Pagpasok sa iskul ng mga bagets, mas oks kaysa payagang mag-mall!

ni Leonida Bonifacio Sison - @Boses | January 20, 2021

Sumagot ang isang propesor ng University of the Philippines-OCTA Research Group hinggil sa muling panukala ng Department of Trade and Industry (DTI) na payagang makalabas ang mga batang 10-anyos at makapasok sa mga shopping malls.

Gayundin, mas pabor ang mga miyembro ng UP-OCTA na ibalik na lamang ang face-to-face classes sa halip na payagang makalabas ang mga bata.

Giit ng propesor, kung hindi papayagang pumunta sa paaralan ang mga bata, ngunit puwedeng magpunta sa mall, balewala ang sinasabi nating bawal magpagala-gala ang mga menor-de-edad.

Dahil dito, mas mabuti umanong buksan na lang muli ang mga paaralan dahil mas importante ito.

Naninindigan ang propesor na hindi malaking tulong sa ekonomiya ang mga bata dahil hindi naman sila ang mga breadwinner ng kanilang pamilya.

Kung tutuusin, ang mas dapat tutukan ay ang paniniguradong walang bata ang pagala-gala dahil kapansin-pansing kahit tapos na ang Christmas break, napakaraming mga bata sa kalye, walang suot na facemask at dikit-dikit kasama ang iba pang mga bata.

At isa pa, hindi pa kasali ang mga batang edad 17 pababa sa mga mabibigyan ng bakuna, kaya hindi pa rin dapat magpagala-gala ang mga ito.

Kung maninindigan tayong hindi pababalikin sa paaralan ang mga bata, dapat maging consistent tayo sa lahat ng patakaran. ‘Pag sinabing bawal lumabas, talagang dapat ipagbawal.

‘Wag nating madaliin ang mga ganitong bagay dahil may tamang panahon para rito. Kaya panawagan sa mga kinauukulan, tutukan ang mga kasalukuyang problema sa halip na gumawa ng panibagong sakit ng ulo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Zero casualty na target sa vaccination program, dapat lang!

ni Leonida Bonifacio Sison - @Boses | January 19, 2021

Zero casualty sa COVID-19 vaccine.

Ito ang target ng gobyerno sa oras na mag-umpisa ang pagbabakuna vs.COVID-19. Bukod pa rito, tiniyak ni vaccine czar Carlito Galvez, Jr. na mas mag-iingat ang Pilipinas sa pagpili ng bakuna na gagamitin para sa mga senior citizens matapos maiulat ang pagkasawi 23 matanda sa Norway nang mabakunahan ng Pfizer dahil sa adverse reactions.

Dagdag pa ng opisyal, kabilang sa mga tungkulin ng vaccine experts ng task group ay suriin ang mga bakuna na ginagamit ng iba’t ibang bansa kabilang ang history nito upang mas makapili ng pinakamabuting bakuna.

Matapos malaman ang ulat, agad na nakipag-ugnayan si Galvez kay Health secretary Francisco Duque III at nagkasundo sila na ang mga edad 18 hanggang 59 muna ang isasailalim sa vaccination program habang maghahanap pa ng angkop na bakuna para sa mas matatanda.

Una nang sinabi ni Galvez na ang Pfizer ang posibleng maunang gamitin sa pagbabakuna sa bansa kontra COVID-19 dahil maagang ilalabas ang nasabing bakuna.

Bukod sa target na zero casualty, sana ay magkaroon din ng information drive tungkol sa vaccination program.

Baka kasi may plano at makakukuha nga tayo ng magbakuna, kung aayaw din naman ang publiko dahil sa kakulangan sa kaalaman at takot dahil sa insidente, sayang din ang pera.

Kaya hindi ito ang panahon para makampante tayo dahil lalo nating dapat tiyakin na ligtas ang bakunang ituturok sa ating mga kababayan. Gayundin, kailangan nating maibalik ang tiwala ng publiko na ginagawa natin ito bilang hakbang kontra COVID-19 at hindi para mapahamak sila.

Bagama’t malaking hamon ito para sa pamahalaan, kailangan natin ng karagdagang pagsisikap at pagtiyak na ligtas ang gagawing pagbabakuna para muli tayong pagkatiwalaan ng publiko.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Kakulangan sa contact tracers dahil sa limitadong pondo, panibagong hamon vs. COVID-19

ni Leonida Bonifacio Sison - @Boses | January 18, 2021

Matapos ang pagtala ng unang kaso ng mas nakahahawang variant ng COVID-19 sa bansa, nakitaan agad ng Department of the Interior and Local Government (DILG) ng malaking hamon ang pagpapatupad ng mahigpit na contact tracing.

Ayon kay DILG Usec. Jonathan Malaya, nasa P1.9 milyon lang ang pondo ngayon ng mga contact tracer, kaya aabot lamang sa 15,000 contact tracers ang kayang i-hire ulit ng ahensiya sa loob ng anim na buwan.

Giit ng opisyal, bagama’t nais nilang maituloy ang serbisyo ng 50,000 contact tracers na natanggap noong 2020, kailangan umanong bawasan ang mga ito dahil sa limitadong budget ng ahensiya.

Gayunman, makatatanggap ng pinakamaraming contact tracers mula sa DILG ang Metro Manila, Central Luzon at Central Visayas dahil sa bilang ng mga active cases dito.

Matatandaang, unang iniutos ng pandemic task force ang pagpapalawak ng contact racing para maisama pati ang ikatlong generation contacts ng mga positibo sa UK variant.

Nakasaad sa resolusyon na dapat i-quarantine sa pasilidad ang lahat na matutukoy na close contact.

Bagama’t nauunawaan nating napakarami pang problema na dapat tugunan sa bansa, alam naman natin kung gaano kahalaga ang contact tracing.

Kaya panawagan sa mga kinauukulan, galaw-galaw ho para matugunan ang budget para rito. Hindi kasi puwedeng todo-himok tayo sa mga lokal na pamahalaan na paigtingin ang contact tracing, pero wala naman tayong pambayad para sa mga gagawa ng trabaho.

Isa pa, hindi basta-basta ang hakbang na ito dahil tila isinusugal din ng contact tracer ang kanilang kaligtasan.

Kaya plis lang, kung gusto natin ng mabilis at epektibong contact tracing, pag-aralan kung paano at saan makakukuha ng pera para rito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com