Matataba, mas delikado sa COVID-19

ni Madel Moratillo | July 17, 2020

Nagbabala ang isang doktor sa posibilidad na mas malala ang sintomas ng covid-19 sa mga pasyenteng obese o may labis na katabaan.

Ipinaliwanag ni Mia Fojas, isang endocrinologist, na ito ay dahil mas mahirap ang pagdaloy ng hangin sa isang COVID patient na obese.

Maaari rin aniyang makaapekto sa sitwasyon ng pasyente kung ito ay mayroong mga sakit na maiuugnay sa katabaan gaya ng obstructive sleep apnea o asthma.

Nagbabala rin si Fojas na mas mahirap pagalingin ang isang obese na covid patient.

Ipinaliwanag ni Fojas na kadalasan sa mga obese ay mayroong chronic condition gaya ng hypertension o diabetes na nakapagpapalala ng kalagayan ng pasyente.

Paliwanag nito, kailangan kasing maalis ang paglapot ng dugo para mas madaling gumaling ang pasyente na karaniwang problema kung hypertensive ito.

Kaya payo ni Fojas sa publiko, kahit umiiral ang lockdown, siguruhing kumakain nang tama at maayos para iwas obesity.

Panlaban sa COVID, common sense — LGU

ni Madel Moratillo | July 13, 2020

Sa panahong ito ng COVID-19 pandemic, kailangang pairalin ang common sense.

Ayon kay Marikina City Mayor Marcelino Teodoro, ito ang sinunod nang sikaping magkaroon ng sariling molecular diagnostic laboratory ang kanilang lungsod.

Dahil aniya sa malakas na testing capacity ng Marikina, hindi nila kailangang umasa sa iba pagdating sa pagsusuri sa kanilang mamamayan.

Matatandaang nagkaroon ng isyu noon ang itinayong laboratoryo ng Marikina matapos itong hindi aprubahan ng Department of Health (DOH) pero kalauna'y binigyan din ng lisensiya ng kagawaran at tinawag pa ni Health Sec. Francisco Duque III bilang isa sa pinakamahusay na testing facility sa bansa.

Online wedding, pinalagan ng simbahan

ni Madel Moratillo | July 5, 2020

Hindi pabor ang isang opisyal ng Simbahang Katolika sa panukalang ‘online o virtual wedding’ habang nagpapatuloy pa ang banta ng covid-19.

Paliwanag ni Balanga, Bataan Bishop Ruperto Santos, ang kasal ay isang mahalagang sakramento ng Simbahan na nagtataglay ng tatlong panuntunan — pagsang-ayon, komunyon at kasunduan.

Kaya naman hindi aniya tama na maging ang kasal ay gawing online na lamang.

“Church wedding is a covenant between the couple themselves, and they as a couple with God as Godparents being the witness, and the priest a minister. Thus, it is a community celebration,” paliwanag ni Santos.

Sinabi pa ni Santos na ang kasal ay kusang-loob na ibinibigay nang walang pananakot at pamimilit.

Kung gagawin aniya ito sa online lamang ay hindi makakatiyak ang pari na ang pag-iisang dibdib ng magkasintahan ay bunga ng kanilang malayang pagpapasya.

“With online wedding how can we, priests, be sure and certain that the couple is not impeded in their free decision to get married,” dagdag pa ng Obispo.

Lumutang ang mga mungkahi na idaos na lamang online ang kasal dahil sa maraming kasal ang hindi pa matuloy dahil sa umiiral na community quarantine at paglilimita sa bilang ng mga dadalo sa mga pagdiriwang.