Kapakanan at kalusugan ng mga ina at sanggol, bigyang halaga

ni Nancy Binay @Be Nice Tayo | Oct. 17, 2024

May nilagdaang bagong proklamasyon si Pres. Ferdinand Marcos, Jr., na naglalayong palawigin ang kamalayan ng mga kababayan natin para sa mga pinagbubuntis na nalaglag at bagong silang na agad pumanaw.

Itinatakda ng Proclamation 700 ang October 15 kada taon bilang National Pregnancy and Infant Loss Remembrance Day para sa kamalayan at pagbigay ng suporta sa mga pamilyang apektado ng malungkot na pangyayaring ito.

Pinawawalang-bisa nito ang Proclamation 586, na idineklara ang March 25 kada taon bilang Day of the Unborn.

Bukod sa pagkilala ng dinaranas ng mga nanay at pamilyang apektado, layunin din ng Proclamation 700 na magbigay ng komprehensibong suporta sa mga apektadong pamilya, kasama na ang mental health services, community programs, at informed health care guidance.

☻☻☻

Lubos nating sinusuportahan ang proklamasyong ito, na bahagi ng responsibilidad ng estado na protektahan ang kapakanan at kalusugan ng mga nanay at sanggol.

Mahirap at masakit ang mawalan ng anak, lalo pa kung dahil sa mga sirkumstansyang dala ng kahirapan.

Kaya’t mahalaga din na matutukan ang maayos na implementasyon ng First 1,000 Days Law na may mandatong suportahan ang mga nanay at pamilya mula pagbubuntis hanggang sa umabot ng 24 months ang sanggol.

Nakakabit ang kinabukasan ng ating bansa sa kalusugan ng kasalukuyan at susunod na henerasyon ng mga Pilipino.

Nararapat lamang na gawin ng pamahalaan ang makakaya nito upang masigurong malusog at malakas ang mga kababayan natin upang mas maayos nating maharap ang iba’t ibang hamon ng buhay at pagbuo ng bansa.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pink ribbon bilang suporta sa breast cancer awareness month

ni Nancy Binay @Be Nice Tayo | Oct. 13, 2024

Tuwing buwan ng Oktubre ipinagdiriwang natin ang breast cancer awareness month. 

Layunin ng pagdiriwang na ito na paalalahanan ang lahat, lalo na ang mga kababaihan na bigyang atensyon ang maagang pagdiskubre at ang mga maaaring gawin para magamot ang sakit na ito.

Pink na ribbon ang ginagamit na simbolo para ipahiwatig ang pag-asa, pakikiisa, at suporta sa mga may breast cancer.

☻☻☻

Isang malupit na karamdaman, ang breast cancer.

Ito ang nangungunang cancer pagdating sa mga kababaihan at pangalawang cancer na may pinakamaraming bilang sunod lamang sa cancer sa baga.

Ayon sa World Health Organization, lagpas sa mahigit 33,000 ang may breast cancer sa ating bansa.

Kaya naman taun-taon ay gumagawa tayo ng mga paraan para maging aware ang ating mga kababayan tungkol dito.

☻☻☻

Hinihimok natin ang mga kababaihan na gamitin ang mammogram at ultrasound package ng PhilHealth para maagapan ang paglala ng sakit na ito.

Iyong mammogram at ultrasound ng upper abdomen, pelvis at breast ay kasama na sa Konsulta package ng PhilHealth.

Itinaas na rin ng PhilHealth sa P1.4 milyon ang “Z-benefit” package para sa mga breast cancer patient mula sa dating P100,000.

Ang Z-benefit package ay ibinibigay na serbisyo ng PhilHealth para sa mga tinatawag na “Case Type Z” o mga mapanganib na karamdaman kung saan maaaring magtagal sa ospital ang isang pasyente para sa mahabang gamutan.

Para sa ating mga kababayang may breast cancer, hindi pa huli ang lahat. Handa ang pamahalaan para tulungan kayo sa panahon ng pangangailangan. 

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Self-Reliant Defense Posture Revitalization Act, pirmado na

ni Nancy Binay @Be Nice Tayo | Oct. 10, 2024

Nitong nakaraang Martes, naisabatas na ang isang panukalang naglalayong palakasin ang self-reliant defense posture ng bansa.

Nilagdaan ni Pres. Ferdinand Marcos, Jr. ang Self-Reliant Defense Posture (SRDP) Revitalization Act o Republic Act 12024 na layuning linangin ang kapabilidad ng ating bansa na depensahan ang sarili sa harap ng iba’t ibang banta.

Nasaksihan natin ang paglagda sa Malacañang kasama ang iba pang mambabatas.

Sisikapin din ng national defense program na palaguin ang ating local defense industry sa pamamagitan ng partnership sa pagitan ng pamahalaan at private manufacturers para sa paggawa ng mga armas at ibang defense material para sa ating militar.

Mandato rin ng bagong batas na suportahan ang mga polisiya, research, maintenance at installment habang lumilikha ng istratehiya para mapalakas pa ang production competitiveness.

☻☻☻

Sa kabila ng iba’t ibang banta sa ating soberanya at seguridad, hindi tayo dapat nakaasa lamang sa mga kaalyadong bansa. 

Mahalaga na may sarili tayong kapasidad at kapabilidad na ipagtanggol ang ating sarili.

Kaya’t lubos nating sinusuportahan ang batas na ito.

☻☻☻

Ang October ay Museum and Galleries Month.

Magandang pagkakataon ito na kilalanin natin ang ating kultura’t kasaysayan.

Hinihikayat natin ang ating mga kababayan na dalawin ang ating mga museum at gallery, at tuklasin ang napakaganda nating pamana.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay