P7B iniwang pinsala ni ‘Egay’

ni Madel Moratillo @News | August 3, 2023

Umabot na sa mahigit 7 bilyong piso ang naitalang pinsala ng Super Typhoon Egay at Habagat sa mga imprastraktura sa Cordillera Administrative Region, Ilocos region, Cagayan Valley, at Central Luzon.

Sa report ng Department of Public Works and Highways, sa flood-control structures naitala ang pinakamalaking pinsala na umabot sa P5.6B, P1.2B sa mga kalsada at P162.6M naman sa mga tulay.

Sa Cordillera Administrative Region, 9 pa ang nananatiling hindi passable sa mga motorista kabilang sa mga apektado ay sa Abra, Apayao, Mt. Province, Kalinga at Ifugao.

Sa Region 1 ay apektado pa sa Ilocos Sur, at Pangasinan.

Sa Region 3 naman ay sa Pampanga.

May 11 kalsada naman sa CAR, Regions 1, 3 at 6 ang may limited access sa mga motorista dahil pa rin sa nag-collapse na lupa, road slip, rockslide, landslide at baha.

Simbahan lubog sa baha, Misa tuloy

ni Madel Moratillo @News | July 31, 2023

Ilang simbahan ang pinasok na rin ng tubig-baha sa Pampanga dahil sa Bagyong Falcon.

Sa bayan ng Macabebe, binaha na rin ang Lord Parish pero tuloy pa rin ang kanilang pagsisimba.

Sa bayan ng Masantol, lubog din sa baha ang mga simbahan.

Sa datos ng Pampanga Provincial Disaster Risk Reduction and Management Office, nasa 196 na barangay mula sa 16 na bayan sa lalawigan ang lubog sa baha.

Licensure exam, gawing libre

ni Madel Moratillo @News | July 31, 2023

Kinalampag ni Davao City Cong. Paolo Duterte ang mga kapwa mambabatas na maaksyunan na ang inihaing panukala na gawing libre ang licensure examinations sa bansa.

Ang House Bill 4927 o Free Professional Examinations Act ay noong Setyembre 2022 pa inihain nina Duterte at Benguet Rep. Eric Yap pero nakabinbin pa rin hanggang ngayon.

Layon aniya ng mga pagsusulit na makita ang kaalaman ng mga ito at hindi ang kanilang pinansyal na kalagayan.

Sakaling maging ganap na batas, sakop nito ang mga pagsusulit na ibinibigay ng Professional Regulation Commission (PRC), Civil Service Commission (CSC), at maging ang Bar Examinations.

Kung maging batas, ang mga indigent na estudyante ay kailangan lang ng certification mula sa Department of Social Welfare and Development.