Mga nanloloko habang may pandemya, makonsensiya naman kayo!

ni Leonida Bonifacio Sison - @Boses | February 4, 2021

Sa gitna ng pandemya, talagang hindi pa rin nauubos ang mga masasamang-loob, lalo na ang mga scammer.

Matatandaang kamakailan ay naiulat na dumoble ang bilang ng mga naitalang online scam dahil dumami rin ang nakikipagtransaksiyon online sa gitna ng community quarantine dahil sa COVID-19 pandemic.

Kaugnay nito, timbog ng National Bureau of Investigation (NBI) Special Action Unit ang isang scammer na kinokopya ang account ng online jewelry seller para masalisihan ang mga bayad ng customer.

Ang siste, kinopya ng suspek ang detalye ng tunay na account ng seller pati ang mga paninda nito. Kapag may um-order na kostumer sa kanyang account, ibinibigay niya ang bank account ng legitimate jewelry online seller at ‘pag nakapagbayad na ang kostumer, palalabasin ng suspek na siya ang nagpadala ng pera at ipade-deliver na niya ang alahas sa kanyang bahay, habang ang original buyer ay walang matatanggap na alahas.

Dahil dito, payo ng NBI sa publiko, siguraduhing lehitimong seller ang kausap, lalo na kung malaking halaga ang binibiling produkto.

Nakadidismaya dahil kahit paulit-ulit ang babala at paalala, talagang ayaw patinag ng iba.

‘Yung tipong gumagamit pa ng ibang tao na naghahanapbuhay nang maayos. Ang masaklap, sila pa ang nasisira sa ibang tao. Tsk!

Utang na loob, makonsensiya naman kayo. Kung gusto ninyong magkapera, magtrabaho kayo nang patas.

Kaya panawagan sa mga awtoridad, paigtingin ang paghanap, paghuli at pagpaparusa sa mga masasamang-loob na ito. Hangga’t hindi sila nauubos, hindi matitigil ang ganitong modus.

Hindi lang mga biktima ang kawawa dahil ‘yung mga nadamay lang tulad ng lehitimong seller ay malamang na apektado rin.

At kayong masasamang loob, hintay-hintay lang dahil may kalalagyan din kayo!

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Paggamit ng facemask sa pribadong sasakyan, pinalagan

ni Leonida Bonifacio Sison - @Boses | February 3, 2021

Habang hindi pa bumubuti ang sitwasyon ng COVID-19 sa bansa, dapat lang na maghigpit ang pamahalaan sa mga health protocols bilang pag-iingat sa sakit.

Bagama’t sang-ayon ang marami sa ilang paghihigpit, paano naman kung ang pinaniniwalaan nating hakbang kontra COVID-19 ay hindi aprub sa publiko?

Sa ngayon, maghihigpit na ang mga awtoridad sa polisiyang pagsusuot ng facemask sa loob ng sasakyan, mapa-pribado man o pampublikong transportasyon, ayon sa Land Transportation Office (LTO).

Giit pa ng isang opisyal, kailangan itong sundin kahit nakatira sa iisang bahay ang mga pasahero kung saan may multang P2, 000 ang mga lalabag na pribadong sasakyan, habang P5,000 naman sa mga nasa pampublikong transportasyon.

Gayunman, hindi ito ikinatuwa ng taumbayan dahil anila, dagdag itong pahirap, lalo na sa mga senior citizen.

Sa halip tuloy na sumunod ang publiko, mas maraming nadismaya at imbiyerna dahil anila, parang ginawa nang negosyo ang pandemya.

Samantala, sang-ayon ang Metropolitan Manila Development Authority (MMDA) na kung iisa lang sa sasakyan ay hindi na obligadong magsuot ng facemask ang mga ito.

Nauunawaan nating kailangang magsuot ng facemask, pero utang na loob, magkaroon naman tayo ng konsiderasyon. Baka kasi akala natin, epektibo ang mga ipinatutupad na hakbang, pero hindi pala.

Tulad ng palagi nating paalala, bago tayo magpatupad ng batas o kautusan, tiyakin nating wala itong masamang epekto sa publiko.

‘Ika nga, isip-isip bago magbaba ng kautusan. ‘Wag natin hayaang mabalewala ang ating mga pagsisikap kontra pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Implementasyon ng child car seat sa ‘Pinas, dapat lang!

ni Leonida Bonifacio Sison - @Boses | February 2, 2021

Simula ngayong araw, ipinatutupad na ang Child Safety in Motor Vehicles o Child Car Seat Law sa bansa.

Sa ilalim ng batas, kailangan ng child restraint system para sa mga batang pasahero ng pribadong sasakyan upang maiwasan ang injury o pagkamatay sakaling masangkot sa aksidente.

Gayunman, ang drayber na lalabag ay papatawan ng multang P1, 000 sa unang paglabag; P2, 000 sa ikalawang paglabag at P5, 000 at isang taong suspensiyon ng driver’s license sa ikatlong paglabag.

Ang Land Transportation Office (LTO) ay nagsimula nang magsanay ng fitters at enforcers, gayundin ang pag-develop ng guidelines para sa implementasyon ng batas, habang ang Department of Trade and Industry (DTI) naman ay naglabas ng mandatory product certification sa car seat.

Habang nagsisimula nang ipatupad ang batas, sinabi ng LTO na manghuli sila ng mga lalabag matapos ang tatlo hanggang anim na buwan.

Sa totoo lang, dapat na talaga itong maipatupad sa bansa. Sa dami kasi ng balagbag na drayber dito, kailangang handa tayo, lalo na ‘pag kasama ang mga bata.

Panawagan lang sa mga awtoridad, sana ay mahigpit itong maipatupad, lalo na ngayong may ilan pang bagay na dapat tingnan.

Kabilang na ang mga sasakyang tinted kung saan inamin ng isang opisyal ng LTO na mahihirapan silang makita kung nasa car seat ang bata kung tinted ang sasakyan.

Gayunman, habang ipinatutupad ito, hangad nating magkaroon ng solusyon sa ganitong mga isyu. Baka kasi ang ending, magpa-tinted na lang ng sasakyan ang iba sa halip na maglagay ng car seat.

Pakiusap lang sa mga private car owners, kung alam ninyong kailangan nito, ‘wag nang hintaying masampolan pa kayo bago sumunod.

Importanteng ngayon pa lang, paghandaan na natin ang batas dahil para rin naman ito sa kaligtasan ng inyong mga batang pasahero.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com