Han So Hee, kinumpirma ang relasyon kay Ryu Jun-yeol

ni Eli San Miguel - Trainee @Entertainment | March 16, 2024

Kinumpirma na ng South Korean actress na si Han So-hee ang kanyang relasyon sa “Reply 1988” star na si Ryu Jun-yeol sa kanyang Naver blog.

Isang araw matapos itanggi ng management agency ng aktres ang mga tsismis tungkol sa kanilang pagde-date, inilabas ni Han ang kanyang personal na kumpirmasyon.

Gayunpaman, hiniling niya sa mga fans na huwag gumawa ng mga espekulasyon tungkol sa pagiging “rebound” niya.

Sa kanyang blog, nilinaw ng aktres na nagkamabutihan sila ni Ryu noong simula ng 2024, at natapos ang relasyon ni Ryu sa kanyang “Reply 1988”co-star at ex-girlfriend na si Hyeri noon pang umpisa ng 2023.

“We were into each other at the beginning of 2024. I was told [Ryu] became single in early 2023 and the breakup article was published in November. Based on this fact, I continued to keep my feelings and the relationship,” anang aktres.

Sinabi rin ni Han na hihingi siya ng tawad kay Hyeri matapos umano niyang magparinig sa Instagram Story kamakailan.

“I will apologize to this person (Hyeri) regarding this, and I sincerely apologize to you all for not reacting wisely. I acted based on my emotions rather than rational thinking, I acknowledge that this is completely my fault,” aniya.

Samantala, hanggang sa ngayon, hindi pa naglalabas ng pahayag ang management agency ni Ryu.

Matatandaang sumikat si Han bilang kontrabida sa 'The World of the Married' noong 2020, ang drama series na nakapagtala ng pinakamataas na viewer ratings sa South Korea.

Wave to Earth, memorable ang 2nd day ng 'First Era Concert'

ni Angela Fernando - Trainee @News | March 14, 2024

Tumatak ang gabi sa 'Wave to Earth' fandom na Plankton matapos silang haranahin ng Korean indie band sa huling araw ng "First Era Concert" sa Manila nu'ng Marso 13.

Nagsimula ang concert sa kanilang mga sikat na kantang "Bad," "Peach Eyes," "Sunny Days," "Nouvelle Vague," "Sunburn," at "So Real."

Umaapaw din ang energy ng banda nang mag-perform ng "Daisy," "Evening Glow," at "Ride."

Napuno naman ng saya ang crowd matapos na magkaroon ng pakulo ang banda at nakisaya sa kanilang mga fans sa pamamagitan ng ilang games.

Nangako naman ang Wave to Earth na muling babalik sa 'Pinas sa susunod dahil naging memorable ang kanilang experience sa bansa.

iKON, balik-'Pinas sa Abril

ni Eli San Miguel - Trainee @Entertainment | March 10, 2024

Bibisita ang South Korean idol group na iKON sa Pilipinas para sa isang solo concert sa Abril 2024.

Sa social media, ibinahagi ng concert promoter na CDM Entertainment ang isang clip ng K-pop group na nag-aanyaya sa mga Pinoy iKONICs na manood ng kanilang "Limited Tour - Get Back," sa Abril 7 sa Smart Araneta Coliseum.

Huling bumisita ang iKON sa bansa noong Agosto ng nakaraang taon para sa kanilang "Take Off in Manila" concert.

Binubuo ang grupo ng anim na miyembro na sina Jay, Bobby, Ju-ne, Song, DK, at Chan. Nag-debut sila noong 2015 sa kanta na "My Type," at sila ay kilala sa kanilang mga kanta na "Love Scenario" at "Killing Me."