“No fail” policy sa mga mag-aaral, sinopla ng DepEd

ni Leonida Bonifacio Sison - @Boses | February 1, 2021

Hindi patas.

Ito ang tingin ng Department of Education (DepEd) sa mungkahi na awtomatikong pagpasa sa lahat ng estudyante dahil sa COVID-19 pandemic.

Paliwanag ni Usec. Diosdado San Antonio, hindi lang ang pag-akyat ng grade level ang importante sa pag-aaral, dahil kailangan umanong matuto ang mga ito bago payagang sumampa sa susunod na academic level.

Giit pa ng opisyal, ang mga estudyante rin ang mahihirapan kung basta sila makakapasa kahit walang tamang assessment para sa kanilang mga natutunan.

Bagama’t nauunawan aniya nila na gusto lamang ng panukala na mabawasan ang stress at makatulong sa mental health ng mga bata, maaari umanong mag-alok ng tulong ang mga guro sa mga estudyanteng ito.

Samantala, matatandaang unang sinabi ng ilang grupo na mas bababa ang kalidad ng edukasyon sa bansa kapag pinairal ang automatic na pagpasa sa mga mag-aaral.

May punto naman ang ahensiya dahil ano pa nga ba ang silbi ng pagsisikap ng mga guro at maraming mag-aaral kung lahat ay ‘ika nga, “auto pass”?

‘Wag nating kalimutan na marami pa ring mag-aaral ang nagsisikap at ginagawa ang kanilang makakaya para pumasa. Ngunit sa kabilang banda, mayroon namang ilang estudyante na hindi naman seryoso sa kanilang pag-aaral.

Kung talagang gusto nating makatulong sa mga mag-aaral, alamin natin ang tunay na problema. Kumusta ang sitwasyon sa bahay? Ang internet connection, kaya pa ba?

Tandaan na ang layunin ng pagpapatupad ng blended learning sa gitna ng pandemya ay upang patuloy na mabigyan ng sapat at de-kalidad na edukasyon ang mag-aaral, sa tulong ng mga guro na nagdoble-kayod.

Kaya utang na loob, pag-isipan at pag-aralan ang bawat hakbang na gagawin para hindi mabalewala ang lahat ng ating pagsisikap para sa edukasyon ng kabataan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Parusa sa mga quarantine violators, dapat patas!

ni Leonida Bonifacio Sison - @Boses | January 31, 2021

Nagbayad ng P1,500 multa ang events host at social media personality na si Tim Yap kasama ang asawa ni Mayor Benjamin Magalong na si Arlene Magalong, aktres na si KC Concepcion at 30 pang bisita sa kontrobersiyal na birthday party na ginanap sa The Manor sa loob ng Camp John Hay sa Baguio City.

Ito ang resulta ng paglabag sa COVID-19 health protocols ng mga nabanggit na personalidad kung saan P1,000 ang multa dahil sa paglabag sa hindi pagsusuot ng facemask at P500 sa kabiguang sumunod sa physical distancing sa naturang party.

Bukod pa rito, nagmulta rin ng kabuuang P9,000 ang The Manor P1,000 para sa paglabag sa Ord. 45-2020 Physical Distancing Ordinance at P5,000 sa Ord. 53-2020 New Normal Operation for Business Establishments.

Samantala, umani ng iba’t ibang reaksiyon sa taumbayan ang naganap na party at pagmumulta.

Tulad ng inaasahan, hindi ikinatuwa ng netizens ang naging aksiyon sa paglabag ng mga nabanggit na personalidad, gayundin ang mga kasama nito. Pero ang iba naman, hayaan na lang daw dahil nagmulta naman.

Giit ng netizens, parang hindi naman patas ang pagpaparusa sa mga lumalabag sa quarantine protocols. Anila, ‘pag ordinaryong mamamayan ang lumabag, kulong agad, pero ‘pag artista o mayaman, multa lang?

Kung tutuusin, may punto ang netizens dahil karamihan sa mga ordinaryong mamamayan na lumabag noon, napilitan lang para makapaghanapbuhay, pero ang mga nag-party, nagsaya lang. Tsk!

Dahil dito, panawagan sa mga kinauukulan, maging patas tayo sa pagpaparusa sa mga lumalabag.

Nakadidismaya kasi na palagi nating sinasabi na mananagot ang dapat managot, pero ang totoong nangyayari, ‘yung mga walang pera lang ang napaparusahan.

Siguro, isa rin ito sa mga dahilan kaya hindi na siniseryoso ng ilan ang mga umiiral na health protocols dahil katwiran nila, mga nakaaangat nga sa buhay ay puwedeng lumabag, bakit sila, hindi?

Bagama’t dapat lang namang magmulta ang mga ito, pakiusap natin sa mga awtoridad, ‘wag tayo puro salita at banta.

Parusahan ang mga dapat parusahan, anuman ang kanilang posisyon sa buhay. Dahil sa panahong ito, dapat maging mas seryoso tayo sa ating mga babala dahil kaligtasan ng taumbayan ang ating itinataya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Estafa sa mga namemeke ng COVID test result, dapat lang!

ni Leonida Bonifacio Sison - @Boses | January 30, 2021

Sa kabila ng mga babala at paalala, patuloy na nakatatanggap ng reklamo ang Philippine National Police (PNP) hinggil sa mga insidente ng pamemeke ng COVID-19 test result.

Ayon sa PNP, nakakukuha umano ng pekeng ng COVID-19 test result ang ilang indibidwal dahil may mga koneksiyon sa ospital, at nadiskubre rin ng Research Institute for Tropical Medicine (RITM) na mismong mga ospital at clinic pa ang nagbibigay ng mga papeles o impormasyon para sa pekeng test result.

Dahil dito, nagbabala ang PNP na puwedeng kasuhan ng estafa ang mga mahuhuling gumagawa nito, lalo na kung may nangyaring bayaran kapalit ng pekeng resulta.

Sa ngayon, naglalaro pa rin umano sa libo ang presyo ng pagpapa-swab test na kinakailangan partikular na sa mga babiyahe sa iba’t ibang bahagi ng bansa.

Samantala, hinimok din ng PNP ang mga kumpanya na maging mabusisi sa isusumiteng RT-PCR test ng kanilang mga empleyado na magbabalik-trabaho.

Ilang beses nang may naiulat na nameke ng COVID-19 test result, at hanggang ngayon, hindi pa rin pala tapos ang isyung ito.

Nakadidismaya dahil para bang wala tayong kadala-dala. Kung ‘yung iba ay no choice dahil requirement sa pagbabalik-trabaho, ‘yung iba ay pasaway lang talaga. ‘Yung tipong kaya nilang gumawa ng ilegal para lang maipilit ang kanilang lakwatsa o kung anu-ano pa. Tsk!

Gayunman, wala rin naman kasing gagamit ng pekeng resulta kung walang namemeke. Kaya dapat ding sisihin dito ang mga gumagawa ng pekeng dokumento.

Dapat lang na makasuhan kayo at managot dahil hindi biro ang ginagawa n’yo. Buhay at kaligtasan ang nakataya rito kaya utang na loob, makonsensiya kayo.

Siyempre, ang taumbayan ay may kailangan ding gawin. Bagama’t mahal talagang magpa-swab test ngayon, kailangan talaga.

Tandaan natin na kaya may ganitong hakbang o requirement ay upang matiyak na hindi kayo nahawa o wala kayong bitbit na virus.

Sa gitna ng pandemya, napakahalagang maging tapat at responsable para sa ikabubuti ng nakararami.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com