Kung cheese lover ka, read mo na!...

keso, panlaban sa heart disease, diabetes at pampababa pa ng cholesterol

ni Justine Daguno - @Life and Style | August 15, 2020

Say cheese! Marami sa atin ang mahilig sa cheese—pang-toppings o panlagay sa spaghetti, pizza, salad, palaman sa tinapay o kahit papakin lang ay panalo talaga!

Sabihin man ng iba na ito ay ‘unhealthy’ sapagkat nagtataglay ito ng saturated fat. Pero alam n’yo ba na ayon sa pag-aaral, ang tamang pagkonsumo ng keso ay maraming magandang benepisyo sa atin? Narito ang ilan sa mga ito:

1. PANLABAN SA HEART DISEASE. Ang pagkonsumo ng 2 ounces o 1-inch cube ng cheese araw-araw ay maaaring makatulong upang maiwasan ang iba’t ibang heart disease. Ito ay dahil ang keso ay nagtataglay ng iba’t ibang bitamina tulad ang calcium, potassium at magnesium, riboflavin at B12.

2. PANG-IWAS SA DIABETES. Para sa mga taong mayroong ‘sweet tooth’ o mahilig sa pagkain ng matatamis, oks kung kahihiligan din ninyo ang keso. Ang pagkain ng 1 3/4 ounces ng cheese kada araw ay nakatutulong upang mapababa ang risk sa pag-develop ng Type 2 diabetes nang hanggang walong porsiyento. Ang calcium umano na tinataglay nito ay malaki ang epekto upang mapanatiling normal ang insulin sa katawan ng tao.

3. MABUTI PARA SA CHOLESTEROL. Ang araw-araw din na pagkain ng cheese ay nakatutulong upang mapababa ang cholesterol ng tao. Ayon sa pag-aaral, bagama’t nagtataglay ito ng kaparehong amount ng saturated fat at calories, ang mga ‘cheese eaters’ ay hindi hamak na mas mababa ang LDL cholesterol kumpara sa mga taong mas pinipili ang butter o margarine.

4. NAKAPAGPAPALAKAS NG KATAWAN. Ang pagkain ng halos isang tasa ng ricotta cheese sa isang araw sa loob ng 12 linggo ay nakatutulong upang mapalakas ang kalamnan lalo na sa matatanda o may edad 60 pataas. Sa resulta ng isang pag-aaral noong 2014 sa Clinical Interventions, ipinapayo sa matatanda ang regular at tamang pagkonsumo ng keso sapagkat ito ay milk protein base na hindi lamang nakapagpapatibay ng mga buto kundi nakapagpapalakas talaga ng katawan.

‘Ika nga ng mga ‘cheese lovers’, “The cheesier, the better!” Totoo na ang paborito nating keso ay hindi lang para talaga masarap, kundi sobrang oks din dahil marami pala itong magandang benepisyo sa ating katawan. Pero siyempre, tulad ng ibang pagkain, dapat hinay-hinay pa rin dahil alam naman natin lahat ng sobra ay hindi rin maganda. Tandaan na moderation ang kailangan sa anumang bagay. Okie?!

Paano makakaipon kung karampot ang kita?

ni Justine Daguno - @Life and Style | August 8, 2020

Ngayong may matinding krisis na kinahaharap ang ating bansa, marami sa atin ang napapaisip kung posible pa kayang makapag-ipon ng pera gayung halos karamihan sa atin ay minimum wage earner o maliit lamang ang kita.

Karamihan sa atin ay hindi kumikita ng malaking halaga, pero ang gastusin ay hindi nawawala, kaya gustuhin man na mag-ipon, sakto lang ang pera para sa gastusin o pangangailangan o minsan nga ay kapos pa.

Pero ‘wag mag-alala dahil narito ang ilan sa mga paraan para makapag-ipon kahit pa low income earners lamang:

1. PUMILI NG MABABANG HOUSING COST O RENTA SA BAHAY. Gustuhin man natin o hindi, malaking porsiyento sa ating kita ay napupunta sa pambayad sa upa o renta sa bahay. Kaya kung tayo ay umuupa ngunit maliit lamang ang kita, panahon na para maghanap ng mas mababang presyo o budget-friendly na matutuluyan. Sikaping ang renta sa bahay ay hindi lalampas o dapat ay hanggang 30% lamang ng ating kita. Sa paraang ito, paniguradong may matitira o may maitatabi na para sa savings.

2. MAGBAYAD NG UTANG AT IWASAN NANG MANGUTANG. Isa sa mga dahilan kung bakit hindi makapag-ipon ang tao ay dahil bukod sa pangunahing bayarin, tulad ng tubig, kuryente, grocery at iba pa ay baon din ito sa utang. Tandaan na ang utang — sa bangko man o sa tao — ay may interest at sa bawat palya o hindi agad pagbabayad, tumutubo ito na siyang dahilan kaya nagkakabaun-baon. Gayunman, upang makaahon, bawasan ang luho o hindi mahalagang gastusin at iprayoridad munang bayaran ang utang.

3. GUMASTOS NG NAAAYON SA KITA. Kung gusto nating makapag-ipon, sikapin nating magkaroon ng disiplina sa paghawak ng pera. Huwag gumastos nang higit sa kinikita. Wala namang problema kung gusto nating i-spoiled ang sarili pero kailangang may limitasyon ito.

4. MAG-BUDGET SA PAGBILI NG PAGKAIN. Anuman ang diet plan natin, isa pa rin sa pinakamalaking gastusin ay napupunta sa pagkain. ‘Ika nga ng marami, “Tipirin mo na ang lahat, ‘wag lang ang pagkain.” Well, may point naman, pero tandaan na hindi lamang sa pagkain umiikot ang lahat, kaya kailangang balanse lamang ito. Walang problema sa pagkain, ang problema ay kung masisira nito ang budget natin.

5. MAG-IPON MUNA BAGO GUMASTOS. Sa pagtanggap ng suweldo, painitin muna kahit sandali ang pera o ‘wag agad pumunta sa mall, palengke, grocery o ‘wag mamili lalo na kung walang listahan. Kung may savings account, i-transfer agad ang halaga para sa ipon o savings, o kung naka-alkansiya naman, ilagay agad ang para sa ipon. Kumbaga, “auto-kaltas” ang gawin, dahil kung tira lang sa expenses ang gagawing ipon, malabo ‘yan dahil minsan, once na magsimulang gumastos ay sunud-sunod na ito hanggang sa nganga na at next cut-off na lang ulit ang pera.

Totoong hindi madaling mag-ipon lalo na kung suweldo lamang ang ating pinanghahawakan. Pero sa panahon ngayon ay bida ang madiskarte, kaya sa anumang paraan ay dapat matuto tayong maghawak ng pera. Iprayoridad ang pag-iipon dahil hindi lamang tayo nito matutulungan sa ngayon, kundi sa mga susunod pang panahon. Good luck!

‘Di lang pampasarap ng ulam... Health benefits ng sibuyas, alamin!

ni Justine Daguno - @Life and Style | August 6, 2020

Alam n’yo ba na ang sibuyas ay hindi lamang simpleng sangkap sa ating niluluto?

Ang gulay o “spice” na ito ay maraming benepisyo — hilaw man at luto nating ikokonsumo. Ito ay nagtataglay ng iron, antioxidant at iba pang mahahalagang bitamina. Mayaman din ito sa Vitamin C at B kabilang ang folate.

Narito ang ilan pa sa mga mabuting benepisyo ng pagkonsumo ng sibuyas:

1. PAMBALANSE NG TEMPERATURA. Know n’yo ba na sobrang oks ipanghalo sa pagkain o kumain ng sibuyas kapag summer season? Ito ay dahil ang sibuyas ay nagtataglay ng cooling properties o mayroon itong tinatawag na volatile oil na nakatutulong upang mabalanse ang temperatura ng katawan kapag mainit ang panahon. Mas oks kung kakainin ito ng hilaw o bilang salad.

2. PANGKONTROL HIGH BLOOD PRESSURE. Para sa matatanda o sinumang nakararanas ng high blood pressure o may hypertension, maaaring isama ang sibuyas o onion salad sa listahan ng inyong “snack” o meryenda. Ito ay dahil ang sibuyas ay mayaman sa potassium na siyang bitamina na nakatutulong upang mapanatiling normal ang presyon ng dugo.

3. OKS PARA SA MGA MAY DIABETES. Kinakailangan din isama sa food diet ng mga diabetic ang sibuyas. Ang glycemic index ng sibuyas ay mas mababa sa 10 na siyang dapat kinokonsumo ng mga may diabetes. Kaunti lamang din ang taglay nitong carbs, ngunit mataas ang fiber content. Ang ganitong kombinasyon o properties ang kailangan upang mapanatiling normal ang blood glucose levels ng mga diabetic.

4. NAPALALAKAS ANG GUT AT HEART HEALTH. Ang sapat na dami ng fiber at prebiotics na tinataglay ng sibuyas ay malaki ang pakinabang upang mapanatiling malusog ang ating gut (panunaw) at heart health. Sa regular na pagkonsumo ng sibuyas, maiiwasan ang pagkakaroon ng indigestion. Gayundin, nakatutulong ito upang makontrol ang cholesterol levels na mabuti naman para sa puso.

Sa panahon ngayon, make sure na healthy ang ating kinakain o kinokonsumo. Sa dami ng mga nauuso at nagkalat na sakit, mahalagang may sapat tayong panlaban dito. Panatilihin ang regular na ehersisyo, pagtulog na may sapat na oras at pagkonsumo ng masusustansiyang pagkain. Okay?