11 election-related incidents, naitala

ni Madel Moratillo @News | Mar. 31, 2025

Photo File: PNP spokesperson Police Brigadier General Jean Fajardo - Philipiine National Police

May 11 election-related incidents na ang na-validate ng Philippine National Police (PNP) mula nang magsimula ang kampanya kaugnay ng May 12 midterm elections.

Sa panayam sa radyo, sinabi ni PNP spokesperson Police Brigadier General Jean Fajardo na hanggang nitong Marso 28, may 39 hinihinalang election-related incidents ang kanilang naitala.

Sa bilang na ito, 11 ang validated na election-related incidents, habang 23 ang validated na walang kinalaman sa eleksyon.

Sa 11 validated election-related incidents na ito, 5 ang sumasailalim sa preliminary investigation habang ang 6 ay isinasailalim sa case build-up.

Aminado si Fajardo na mas mainit ang eleksyon sa lokal kaya patuloy aniya silang magbabantay.

Printing ng balota, tapos na

ni Madel Moratillo @News | Mar. 17, 2025

Photo File: George Garcia - Comelec

Nakumpleto na ng Commission on Elections (Comelec) ang pag-imprenta ng 68,542,564 opisyal na balota na gagamitin para sa May 12 National and Local Elections. 

Ayon kay Comelec Chair George Garcia, inabot lang ng 48 araw ang pag-imprenta ng mga balota na pasok sa itinakda nilang deadline. 

Nagsimula ang pag-imprenta ng mga balota noong Enero 16 pero natigil matapos maglabas ng temporary restraining order ang Korte Suprema pabor sa ilang kandidato. 

Dahil tapos na ang pag-imprenta ng balota, nakatutok na ngayon ang poll body sa beripikasyon naman ng mga balota kung ito ay babasahin ng automated counting machines. Target nilang matapos ito sa Abril 20 hanggang 21.

Nabatid na nasa higit 50 porsyento na ng mga balota ang naberipika bilang “good” ballots. Mayroon namang 2.2 milyong balota ang “bad” ballots o hindi binasa ng makina. Ang bad ballots ay pinapalitan din ayon sa Comelec.

Walang TRO vs. ICC... Duterte, tablado sa SC

ni Madel Moratillo @News | Mar. 13, 2025

Photo File: Si dating Pangulong Rodrigo Duterte - Sen. Bong Go

Walang inilabas na temporary restraining order (TRO) ang Korte Suprema laban sa pakikipagtulungan ng gobyerno ng Pilipinas sa International Criminal Court (ICC). 

Sa halip, inasatan ng Korte Suprema ang mga respondent na magkomento kaugnay sa inihaing petisyon kahapon nina dating Pangulong Rodrigo Duterte at Senator Bato Dela Rosa. 

Respondents sa petisyon sina Executive Secretary Lucas Bersamin, Justice Secretary Boying Remulla, DILG Secretary Jonvic Remulla, PNP Chief Rommel Marbil, CIDG Chief Nicolas Torre Ill, Solicitor General Menardo Guevarra, DFA Secretary Enrique Manalo, AFP Chief of Staff Gen. Romeo Brawner, Jr. at dating Immigration Commissioner Norman Tansingco. 

Ayon sa SC, matapos talakayin ang 94 na pahinang petisyon ay hindi naipaliwanag nang maayos ng petitioners kung bakit kailangang magpalabas ng TRO. 

Sa kabila n'yan binigyan ng Mataas na Hukuman ang mga respondent ng sampung araw upang magkomento sa petisyon. 

Samantala, kinumpirma naman ng SC na natanggap na nila ang magkahiwalay na inihaing petition for habeas corpus na humihiling na pauwiin na agad ang dating Pangulo. 

Inihain ang magkahiwalay na petisyon ng magkapatid na sina Davao City Mayor Baste Duterte at dating presidential daughter na si Kitty. 

Ipinag-utos na ni Chief Justice Alexander Gesmundo na isagawa agad ang raffle sa dalawang petisyon para sa nararapat na aksyon.