Mas malalakas sa Setyembre at Oktubre.. 11 pang bagyo, hahataw sa 'Pinas

ni Madel Moratillo / Mai Ancheta @News | July 31, 2023

Walo hanggang 11 bagyo pa ang tinatayang papasok sa Pilipinas hanggang sa katapusan ng taon.

Ayon kay PAGASA Deputy Administrator Dr. Nathaniel Servando, aasahan ang mas malalakas na bagyo sa pagitan ng Setyembre at Oktubre.

Samantala, umabot na sa 16 ang naitalang nasawi dahil sa Super Typhoon Egay at sa Habagat. Sa report ng NDRRMC, may 52 naitalang sugatan habang 20 ang nawawala.

Pumalo naman na sa P5.9 bilyon ang naitalang pinsala sa imprastraktura at agrikultura.

Nasa 22 libong bahay naman ang nasira na tinatayang aabot sa P344K ang halaga. May mahigit 1 milyong residente naman ang naapektuhan ng Bagyong Egay sa 13 rehiyon ng bansa.

May 40 na lugar ang nagdeklara ng state of calamity dahil kay 'Egay' at Habagat.

Mga pasahero nag-panic sa lakas ng hangin.. Bangka tumaob, 21 patay

ni Jeff Tumbado / Madel Moratillo / Mai Ancheta @News | July 28, 2023

Umabot sa 21 pasahero ang nasawi habang 30 naman ang nailigtas sa paglubog ng bangka sa Talim Island, Barangay Kalinawan, Binangonan sa Rizal, kahapon.

Sa panayam kay Philippine Coast Guard (PCG) Spokesperson Rear Admiral Armand Balilo, 51 ang kabuuang bilang ng mga sakay sa MBCA Princess Aya.

Bandang ala-1 ng hapon, hinampas umano ng malakas na hangin ang 45-metrong bangka kaya’t nataranta ang mga pasahero at nagpuntahan sa kaliwang bahagi ng sasakyan kaya’t nawalan ng balanse at lumubog.

Ayon pa kay Balilo, binigyan ng clearance na maglayag ang bangka dahil walang sama ng panahon sa area.

Patuloy pa umano ang imbestigasyon sa insidente.

Magtipid, mag-recycle — DTI.. Taas-presyo sa school supplies

ni Madel Moratillo @News | July 27, 2023

Tumaas ang presyo ng ilang school supplies, isang buwan bago magbukas ang klase.

Ayon kay Department of Trade and Industry (DTI) Undersecretary Ruth Castelo, nasa piso hanggang onse pesos ang itinaas ng presyo ng ilang school supplies. Dahil na rin ito sa pagtaas ng halaga ng raw materials.

Kaya para makatipid, payo ng DTI sa mga magulang, bumili ng bundle at ang mga gamit na pwede pa naman ay gamitin ulit.

Kahapon, binisita ng opisyal ang ilang establishments sa Marikina para matiyak na sumusunod sila sa suggested retail prices para sa school supplies.

Sa bagong SRP ng DTI, ang mga 80 leaves na composition notebook ay pwedeng ibenta mula P23 hanggang P52, depende sa brand.

Sa ballpen naman, P9.25 hanggang P19 habang para sa lapis ay P11 hanggang P17.