After 2 years.. Bonus ng titser, ibibigay na

ni Madel Moratillo @News | September 15, 2023

Matatanggap na ng 920,073 guro sa pampublikong paaralan ang kanilang performance-based bonus para sa fiscal year 2021.

Ito ay matapos ilabas na ng Department of Budget and Management (DBM) ang P11.6 bilyong pondo para rito.

Sa isang pahayag sinabi ng DBM na hanggang nitong September 1, 2023, lahat ng kanilang 16 regional offices ay ini-release na ang Special Allotment Release Orders (SAROs) at Notice of Cash Allocations (NCAs) para rito.

Ayon kay DBM Secretary Amenah Pangandaman, kinikilala ng DBM ang extraordinary na trabaho ng mga guro.

Pero para sa non-teaching personnels na nasa ilalim ng Schools Division Offices sa Metro Manila, Cordillera Administrative Region, Central Luzon, Calabarzon, Eastern Visayas, Davao Region, Soccsksargen, at Caraga ibinalik ito sa DepEd para sa revalidation o revision. Ito ay dahil sa ilang concern gaya ng duplicate entries, maling impormasyon, at iba pa.

Pangangampanya online, bantay-sarado.. 91 kandidato sa BSKE, nasampulan

ni Madel Moratillo @News | September 11, 2023

May 91 na kandidato sa October 30, 2023 Barangay at Sangguniang Kabataan Elections ang nabigyan ng show cause orders ng Commission on Elections dahil sa paglabag sa premature campaigning.

Ayon kay Comelec Chairman George Garcia, binigyan ng 3 araw ang mga nasabing kandidato para magpaliwanag ng kanilang panig.

Sinabi ni Garcia na resulta ito ng mga nakita nila mismong nalabag habang ang iba ay nai-report sa kanila.

Puwede naman aniyang motu propio ay mag-imbestiga ang Comelec kahit walang pormal na reklamong inihain sa kanila. Muli namang binalaan ni Garcia ang mga lumalabag sa premature campaigning. Paliwanag ng poll chief, lahat ng kandidato na naghain na ng Certificate of Candidacy ay itinuturing nang kandidato. Puwede lang silang mangampanya sa October 19 hanggang 28.

Kahit paglalagay aniya ng poster o pag-promote ng sarili sa social media ay bawal dahil maituturing itong premature campaigning.

Babala ni Garcia, ang 91 na ito ay simula palang at masusundan pa sa mga darating na araw.

P7.4B gamot, expired, mae-expire na — COA.. Normal lang 'yan — DOH

ni Madel Moratillo @News | September 10, 2023

Iginiit ni Health Secretary Ted Herbosa na normal lang na ma-expire-an ng gamot.

Giit ni Herbosa, may porsyento talaga ng supply ng gamot ang inaabot na ng expiration.

Inihalimbawa niya ang bakuna na maikli ang shelf life.

Hindi lang naman aniya ito nangyayari sa Pilipinas kundi maging sa ibang bansa.

Aniya, dapat talaga ay sakto lang ang ino-order pero mahalaga rin umano na mayroong sobra sa supply.

“We always buy sobra. We want to buy sobra. Even with our national immunization program, bumibili talaga tayo ng sobra. Because I’d rather have sobra than kulang. Kung sobra, dapat matuwa ka nu'n kasi may reserve ka,” pahayag ni Herbosa. Ang pahayag ni Herbosa ay kasunod ng report ng Commission on Audit na nasa P7.4 billion na halaga ng gamot at iba pang supplies ang nasayang matapos abutan ng expiration o pagkasira.

Tiniyak naman ni Herbosa na titingnan niya ang sitwasyon at kung paano ito maiiwasan.