Pagpapawalang-bisa ng kasal sa pagtatago na buntis sa iba ang misis

ni Atty. Persida Rueda-Acosta @Magtanong Kay Attorney | Nov. 26, 2024

Dear Chief Acosta,

Ang aking kapatid na lalaki ay nagpakasal sa matagal na niyang kasintahan na nagtatrabaho sa Hong Kong. Ang kanilang kasal ay naganap isang linggo mula nang dumating siya ng Pilipinas mula sa Hong Kong. Kaninang umaga ay nakita ko ang asawa ng aking kapatid na nagsusuka sa aming hardin. Ako ay nabahala kaya siya ay nilapitan ko upang kumustahin. Sinabi niya sa akin na siya ay maayos naman subalit inamin niyang maaaring siya ay nabuntis ng kanyang naka-date sa Hong Kong. Kung ito’y totoo, maaari ba akong magsampa ng kaso upang ipawalang-bisa ang kanilang kasal? — Alfonso

---

Dear Alfonso,

Ang inyong kapatid ay maaaring magsampa sa korte ng petition for annulment of voidable marriage dahil sa fraud sang-ayon sa Article 45 (3) na may kaugnayan sa Article 46 (2) ng Family Code of the Philippines kung saan nakasaad na:

“Art. 45. A marriage may be annulled for any of the following causes, existing at the time of the marriage: xxx

 (3) That the consent of either party was obtained by fraud, unless such party afterwards, with full knowledge of the facts constituting the fraud, freely cohabited with the other as husband and wife; xxx

“Art. 46. Any of the following circumstances shall constitute fraud referred to in Number 3 of the preceding Article: xxx

 (2) Concealment by the wife of the fact that at the time of the marriage, she was pregnant by a man other than her husband; xxx”

Batay sa nasabing mga probisyon ng batas, ang tamang indibidwal na maaaring magsampa ng nasabing petisyon sa korte ay ang inyong kapatid at hindi kayo.   

Batid din ng Section 3 of A.M. No. 02-11-10-SC (March 4, 2003) (RE: PROPOSED RULE ON DECLARATION OF ABSOLUTE NULLITY OF VOID MARRIAGES AND ANNULMENT OF VOIDABLE MARRIAGES), as amended, na:

“Section 3. Petition for annulment of voidable marriages. –

(a) Who may file. - The following persons may file a petition for annulment of voidable marriage based on any of the grounds under article 45 of the Family Code and within the period herein indicated: x x x

(3) The injured party whose consent was obtained by fraud, within five years after the discovery of the fraud, provided that said party, with full knowledge of the facts constituting the fraud, has not freely cohabited with the other as husband or wife; XXX”

Binibigyang-diin nga ng mga nasabing probisyon ng batas na ang may legal standing na magsampa ng nasabing petisyon ng pagpapawalang-bisa ng kasal ay ang inyong kapatid dahil ang kanyang consent o pahintulot na magpakasal ay nakuha sa paraan ng fraud o panloloko sa pamamagitan ng pagtatago ng kanyang asawa na siya ay buntis, noong siya ay nagpakasal sa inyong kapatid, at ang ipinagdadalantao niya ay hindi sa inyong kapatid kundi mula sa ibang lalaki. Kailangan din na maisampa ito sa korte sa loob ng limang taon mula nang malaman o madiskubre ang nasabing fraud o panloloko.  

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Magkaiba ang SPA para sa pagsangla at pagbenta ng lupa

ni Atty. Persida Rueda-Acosta @Magtanong Kay Attorney | Nov. 25, 2024

Dear Chief Acosta, 

Nagtatrabaho ako bilang isang Overseas Filipino Worker (OFW) sa Hong Kong. May lupa akong naipundar sa Batangas. Noong ako ay umuwi sa Pilipinas, gumawa ako ng Special Power of Attorney (SPA) para maibenta ang lupang iyon at magamit ko ang perang mapagbebentahan bilang panimula ng isang negosyo. Nagulat na lamang ako na sa halip na ibenta ay isinangla pala ng kapatid ko ang lupang iyon. Maaari niya bang gawin iyon? — Gilliane

---

Dear Gilliane,

Una sa lahat, alamin muna natin ang konsepto ng tinatawag na Special Power of Attorney (SPA).  Ang SPA ay isang dokumento na ginagawa ng principal upang mabigyan niya ng karapatan ang kanyang kinatawan na makipagtransaksyon sa ngalan niya. Ang dokumentong ito ay importante dahil ito ang nagpapatunay na pumapayag ang principal na siya ay katawanin ng tinatawag na agent. 

Kaya ito tinatawag na SPA ay dahil nakasaad dito ang mga partikular na transaksyon kung saan pumapayag ang principal na siya ay katawanin ng agent. Nakasaad sa Article 1878(5) ng New Civil Code na kailangan ang SPA para ang kinatawan o agent ay makapasok sa isang kontrata na nakakaapekto sa pagmamay-ari ng lupa. Bukod pa rito, nakasulat sa Article 1879 ng New Civil Code na: 

“ARTICLE 1879. A special power to sell excludes the power to mortgage; and a special power to mortgage does not include the power to sell.”

Kaya naman, kung ang principal ay gumawa ng SPA kung saan pinapayagan niya na ibenta ng kanyang kinatawan ang lupa ay hindi nangangahulugan na maaari ring isangla ng agent ang lupang iyon. Kung ang isinulat naman ng principal sa SPA ay pumapayag siya na isangla ng agent ang lupa sa kanyang ngalan, ay hindi nangangahulugan na maaaring ibenta ng agent ang nasabing lupa. Samakatuwid, kung ano lang ang partikular na inilagay ng principal sa SPA ay iyon lang din ang maaaring gawin ng agent.

Sa iyong sitwasyon, nakasaad sa SPA na iyong ginawa na binibigyan mo ng karapatan ang kapatid mo na ibenta ang lupain mo sa Batangas. Kaya, maaaring hindi tama ang kanyang ginawa na sa halip na ibenta ay isinangla niya ito dahil malinaw ang nakasaad sa iyong SPA na ang ibinibigay mo sa kanyang karapatan ay magbenta at hindi magsangla. Lumampas sa kanyang awtoridad ang iyong kapatid nang isangla niya ang iyong lupa, sa halip na ibenta ito. Dahil dito, maaari mong kuwestiyunin ang pagsangla na ginawa ng iyong kapatid.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Karapatan ng mga nangungutang at nagpapautang

ni Atty. Persida Rueda-Acosta @Magtanong Kay Attorney | Nov. 24, 2024

Marami sa ating mga kababayan ang dumudulog sa aming tanggapan upang humingi ng tulong laban sa mga naniningil ng kanilang pagkakautang sa kanilang credit cards at maging ng kanilang mga utang na kinuha nila online. 

Aminado naman ang mga ito na sila nga ay nagkautang gamit ang credit card na ibinigay sa kanila ng mga bangko bilang credit card companies at ng iba pang financial institutions na nagpapautang na may interes. Subalit ang hinihiling lamang nila, sila ay bigyan din ng konsiderasyon at kaukulang respeto ng mga ito sa pagkakataong hindi nila nabayaran sa takdang panahon ang kanilang mga pagkakautang. 

Magsilbi sanang paalala ang limbag na ito sa mga may credit cards na maging responsable sa paggamit nito sapagkat malaki talaga ang interes na ipinapataw ng mga ito. Kaya naman kapag hindi kinakailangan iwasan ang paggamit ng credit card nang walang pakundangan. Ganoon din iyong mga umuutang sa mga lending applications, nawa ay iwasan ito hanggang kakayanin pa.

Bilang mga nagpapautang, ang mga credit card companies ay mayroong karapatan na maningil sa mga nangutang gamit ang credit card na kanilang ipinagkaloob sa kanilang mga kliyente. Ang mga lending app ay mayroon ding karapatan upang mabawi ang halagang kanilang ipinautang. Kalakip nito ay ang kanilang karapatan na ibigay ang paniningil sa collection companies para maningil ng kanilang mga pautang kapag ang nasabing pagkakautang ay kinakailangan nang mabayaran. Ito ay sa mga pagkakataong ang obligasyon ng nangutang na magbayad ay umabot na sa takdang araw at hindi pa rin ito nakakabayad ng kanyang pagkakautang. 

Subalit ang karapatang maningil na ito ng mga credit card companies at lending app ay hindi dapat na maging dahilan upang guluhin ang buhay ng nangutang. May mga karapatan din ang mga nangungutang na mabigyan ng proteksyon laban sa mga hindi makatwirang paniningil at pamamahiya lalo na sa social media. 

May mga paraan na maayos upang makapaningil ng pautang ang mga credit card companies at lending app. Ipinagbabawal ng batas ang pagsasagawa ng mga hindi makatarungang paniningil katulad na lamang ng paggamit ng mga mapang-insultong mga salita. 

Mayroong regulasyon ang Bangko Sentral ng Pilipinas kung saan binigyan ng klasipikasyon bilang Unfair Collection Practices ang mga sumusunod na gawain:

(a) Use or threat of violence or other criminal means to harm a person, his reputation or property; 

b) Use of obscenities, insults, or profane language which amount to a criminal act or offense; 

(c) Disclosure of the names of credit cardholders who allegedly refuse to pay debts, unless authorized by law; 

(d) Threat to take any action that cannot legally be taken;

 e) Purposely communicating or threatening to communicate false credit information; 

(f) Any false representation or deceptive means to collect any debt or to obtain information concerning a cardholder; and

(g) Making contact at unreasonable/inconvenient hours before 6:00 A.M. or after 10:00 P.M., unless the account is past due for more than sixty (60) days, it is with express permission, or said times are the only reasonable or convenient opportunities for contact (Subsecs. 4301N.14, Manual of Regulations for Non-Bank Financial Institution as amended by Circular No. 454, s. 2004, issued 9-24-2004). 

Sa mga nakasaad sa itaas ay makikita natin na kahit na ang isang taong mayroong pagkakautang ay marapat din namang mabigyan ng kaukulang respeto sa pagkakataong siya ay sisingilin na sa kanyang obligasyon. 

Ipinagbabawal ang paggamit o pagbabanta ng karahasan o iba pang kriminal na paraan upang saktan ang isang tao, ang kanyang reputasyon o kanyang ari-arian. Hindi rin hinahayaan ang paggamit ng mga kahalayan, insulto, o bastos na pananalita na katumbas ng isang kriminal na gawa o pagkakasala. Lalong hindi pinapayagan ang credit collection agents na magsiwalat ng mga pangalan ng mga may hawak ng credit card o account na diumano ay tumangging magbayad ng mga utang. 

Subalit kahit na mayroong ganitong uri ng panuntunan ang Bangko Sentral, marapat

isipin ng isang nangungutang na siya ay mayroon din namang obligasyon na bayaran ang kanyang mga pagkakautang. Kung mayroong dahilan at hindi niya mabayaran ito ay maaari siyang makipag-ugnayan sa institusyon na kanyang pinagkakautangan at makipag-usap kung papaano niya mababayaran ang kanyang pagkakautang sa paraang kanyang kakayanin.