa mga dakilang nagtatrabaho sa panahong ginugunita ang pagsilang ng Dakilang Manunubos. 

Maaari silang huminto ng kahit ilang sandali pagkagat ng alas-dose upang makapiling nang kahit virtual ang mga kadugo at mabati sila ng maalab na “Maligayang Pasko!” Ngunit pagkalipas lamang ng ilang sandali, sila’y manunumbalik agad sa pagkayod.

Magkakaramay sila sa paghahanapbuhay kung kailan nakabakasyon ang puso’t diwa ng nakararami, at nagpapasalamat pa rin sa sabay na pagkakataong kumita at makatulong sa kapwa habang ginagampanan ang kani-kanilang tungkulin. Ganito sila magdiwang ng Kapaskuhan, na ang mga gawain at galaw ay mistulang dalisay na pagbati ng

“Buenas noches” kahit ang mas masarap sana ay ang pakikipag-Noche Buena.

Sila ang patunay na ang pagbubunyi sa pagdating ni Hesus ay may maraming kaparaanan na ang pagkakahalintulad ay ang layuning makapagsilbi o makatulong sa iba, kahit sa hindi kakilala.

Kaya’t sa mga darating na araw hanggang sa paparating na Miyerkules, asintaduhin natin ang taos-pusong pagdiriwang ng Kapaskuhan — nasaan man tayo at anuman ang ating gagawin. Gawin ito na puno ng pasasalamat sa anumang mayroon tayo at iwaksi sa isip at damdamin ang kung anuman ang wala sa atin.

Maligayang Pasko sa inyo at sa inyong mga mahal sa buhay, mga giliw na mambabasa!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.