After ibrodkas sa socmed ang problema sa relasyon… ANDI AT PHILMAR, TOGETHER AGAIN SA RESTO SA SIARGAO

ni Melba Llanera @Insider | Feb. 11, 2025

Andi at Philmar - Instagram Andi Eigenmann

Mukhang hindi naman nag-iisa ang aktres na si Andi Eigenmann kung anuman ang pinagdaraanang pagsubok ng relasyon nila ngayon ni Philmar Alipayo, dahil kumakalat ngayon sa social media ang mga larawan na kumakain ang magdyowa kasama ang lolo at lola ng aktres na sina Rosemarie Gil at Eddie Mesa sa Siargao. 

Isang kaibigan namin na kasalukuyang nasa Siargao ang nagsabi na nakita rin daw niya sa restaurant na pag-aari nila na magkasama ang controversial couple. 

Sa parte ni Andi, alam namin na bukas talaga ito na maayos pa ang pagsasama nila ni Philmar dahil sa Instagram (IG) post ng dating aktres ay kinlaro nito na hindi niya sinabing “cheater” o niloko siya ng fiancé, kundi may isang “ahas” na itinuring nilang kaibigan ang sumisira sa kanilang relasyon.

Nakakalungkot lang na puwede palang magkaayos pero umabot pa sa puntong nagmistulang pamperya ang problemang pinagdaanan nila dahil ibinrodkas pa nila ito sa social media, kung saan inabangan at pinagpiyestahan ng mga netizens ang mga kaganapan sa kanilang pagsasama. 

Parehong na-bash ng ilang netizens sina Philmar at Andi. May mga nagsabi na karma lang daw ito sa dating aktres dahil sa ginawa nito dati kay Albie Casiño na ikinasira ng career ng aktor. 

Katakut-takot naman na panlalait ang ibinato kay Philmar kung saan tinawag itong ‘pangit’, at ginawa pang meme ng iba na ang surfer daw ang patunay na walang katotohanan ang pinasikat na kanta ni Andrew E. na Humanap Ka Ng Panget.

Sana ay maging aral na ito, hindi lang kina Andi Eigenmann at Philmar Alipayo kundi sa lahat, na hindi dapat maging takbuhan ang social media sa tuwing may problema sa relasyon dahil hindi naman ibang tao ang dapat magpatakbo nito kundi ang dalawang taong involved lang.

---

SA ngayon pa lang ay nagbubunyi na ang mga Kapamilya solid supporters dahil sa bill na isinampa sa Kongreso para pagkalooban muli ng franchise ang ABS-CBN para sa free TV airing. 

May ilan din naman ang nagsasabi na baka kapag naaprubahan na ito ay magso-solong muli ang Kapamilya Network at mabubuhay muli ang mahigpit na kompetisyon sa pagitan ng mga TV networks. 

Ngayon kasi ay naging bukas ang ABS-CBN sa collaboration sa ibang istasyon, kung saan napapanood na sa ibang network ang kanilang mga shows at mga artista. 

Pinaka-latest nga ay mapapanood na sa GMA-7 ang Pinoy Big Brother Collab Edition (PBBCE). Ito ay para sa 20th year celebration ng show kung saan balita na si Gabbi Garcia ang isa sa magiging mga hosts. 

Wala pang sinasabi kung kailan ang release date pero inaabangan na ito ng mga avid viewers ng naturang programa.

Ang pagkawala ng franchise ng ABS-CBN ay masasabing nagpabago sa viewing habit ng mga Pinoy kung saan ang social media platform gaya ng YouTube (YT) at Netflix ang naging takbuhan ng mga dating TV viewers. 

Sana lang, kung saka-sakaling maipagkaloob muli sa ABS ang franchise para makapag-operate sa free TV, patuloy pa rin silang maging bukas sa collaboration sa ibang istasyon na naging hudyat ng pagtatapos ng mahigpit na kompetisyon sa TV industry.

Hindi lang daw siya… IBINULGAR NI ALEXA: CONG. SANDRO, LAGING NAGSASAKAY NG MGA KAIBIGAN SA PRIVATE PLANE PA-ILOCOS

ni Melba Llanera @Insider | Feb. 9, 2025

Sandro Marcos at Alexa Miro - Instagram

Pinaninindigang muli ni Alexa Miro na wala talaga silang relasyon ni Congressman Sandro Marcos at pagkakaibigan lang ang namamagitan sa kanila. 

Kinlaro rin niyang hindi ito nanliligaw o nagpaparamdam sa kanya. Pero inamin naman ni Alexa na kung manliligaw sa kanya ang Presidential Son, malaki ang pag-asa nito.  

Papuri nga ng aktres, kagalang-galang at marunong magbigay ng respeto at importansiya sa mga taong nakakasalamuha niya si Cong. Sandro.  

Sa isyung lumabas noon na nakita siyang isinakay nito nang solo sa private plane, paliwanag ni Alexa, lagi namang nagsasakay ang kongresista ng mga kaibigan nito sa private plane papuntang Ilocos o La Union. Maaaring birthday ng isa nilang kaibigan o kaarawan mismo ng congressman ‘yung nakitang sumakay siya sa private plane nito.

At dahil sa nature ng trabaho niya bilang isang artista, kung saan madalas ay galing siya sa taping o shooting, lagi siyang nahuhuli sa event, kaya wala naman daw masama kung gumamit man siya ng plane.

Personal na rin niyang na-meet ang First Family. Pagkukuwento ni Alexa, mababait na tao ang pamilya Marcos at mainit siyang tinanggap nina Pangulong Bongbong at First Lady Liza Araneta bilang kaibigan ng anak nila.  

Inamin din sa amin ni Alexa na noong kasagsagan ng isyu sa kanila ni Cong. Sandro, naiyak siya nang isa o dalawang linggo dahil sa kauna-unahang pagkakataon ay na-bash siya. Bilang isa sa itinuturing niyang matalik na kaibigan, si Cong. Sandro ang nagpayo sa kanya na kailangan niyang tatagan ang loob niya. Bilang isang artista, parte na ng buhay nila ang mga isyu at intriga, at kung may isang bagay na nakatakdang mangyari, mangyayari talaga ito.  

Naging takaw-pansin sa nakaraang Gabi ng Parangal ng MMFF nang magkahawak-kamay na naglalakad sina Alexa at Rob Gomez. 

Paliwanag ni Alexa, magkaibigan lang sila ng Kapuso actor, dating magkasama sa isang

show sa GMA, at hindi ito dapat bigyan ng kulay o malisya.  

Ine-enjoy ang kanyang pagiging freelance artist, napanood si Alexa sa Tropang LOL (TLOL) ng TV5 at Tahanang Pinakamasaya (TP).

---

Mukhang hindi natanong si McCoy de Leon sa nakaraang presscon ng In Thy Name (ITN) tungkol sa totoong estado ng relasyon nila ni .Elisse Joson. 

May isang anak silang si Baby Feliza, na ngayon ay tatlong taon na.  

Noong nakaraang taon, pumutok ang isyung “MOMOL” o “making out-making out lang” sa pagitan nina Elisse at Joshua Garcia sa Star Magic Christmas Ball nang mahuli diumano sila ni McCoy na naghahalikan habang lasing sa party.

Nanatiling tikom ang bibig ng dalawa sa isyu, kung saan lumipad pa-Japan si Joshua kasama ang Filipino-French athlete girlfriend niyang si Emilienne Vigier. Samantala, napabalitang nagalit nang husto at nakapagsalita nang hindi maganda si McCoy laban sa kapwa aktor. 

Hindi pa klaro kung hanggang ngayon ay nagsasama pa sa iisang bubong sina McCoy at Elisse, dahil nakatutok ang aktor sa taping ng Batang Quiapo (BQ), kung saan ginagampanan niya ang role bilang David.  

Ang naaalala lang namin noon ay ang balitang tutol diumano ang doktorang ina ni Elisse sa pakikipagrelasyon nito kay McCoy, pero ipinaglaban ni Elisse ang boyfriend sa kanyang ina.  

Wish namin na kung may problema man sa pagitan nina Elisse at McCoy, sana ay maayos at malagpasan nila ito, lalo’t bukod sa ipinaglaban nila noon ang kanilang relasyon, may anak silang pinakamaaapektuhan kung maghihiwalay sila.

Naiskandalo dahil kay Rob… HERLENE, NAGPATINGIN SA DOKTOR SA PAG-IISIP

ni Melba Llanera @Insider | Feb. 6, 2025

Herlene Budol - IG

Ngayong inamin na ni Herlene Budol na sumailalim siya sa series of psychological therapy nang madawit ang pangalan niya sa isyu nina Rob Gomez, Bianca Manalo at sa live-in partner ng Kapuso actor na si Sheila Rebortera — kung saan pinagpiyestahan ng mga netizens ang nag-leak na private messages ni Rob sa dalawang Magandang Dilag (MD) co-stars — naalala namin kung ano ang ipinayo ng dati niyang manager at ngayon ay Ahon Mahirap first nominee na si Wilbert Tolentino kay Hipon Girl.  

Sa panayam namin noon kay Wilbert sa nakaraang pagbisita niya sa Malabon para magkaloob ng mga bigas at e-trikes sa iba’t ibang barangay doon, ibinahagi ng Ahon Mahirap first nominee na ang ipinayo niya kay Herlene ay magsabi lang ito ng katotohanan at maglabas ng official statement.  

Kuwento pa ni Wilbert, tiningnan niya ang mga screenshots na nag-leak, at marami rito ay hindi galing kay Herlene — pinaghalu-halo na lang ng ibang vloggers at ginamit sa accounts nila para makakuha ng maraming views. 

Ayon pa kay Wilbert, sinabihan niya ang dating alaga na wala silang dapat iisyung public apology dahil single noong panahon na iyon si Rob. Sa ini-release nitong statement, kinlaro niya na walang katotohanan ang mga paratang at pinalala lang ito ng iba.  

Si Herlene pa rin ang mukha ng Ahon Mahirap at hindi naging rason ang mga negatibong isyu para hindi ito kunin ng naturang partylist. 

Paliwanag sa amin ni Wilbert, si Herlene ang perpektong halimbawa ng isang tao na hindi alintana ang kahirapan para abutin ang kanyang pangarap at baguhin ang kanyang buhay—na siyang adbokasiya ng Ahon Mahirap.  

Sa kabilang banda, ibinalita rin sa amin ni Wilbert na pagkatapos ng dalawang taon ay plano niyang isali uli si Herlene sa isang international beauty pageant, lalo't nananatili ang pangarap nito na maging international beauty queen. 

Sa ngayon, nakapokus muna ang Kapuso actress sa kanyang series sa GMA, ang Binibining Marikit (BM), na ayon sa aktres ay siyang pagtutuunan niya ng panahon at atensiyon.  

---

Sorry, mga kafatid! TRANS AT MAY-ASAWA, BAWAL SA MISS WORLD PHILS. QC 2025

SAMANTALA, sa nakaraang Ms. World Philippines Quezon City 2025, pormal na humarap sa media ang sampung contestants para sa kanilang national costume presentation. 

Suot ang kanilang mga naggagandahan at makukulay na national costumes sa event na ginanap sa Grand West Side Hotel, lumutang ang ganda at kaseksihan ng mga kandidata.  

Nakapanayam din namin dito ang franchise director ng Ms. World Philippines Quezon City 2025 na si Ms. Jen Jarina. Ayon sa kanya, ang hinahanap niya sa mananalo ay may magandang mukha at katawan, matalino, may social awareness, leadership, at magandang attitude. 

Ikinuwento rin niya na magaganap ang coronation night nito sa darating na April 5 sa Novotel Manila. Ang kokoronahan bilang Ms. World Philippines Quezon City 2025 ay isasali sa Ms. World Philippines national pageant sa ilalim ng franchise na pinangungunahan ng National Director nito na si Arnold Vegafria — bukod pa sa P300,000 thousand bilang cash prize.  

Hiningan namin ng reaksiyon kung bukas ba ang Ms. World Philippines Quezon City sa mga transwoman at sa mga may-asawa na nagbabalak sumali rito. 

Ayon kay Ms. Jen Jarina, naniniwala siya na may tamang beauty pageants para sa kanila, at ang Ms. World Philippines QC ay para lamang sa mga single at straight na babae.