Tips para ma-enjoy ang solo adventure

ni Nympha Miano-Ang @Life and Style | April 22, 2023

Maging ikaw man ay isang metikulosong planner o isang taong basta nakakita ng biyaheng bus, sasampa kaagad para lang makabiyahe ng solo at bahala na, susuungin ang adventure ng buhay.

Para kasi sa iyo iyan ang magiging experience at aral mo sa bagong adventure para matutunang lumakad at magbiyahe na mag-isa. Alam mong ang alaala ng napakagandang biyaheng adventure ay dapat maging unforgettable, kaya ang kailangan mo lang ay sige lang gora lang na makapagbiyahe para makapagsimula ng panibagong adventure sa buhay. Pero paano ba mas mae-enjoy ang solong biyahe sa bawat pupuntahang lugar. 1. Tingnan kung gaano katagal ka sa papasuking adventure. Huwag hayaang ang kakulangan sa libreng oras ang magpapadismaya sa iyo. Basta’t tiyakin na ang pagbiyahe ay lilikha ng pangmatagalang alaala lalo na kung ang destinasyon ay tama. 2. Konsiderahin ang budget at gamitin ito bilang gabay. Ang pagbiyahe nang hindi masyadong magastos ang pinakamagaling na adventure sa lahat. Puwedeng sumakay ng tren patungo sa pinakamalayong destinasyon. Tumambay sa coffee shop o karinderya at makipagkuwentuhan.

Bisitahin ang maliliit na museo, historical centers, art galleries o sight seeing places.

Magtungo sa iba pang visitors’ center. May mga libreng aktibidad kahit saan at may mga impormasyon sa mga pupuntahan, gawing gabay ang mapa sa cellphone at iba pang ideal places na nakarekomenda roon. Kung nakatira ka sa labas ng pangunahing siyudad, isang simpleng day trip sa MRT o LRT lang, ferry o bus ay maghahatid na ng sariwang perspektibo sa araw-araw na buhay.

Kung mahabang biyahe ang plano pumili ng pinakaligtas na lugar sa bansa. Kung may sapat kang budget, may mga deluxe adventure na maaaring ikonsulta sa mga lehitimong professional travel agent na may inaalok na group packages. Mag-ingat lamang at suriing mabuti kung hindi mai-scam sa mga travel packages. Ang tour operators ay may iba’t ibang offer ng mga lugar o aktibidad na depende sa iyong panlasa, pam-beach man ang destinasyon o kaya ay bulubundukin. 3. Matalinong i-manage ang oras, pero maging flexible. Nariyan ang sobrang trapik at delays sa eroplano at hindi laging batid ang lagay ng panahon. Gamitin ang pagkakataon na ito, basahin ang susunod na serye ng biyahe, kausapin ang iba pang stranded passenger o kaya ay magtungo na lang sa lugar na ‘di gaanong dinadayo.

Magandang ideya rin na lumahok sa joiners club o iyong may mga biyaheng magkakasama kahit hindi magkakilala sa isang van, kung hindi naman tawid dagat ang pupuntahan. Dahil sila ang may mga itineraries kung anong mga oras aalis, kakain at pupunta sa isang lugar. Ingat sa biyahe ngayong summer mga lodis and have fun!

Mga 'Pamahiing Pinoy' sa tuwing araw ng Kuwaresma

ni Nympha Miano-Ang- @Life and Style | March 20, 2023

Karaniwan nang pawang mga aktibidad sa simbahan simula ng Araw ng Palaspas o sa unang Linggo ng Abril ang paggunita sa pagkamatay ni Hesukristo.

Likas sa mga Pilipino ang pagiging mapamahiin. Lahat na lang yata ng bagay at okasyon sa ating buhay ay kaakibat ang mga pamahiin o mga paniniwalang nakaugat sa ating kultura at tradisyon. Sa kabila ng katotohanang hi-tech na ang lahat, hindi pa rin nabubura ang ilang paniniwala ng salinlahi at patuloy na binubuhay ng bawat bagong henerasyon.

Narito ang ilan sa mga paniniwalang Pinoy tuwing Kuwaresma na hindi natin maintindihan, karamihan ay walang basehan at nagiging katatawanan, ngunit patuloy na sinusundan.

1. Pag-aakyat sa bundok, partikular ng mga arbularyo, para maghanap ng mga halamang gamot at anting-anting na pinaniniwalaang dumodoble ang bisa kapag nakalap sa Semana Santa, lalo na kapag Biyernes Santo.

2. Paglalagay ng palaspas sa pintuan at mga bintana ng bahay para hindi pumasok ang aswang o demonyo.

3. Ang mga lumang palaspas ay sinusunog at ang abo at hinahaluan ng langis ng niyog at ginagawang gamot – sa sakit ng ulo, tiyan, galis, at mga kati-kati.

4. Guguhitan ng krus ang mga dingding ng bahay para maitaboy ang masasamang espiritu.

5. Bawal maligo ng Biyernes Santo dahil magkakasakit.

6. Iwasang magkasugat dahil mas malalim ito at matagal maghilom.

7. Bawal magsalita ng malakas o tumawa baka ka mabati ng masasamang espiritu.

8. Bawal magwalis, magsibak ng kahoy, magpukpok ng martilyo o gumamit ng kutsilyo dahil “patay” ang Diyos.

9. Ang mga bata ay pinapalo ng baging ng makabuhay para hindi maging sutil o lapitin ng aswang, engkanto o masamang espiritu.

10. Ang langis ng niyog na ginawa sa Biyernes Santo na mabisang pantaboy ng masasamang espiritu ay nakagagaling ng sakit.

11. Ang mga bata ay pinagbabawalang pumunta sa kakahuyan o masusukal na lugar dahil maaari silang batiin ng mga engkanto at papalitan ang kanilang kaluluwa.

12. Bawal mag-ihaw ng isda dahil mangingitim ang iyong mukha.

13. Sa Linggo ng Pagkabuhay, ay pinababasbasan ang mga butong ipupunla upang maging masagana ang ani.

14. Ang ulan sa Linggo ng Pagkabuhay ay itinuturing na agua bendita o holy water na simbolo ng pagbuhos ng biyaya ng Diyos.

Ang kuwento sa 'Road To 31 Years' ng BULGAR

ni Nympha Miano-Ang- @Life and Style | December 2, 2022

Maitutulad sa isang naglalakbay sa daan ang tinatahak na landas ng BULGAR. Pakay lumayo at umakyat pa ng matagumpay sa matataas na lugar, pero ang mga susuungin na daan tungo sa mas malayo pang mararating ay pawang may iba't ibang mapanubok na sitwasyon.

Sa unang dalawang taon ng BULGAR (Pahayagan ng Katotohanan), matrapik dahil hindi basta makausad sa mga karibal na tabloid at magasin na unang humarurot sa kalye.

Subalit sa husay ng pagmamaneho ng publisher na si Gng. Leonida B. Sison at yumaong mister na si G. Rainier Sison, sinabayan nila ang harurot kahit makitid ang daan.

Pagsapit sa ika-5 kilometrong taon na daan, naroon na tuwing bubusina ang kopya ng Bulgar sa bawat kanto, nililingon ng masa, paparahin dahil makulay ang bawat kulurete ng kuwento. Nakikiliti ang marami kapag sinasakyan ang behikulong handog na istorya ng diyaryo. Natutuwa pa rin sila kahit nakababa na ang estribo ng pahina, parang gusto pa nila uling abangan sa kabilang dulo ng kalye ang Bulgar upang muling sakyan at tunghayan ang mga kuwentong kapana-panabik sa araw-araw na pagdaraan. Dito, ang biyahe ay nakaabang na ang mga terminal ng matitingkad na advertisement.

Sumasabay sila sa harurot ng pahinang walang pagod araw-araw ang biyahe sa mga lansangan.

Pagsapit sa ika-15 taon, nagka-aberya man ang biyahe dahil sa pagtagilid ng gulong ng ibang departamento bunga ng mga masalimuot, baha at maputik na daan, nailabas ang itinatagong reserbang magpapalutas sa mga problema. Kinumpuni ang mga parteng kinalawang, inalis at pinalitan ang mga nasira at nawalang turnilyo upang muling makausad ang bagong gulong sa nahihitik na kargang impormasyon ng Bulgar (Boses ng Masa, Mata ng Bayan).

Nasa ika-25 kilometrong taon na ang Bulgar (No. 1 sa pamilyang Pinoy) nang lumawak pa ang daang tinahak at maparaan sa tollgate ng online platform. Makabago ang daan, malawak ang mga linyang puwedeng maniobrahin ng mga balita at tsismis, mapa-streamline man o online, wala pa ring trapik na diretso lang ang buga ng tambutso ng diyaryo.

Subalit, bago pa makarating sa dulo ng ika-31 kilometrong taon, nabalahaw ang behikulo sa ika-29 na kilometro nang salubungin ng COVID-19. Gumarahe sandali ang Bulgar upang makaiwas sa kumunoy ng pandemya. Umabot ng halos 2 taon na walang biyaheng diretso. Tila mga mandirigmang nasukol ang nagmamaneho at sakay ng diyaryo sa isang 'zombieland.'

Salamat at naparaan ang rescue ng mga bakuna, naka-survive mula sa magubat at mabangis na daan ng ika-30 kilometro ang Bulgar. Natanaw na at narating ng mga nagkaisang sakay upang makabangon sa lugmok na pagsubok ng pandemya ang dulong yugto ng ika-31 taong landas na pinakaaasam! MALIGAYA ANG PAGDATING NG BULGAR SA 31-TAONG KILOMETRO!