Remdesivir, epektib vs. COVID-19 — DOH

ni Madel Moratillo | July 3, 2020

May mga nakitang positibong resulta sa ilang covid patient na binibigyan ng gamot na Remdesivir.

Ito ang kinumpirma ni Health Usec. Ma Rosario Vergeire sa isang virtual press conference.

Ang Remdesivir ay gamot para sa ebola virus pero, nakitang epektibo rin ito sa paggamot sa covid-19.

Ayon kay Vergeire, batay sa mga feedback na ipinarating sa kanila mula sa ginagawang clinical trial ay nabawasan ang mga oras na naka-admit sa critical care ang isang covid patient.

Pero paglilinaw ni Vergeire bagama’t may mga positibong resulta na nakikita sa mga pasyenteng nabigyan ng Remdesivir ay hindi pa ito pinal hanggang hindi nakukumpleto ang trial.

Sa Singapore at Japan ay inaprubahan na ang Remdesivir bilang panggamot sa covid-19.

Maliban sa Remdesivir, ilan pa sa mga gamot na kabilang sa solidarity trial ng WHO ay ang antimalarial drug na hyrdroxychloroquine, at antiretroviral drugs na Lopinavir at Ritonavir.

After 10 days... COVID patient na walang sintomas, puwede nang pauwiin

ni Madel Moratillo | June 27, 2020

Binago na ng Department of Health ang kanilang ipinatutupad na protocol sa pag-discharge ng mga pasyenteng nagpositibo sa covid-19 mula sa mga ospital o quarantine facilities.

Ayon kay Health Usec. Ma Rosario Vergeire, ito ay kasunod ng resulta ng mga pag-aaral ng ilang eksperto kung saan natukoy na pagsapit ng ika-10 araw ay hindi na nakakahawa ang covid-19 virus na nasa katawan ng isang indibidwal.

"There’s a findings 2 weeks ago article at evidences sinasabing ang isang pasyenteng confirmed na positive pagdating ng 10th day they are already non infectious. Kaya rekumendasyon ng mga eksperto ‘di mo na kailangang ire-test kasi alam mo na pagdating ng 10 araw ay ‘di na talaga siya makakahawa sa ibang tao. Binago namin protocol because of this evidence," pahayag ni Vergeire.

Dahil dito, mula sa "test based" ay "symptom based" approach na ang paiiralin ng DOH.

Sa ilalim nito, makalipas ang sampung araw at wala ng sintomas ng virus ang isang pasyente ay maaari na itong pauwiin nang hindi na kailangang sumailalim pa sa confirmatory test.

Para naman sa mga asymptomatic, kung makalipas ang 14 na araw ay wala pa rin siyang sintomas ng virus ay maaari na itong pauwiin ng bahay kahit hindi na isailalim pa mula sa covid test.

Aminado ang DOH na ang pagbabagong ito ng protocol ay malaking tulong hindi lang sa pamilya ng pasyente kundi maging sa kasalukuyang health system dahil mabibigyang espasyo na rin sa mga ospital at iba pang quarantine facility ang mga bagong covid patient na kailangang ma-admit.

Sa dating sistema ng DOH, bago makalabas ng ospital kailangang dalawang beses na mag- negative sa covid-19 ng isang pasyente.

Pagkatapos nito, kailangan din niyang sumailalim muli sa isa pang covid test makalipas naman ng 14 na araw na muli nitong pagsailalim sa home quarantine.

Kaugnay nito, sinabi ng DOH na asahan ang mas lalo pang pagtaas ng bilang ng iuulat nilang nakakarekober mula sa covid-19 dito sa bansa.

Maliban dito, naglunsad din ang DOH ng kanilang tinawag na oplan recovery na magsasagawa ng validation sa mga mild covid patient na nag-home quarantine lamang.

Paliwanag ni Vergeire, karamihan sa mga ito ay hindi na na-monitor ng barangay health emergency response team kung gumaling ba o pumanaw na mula sa sakit.

Suob vs. COVID-19, delikado — DOH

ni Madel Moratillo | June 27, 2020

Muling nagpaalala ang Department of Health (DOH) sa publiko hinggil sa panganib na maaaring idulot ng tuob o suob.

Sa isang advisory, sinabi ng DOH na ang paglanghap ng steam na may asin, lemon at iba pa ay hindi nakakapatay ng COVID-19.

Maging ang Center for Disease Control and Prevention at World Health Organization ay nagsabi na rin na hindi nakakagaling ng covid-19 ang steam inhalation.

Wala rin umanong scientific evidences na magpapatunay na nakakapatay ng virus na dala ng covid-19 ang steam inhalation.

Paliwanag naman ni Health Usec. Ma Rosario Vergeire, maaaring makapagpakalat lang ng virus ang steam inhalation.

Maaari aniyang sumama ang virus sa singaw o na-produce na aerosole dahil sa steam.

Ang steam inhalation ay nagpaparami rin umano ng likido sa ilong na posibleng makahawa sa iba sa pamamagitan ng pagbahing o pag-ubo.

Bukod dito, maaari rin umano itong magdulot ng aksidente gaya ng pagkasunog at pagkalapnos ng balat.

Sa kapitolyo ng Cebu, isang memorandum ang inilabas ng pamahalaang panlalawigan kung saan hinihikayat ang mga empleyado na mag-tuob ng dalawang beses isang araw sa kani-kanilang work station.

Ang Cebu City ang isa sa pangunahing tinututukan ngayon ng pamahalaan dahil sa pagdami ng kaso ng COVID-19.