Mga selebrasyon sa ‘Pinas, pag-aralan kung oks ipagdiwang online

ni Leonida Bonifacio Sison - @Boses | January 11, 2021

Iba’t iba ang naging reaksiyon ng publiko hinggil sa Traslacion 2021.

Maraming deboto ang natuwa dahil kahit walang prusisyon at iba pang tradisyon, nakagawa ng paraan ang simbahan para maitaguyod ang Pista ng Itim na Nazareno. Habang marami rin ang nadismaya dahil sa pagdagsa ng mga deboto na nauwi sa siksikan.

Dahil dito, umani ng batikos mula sa social media ang okasyon dahil ipinagpatuloy ito, kaya giit ng ilang netizens, masasabing mass gathering ang nangyari at dapat ay naging online na lang muna ang selebrasyon.

Gayunman, iginiit ng Manila Police District (MPD) at lokal na pamahalaan ng Lungsod ng Maynila na naging matagumpay ang selebrasyon ng Traslacion 2021.

Sa huling misa ng Traslacion, sinabi ng rector ng Quiapo Church na si Msgr. Hernando Coronel na hindi talaga maiiwasan ang mga tao na pumunta mismo sa simbahan sa kabila ng pakiusap na ‘wag nang pumunta at makinig na lang sa online mass.

Dagdag pa ng opisyal, marami silang hakbang para masiguro ang kaligtasan ng mga tao, kaya naisipan nilang misa lang ang gagawin at wala nang iba, ngunit nagulat umano siya sa pagdagsa ng maraming deboto.

Samantala, nagpaalala ang DOH sa lahat ng mga pumunta sa Traslacion na obserbahan ang sarili kung magkakaroon ng mga sintomas gaya ng lagnat, ubo, sipon, pagkawala ng panlasa at pang-amoy.

Siguro nga, ‘di talaga maiiwasan ang pagdagsa ng mga tao sa ganitong klase ng okasyon dahil parte na ito ng kanilang buhay, lalo pa ngayong maraming dapat ipagdasal gayung nahaharap sa problema ang ilan sa ating mga kababayan.

Ngunit ‘ika nga, tapos na ang selebrasyon at wala na tayong magagawa. Pero sana, magsilbing aral ito na sa susunod pang mga okasyon, pag-isipang mabuti kung puwede itong ipagdiwang online o ‘wag na lang muna.

Baka kasi sa halip na alternatibong paraan ito para makapagdiwang, eh maging mitsa pa ng panibagong hawaan. Ibig sabihin, bagong problema, hindi lang sa mga mahahawa kundi maging sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Traslacion sa gitna ng pandemya, maging mapayapa sana

ni Leonida Bonifacio Sison - @Boses | January 9, 2021

Ngayong araw, Enero 9, ipinagdiriwang ang Pista ng Itim na Nazareno.

Bagama’t wala ang nakasanayang parada ng poon, handa ang National Capital Region Police Office (NCRPO) para sa okasyong ito.

Para mapanatili ang kaayusan at kapayapaan ng selebrasyon, nagtalaga ang Manila Police District ng 6,000 hanggang 7,000 pulis at dagdag na humigit-kumulang 20,000 pulis mula sa iba’t ibang police districts ng NCRPO.

Gayunman, aminado si NCRPO Chief Brig. Gen. Vicente Danao, Jr. na malaking hamon sa kanila ang pagpapatupad ng minimum health standard dahil sa pandemya, gayung mayroon pang bagong strain ng COVID-19, na sinasabing mas mabilis makahawa.

Samantala, mayroong restrictions sa kasagsagan ng Traslacion 2021 upang maiwasan ang anumang hindi inaasahang insidente.

Kabilang sa mga restriksiyon ang pagbabawal sa mga vendor sa bisinidad ng Quiapo Church, gayundin, hindi maaaring magdala o gumamit ang mga deboto ng backpacks at colored canisters, habang transparent plastic bags o transparent water containers lamang ang papayagan.

Habang ginagawa ng mga awtoridad ang kanilang parte upang mapanatiling payapa at maayos ang selebrasyon, bilang deboto, tayo ay may dapat ding gawin.

Kung nais nating maitaguyod nang maayos ang okasyong ito, hiling natin ang kooperasyon ng bawat isa.

Tiyaking nasa tamang kondisyon ang katawan bago pumunta sa simbahan, at kung alanganin ang kondisyon, ‘wag na munang pumunta at sa bahay na lang manalangin.

Maging responsable tayong deboto at iwasang magpasaway dahil hindi ito makatutulong.

Hangad nating maging mapayapa ang selebrasyon ng Pista ng Itim na Nazareno sa gitna ng pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bus lane sa Quezon Ave. at iba pang kalsada, pag-aralan para iwas trapik at aksidente!!!

ni Leonida Bonifacio Sison - @Boses | January 8, 2021

Nakita natin ang kalahagahan ng bus lane.

Tuluy-tuloy ang biyahe, pagsasakay at pagbaba ng mga pasahero at walang singitan sa kalye.

Ito ang araw-araw na eksena sa kahabaan ng EDSA, na ikinatuwa naman ng mga motorista at komyuter.

Ngunit sa kabilang banda, ibang-iba ang sitwasyon sa ibang kalsada. Kapansin-pansing hindi pa rin nagbabago ang sitwasyon ng ilang motorista.

Kaugnay nito, hindi pa rin talaga nawawala ang mga balagbag na public utility vehicle (PUV) driver, base sa natanggap naming reklamo.

Ayon sa nagreklamo, muntik nang tamaan ang kanilang sasakyan ng bus dahil aniya, wala itong takot na sumisingit. Bukod pa rito, ayaw nitong magbigay-daan sa kapwa motorista.

Nakadidismaya dahil sa totoo lang, 2021 na pero mayroon pa ring tsuper na walang ingat sa kalsada.

Imbes na mag-ingat dahil may dalang mga pasahero, hayan at parang wala kayong takot na masangkot sa aksidente.

Siguro, hindi na sapat ang mga paalala at babala dahil kahit ano’ng salita natin, wa’ paki talaga ang iba at hindi madadala hangga’t walang nasasaktan.

Kaya naman, suhestiyon natin sa mga kinauukulan, baka puwedeng magkaroon din ng bus lane ang ibang pangunahing kalsada sa Metro Manila tulad ng Quezon Avenue. Pag-aralan na kung kakayanin ang ganitong solusyon dahil kung hindi madadaan sa pakiusap ang mga motorista, kailangan talaga ng iba pang hakbang.

Kung nakita natin ang magandang resulta nito sa EDSA, malamang, malaking pakinabang din ito sa ibang kalsada, hindi lang sa mga komyuter kundi pati sa ibang motorista.

Paalala naman sa mga motorista at PUV driver d’yan, hindi n’yo pag-aari ang mga kalyeng dinaraanan n’yo kaya utang na loob, matuto tayong magbigayan at pairalin ang disiplina sa lahat ng oras.

Isa pa, palagi tayong nagrereklamo na kesyo trapik, eh, tayo rin naman ang nagpapasaway sa kalsada. Sa totoo lang, hindi na natin kailangang magpaalala at magmakaawa sa bawat isa na maging disiplinado at mapagbigay sa kalsada, pero heto tayo at muling nagpapaalala.

Kaya para maiwasan ang anumang sakuna, nawa’y lahat ay makipagtulungan. Hindi lang ito para sa ating sarili kundi para rin sa ating kapwa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com