Tagaytay, bantay-sarado sa PNP kahit bukas na uling pasyalan

ni Twincle Esquierdo | September 20, 2020

Sa pagbubukas ng Tagaytay City, inaasahan na unti-unti nang makakabangon ang ekonomiya matapos humina ang mga negosyo sa nasabing lugar dahil sa Covid-19.

Maraming motorcycle riders at turista na ang nagpupunta sa Tagaytay ngunit kakaunti pa lamang ito kumpara noong walang pandemya. Ayon kay Tagaytay Mayor Agnes Tolentino, kahit papaano ay makakabangon ang kanilang lugar kahit kaunti lamang ang pumupunta rito ngayon.

Magandang pahiwatig naman ito para sa mga maliliit na negosyante sa Tagaytay.

"Medyo naka-recover nang kaunti kasi tuluy-tuloy na ang pasok ng tao," sabi ni JC Lorenzo, may-ari ng bulalohan.

"Bumabalik na ang kita. Kumikita na kami at nakakaahon na," sabi naman ni Teodoro Rodi na tindero ng bulaklak.

"Malaking bagay po na naibalik na, nabuksan na uli ang Tagaytay. Magkakaroon na po uli kami ng magandang pag-asa na makabangon uli," sabi ni Maricel Ferrer, tindera ng prutas.

Nagpaalala naman si Joint Task Force COVID Shield Commander Guillermo Eleazar na dapat ay may travel authority ang mga turistang pupunta sa Tagaytay.

Magsasagawa rin sila ng ramdom checkpoint sa iba't ibang kalsada sa papasok at palabas ng Tagaytay upang matiyak kung awtorisadong turista lamang ang mga nakakapunta roon at pinaigting din ang police visibility upang masunod ang physical distancing, pagsusuot ng facemask at faceshield.

Taj Mahal, bubuksan na kahit pa may COVID-19

ni Lolet Abania | September 9, 2020

Nakatakda na muling buksan ang isa sa mga magagandang atraksiyon sa India, ang Taj Mahal, matapos ang mahigit na anim na buwan na isinara ito kahit patuloy ang pakikipaglaban ng naturang bansa sa pagtaas ng nakamamatay na sakit na Coronavirus.

“The Taj Mahal will reopen on September 21. All COVID-19 protocols, like physical distancing, masks will be followed,” pahayag ni Uttar Pradesh Tourism Department deputy director na si Amit Srivastava.

Gayunman, limitado ang maaaring bumisita sa tourist hotspot dahil 5,000 kada araw lamang ang papayagang makapaglibot kumpara sa dating namamasyal na turista na umaabot sa 20,000 araw-araw, ayon pa kay Srivastava.

Isa sa tinaguriang New Seven Wonders of the World, ang Taj Mahal na mayroong nagniningning na marble mausoleum at matatagpuan sa timog na kapital ng bansa na New Delhi ay isinara mula pa noong Marso bilang bahagi ng pagpapatupad ng India sa mahigpit na lockdown sa mga lugar.

Gayundin, ang Uttar Pradesh, tahanan ng Agra City kung saan naroon ang Taj Mahal ay isa sa mga states sa India na may pinakamaraming tinamaan ng COVID-19 dahil sa naitala nitong mahigit sa 270,000 kaso ng virus.

Subali’t nagpasya pa rin ang India na buksan ang lugar sa kabila ng patuloy na pagtaas ng impeksiyon upang unti-unting makaahon sa nanganganib na ekonomiya ng bansa dahil sa COVID-19.

Samantala, pumangalawa na sa pinakamaraming infected ang India na nagtala ng mahigit 4.2 milyong kaso ng Coronavirus na nilagpasan ang Brazil at kasunod sa nangungunang United States. Mula noong August, ang India ay nai-report na may pinakamataas na kaso kada araw sa buong mundo.

Tagaytay City, bukas na uli sa mga turista

ni Thea Janica Teh | September 6, 2020

Papayagan nang makapamasyal muli ang mga turista sa Tagaytay City sa ilalim ng Modified General Community Quarantine (MGCQ) status, ayon kay City Administrator Gregorio Monreal.

Ibinahagi ni Monreal na welcome na muli ang mga turista sa kanilang lugar, ngunit pinaalalahanan ang mga ito na sumunod pa rin sa health protocols tulad ng physical distancing at pagsusuot ng face mask.

Mananatili pa rin ang mga checkpoint sa pagpasok sa Tagaytay ngunit hindi na inoobliga na magpakita ng travel pass. Ang kailangan lamang ay mag-fill up ng health declaration form.

Sa inilabas na memorandum ni Tagaytay City Mayor Agnes Tolentino, ang lahat ng establishment na pinapayagang magbukas sa ilalim ng MGCQ ay kinakailangang sumunod sa health protocols para maprotektahan ang kalusugan ng trabahador at mga kostumer.

Ang mga hotel ay pinapayagan na ring magbukas ngunit 50% lamang ng kapasidad nito ang maaaring tanggapin. Kinakailangan din na may clearance at accreditation ang hotel mula sa Department of Tourism.

Bukod pa rito, ibinahagi rin ni Tolentino na ang Tagaytay City Oval at Skateboard and BMX tracks ay bukas mula 8:00 am hanggang 10:30 am at 3:00 pm hanggang 5:30 pm lamang.