Luya, pambawas ng cholesterol at panlaban sa period cramps

ni Justine Daguno - @Life and Style | July 11, 2020

Knows n’yo ba na ang ginger o luya ay kabilang sa mga super food dahil sa dami health benefits nito?

Ayon sa pag-aaral ni Karen Ansel, R.D.N., ang luya ay hindi lamang basta ginagamit na sangkap o pampalasa sa pagkain, kundi noon pa man ay alternatibo na itong ginagamit sa medisina o epektib na panggamot. Napatunayan din na ang gingerols na tinataglay nito ay mabisang anti-aging, anti-inflammatory, antimicrobial, antifungal at marami pang iba.

Anu-ano nga ba ang mga benepisyo ng luya sa atin?

1. PAMPALAKAS NG RESISTENSIYA. Ang madalas na pagkonsumo ng ginger tea o ginger lozenges ay nakatutulong upang malabanan ang mga impeksiyon at mapalakas ang ating resistensiya. Sa katunayan, oks ito para sa mga pasyenteng nagre-recover o kagagaling lamang sa sakit nang sa gayun ay madaling manumbalik ang kanilang sigla.

2. PANG-RELIEVE NG PERIOD CRAMPS. Para sa kababaihan, hindi na kailangang magtiis sa ng menstrual o period cramps, sapagkat ang ginger tea o lozenges ay mabisa ring pang-relieve nito. Ito ay itinuturing na “ibuprofen alternative”, pareho lamang ng epekto nito sa mga nabibili nating pain-reliever sa botika, ngunit wala itong side-effect.

3. EPEKTIB NA ANTI-AGING. Kung gusto natin ng pampabyuti pero sa mas mura o natural na paraan, panalo pa rin ang luya r’yan. Ito ay nagtataglay ng mga antioxidant ay tumutulong na protektahan ang ating balat mula sa mga free-radical (tulad ng polusyon at UV rays), na nagpapabilis ng pagkasira ng collagen na kailangan ng ating balat. Ang taglay na antioxidant ng luya ay nakatutulong upang mapanatili ang produksiyon ng collagen ng ating balat upang manatili itong makinis at maganda.

4. PANGGAMOT SA PAGSUSUKA. Maaaring may ilan sa atin na pamilyar sa luya bilang panggamot sa pagsusuka. True naman, dahil ayon kay Ansel, nakatutulong ito para sa mga may hangover, sinisikmura, mga buntis na nakararanas ng morning-sickness, nahihilo sa biyahe, at maging ang mga nagre-recover sa chemotherapy.

5. PAMPABAWAS NG BAD CHOLESTEROL. Pinatunayan din ng mga eksperto na ang luya ay nakatutulong upang mabawasan ang LDL cholesterol levels (bad cholesterol) na oks upang maiwasan ang sakit sa puso at iba pang may kaugnayan o tulad nito.

Sa panahon ngayon na pahirapan ang kabuhayan, marami sa ating mga kababayan ang tumatangkilik sa mga alternatibong paraan, kaya oks malaman na ang mga ang akala natin na simpleng sangkap o pampalasa lamang sa pagkain ay marami pa palang magagawa para sa atin—natural na, mas tipid pa! Kuha mo?

Natural na paraan para labanan ang pananakit ng ulo

ni Justine Daguno - @Life and Style | July 9, 2020

Ang headache o pananakit ng ulo ay isa sa mga problema na madalas na nararanasan ng karamihan sa atin.

Ayon sa pag-aaral, maraming dahilan kung bakit nakararanas ng pagsakit ng ulo ang tao — dahil sa sobrang pagtatrabaho o stress, sintomas ng iba pang sakit at iba pa. Ngunit ang pangunahing dahilan sa problemang ito ay ang pamumuhay o lifestyle ng tao.

Well, para sa mga iba r’yan na halos i-maintenance na ang pain reliever, alam n’yo ba maaari nating masolusyunan ang pananakit ng ulo nang hindi na umiinom ng gamot?

Narito ang ilan sa mga paraan upang masolusyunan ang headache sa natural na paraan:

1. PALAGING UMINOM NG TUBIG. Ang dehydration ay isa sa mga dahilan ng pagsakit ng ulo sapagkat ang sapat na tubig sa katawan ay kailangan upang makadaloy nang maayos ang oxygen sa dugo papunta sa utak. Kapag nararamdaman ng pananakit ng ulo, maaaring indikasyon ito na kailangan natin ng karagdagang tubig sa katawan. Ilan pa sa mga sintomas ng dehydration ay kawalan ng konsentrasyon at pagiging iritable.

2. PAGKONSUMO NG CAFFEINATED NA INUMIN. Maaari ring instant relief sa pananakit ng ulo ang pag-inom ng mga caffeinated na inumin tulad ng tsaa at kape. Ang caffeine ay mahusay sa pagkontrol ng mood swings at nakatutulong din ito upang tumaas ang alertness level ng tao. Sa ibang pagkakataon, ang sobrang pagkonsumo ng caffeine ay maaaring magdulot ng pagsakit ng ulo, kaya dapat ay sakto o moderate lang ang gawin natin.

3. PAGKAKAROON NG SAPAT NA PAHINGA. Tulad ng ating nabanggit, ang sobrang pagtatrabaho o stress ang karaniwang sanhi ng pagsakit ng ulo. Ang pagkakaroon ng sapat o 7 hanggang 9 na oras ng pagtulog ay mahalaga upang manatiling kalmado ang ating isipan sa mahabang oras na tayo ay gising o may ginagawa.

4. ACUPUNCTURE. Makakatulong ang acupuncture upang maayos ang daloy ng dugo sa ating katawan. Ito ay paraan na hindi hamak na mas epektibo at wala ring side effects kumpara sa mga gamot. Bagama’t wala pang tiyak na pag-aaral na panggamot ito sa mga chronic headaches, may mga nakapagpatunay naman na may magandang benepisyo ito sa acute migraines.

5. PAGGAMIT NG COLD COMPRESS. Ang paggamit ng cold compress ay isa rin sa mga natural na paraan upang mawala ang pananakit ng ulo. Makatutulong ang paggamit nito upang mabawasan ang anumang inflammations.

6. PAGPAPAHID O PAGLALAGAY NG ESSENTIAL OILS. Epektib din na pantanggal ng sakit ng ulo ang pagpapahid ng mga essential oil tulad ng peppermint at lavender oil. Ang mga ito ay may natural na sangkap na nakaka-relax o nakakapagpakalma.

Ilan lamang ang ating mga nabanggit sa mga natural na paraan upang maiwasan o malunasan ang simpleng pananakit ng ulo. Pero ang pananakit ng ulo ay maaaring sintomas ng iba pang sakit, kaya kung ito ay dumadalas at may iba pang nararanasan bukod dito, makabubuti na ipakonsulta ito sa doktor. Oks lang mag-alternative lalo na kung epektib, pero tandaan na iba pa rin ang sigurado kaya magpakonsulta pa rin sa mga eksperto. Gets mo?!

‘Di puwedeng forever na umasa sa suweldo... 5 dahilan kung bakit dapat magnegosyo

ni Justine Daguno - @Life and Style | June 27, 2020

Isa ka ba sa mga nagplano o minsa’y napaisip magsimula ng negosyo, pero sa ilang kadahilanan, hanggang ngayon ay hindi mo pa rin ito nasisimulan?

Habang tumatagal ang pandemic, marami sa atin ang humaharap sa iba’t ibang pagbabago o adjustments. Paniguradong marami rin sa atin ang nagkakaroon ng realization o napapaisip ng mga bagay-bagay, tulad ng pagnenegosyo na talaga nga namang kailangan natin sa kasalukuyang sitwasyon.

Well, kung minsan na itong sumagi sa isipan mo at hindi lamang matuluy-tuloy, narito ang ilang dahilan kung bakit nga ba kailangan na nating simulan ang pagnenegosyo ngayon:

1. HINDI SAPAT ANG KITA. Bukod sa trabaho natin ngayon, mahalagang meron pa tayong ibang source of income. Aminin man natin o hindi, sa dami ng mga pinagkakagastusan sa araw-araw, hindi sapat na tuwing kinsenas-katapusan lang tayo nagkakapera. Kung minsan, kahit anong gawin nating pagtitipid o pagkukuripot, kung kapos talaga ang kita, mahirap pa rin ang asenso. Upang matustusan ang lahat ng pangangailangan, ang better solution ay ang paghahanap ng iba pang pagkakakitaan — ang pagnenegosyo.

2. KAILANGANG MASUBUKAN ANG IYONG ENTREPRENEURIAL SKILLS. Hindi lahat ng tao ay may natural na talent sa business, pero lahat ay may potensiyal. Bukod sa motibasyon, dapat ay meron din tayong determinasyon upang magawa ito nang maayos. Kailangan lamang na huwag matakot magsimula sa pagnenegosyo, ituring na lamang natin itong challenge. Challenge na hindi lamang susubok sa ating kakayahan kundi tutulong din sa atin upang umasenso tayo.

3. HINDI HABAMBUHAY ANG PAGTATRABAHO. Lahat ay nagre-retire sa trabaho at maaaring dalawa hanggang tatlong dekada mula ngayon ay mangyayari ito sa atin. Kapag natigil sa pagtatrabaho ang tao, hihinto na rin ang earnings nito. Pero ang problema, mawalan man tayo ng kita ay hindi matatapos ang paggastos dahil habang nabubuhay ang tao, patuloy ang pangangailangan nito. Kaya habang malakas at may sapat pa tayong kakayahan ay simulan na natin ang pagnenegosyo upang mapag-ipunan ang ating pagtanda.

4. PARA MAGING CREATIVE AT MOTIVATED SA BUHAY. Kung sisimulan natin ang pagnenegosyo ngayon, paniguradong mas magiging makabuluhan ang ating buhay. ‘Ika nga nila, hindi kailangang malaki agad ang business, simulan ito sa mga bagay na gusto mong ginagawa upang hindi tayo ma-pressure o ma-motivate tayo. Halimbawa, kung matagal mo nang trip ang pagbe-bake o pagluluto, paglikha ng mga arts at iba pa, bakit hindi simulan sa mga ito? Paganahin lamang natin ang ating creativity at pag-isipang mabuti ang negosyo na swak sa ating personality.

5. PRAKTIKAL ITONG GAWIN NGAYON. Kung kabilang tayo sa mga nawalan ng kabuhayan o nahinto sa pagtatrabaho dahil sa pandemya, ang pagsisimula ng business ang pinakapraktikal na magagawa natin. Nawalan man tayo kita, pero patuloy ang pagdating ng mga bayarin, kaya upang matustusan ang mga ito, kailangan na talaga nating magnegosyo.

Sa totoo lang, marami nang nagnenegosyo ngayon, pero hindi ibig sabihin nito ay hindi na tayo puwedeng sumabay. Kung iisipin, sa palengke ay magkakatabi ang mga tindahan na nagbebenta ng magkakaparehong paninda, pero lahat sila ay kumikita.

Kung wala namang puhunan, muli ay gamitin ang creativity o magsimula muna sa pagre-resell. Tandaan, kailangan nating mag-focus sa paraan, hindi sa mga dahilan.

Gets mo?