Dapat gawin kung nawalan ng bahay

ni Nympha Miano-Ang- @Life and Style | July 27, 2021

Ang dami na namang winasak na bahay ng nagdaang bagyong Fabian, para silang nademolis na kahit hanapan pa ng relocation site at bigyan ng maayos na paglilipatan ay patuloy pa rin silang bumabalik sa mapanganib na lugar na kanilang kinatitirikan. Tulad din sila ng mga residenteng nasunugan kaya wala nang sariling tahanan, diyan na ngayon dapat matuto kung paano mamumuhay ayon sa pangangailangan: pagkain, masisilungan, tulog at kapayapaan ng isipan.

1. Alamin ang mga pangangailangan at estimahin kung hanggang saan ka tatagal nang wala ang iba pang kailangan. Nagugutom ka ba? Maghanap ka na ng pagkain ngayon o ipagpatuloy ang hanapbuhay. Manatiling mabuhay dahil nariyan ang pamahalaan para makatulong sa kaunting makakain at masisilungan.

2. Giniginaw na ba kayo dahil patuloy ang pag-ulan at malamig ang gabi? Makisilong muna kung saan ligtas na mahatdan at may nakahanda namang evacuation center ang pamahalaan para sa mga apektadong pamilya. Huwag basta kakalat-kalat sa kalye at baka mapagkamalang namamalimos. Kung kayang bumili ng kape ay magkape. Move on at lumaban at magpatuloy lang sa buhay.

3. Alam mong nagiba na ang iyong bahay. May lugar ba kayong mapagsisilungan? Kung ayaw ninyo sa evacuation center, mas ligtas kung makikipanuluyan sa kaibigan o kaanak kaysa ang makipagsiksikan sa center. Delikado kasi kung sa ilalim kayo ng tulay o pakalat-kalat na matutulog sa daan dahil kayo ang pinaka-karaniwang target ng mga adik, mga nambibiktimang mga loko sa kalye at iba pang mga masasamang elemento. Sikaping humanap kahit paano ng masisilungan. Hingin ang tulong ng mga awtoridad. Makiusap sa kanila, magsalita nang maliwanag at tapat, iparamdam na desperado ka. Tanungin sila kung ano ang maaaring dalhin at hindi sa pakikisilong.

4. Habang nakikitira, sundin ang lahat ng mga regulasyon at batas sa lugar. Kung may curfew ay sundin. Para na rin sa kaligtasan ninyo ang paghihigpit nila. Kung may iba kang makikilala na nakikisilong sa lugar dahil sa naging biktima ng baha, sunog o demolisyon, mainam na may makakausap ka at maging positibo sa lahat ng aspeto habang walang matitirhan.

5. Kung may posibleng trabahong maibibigay sa’yo sa lugar na iyan, mas mainam. Diyan ka makapagsisimula ng bagong trabaho at pamumuhay. Tandaang nasa desperado kang sitwasyon at kailangang tanggapin anuman ang biyayang darating sa ikalawang pagkakataon.

6. Kapag may rasyon na pagkain, maging disiplinado. Kung dapat na pumila ay pumila nang maayos, huwag makipag-agawan ng pagkain kahit sa kapwa walang tirahan at pagkain. Matutong magsalita ng pakisuyo at magpasalamat kahit kanino. Huwag basta parang gutom at galit sa lahat ng bagay. Kung kailangan ng panalangin bago kumain ay makisabay na lang sa panalangin nila kung anuman ang ritwal mo sa sariling relihiyon. Ang pagpapasalamat sa Maykapal ang siyang magpapabago sa iyong ugali at magbibigay ito sa iyo ng lakas sa araw-araw.

7.Kung ang relocation area na napuntahan ay walang pagkain, tubig at iba pang serbisyo na madaling mapuntahan, gumawa na ng paraan. Kailangang gawin ang lahat para maka-survive. Huwag mananakit ng iba o manggugulang ng kapwa. Huwag magnanakaw sa mga tindahan. Kung ang gas stations, restoran at grocery stores ay may itinatapon na mga pagkaing malapit nang masira, puwede pa itong kainin o ang tinatawag na pagpag. Tingnan kung may makita pang maayos na nakabalot at at kung hindi pa panis ay puwede pang initin na mabuti at kainin.

8. Kung may sirang sasakyan, dito na lang muna matulog. Kailangan mong pa ring may proteksiyon ka habang may nasisilungan. Maging malikhain sa paghahanap ng tamang lugar habang walang bahay, pagtiiisan ang lahat ng kayang gawin at makain. Balutin ang sarili ng kumot para maiwasang makagat ng lamok at hindi malamigan kung sakaling umuulan.

9. Maging mabuti sa ibang tao para mas matahimik ka at huwag kang maiinggit sa kapwa. Maging handa na depensahan ang sarili sakaling may ibang gumugulo pa sa iyo.

10. Maging matalino, masayahin, ngumiti at awit-awitan na lamang o sipul-sipulan ang mga pangyayari. Sa maniwala ka o hindi kapag ganito kapositibo ang iyong ugali at lakip pa ang awitin sa puso higit na maililigtas mo ang iyong sariling isipan at buhay laban sa mga desperadong pangyayari.

11.Kailangang manatiling tahimik at malayo sa iba pang masamang elemento. Tanggapin ang responsibilidad sa mga gagawin at aminin sa sarili na wala ka nang bahay ngayon. Kailangan kang magsikap ngayon kung paano aayusin ang buhay at magkaroon uli ng sariling bahay bukod sa pagkakaroon ng regular na hanapbuhay.

Alam n’yo bang marami akong kakilala na mga kabataan noon na mas lalong naging masikap ngayon at may magaganda nang bahay at sariling mga lote dahil ayaw na nilang magbalik sa dating buhay na squatter na laging ginigiba at dinedemolis. Huwag magpakatamad o madespera. Sa halip pag-ibayuhin ang espiritwal na pananaw. Ang mahalaga ay buhay ka at may pag-asa pang nag-aabang para sa tulad mo na bahay lamang ang nawala. Iyan ang kapangyarihan ng milagro. Sa kabila ng mga nangyari sa buhay, ang mga pagsubok o paghamon na iyan ay lalampasan mo rin. Marami ka pang panahon para mag-isip at maging positibo. Maging matatag sa pag-iisip. Sabihin lagi sa sarili na"Heto ako, ito ngayon ang hinaharap kong problema at kailangan kong lampasan at labanan at wala nang makakapigil pa sa akin." Palakasin ang pananampalataya at palakasin ang tiwala sa Diyos.

Anu-ano ang dapat gawin para maiwasang mapikon?

ni Nympha Miano-Ang- @Life and Style | July 14, 2021

Kung minsan ang pamimigat ng kalooban ay bunga na rin ng iba’t ibang mga kadahilanan, pero sabi nila ang pinakamatinding dahilan daw dito ay iyong mainsulto ka dahil sa panunudyo o panunukso. Maging ito man ay mula sa isang itinuturing mo pa namang mabuting kaibigan o sa mga barkada, kung minsan ang panunukso nila ay nakakalikha ng insekyuridad at nakakababa ng pagkatao kung kaya naman matagal bago ito mawala sa kalooban.

Habang hindi mo makontrol ang pagtatawa ng iba, o sinasabi ng iba magagawa mo namang makontrol ang sarili kung magbabago ka para hindi ka tuluyang mapikon sa kanila.

1. Kunwari ay wala kang naririnig. Dedmahin na lang ang pagtatawa ng iba para makayanan ang sitwasyon. Sila kasi ang mga taong gustong makakuha ng iyong reaksiyon sa unang hataw pa lang ng pang-iinsulto. Dahil kapag nanatili kang ‘di kumikibo at tahimik lang, siguro ay susuko na iyan at hindi na mauulit pang mang-insulto o manudyo.

2. Magpakitang tatag o tapang. Kahit na hindi ka masyadong kumpiyansa sa sarili, magpakatatag at kunwari mas matapang ka sa nararamdaman mo sa ngayon. Kapag sumagot ka nang matatag at mangatwiran sa mga taong nagtatawa sa iyo ay magpapakita sa kanya na mas matapang ka kaysa sa iniisip niya.

3. Itago mo na lang ang iyong tunay na damdamin hanggang sa pag-iisa. Plastikin mo nang ngiti kumbaga. Dahil kapag ipinakita mo ang iyong pagkapikon sa pang-iinsulto niya, mas lalo siyang matutuwa. Perpektong naiintindihan na napatahimik ka na lang, pero maghintay ka na lumapit siya sa iyo para manghingi ng sorry.

4. Pigilan ang sarili na patulan siya. Huwag kang bababa sa kanyang lebel dahil hindi malulutas ang problemang ito. Lalo lang siyang mahahamon.

5. Gaanan lamang ang komento. Kung ang nang-iinsulto ay pinagtawanan ang iyong bagong gupit na buhok at damit, puwede ka namang sumagot ng pasasalamat sa kanya at napansin niya rin ang iyong naging pagbabago. Hindi ang naturang sagot ang gusto niya, mainam na nakontrol mo ang iyong sarili na patulan siya sa kanyang naging komento.

6. Iwasan na ang naturang tao. Hindi ka naman kasi pagtatawanan at matutukso uli kung masasalubong mo uli at magkrus uli ang landas ninyo ng tao. Hindi na praktikal kung araw-araw ka na kasing nasasaktan sa pang-iinsulto. Kaya simpleng dumistansiya na lang at lumayo para hindi siya makita at hindi ka masyadong magdaramdam.

7. Pero, tandaan mo na hindi naman iyon tungkol lahat sa iyo. Ginagawa kasi ng ibang tao ang panunudyo dahil may problema sila sa damdamin, ito’y para makuntento ang kanilang kasiyahan at para mas iangat nila ang sariling karakter.Basta lagi mo lang paalalahanan ang sarili na ang mga pang-iinsulto ay mas madaling balewalain.

8. Kapag alam mong nariyan na uli ang mga nang-iinis, dapat lagi kang may good friend sa tabi para maipagtanggol ka.

9. Kung ang panunukso ay sumosobra at hindi mo na kayang tanggapin, oras na para magsumbong sa iba na may awtoridad na kumastigo sa kanila.

10. Pataasin mo na lamang ang tiwala sa sarili, hubugin ang talento at isipin na anuman ang sabihin nila sa iyo, dapat ka pa ring proud sa iyong sarili.

Paano maiiwasan ang sumbatan kung may komprontasyon?

ni Nympha Miano-Ang- @Life and Style | July 12, 2021

Ang berbal na komprontasyon ay hindi madali, pero hindi sinasadyang biglang uusbong uli ang hindi naresolbang damdamin at iyon pa rin ang gumugulo sa iyong isip buhat nang huli kayong magkita ng naturang tao. Kung halos isang taon na kayong ‘di nagkikita at may nakatanim ka pa ring sama ng loob sa kanya, hindi kailangang husgahan siya at maging mabigat ang argumento. Maging sibil at kampante sa pakikiharap kung gustong maging malinaw ang lahat.

1. Tanungin ang sarili kung ang argumento ay sapat para maging paksa pa. Pero kung mahalaga pa rin sa iyo ang argumento kahit isang taon na ang nakalipas, tanungin muna ang sarili kung kailangang mag-usap at gusto mong matapos na sa balak mong mapag-usapan. Maaaring ang paliwanag niya ang gusto mong marinig o simpleng tawad ang hingi mo sa kanya. Ang makuha mo lang ang magandang resulta sa argumento ang tutulong para maging maayos na ang lahat. Tanungin din ang sarili kung ang tao na haharapin ay mahalaga pero kung hindi na ay huwag nang aksayahin pa ang oras.

2. Gumawa ng strategy sa komprontasyon at maging maingat. Isipin ang gustong sabihin sa tao kung paano paplanuhin na mabanggit sa kanya ang paksa. Imadyinin ang magiging tugon niya at kung ano ang kahihinatnan ng argumento. Lumikha ng strategy para maging kampante at maayos sakaling mag-init ang sitwasyon at nang matulungan ang sarili na maiwasang makapagsalita ng kung ano na pagsisisihan mo sa dakong huli.

3. Kontakin o makipagkita sa kanya at hayaang ipasabi sa kanya na gusto mo siyang makausap. Magparamdam sa kanya at gusto mo kamo siyang makausap at i-set ang lugar kung saan kayo magkikita. Pumili ng lugar na ligtas, tahimik at makapag-usap ng ilang oras kung kailangan. Iwasang makipag-kompronta sa pampublikong lugar kahit anong mangyari.

4. Ipanatag muna ang loob at simula nang dahan-dahan sa konting kuwento. Maging sibil at kumustahin muna siya sa nagdaang ilang buwan na 'di ninyo pagkikita at ano ang ginagawa niya, kumustahin ang pamilya niya, kumustahin siya sa bago niyang trabaho. Ang matanong muna siya sa mga bagay-bagay na tungkol sa buhay niya ang papanatag sa susunod na usapan at maiwasan ang pag-iinit ng ulo at tumaas ang tensiyon.

5. Maging bukas at tapat hinggil sa isyu sa pagkompronta sa tao. Iwasang magpaliguy-ligoy at diretsahin na sa nararamdaman. Manatili sa iniisip, damdamin para marinig niya ang iyong punto. Sabihin sa tao ang inaasahan mong kalalabasan ng usapan kung paano mo inaasahan ang bagay na maging iba sa hinaharap, halimbawa: “Okey lang na sa akin mo direktang sasabihin kaysa naman marinig ko pa sa iba ang mga sinasabi mo tungkol sa akin.”

6. Makinig sa iba pang kuwento ng tao hinggil sa buhay niya. Tulad mo, siya rin ay may iba ring iniisip at damdamin hinggil sa bagay na maaring pareho o iba sa iyo. Kung pakikinggan ka niya, parehas ang damdamin ninyo dahil nakinig ka sa sinabi niya. Kapag nagawa mo ito at malaman kung ano ang gustong matupad ng isang tao ang makatutulong sa inyong dalawa na magkasundo na.