Kahit umaming supplier.. Kasong droga vs. Kerwin Espinosa, ibinasura ng korte

ni Madel Moratillo | December 30, 2021

Ibinasura ng Makati City Regional Trial Court ang illegal drug case laban kay “self-

confessed” drug distributor Kerwin Espinosa.

Sa desisyon ng Makati RTC Branch 64, mas pinaboran nito ang inihaing demurrer to evidence ng kampo ni Espinosa.

Ito ay dahil sa kakulangan umano ng sapat na ebidensiya laban dito. Maliban kay Espinosa, kinatigan din ng korte ang demurrer to evidence ng mga kapwa akusado ni Espinosa na sina Lovely Impal, Wu Tuan Yuan, at Marcelo Adorco o ang tinatawag na Espinosa Group.

Sinabi ng korte na bigo rin umano ang prosekusyon na maglabas o magdadag ng katibayan na magpapatunay na guilty beyond reasonable doubt ang mga akusado.

Si Espinosa at iba pa ay nahaharap sa kasong illegal drug trafficking. Paliwanag ng korte, batay sa jurisprudence, dapat na mapatunayan na ang akusado ay umakto bilang broker o kaya ay pinag-ugnay nito ang buyer at seller ng droga gamit ang electronic devices.

Nakabatay lang umano ang prosekusyon sa sinumpaang salaysay ni Adorco na idineklarang inadmissible dahil wala itong kasamang abogado nang gawin ang kanyang testimonya.

Kahit pa tanggapin umano ng korte ang testimonya ni Adorco ay hindi ito sapat dahil ito ay inconsistent, may mga errors at binawi rin ni Adorco.

Una rito, kinasuhan ng Department of Justice sina Espinosa kaugnay sa umano’y illegal drug trade sa Eastern Visayas.

Si Espinosa ay anak ni dating Albuera, Leyte Mayor Rolando Espinosa, Sr., na nasawi sa loob ng kulungan noong 2016 matapos umanong manlaban sa mga pulis. Kasama ang nakatatandang Espinosa sa mga lokal na opisyal na nasa listahan ni Pangulong Rodrigo Duterte na sangkot umano sa ilegal na droga.

Naaresto ang nakababatang Espinosa sa Abu Dhabi noong Nobyembre 2016, at sinasabi ng PNP-AIDG na umamin umano ito sa pagkakasangkot sa kalakalan ng ilegal na droga.

P40.2B inutang ng 'Pinas, pambili ng booster shots at bakuna sa edad 12-17

ni Madel Moratillo | December 24, 2021

Aprubado na ng World Bank ang $300 milyon na inutang ng Pilipinas.

Sa ngayon, umabot na sa $800 milyon o katumbas ng P40.2 bilyon na ang nautang ng Pilipinas. Ito ay sa loob lamang ng nakalipas na dalawang linggo.

Ang pera ay gagamitin umano para ibili ng 27 milyong doses ng COVID-19 vaccine para sa booster shots. Gayundin ang para sa bakuna ng mga nasa edad 12 hanggang 17.

Iwas-COVID-19 — DOH... Sementeryo sa buong bansa, sarado sa Undas

ni Madel Moratillo | September 15, 2020

Ikinukonsidera ng Department of Health ang pagrerekumenda na isara ang lahat ng mga sementeryo sa buong bansa sa panahon ng Undas.

Ginawa ni Health Undersecretary Ma Rosario Vergeire ang pahayag kasunod na rin ng aksyon ng ilang Metro Manila Mayors na isara pansamantala ang mga pampubliko at pribadong sementeryo at kolumbaryo sa kani-kanilang lugar sa mga nasabing petsa.

Ito ay bilang pag-iingat laban sa COVID-19 at maiwasan ang pagkalat pa nito.

"So, 'pag dumating 'yung panahon na 'yan maaaring makapag-recommend din tayo so it can be recommended across the country" pahayag ni Vergeire.

Paliwanag ng Health Official na sa panahon ng Undas ay marami ang magtutungo sa mga sementeryo.

Dahil sa banta ng COVID-19 ay mahigpit na ipinagbabawal ang mass gathering.

"Alam natin 'pag Undas talagang 'yung mga tao siksikan sa sementaryo and that is mass gathering already and we would like to prevent that," pahayag ni Vergeire.

Pinuri naman ni Vergeire ang ginawang hakbang ng ilang LGUs at maging ang maagang pag-aanunsiyo nito sa publiko.

Ang Lungsod ng Maynila ang unang nag-abisp sa pagsasara ng mga semeteryo mula Oktubre 31 hanggang Nobyembre 1 na sinundan ng iba pang lungsod sa Metro Manila nang mula Oktubre 29 hanggang Nobyembre 4.