Feeling-dalaga pa rin daw kahit may anak na…

ELLEN, TINAWAG NA LAKWATSERA, NAPIKON, RUMESBAK SA NETIZEN

ni Melba R. Llanera - @Insider | September 29, 2020

Hindi pinalagpas ni Ellen Adarna ang isang basher kung saan tinawag siyang lakwatsera o "laagan" sa salitang Bisaya.

Nu'ng September 26 ay nagpunta si Ellen sa isang tagong ilog sa isang bundok kung saan siya naligo. Sa in-upload na video, nilagyan ito ng aktres ng caption na: "Me x10."

Sa comments section ay isang basher ang tumawag na "laagan" o lakwatsera kay Ellen. Nagkomento pareho sa Tagalog at Bisaya, may mensahe itong, "Dalaga ghorl? Ka laagan ba?" (Dalaga ghorl? Ang lakwatsera naman.)

Halatang napikon si Ellen sa naturang basher at sinagot ito nang dalawang beses na pareho ang mensahe. Sinabing 'di niya alam kung paano tatawagin ang basher dahil nalilito siya kung babae ba ito o lalaki. Ayon kay Ellen ay buhay niya 'yun at kahit maging dalaga man o hindi ay nangangailangan ng pahinga o break.

Sa huli ay sinabi pa ni Ellen na huwag ipakita ng basher ang pagiging ignorante nito.

Wala nga namang masama kung nag-i-enjoy man sa buhay niya ang aktres hangga't 'di naman niya napapabayaan ang responsibilidad niya bilang isang ina kay Elias Modesto.

Itinuring pa naman daw na kuya, Julia… JOSHUA, TINEXT SI GERALD PARA MAG-USAP SILA, DINEDMA LANG

ni Melba R. Llanera - @Insider | August 30, 2020

Eksklusibong nakapanayam ng Cinema News At Home Edition si Joshua Garcia na ipinalabas nu'ng nakaraang Biyernes hosted by Bianca Gonzales at dito'y inamin ng Kapamilya actor na kung may isa siyang tao na gusto niyang makausap na "no holds barred" ngayong lockdown, ito ay si Gerald Anderson.

Ayon kay Joshua, tinext niya si Gerald kung puwede ba silang mag-usap para maayos ang lahat pero hindi pa siya nakatanggap ng reply mula rito.

Paliwanag ni Joshua, ngayong lockdown ay mahirap na may taong 'pinangingilagan' niya lalo na't itinuring niya ito na parang kuya dahil iisa lang ang handler nila at maliit ang mundo ng showbiz at nasa iisang network lang sila.

Tinanong din si Joshua kung ano ba ang isang bagay na pinaka-na-miss niya kay Julia Barretto mula nang mag-break sila, at agad niyang sagot, ito ay ang presensiya sa buhay niya ng ex-girlfriend.

Inamin din niyang iba rin kasi sa pakiramdam na alam mong may kasama ka sa lahat ng bagay lalo't sila na ang magkasama mula nang nagsisimula siya sa showbiz.

Mga Kapamilya, gigil na gigil…

ILANG KONG., MATAPOS IPASARA ANG DOS, TODO-HINGI NG PABOR NA ILABAS SA BALITA

ni Melba R. Llanera - @Insider | August 26, 2020

Hindi napigilan ng ABS-CBN TV news reporter na si Miguel Dumaual ang magpahayag ng pagkadismaya at pagkainis sa mga kongresistang bumoto para 'di maaprubahan ang franchise ng ABS-CBN, pero ngayon ay humihingi ng coverage.

Sa tweet ng TV news reporter, siniguro ni Miguel na walang maaasahang coverage ang mga nasabing kongresista mula sa widest reach online ng ABS pagkatapos ibasura ng mga ito ang hinihinging renewal ng franchise ng network.

Mensahe ni Miguel sa mga naturang kongresista, "Isang dambuhalang middle finger, nagre-request ngayon ng coverage sa papogi nila matapos 'di suportahan ang prangkisa ng ABS-CBN.

"We have the widest reach online, and you think we'll gladly give you that platform after you threw our network into crisis?"

'Di rin napigilan ng mga kapwa ABS correspondent ni Miguel tulad ni Anjo Bagaoisan na pabiro pero pasarkastikong sumagot na may ibang media namang puwedeng lapitan gaya ng sinasabi ng ibang mga kongresista na 'di makakaapekto sa pagbabalita ang pagkawala ng Kapamilya Network.

Nagkomento rin ang isa pang tv news reporter na si Mike Navallo pero isang simpleng "Happy weekend folks," ang isinagot nito.

Sa tweet naman nu'ng July 23 ng ABS News Digital head na si Lynda Jumilla, pagkadismaya at inis din ang naramdaman nito na isang kongresista na bumoto rin para 'di maaprubahan ang ABS-CBN franchise renewal ang nagpadala sa kanya ng press release. May mensahe itong: "'Yung bumoto kayo para ipasara ang network, tapos magpapadala kayo ng press release para i-promote ang negosyo n'yo. How to be you po?"

Ang gusto ng maraming netizens ay pangalanan nina Miguel at Lynda ang mga nasabing kongresista na nu'ng nagsabog daw ng kakapalan ng pagmumukha ang nasa Itaas ay mukhang dilat na dilat ang mga mata at sinalo ang lahat at wala nang itinirang kahihiyan sa sarili.