Suga, pinatatalsik na sa BTS dahil sa drunk driving

ni Eli San Miguel @K-Buzz | August 14, 2024

Photo: BTS Suga / Andrew Harnik / Associated Press

Maraming K-netizens ang humihiling ng pagpapatalsik kay Suga bilang miyembro ng BTS. Ito'y kasabay ng patuloy na imbestigasyon sa drunk driving incident ng Korean star.

Ilang Koreano na ang naglagay ng mga wreaths sa harap ng gusali ng HYBE [parent company ng BTS] sa Seoul, na nagpapakita ng mga kahilingang mapatalsik si Suga.

Kasalukuyang nagsasagawa ang pulisya ng imbestigasyon sa paggamit ni Suga ng electric scooter habang siya ay lasing noong Agosto 6. Sinabi naman ng mga otoridad na ipapatawag nila si Suga ukol sa insidente ng drunk driving.

Gayunpaman, sa gitna ng panawagan ng ilang Korean netizens na patalsikin si Suga mula sa BTS, sinabi ng isang Korean culture critic na hindi papayag ang Big Hit Music na mangyari ito.

Ayon sa ulat ng Korea Times, sinabi ng culture critic na si Jung Min-jae na "[it is] relatively unlikely that BTS' agency will consider Suga's withdrawal from the group." Dagdag pa ni Jung, mas malaking pinsala ang maidudulot kung aalis si Suga sa global supergroup.

ARMYs, itinanggi ang pagpapasimuno sa trending hashtag na #SugaChallenge

ni Eli San Miguel @K-Buzz | August 12, 2024

Photo: AP

Itinanggi ng mga fans ng BTS o mas kilala bilang ARMYs, ang pagpapasimuno sa #SugaChallenge bilang suporta sa pagkakasangkot ng BTS member na si Suga sa drunk driving.

Noong Agosto 6, nasemplang si Suga na kasalukuyang nagsasagawa ng kanyang serbisyo militar bilang social worker, habang siya’y nagmamaneho ng electric scooter sa Seoul.

Ayon sa pulis, ang resulta ng breathalyzer test ni Suga ay nagpapakita ng 0.227 percent na blood alcohol content, na sobrang taas kumpara sa license revocation level na 0.08 percent. Malapit nang ipatawag ng Yongsan Police Station sa Seoul si Suga para imbestigahan ang mga pangyayari sa kanyang pag-inom at ang dami ng alcohol na kanyang nakonsumo.

Sa X, umakyat sa trending ang #SugaChallenge kung saan ang mga gumagamit ng hashtag ay nag-post ng mga larawan na nagpapakita ng pag-inom ng alak sa kanilang mga sasakyan. Maging ang mga media sa Korea ay nag-ulat tungkol sa #SugaChallenge na sinasabing sinimulan ng BTS ARMYs.

Naglabas naman ng pahayag ang BTS ARMYs upang itanggi ang kanilang pagkakasangkot sa trend na #SugaChallenge.

“From BTS ARMY: In light of recent events, a number of individuals associated with various music fandoms…who have expressed unfavorable opinions towards BTS, have initiated a trend intended to ridicule a specific situation,” ayon sa pahayag na ibinabahagi ng mga BTS ARMYs sa Facebook at X.

Dagdag pa nito, “This trend entails the sharing of images portraying the consumption of alcohol within a vehicle, despite the fact that the initial incident did not occur in a car. It is important to note that although ARMY will continue their support for all seven members, ARMY was not involved in this trend, as it is essential to handle such matters with sensitivity and consideration for all parties involved.

Thank you. ARMY.” Bilang pagkontra sa #SugaChallenge, ginamit ng fandom ang mga hashtags na #FAKECHALLENGE, #Its_Not_ARMY, #조작된챌린지 #진짜아미아님 at #koreanmediabeprofessional.

Seventeen, magkakaroon ng world tour sa US

ni Eli San Miguel @Entertainment News | August 8, 2024

Photo: SEVENTEEN / FB

Inihayag ng K-Pop idol group na Seventeen na babalik sila sa US para sa kanilang bagong world tour sa Oktubre.

Gaganapin ng Seventeen ang kanilang “Right Here” world tour sa US, na pinamahalaan ng Live Nation, na magsisimula sa Oktubre 22 at 23 sa Allstate Arena sa Rosemont, Illinois.

Susundan ito ng mga concert sa Belmont Park, New York sa Oktubre 25 at 27; San Antonio, Texas sa Oktubre 31 at Nobyembre 1; at Oakland, California sa Nobyembre 5 at 6. Magtatapos ang tour sa Nobyembre 9 sa Los Angeles sa isang malaking pagtatanghal sa BMO Stadium.

Bago ito, ilulunsad nila ang world tour na pinamahalaan ng Live Nation, sa Oktubre 12 sa Goyang Stadium sa South Korea.

Ito ang magiging unang US tour ng Seventeen mula noong “Be The Sun” world tour, na nagtapos sa Newark noong Setyembre 2022.

Mula noon, nakamit ng Seventeen ang titulo ng best-selling K-Pop album of all time sa “FML,” na nakabenta ng higit sa anim na milyong kopya at naging best-selling album sa buong mundo noong nakaraang taon, ayon sa International Federation of the Phonographic Industry (IFPI).