Ex-GF, matagal na raw type ang singer... IÑIGO, SUPER-HAPI PARA KAY MARIS NA NAGING BF NA SI RICO

ni Melba R. Llanera - @Insider | June 28, 2021

"Of course I'm very, very happy for her," ang bungad na pahayag ni Iñigo Pascual nang hingin namin ang reaksiyon niya tungkol sa kumpirmado nang relasyon ngayon nina Maris Racal at Rico Blanco.

Dagdag pa ng dating kasintahan ni Maris, "Actually, alam ko kung gaano kasaya si Maris with Rico. I mean, she always love and admire Rico for a very, very long time. I am very happy for her.

"She's coming out with her music, may lalabas siyang kanta. Nakaka-proud kasi nakita ko si Maris na nag-i-struggle na hinahanap ang sarili niya or 'yung mga gusto niyang gawin.

"To see her blossoming into someone which she is now, and how she's really being herself in front of people, talagang nakakatuwa. Sobrang nakakatuwa," masayang pahayag pa ni Iñigo.

Bukod sa pagiging ex-sweethearts, nagkapareha rin sina Maris at Iñigo sa ilang proyekto kaya't nabuo ang tambalang MarÑigo, kung saan marami ang nalungkot sa kanilang mga tagahanga dahil 'di nagkatuluyan ang dalawa.

Sa tanong namin kung may komunikasyon pa ba sila sa ngayon ni Maris, inamin naman sa amin ni Iñigo na matagal na silang 'di nakakapag-usap at bilang respeto at para maiwasan na rin na maging "awkward" sila sa isa't isa ay mas mabuti na rin daw na 'wag na munang buksan ang komunikasyon sa pagitan nila.

Ayon kay Iñigo, buung-buo ang suporta niya para sa relasyon nina Maris at Rico at maligaya siya dahil alam niyang masayang-masaya ngayon si Maris.

Samantala, bukas din si Iñigo sa mga proyekto na pagtatambalan nilang muli ni Maris kung saka-sakaling may offer silang matanggap. Tiyak na ikatutuwa ito ng mga solid MarÑigo fans na hanggang ngayon ay nag-aabang pa rin sa balik-tambalan ng dalawa.

Tinanong din namin kung handa na ba siya sa pakikipagrelasyon kung saka-sakaling may dumating sa buhay niya ngayon.

Ipinaliwanag sa amin ni Iñigo na sa dami ng ginagawa niya sa kanyang career sa ngayon ay wala siyang oras para sa pakikipagrelasyon. Naniniwala rin ang singer-actor na 'pag siya ang pumasok sa isang relasyon, gusto niya ay seryosohan na at mauuwi na sa kasalan, kaya mas gusto niya na mangyari na lang ito sa tamang oras.

Kalo-launch lang ng international album ni Iñigo na may titulomg Options kung saan bukod sa mga sariling komposisyon, may mga nakapaloob ding komposisyon mula sa ilang songwriters mula sa Manila at California.

Tuwang-tuwa si Iñigo na napakinggan ang carrier single niyang Danger mula sa album na Options sa radio station na 102.7 KIIS FM sa Los Angeles, California, USA.

Kuwento sa amin ni Iñigo, sobra siyang natuwa rito dahil nu'ng nasa America pa pala siya nakatira ay ito na ang radio station na pinapakinggan niya.

Nakakabilib lang na sa kabila ng husay at talento sa pagkanta at pagsasayaw ay sumasailalim pa rin sa intensive training si Iñigo sa pagpe-perform na gaya ng training na ginagawa sa South Korea.

Aktres, nabastusan, pumalag... PIKTYUR NG BF NI SUNSHINE, PINALITAN NG PORN ACTOR

ni Melba R. Llanera - @Insider | June 20, 2021

"I feel there's a fine line between joke and nakakabastos na. Nu'ng nakita ni Mommy (Sunshine Cruz) 'yan, sobrang na-disturb siya kasi it's something... there's a joke and humor, pero parang disturbing na kasi minor kami ni Chesca.

"It's weird na they're editing someone of that inappropriate thing to our simple family photo. Hindi na nakakatuwa. My mom, she was supposed to ignore it na lang and let it slide, pero hindi na talaga tama and nakakabastos na.

"She has to speak up about it and let them know na it's not right," ang mahabang pahayag ni Sam Cruz Montano nang hingan ng reaksiyon ng Cinema News tungkol sa isang netizen na pinalitan ang larawan ni Macky Mathay ng isang male porn actor sa Mother's Day celebration ng kanilang pamilya.

Tulad ng inang si Sunshine ay umalma rin si Sam sa mga taong sine-sexualize ang buo nilang pamilya.

Ayon nga sa batang singer, mga tao rin sila at may mga damdamin at nakakalungkot na sa murang gulang ay dumaraan sila sa pambabastos mula sa ibang tao.

Patuloy na pagkukuwento ni Sam, pinapalagpas lang nila dati ang gumagawa ng ganito sa kanilang pamilya, pero ngayon ay sobra na ang effort ng pambabastos sa kanila kaya kailangan na nilang magsalita at ipaalam na mali ang ginagawa sa kanila.

Samantala, sumusunod si Sam sa yapak ng mga magulang kung saan pinasok na rin nito ang pagkanta at may single siya ngayon sa Universal Record, ang Train of Thoughts.

Excited si Sam kung darating ang araw na makaka-collaborate niya ang mga magulang.

Lumaki si Sam kung saan nagdya-jamming ang kanilang pamilya at nagse-second voice pa siya sa kanyang ina. Galing din sa pamilya ng mga singers, ang mga Cruz, bukod dito ay kumakanta at naggigitara naman ang ama niyang si Cesar Montano.

Music influence ni Sam sina Sarah Geronimo, Moira dela Torre at Julie Anne San Jose kung saan bilib siya sa stage presence at talento ng tatlo.

Gusto ring maka-collaborate ni Sam si Moira kung saan bukod sa kinalakihan na niya ang mga pinauso nitong kanta ay gusto niya ang mensahe ng mga awitin nito.

Aktres, umatras uli... PIOLO, GAME NA GAME PA RIN KAY JUDAY

ni Melba R. Llanera - @Insider | May 24, 2021

"I was talking with my friends before and I know about the casting long before. Sabi ko nga, kung tinanggap ni Juday, kung gagawin ni Juday, I'll do it. It'll be nice to work with her again," ito ang naging pahayag ni Piolo Pascual sa nakaraang eksklusibong panayam sa kanya ni Bianca Gonzales sa Cinema News nang tanungin kung tatanggapin niya ba ang husband role sa Pinoy version ng Doctor Foster.

Matatandaang bago pa man ang announcement na sina Jodi Santamaria, Zanjoe Marudo at Sue Ramirez ang napiling gumanap sa role sa Korean drama adaptation, naging matunog ang mga pangalan nina Piolo Pacual at Judy Ann Santos na bagay na bagay sanang gumanap sa papel ng mag-asawa.

Kaya lang, tinanggihan ni Juday ang role dahil hindi raw nito kayang magpaka-daring bilang respeto na rin sa asawang si Ryan Agoncillo.

Huling nagkatambal sa pelikulang Don't Give Up On Us sina Piolo at Juday, at ayon sa aktor, hindi lang malaki ang utang na loob niya sa dating kapareha kundi tagahanga rin siya nito at kung magkakaroon ng proyekto kung saan magkakatambal silang muli ay tatanggapin niya.

Papuri naman ng A-lister actor kina Jodi at Zanjoe, kaibigan niya ang dalawa at naniniwala siya na kayang-kaya ng mga ito ang mga papel na gagampanan.

'Di man aktibo ngayon sa telebisyon si Piolo, kung saan huli siyang napanood sa Sunday Noontime Live ng TV5, siniguro naman ng aktor na hindi niya iniwan ang showbiz. In fact, tatlong pelikula ang natapos niyang gawin.

Una ay ang pelikula na pinagtambalan nila ni Alessandra de Rossi, pangalawa, ang pelikula na idinirek ni Paul Soriano kung saan kasama niya si Jasmine Curtis-Smith, at isa pang pelikula na idinirek ni Brillante Mendoza para sa centennial celebration ng Pilipinas.

Kuwento nga ni Piolo, ang pelikula ang passion at first love niya kaya't ito ang prayoridad niya.

Pero sa ngayon, ini-enjoy niya ang tahimik at pribadong buhay sa Batangas kung saan isa na ring certified plantito ang aktor. Ngayon nga, bago pa magbukang-liwayway ay gising na si Piolo para mag-hiking, mag-alaga ng mga tanim niyang halaman at mag-beach. Pagtungtong naman ng paglubog ng araw ay hinihila na ng antok si Piolo.

Mas tahimik na rin ang buhay niya ngayon dahil iwas na rin siya sa masyadong paggamit ng social media kung saan isa sa mga naging paboritong i-bash ng ilang netizens ang aktor.

Ayon nga kay Piolo, nagso-social media lang siya kung kinakailangan sa trabaho. 'Di na siya nagbabasa ng mga komento mula sa mga netizens dahil para kay Piolo, ayaw niyang saktan ang sarili na baka magbunga pa ng bad vibes sa kanya.

Inilarawan nga ng tv host na si Tito Boy Abunda na "bullet proof" si Piolo dahil sa kabila ng mga intriga at isyung naipukol na sa kanya, nananatili pa rin itong matibay at matatag.

Esplika ng aktor, hindi kasi siya showbiz na tao at hindi niya iniuuwi sa bahay ang kanyang buhay-showbiz. Bukod sa kanila ng anak na si Iñigo, wala nang artista sa pamilya nila at 'di rin siya itinuring na sikat o isang malaking tao ng mga ito.