Valenzuela RTC, naka-lockdown

ni Maeng Santos | June 28, 2020

Photo: Source

Isinailalim sa temporary lockdown ang Valenzuela Regional Trial Court (RTC)-Bulwagang Pangkatarungan simula Hunyo 25 matapos matuklasang may ilang empleyadong maaaring positibo sa COVID-19.

Tatagal ang lockdown hanggang Hulyo 9, kung ang empleyado ng korte na sinasabing nagkaroon ng contact sa COVID-19 patient ay magpopositibo rin sa naturang sakit.

Agad namang ipagpapatuloy ang in-court proceedings at iba pang transaksiyon kung negatibo ang magiging resulta ng swab test, nakasaad sa memorandum na inisyu ni Executive Judge Maria Nena Santos.

Ayon din sa nasabing memorandum, sasailalim sa dalawang linggong self-quarantine ang mga hukom at kawani ng Valenzuela RTC.

Ang mga pagdinig at pag-raffle ng mga kaso ay ipagpapatuloy sa pamamagitan ng video conferencing.

Online seller, tiklo sa shabu

ni Maeng Santos | June 24, 2020

Photo: Source

Arestado ang dalawang hinihinalang sangkot sa ilegal na droga matapos makuhanan ng nasa P272,000 halaga ng shabu sa biy-bust operation sa Caloocan City.

Kinilala ni Caloocan Police Chief Col. Dario Menor ang mga naaresto na sina Gretchen Cerro alyas Ate, 29, online seller at Arthur Villanueva, 41, tricycle driver, kapwa ng Bgy. 175, Camarin.

Ala-1:30 ng madaling-araw nang magsagawa ng buy-bust operation ang mga operatiba ng Station Drug Enforcement Unit (SDEU) sa pangunguna ni P/Capt. Deo Cabildo kontra sa mga suspek sa kahabaan ng Sampaguita St., Bgy. 175.

Agad inaresto ng mga operatiba ang mga suspek matapos bentahan ng isang sachet ng shabu si PCpl. Roger Abrenica na nagpanggap na buyer kapalit ng P1,000 marked money.

Narekober ng pulisya sa mga suspek ang nasa 40 gramo ng shabu n tinatayang nasa P272, 000 ang halaga at buy-bust money.

Kabilang sa mga nag-rally at ikinulong... 2 Jeepney drivers, positive sa COVID-19

ni Maeng Santos | June 21, 2020

Photo: Source

Isinailalim kahapon sa swab testing ang 129 detainees sa Caloocan Custodial Facility

matapos magpositibo sa COVID-19 ang dalawa sa anim na jeepney drivers na ikinulong makaraang arestuhin kamakailan dahil sa pagsasagawa ng protesta.

Ayon kay Caloocan City Police Chief Col. Dario Menor, apat na pulis na nakatalaga sa custodial center ang isailalim din sa test.

Bilang parte ng health at safety protocols, ipinag-utos niya na pansamantalang ipagbawal muna ang pagbisita sa detention facility dahil sa inaasahang gagawing pag-disinfect sa lugar ng mga tauhan ng City Health.

Nilinaw naman ni Menor na ang anim na PISTON drivers ay nakahiwalay sa karamihan na mga nakakulong dahil matatanda na sila simula nu’ng unang araw na pagkakulong nila hanggang sa kanilang paglaya matapos makapagpiyansa.

Nasa maayos namang kondisyon ang lahat ng mga detainees at walang nagpapakita ng sintomas subalit, kailangan pa rin aniya nilang isailalim sa swab test para sa health protocol.

Si Caloocan Rep. Edgar ‘Egay’ Erice ang nagpahayag na nagpositibo sa COVID-19 ang dalawa sa anim na PISTON drivers. Isa rin siya sa mga tumulong upang makalaya ang mga ito sa pamamagitan ng pagpiyansa sa kanila