Transparency server sa Halalan 2025, out na — Comelec

ni Madel Moratillo @News | September 21, 2023

Magpapatupad ng malaking pagbabago ang Commission on Elections (Comelec) sa 2025 midterm polls.

Sa plenary debate para sa budget ng Comelec sa 2024, sinabi ni Surigao del Norte Rep. Francisco Jose Bingo Matugas II, na nag-sponsor ng 2024 budget, hindi na gagamit ang Comelec ng transparency server sa 2025.

Ito ay para mawala aniya ang isyu sa IP address, sa halip ay didirekta na ito mula sa mga presinto deretso na sa main server.

Ito ay para mawala na rin aniya ang mga kwestyon sa transmission logs.

Pero papayagan naman ng Comelec ang "virtual counting" ng mga boto sa precinct level.

“Magkakaroon po ng opportunity ang mga watchers na tingnan 'yung ballots na na-feed doon sa machine for this coming 2025 election. Mapi-picture-an nila 'yung mga balota and then they can count it manually doon mismo sa presinto bago i-print 'yung election return so that they can compare," pahayag ni Matugas.

Gagamit din aniya ang Comelec ng blockchain technology para maging secure ang transmission ng election result.

Lusot sa election ban — Comelec.. Pamimigay ng fuel subsidy, tuloy

ni Madel Moratillo @News | September 21, 2023

Exempted na sa election ban ng social services ang pamamahagi ng fuel subsidy sa mga nasa pampublikong transportasyon.

Ito ay matapos aprubahan ng Commission on Elections ang hiling ng Department of Transportation at Land Transportation Franchising and Regulatory Board para ma-exempt sa ban ang pamamahagi ng fuel subsidy.

Mahigpit na bilin ng Comelec na sa implementasyon ng programa ay dapat matiyak na hindi ito makakaimpluwensya sa nalalapit na Barangay at Sangguniang Kabataan Elections.

Kabilang sa sakop ng exemption sa election ban ay para sa fuel subsidy program, PUV service contracting program, at PUV modernization program sa kahilingan na rin ng Department of Transportation at Land Transportation Franchising and Regulatory Board.

Ang fuel subsidy ay para matulungan ang mga tsuper at operator ng public transport na apektado ng walang tigil na pagtaas ng presyo ng oil products.

Pilot run ng K-10, aarangkada sa Sept. 25 — DepEd

ni Madel Moratillo @News | September 18, 2023

Sa Setyembre 25 magsisimula ang pilot implementation ng recalibrated Kindergarten to Grade 10 o K-10 curriculum sa ilang piling paaralan sa bansa.

Sa anunsyo ng Department of Education (DepEd), may 35 eskwelahan ang lalahok sa pilot run ng bagong MATATAG K-10 curriculum na una nang inilunsad noong Agosto 10.

Batay sa listahan ng DepEd, ang 5 eskwelahan ay nasa National Capital Region (NCR), tig-5 rin sa Cordillera Administrative Region (CAR), Ilocos Region, Cagayan Valley, Central Visayas, Soccsksargen, at Caraga.

Una rito, sinabi ni DepEd deputy spokesperson Assistant Secretary Francis Bringas na iko-consolidate ng DepEd lahat ng findings at resulta ng pilot run bilang paghahanda sa implementasyon nito sa mga susunod na taon.

By phase umano ang implementasyon ng bagong K-10 curriculum sa Kinder, Grade 1, Grade 4, at Grade 7 na magsisimula sa School Year 2024-2025.

Ang Grades 2, 5, at 8 naman ay sa SY 2025-2026; Grades 3, 6 at 9 naman sa SY 2026-2027, at Grade 10 naman sa SY 2027-2028.