Ang kahalagahan ng spiritual retreat sa pamilya

ni Nympha Miano-Ang - @Life and Style | July 2, 2020

Kung noon ay hindi gaanong close ang loob ng bawat pamilya sa isa't isa dahil abala sila sa kung anu-anong bagay o busy sa trabaho, pag-aaral at negosyo, ngayong may pandemya ay bigyan ng halaga na magkalapit ang damdamin ng isang pamilya sa pamamagitan ng family spiritual retreat.

1. PAANO GAWIN ANG FAMILY SPIRITUAL RETREAT? Naalala ni Jessica noon ang dalampasigan na dati ay naglalaro lang siya ng buhangin at gumagawa ng kastilyo, ngayong kapiling na niya ang pamilya sa lugar na ‘yun ay mapalalaganap na niya bilang director ng family retreat center ang tiwala, pananampalataya at paglalapit ng loob ng bawat pamilya upang mas mapalakas pa ang pagdarasal ngayong may pandemya. Hinihikayat aniya sa retreat ang mga magulang na maipadama ang kanilang spiritual values sa kanilang mga anak sa pamamagitan ng mga aktibidad nilang itinuturo.

Kahit na iba pa ang iyong relihiyon, puwedeng gumawa ng family retreat. Lahat ng kailangan tulad ng pagbubukas ng loob sa Diyos ang kahandaan niya na maikonekta ang bawat isa sa Itaas ay layon ng retreat na ito.

Tulad ng binuong kastilyong buhangin, samahan ng lakas upang tumatag ito. Ito na ang tamang oras na kasama ang buong pamilya, kapwa mapag-usapan nang malaliman ang kanilang mga damdamin at paniniwala hinggil sa Diyos na bagama’t dati ay hectic ang schedule, ngayon ay kahit sa loob ng bahay o bakuran ay maaari nang maidaos ang retreat. Nakatutulong ang retreat upang mapatatag ang samahan ng pamilya, natututo ang isa’t isa na makipagtulungan sa pamayanan at maibahagi ang spiritual values. Dalawang beses sa isang linggo ay sabay-sabay na magdarasal ang bawat pamilya, nagkakantahan, may mga quiz o games upang umibayo ang komunikasyon. Mas madaling mapatatag ang pagpapatawad at patuloy sa kanilang commitment.

2. ANG PAMILYA SA PANAHON NG KRISIS. Ang family retreat ay hindi lamang nagpapatatag sa samahan ng buong pamilya, ito rin ang nagpapagamot sa anumang sugat na hatid ng mapapait na problema at karanasan sa buhay. Nu’ng minsan na nasa retreat ay natumbahan ng ihaw-ihaw na nagbabaga ang anak ni Maly na isang single parent na ni minsan ay hindi man lang nakapagsisimba. Nagising na lang siya isang araw na nagdarasal nang mataimtim at abot langit ang kanyang dasal. Unti-unting gumagaling ang sunog sa balat ng kanyang anak. Dito mas lalong umigting ang kanyang naisin na dalasan ang retreat.

“Napakasarap ng pakiramdam na hindi ko akalain na lulukob sa akin ang kapangyarihan ng Diyos sa pagpapagaling sa aking anak.” Naging taglay nilang mag-ina ang espiritwal na kalakasan, tunay na pananampalataya at pagharap sa tunay na mga kapamilya.

Ang anak niyang si Eden na ngayon ay 15-anyos na ay palaging nagpapaabot ng mensahe sa kanyang mga kaibigan tungkol sa kapangyarihan at milagro ng Panginoon.

3. BAKIT UMUUBRA ANG RETREAT? Nag-iiwan ng positibong pananaw sa buhay ng isang tao ang family retreat, ayon kay Father Thomas Hoar, director ng Sr. Edmunds Retreat Centers sa Ender's Island. Hinihikayat nito na mapalago ang pagiging madasalin ng bata at kahalagahan sa espiritwal niyang pagiging aktibo mula sa tatlong bagay.

Una ay ang pagbibigay ng pagkakataon na magkakasama ang bawat pamilya kung saan may pagkakataon na makita ng mga bata ang kanilang mga magulang na aktibo sa relihiyon at nasisiyahan na gawin ang paglilingkod sa Diyos.

Ikalawa ay makasama ang kanilang mga kapatid na nagbabahagi ng kanilang espirituwal na kahalagahan. Ang ikatlo ay makita rin ng bawat pamilya ang isa’t isa kung paano pahalagahan ang pananampalataya at maisapamuhay ito.

Ready ka na ba?... Mga tanong bago magpakasal

ni Fely Ng - @Buhay Pag-Ibig at Pamilya | June 30, 2020

“Yes, I do,” Mga amigo at amiga, pamilyar, ‘di ba? Dahil nasa buwan pa rin tayo ng Hunyo, palaging kasalo sa usapin ang paglagay sa tahimik o pagpapakasal na kadalasan ay taon o higit pa kung paghandaan ng bawat pamilya ng magkasintahan.

Madalas, magulang ang nagtatanong kung talagang handa ka na sa susunod na kabanata ng iyong buhay, palaging maririnig ang mga negatibong komento tungkol sa hindi madali ang pagpapakasal at hindi basta-basta ang pagpapamilya, na nagbibigay ng takot o kaba, at minsan ay mapapadalawang-isip ka pa. Normal lamang na mag-alinlangan kahit in love ka. Sa dami ng mag-asawang hindi maligaya at mga pagsasamang nauuwi sa paghihiwalay, natural lang na pag-isipan mong mabuti ang desisyong babago sa buhay mo.

Subalit, talaga bang ready ka na? Maraming preparasyon ang ganitong sitwasyon. Kung nais mong makasiguro, isa-isahin natin ang ilang mga katanungan na dapat pinaghahandaan ng bawat magsing-irog.

1. Handa ka na bang gugulin ang mga susunod na bahagi ng iyong buhay sa isang tao? Ito ay tunay na malaking commitment. Ang kasal ay panghabambuhay na dapat seryosohin. Kasama rito ang pagbuo ng masayang pamilya, kaya dapat 100% sure na mahal n’yo ang isa’t isa nang walang magiging problema sa inyong pagsasama sa hirap man o ginhawa. Kaya mo na bang magkaroon ng limitasyon sa anumang desisyong kasama sya? Ito ay isa pa sa mga mahalagang katanungang dapat pinag-uusapan. Ang mga importanteng detalye tulad ng ilang anak ang dapat para sa ikabubuti sa pagbuo ng pamilya o kahit sa pinakamaliit na plano, palaging maging open sa isa’t isa sa lahat ng bagay at panahon na walang itinatagong reserbasyon upang maiwasan ang sisihan sa bandang huli.

2. Payag ka bang iwanan o iwasan ang lahat para sa kanya? Kadalasan, ang tanong na ito ay para sa kababaihan na mayroong naipundar na magandang karera, na kailangang iwanan para sa pagpopokus sa kanyang minamahal. Subalit kung minsan ay hindi pansin na sa simula pa lang ng relasyon, marami nang maliit na sakripisyo ang kalalakihan. Ang simpleng pag-iwas sa bisyo tulad ng alak, sigarilyo at barkada ay patunay lamang na kayang magsakripisyo para sa mahal niya.

3. Paano ang usaping pangkabuhayan? Tanong na dapat pinag-uusapan ngayon pa lang, maging tapat. Hindi porke lalaki ang madalas na may trabaho, siya pa rin ang masusunod sa pagba-budget. Hindi rin naman makatarungan kung si mister ang nagtatrabaho, pero hindi naman niya mahawakan kahit ang kanyang suweldo. Maging patas dahil partner sa buhay ang kasama mo at hindi alipin.

4. Normal lang ba ang magtalo? Kailangan mong maging mapagpasensiya. Ang pagtatalo o argumento ay normal sa buhay, kaya simulan mong maging maunawain habang wala pa ang wedding day dahil maaaring araw-araw ay harapin mo ang ganitong senaryo. Maraming bagay at sitwasyon na puwedeng pagtalunan at pagdaanan ng bagong kasal dahil ito ang panahon ng adjustment period.

Kung nakakasiguro ka na kaya mong panindigan ang lahat ng tanong, binabati na kita. Ang katotohanan, wala namang perpektong pagsasama. Respeto at pagmamahal sa isa’t isa ang sikreto ng buo at masayang pamilya. Kailangan mo lamang alisin ang anumang ilusyon o agam-agam at imulat ang sarili sa tunay na kaganapan ng buhay.

◘◘◘

Para sa anumang isyu, opinyon o problema na gustong i-share, magsend sa e-mail buhay.bulgar@gmail.com o sumulat sa Buhay, Pag-ibig at Pamilya at ipadala sa Bulgar Bldg., 538 Quezon Avenue, Quezon City.

Gusto mo na bang bumukod sa mga magulang mo, besh?... mga dapat matutunan sa pagso-solo sa bahay

ni Jersy Sanchez - @No Problem| June 29, 2020

Marami sa young working adults ang nagbabalak nang maging independent o bumukod sa bahay. Well, magandang practice ito dahil marami kang matututunan sa pagbukod na hindi mo matututunan hangga’t nakatira ka sa bahay ng mga magulang mo.

Gayunman, para sa mga beshies natin d’yan na gustong ma-challenge ang kanilang pagiging adult, narito ang ilang bagay na dapat n’yong matutunan bago bumukod ng bahay:

1. MATUTONG MAGLUTO. Kung nasanay ka na palaging ipinaghahanda ni nanay ng almusal, tanghalian at hapunan, puwes, dapat mo na itong gawin mag-isa kaya it’s time para hasain ang iyong cooking skills. Bilang adult, kailangan mong matutong magluto para sa iyong sarili dahil hindi puwedeng umasa sa delata at fast food sa lahat ng oras dahil hindi ito healthy. Magandang practice rin ito upang gumising nang maaga para maghanda ng iyong almusal at packed lunch, gayundin, alam mo kung anu-ano ang sangkap ng kakainin mo.

2. MATUTONG MAGLINIS AT MAGLABA. Ang responsableng adult ay hindi makalat sa bahay at workplace. Ang adulting reality na ito ay makikita mo ‘pag ikaw ay nag-solo living. ‘Yung tipong wala si mama para magligpit ng mga gamit mo, lalo na kapag nagmamadali ka kaya ngayon pa lang, simulan mo nang mag-ayos ng mga kalat sa paligid mo.

Maging responsable ka na rin sa mga susuotin mo dahil no more palaba kay mama, gayundin, kung hindi mo pa afford bumili ng washing machine at hindi ka komportable sa pagha-handwash ng iyong mga damit, puwede mong subukan ang self-service laundry. Pero kung mas gusto mong ikaw ang maglalaba ng iyong mga damit, magandang investment ang washing machine dahil matagal mo itong magagamit.

3. MAGLAAN NG ORAS SA MGA MAHAL SA BUHAY. Nakakapagod talagang magtrabaho dahil kailangan mong magtira ng oras para sa sarili mo, pamilya at mga kaibigan. Kung malayo ang bahay mo sa kanila, oks lang na maglaan ng araw o weekend para bisitahin sila at magkaroon ng quality time. Kahit tight sa budget at oras, sobrang worth it ito dahil nakakabawas sa stress ang pakikipag-bonding sa mga mahal natin sa buhay.

4. ‘WAG HINTAYIN ANG DUE DATE NG BILLS. Mahilig tayong mga Pinoy sa last-minute hirit. ‘Yung tipong hangga’t puwedeng gawin sa ibang araw, palagi nating ipinagpapaliban kaya ang ending, nagmamadali. Halimbawa, pagbabayad ng bills sa mismong due date. Ang eksena, naiipit sa mahabang pila dahil sa dami ng magbabayad. Kaya mga besh, kung may budget naman kayo at may extra time, magbayad agad para iwas-hassle.

Ready na ba kayo, mga ka-BULGAR? Iba’t iba man tayo ng plano — kung gustong bumukod sa maagang edad o gustong manatali sa bahay kasama ang mga magulang, ‘wag nating kalimutan maging responsable ngayon pa lang dahil para rin ito sa ating kapakanan. Okie?