Karneng baboy mula Singapore, bawal — DA

ni Madel Moratillo | March 11, 2023

Naglabas ng temporary ban ang Department of Agriculture (DA) sa lahat ng pork products mula Singapore dahil sa outbreak ng African swine fever (ASF).

Sa isang memorandum na inilabas ni Agriculture Senior Undersecretary Domingo Panganiban, nakasaad na kasama sa sakop ng ban ang pagpasok ng domestic at wild pigs maging produkto nito kasama na ang mga balat at karne.

Batay sa nasabing memo, ang Singapore ay hindi accredited para mag-export ng kahit anong swine-related commodities. Pero maaari itong makapasok sa pamamagitan ng hand-carried products, kaya inilabas ang kautusan ng DA.

Ang mas mahigpit na patakaran ng DA ay matapos may maitalang bagong kaso ng ASF sa bansa.

Una rito, sa Carcar City, Cebu, may mahigit 50 samples ang nagpositibo sa ASF, na unang kaso sa probinsya.

Duty sa halalan.. Bayad sa titser at pulis, i-advance — VP Sara

ni Madel Moratillo | March 10, 2023

Humirit si Vice President at Education Sec. Sara Duterte sa Commission on Elections na ibigay nang mas maaga ang honararia ng mga gurong nagsisilbi sa halalan.

Sa kanyang talumpati sa National Elections Summit na pinangunahan ng Comelec, hiniling ni VP Sara na i-advance ang honoraria bago ang araw ng halalan, kung pwede ay maisabay din aniya maging ang para sa mga pulis.

Ayon sa Bise Presidente, marami rin kasing gastos ang mga ito para makapagsilbi sa halalan gaya ng sa transportasyon, pagkain at iba pang pangangailangan.

Sagot naman ng poll body, sa pamamagitan ni Comelec Chairman George Garcia, pwede naman nila itong pagbigyan.

Katunayan, nagawa na aniya nila dati na ibigay ang 50% na honoraria ng mga guro bago ang araw ng eleksyon, at 50% pagkatapos ng halalan.

Pero nagkaproblema naman aniya sila sa Commission on Audit dahil may ilang guro ang hindi nakarating sa araw ng eleksyon dahil sa iba’t ibang kadahilanan.

Ang iba rito, natakot sa banta sa seguridad.

Sa kanyang talumpati sa summit, nagpahayag din ng pangamba si VP Sara sa mga insidente ng pamamaslang at pananambang sa ilang halal na opisyal.

Hiniling din niya sa Comelec ang paggamit ng makabagong teknolohiya para masawata ang mga insidente ng dayaan sa halalan.

Inihalimbawa niya ang mga multiple voter na noong alkalde pa siya ay na-encounter nila.

Hiniling din ni VP Sara na maisama ang voter education sa K to 12 para maaga pa lang ay maturuan na ang mga bata sa kahalagahan ng pagboto.

Early voting sa senior, PWD at buntis

ni Madel Moratillo | March 9, 2023

Target ng Commission on Elections (Comelec) na magkaroon ng early voting para sa mga senior citizen, persons with disabilities at buntis.

Ayon kay Comelec Chairman George Garcia, iminungkahi na niya sa en banc ang panukalang ito para mapag-aralan.

Sakaling aprubahan ng en banc, magkakaroon ng pilot testing para rito sa ilang piling lugar sa Luzon, Visayas at Mindanao.

Sa mungkahi ni Garcia na early voting ay magsisimula ng 5am hanggang 7am. Mas maaga ito sa normal na oras ng pagbubukas ng botohan. Gayunman, kakailanganin ng dagdag na pondo para rito.