Ayaw umuwi ng ‘Pinas.. Cong. Teves, sisipain sa Kamara

ni Madel Moratillo | March 16, 2023

Pinagpapaliwanag ng House Committee on Ethics si Negros Oriental Cong. Arnie Teves sa patuloy na kabiguang bumalik sa trabaho.

Limang araw ang ibinigay ng komite kay Teves para magpaliwanag kung bakit hindi pa rin ito bumabalik gayung paso na ang kanyang travel authority.

Ang travel authority ng mambabatas para sa kanyang biyahe sa Estados Unidos ay mula Pebrero 28 hanggang Marso 9 para magpa-stem cell.

Una rito, nagpasabi si Teves na hindi ito makauwi ng bansa dahil natatakot siya sa kanyang seguridad.

Sinabi ni House Committee on Ethics and Privileges Chairman Felimon Espares na kailangang magpaliwanag ni Teves lalo na’t may defiance ito sa kautusan ng Kamara.

Maaari umanong matanggal sa puwesto si Teves bilang disciplinary action kung hindi ito susunod.

Si Teves ay nadawit sa pamamaslang kay Gov. Roel Degamo.

7 Tau Gamma, tuluyan sa Salilig-hazing — DOJ

ni Madel Moratillo | March 16, 2023

Inirekomenda na ng Department of Justice (DOJ) ang pagsasampa ng kasong paglabag sa Anti-Hazing Law sa 7 suspek na miyembro ng Tau Gamma Phi sa pagpatay kay John Matthew Salilig.

Ayon sa DOJ Panel of Prosecutors, nakitaan ng probable cause para iakyat sa korte ang reklamo laban sa pito.

Kabilang sa mga pinakakasuhan ang lider ng Tau Gamma Phi-Adamson Chapter na si Tung Cheng Teng, Jr. at master initiator na si Daniel Perry.

Pinakakasuhan din sina Earl Anthony Osita Romero a.k.a. Slaughter, Jerome Ochoco

Balot a.k.a. Allie, Sandro Dasalla Victorino a.k.a. Loki, Michael Lambert Alcazar Ricalde a.k.a. Alcazar at Mark Muñoz Pedrosa a.k.a. Macoy.

Ayon kay DOJ Asec. Mico Clavano, lahat ng 7 respondent, nagplano at lumahok sa ginawang hazing noong Pebrero 18 ay liable din sa kaso.

Nakasaad pa sa resolusyon ng panel na ang hazing sa pamamagitan ng pag-paddle sa welcoming rites ng nasabing fraternity ang naging sanhi ng pagpanaw ni Salilig.

Pagdinig sa Salilig-hazing, tinapos na ng DOJ

ni Madel Moratillo | March 12, 2023

Tinapos na ng Department of Justice (DOJ) ang pagdinig sa reklamong paglabag sa Anti-Hazing Law laban sa mga suspek sa pagkamatay ni John Matthew Salilig.

Matatandaang ang bangkay ni Salilig ay natagpuang nakalibing sa isang hukay sa Imus, Cavite matapos itong masawi dahil umano sa hazing.

Ayon sa panel of prosecutors ng DOJ, submitted for resolution na ang reklamo laban sa

7 suspek.

Sinabi pa ng DOJ na sa pitong suspek, ang master initiator na si Daniel Perry lang ang nagsumite ng counter affidavit.

Ang apat na suspek naman na sina Tung Cheng Teng, Jr., Mark Pedrosa, Sandro Victorino, at Michael Lambert Ritalde, humirit na iurong ang preliminary investigation.

Si Romero Earl Anthony ay muli lang iginiit ang inihaing sinumpaang salaysay sa inquest proceedings.

Inaasahang sa mga darating na araw o linggo ay mailalabas na ng DOJ panel ang resolusyon sa reklamo.