P3-m marijuana, nasabat

ni Madel Moratillo | June 23, 2020

Abot sa mahigit 3 milyong pisong halaga ng kush marijuana ang nasabat ng Bureau of Customs mula sa isang parcel na ipinadala sa pamamagitan ng Central Mail Exchange Center. Ayon sa BOC, ang mga nasabing parcel ay mula sa California, USA at idineklara bilang tsokolate, green at black tea at shirts.

Pero matapos isailalim sa physical examination ng mga examiner ng BOC-NAIA ang package, 4 na pakete pala ng kush marijuana ang laman nito.

Hindi naman tinukoy ng Customs ang pagkakakilanlan ng padadalhan ng package pero ito ay taga-Marikina City umano.

Ang kush marijuana ay ikinukonsidera pa ring ilegal sa bansa at ang importasyon nito ay may katapat na parusang habambuhay na pagkabilanggo.

Ang mga nakumpiskang kush marijuana ay itinurnover naman sa Philippine Drug Enforcement Agency para sa karagdagang profiling at case buildup.

Tiniyak naman ng BOC ang kanilang pinaigting na pagsala sa lahat ng dumarating na parcel at cargo sa bansa upang matiyak na walang makakalusot na ilegal na kontrabando.

30,682 positibo sa COVID-19

ni Madel Moratillo | June 23, 2020

Umakyat na sa 30,682 ang kabuuang bilang ng covid-19 cases na naitala sa bansa.

Ito ay matapos makapagtala ang Department of Health ng 630 na karagdagan pang kaso.

Sa mga bagong bilang na ito ay 467 ang fresh cases habang 163 naman ang late cases.

Sa mga fresh cases, 149 ang mula sa National Capital Region, 164 sa Region 7, ang 153 naman ay mula sa iba pang lugar sa bansa at may 1 mula sa hanay ng repatriates.

Sa mga late cases naman, ang 25 ay mula sa NCR, 93 mula sa Region 7 at 45 naman sa iba pang lugar sa bansa.

May naitala namang 250 na nakarekober mula sa sakit. Dahil dito, umakyat na sa 8,143 ang bilang ng mga pasyenteng gumaling mula sa virus.

May 8 namang naitalang nasawi dahil sa covid-19. Sa ngayon, umabot na sa 1,177 ang kabuuang bilang ng nasawi sa bansa dahil sa covid-19.

P1 milyong marijuana, nasabat

ni Madel Moratillo | June 20, 2020

Photo: BOC Philippines

Aabot sa mahigit 1 milyong pisong halaga ng marijuana ang nasabat ng mga tauhan ng Bureau of Customs sa Port of Clark sa Pampanga.

Ayon sa BOC, aabot sa 966 gramo ng marijuana na tinatayang nagkakahalaga ng P1.1 milyon ang nadiskubre sa isang ipinadalang bagahe mula sa Estados Unidos.

Ang shipment ay idineklara umano bilang mga “art-work fine” mula sa California, USA na

dumating sa bansa nitong Hunyo 9.

Ayon sa BOC, sumailalim sa profiling ng mga tauhan ng Customs at isinalang din sa x-ray examination ang nasabing shipment.

At sa physical examination, nadiskubre ng kanilang mga tauhan ang dalawang vacuum-sealed na plastic packs kung saan nakatago ang marijuana.

Nai-turnover na ang mga ito sa Philippine Drug Enforcement Agency sa Region 3.

Hindi naman tinukoy ng Customs kung sino ang nagpadala ng shipment at kung sino ang dapat sana’y tatanggap nito dito sa bansa.

Noong Marso lamang, 13.2 milyong pisong halaga ng marijuana na tinangkang ipuslit sa bansa ang nasabat din sa Port of Clark.