Ill-gotten wealth vs. Marcoses, ibinasura ng Sandiganbayan

ni Madel Moratillo | February 23, 2023

Ibinasura ng Sandiganbayan ang ill-gotten case na inihain laban kay dating Pangulong Ferdinand Marcos, Sr. at iba pa sa Sandiganbayan dahil sa kawalan ng sapat na ebidensya.

Sa 156-pahinang desisyon ng Sandiganbayan Fifth Division, ibinasura ang Civil Case laban kina dating Pangulong Marcos Sr., misis na si Imelda; Luis Yulo; Roberto Benedicto; Nicolas Dehesa; Jose Tengco, Jr.; Rafael Sison; Cesar Zalamea at Don Ferry.

Dahil umano sa napakalaking loan mula sa mga state-run financial institutions na pabor sa kumpanya na nasa ilalim ng kanilang kontrol.

Sa desisyon ng anti-graft court, nakasaad na hindi napatunayan sa pamamagitan ng ebidensya na ang mga property na subject ng kaso ay pag-aari ng mga Marcos.

Giit ng korte, umasa lang ang prosekusyon sa affidavit ni Rolando Gapud na nagsilbi umanong financial advisor ng dating Pangulo.

Gayunman, maituturing umano itong hearsay lang dahil hindi naman naisalang sa witness stand si Gapud.

Ibinasura rin ang kaso laban sa iba pang akusado dahil sa parehong dahilan. Ang nasabing kasong sibil ay isinampa sa pamilya Marcos matapos ang 1986 EDSA People Power Revolution.

Piyansa sa mahihirap, mas pinababa

ni Madel Moratillo | February 22, 2023

Ibinaba ng Department of Justice (DOJ) sa P10,000 ang piyansa para sa mahihirap na nahaharap sa kasong kriminal.

Sa isang department circular, inatasan ni Justice Secretary Jesus Crispin Remulla ang mga prosecutor na sa panahon ng inquest o preliminary investigation ay alamin kung ang respondent ay indigents at irekomenda ang mas mababang piyansa.

Sakaling mapatunayang guilty ito sa ginawang inquest o preliminary investigation ay 50% lang ng piyansa ang irerekomenda para rito o P10,000 o kung alin ang mas

mababa.

Hindi naman tinukoy sa DOJ circular ang nature ng krimen pero itinakda sa P10,000 ang cap bilang maximum na halaga para sa indigents.

Ayon naman kay DOJ Spokesperson Assistant Secretary Mico Clavano, effective immediately ang nasabing circular.

Nabatid na ang nasabing reporma ay inirekomenda ni Chief Justice Alexander Gesmundo sa ginawang Justice Sector Coordinating Council noong Enero bilang solusyon sa jail congestion.

Tiniyak naman ni Remulla na magkakaroon ng safeguards ang circular na ito para hindi maabuso.

Shortage, ibinulgar na peke.. Presyo ng agri products, kontrolado na ng kartel, hoarders

ni Madel Moratillo | February 20, 2023

Walang problema sa suplay ng pagkain sa bansa. Ito ang iginiit ng consumer group na Malayang Konsyumer kasunod ng kabi-kabilang importasyon ng gobyerno ng iba’t ibang produktong agrikultura.

Ayon sa grupo, ang kartel, hoarders at profiteers na nagtatago sa naaning agri products at nagmamanipula ng presyo nito sa merkado ang tunay na problema.

Kaya apela ni Atty. Simoun Salinas, spokesperson ng Malayang Konsyumer kailangan nang maamyendahan ang Republic Act 10845 o “Anti-Agricultural Smuggling Act of 2016”.

Sa Senado, ilang panukalang batas ang inihain na layong maamyendahan ang Anti Smuggling Law. Kabilang dito ang Senate Bill 1688 ni Senador JV Ejercito at Senate Bill 1812 ni Sen. Lito Lapid.

Pero tinututulan ng grupo ang panukala ni Lapid dahil isiningit dito na maisama sa Anti-Smuggling Act ang tobacco at sigarilyo.

Ayon kay Salinas, mas pabor sila sa panukala ni Ejercito dahil ang target dito ay mga nasa likod ng hoarding, profiteering, kartel at iba pang pang-aabuso sa merkado ng agri products.

Sa ilalim ng panukala ni Ejercito ay ituturing din bilang isang uri ng economic sabotage ang mga ito na may katapat na mabigat na parusa.

Giit nina Salinas at Malayang Konsyumer Convenor Christian Real, ang mga amyenda sa Anti-Smuggling Law ay naglalayong mapabuti ang pagpapatupad nito, subalit dapat ay nakatuon sa mga pagkakasala na direktang apektado ang mga Pilipinong mamimili.

Dagdag pa ni Real, dapat bantayan ding mabuti ng gobyerno ang masyadong mahal na presyo ng mga produktong pagkain na kinokontrol ng kartel at mga mapagsamantalang grupo.